Mak 1

Layattak Jon nug Jesusnu ib babaittom

1Kayak Bekka Jesus Kristusnu Nai Ena am inam niitte. 2Anukka Kayak Nug ⌊Nug bekka Jesus amegppa alo amubia Nug⌋ propet laa onig Aisaia amegppa a, Aisaia nug nai awa yom amu, Nai Ena amu anam digmeum. Aisaia nug inam yom. “Antte! Da heppi, dahil nai awa ukkak danab laa nug anuqa ukka, nahip ib bappaidkku. 3Nug am baag laa atu taɗakppa dayaya, nai inam ewa atte.

‘Ag Naɗi uɗikkunu ib babaitteg!

Ao, ag ib tutukku, tak nak iitta ele nuhignu babaitteg!’ ”

Aisaia nug anam aum.

4Anam amu, Jon nug atu taɗakppa uɗia dayaya, nug danab amelagppa, Kayak Nug ahilag hipunin uhuqa madakkunu ag oolag eɗueb, layattak aoglagnu nai mehuqom. 5Nug nai anam mehuqom amu, Juda danab, laa Jerusalemnu, laa Juda wanppa laih ohnu ele, ag Jon gumidna gona, ag hipunin ahilag miagib mattiegeg, Jon nug Jodan leppa layattom. 6Nug lamen kamel uɗigppa hak amu ma, nug imuagppa matagiɗ, doɗ gaɗappa hak ele takka, nug tap-lokus, uppuh leppu atuppanu awak ele lattom. 7Anam dayaya amu, nug danab amelagppa aum. “Laa Nug da dimulppa uɗitte amu, nuhig ɠagattag am dahil eɗidtte. Nug am danab okkainab, da am okkai iitta; dahil hak am nuhig bia iitta; dahil am elele iittanab iitta. 8Da ag leppa layadttem, amge Nug Kayak Ouɗippa ag layadkku,” awa aum.

Jesus layattak awowa, oo eeɗak ele awom

9Aria, haen amuppa Jesus Nug Galilinu aab Nasaret, Nug appanu aha uɗie, Jon nug Jodan leppa laaittom. 10Laaitta male, Jesus Nug leppanu beebe, hab obate, Kayak Ouɗi Nug uppuɗil beɗulag nakok laabia naana, nuhigppa dayeye anttom. 11Kayak Ouɗi Nug ne, baag laa hab aabppanu Jesus amegppa aum. “Na am da bekkal, da nahipnu ool mauhtte. Ele amu, da nahipnu oolppa enanagnab doottem,” awa aum.

12Haen amuppa pahanab Kayak Ouɗi Nug he, Jesus Nug atu taɗakppa ukka, 13appa deɗ 40 dayeye, Satan nug Jesus eheɗ hekkunu oo eeɗeɗe, Jesus Nug doɗ dakkuɗ oolagppa dayeye, engel ag Nug ehanidppig.

Jesus Nug ippunittak awak danab tatamnu onilagppa eum

14Aria, haen amu male, Herot Antipas nug Layattak Jon maniguittakppa me dayeye, Jesus Nug aha, Galili ukka, Nug Kayaknu Nai Ena mehuqom. 15Nug nai inam mehuqa aum. “Haen aakku beum dayeye, Kayaknu ɗo maɗoɗ aakku miag doum daatte amunu, ag ahilag hak nau uuna, oolag eɗueb, Nai Enanu oolagppa genab doyeg!” awa aum.

16Deɗ laa Jesus Nug Galili le ameg ihippa oiyaya, Nug Saimon, Andru ele, aa am eamag amu, Nug aa ahilah uhui leppa eeheh anatom. Aa am kakai awak danab amunu aa uhui epiɗ. 17Jesus anata amu, Nug amelahppa aum. “Doya, da dim lamiɗeɗ! Aa anam hepeɗ,, da aa danab diiaknu uɗat ippuanatkkul,” awa aum. 18Nug anam a, aa pahanab ahaya, uhui uuadya, Nug dim lamidpiɗ.

19Dim lamitteheh, Jesus Nug nakok laa ele wana, Nug Sebedi bekoɗ Jems, Jon ele, aa ele am eamag amu, Nug aa uub ahilahppa daayya, uhui bappalatteheh anatom. 20Anata amu Nug ahilahnu ele aum. “Aa da dim lamiɗeɗ!” awa aum. Nug anam a amu aa ahai, aa mamelah Sebedi, amu ahilkad uɗat nid oh uubppa daappig ele amu uuadya, Jesus dim lamidpiɗ.

Jesus ouɗi nau laa lamittom

21Aria, ag Jesus dim lamitteg, ag oh ahan Kaperneam goppig. Gona daanna, Nug Sabat deɗppa Juda dilag nai doyak lakka appa ta, Kayaknu nai ippuanattom. 22Ippuanatte, Juda danab ag dabmak kuɗum aoppig. Aɗinu? Nug ɗo mehuqak danab nai ippunadppig bia ag ii ippuanattom. Iitta. Nug danab nug anam hekkunu ehah ele, Nug amubia nai ippuanattom. 23Ag anam nai doyak lakka appa daaegeg, danab laa nug ouɗi nau ele appa dayaya ewa aum. 24“Jesus, Nasaret ted, na ig attem heigkkutnu uɗime? Na heppe, ig nauhkkunignu uɗimete? Da na dooidttem; Laa Kayaknu Oppiaawak Ele, amuam na aakkuib,” awa aum. 25Nug anam a amu, Jesus Nug ouɗi nau amegppa baag ɠagattagppa aum. “Na oɗen qamutna, danab amu uuidna ukke!” awa aum. 26Jesus Nug anam a amu, ouɗi nau nug he, danab beɗu huan hahaɗeɗe, ouɗi nau nug baag okkaippa ewawa, danab amu uuittom. 27Uuitte amu, danab laa ag danab amu anidna, dabmak kuɗum aona, amu ag akka akka Jesusnu appig. “Imu aɗi? Ippunittak imu am bau. Nug ehah ena ele, amu diig amunu Nug ouɗi nau amelagppa, ‘Ag ukkeg!’ atte amu, ag nuhig nai dim lamidtteb,” aon appig. 28Ag anam anidna, nai amu pahanab tuɗitteg ukke, Galili wan atu ohppa ukkom.

Jesus oɗe danab kuɗum bappalattom

29Jesus Nug danab amu ehanitte, Nug, amu nuhikkud ippunittak awak danab Saimon, Andru, Jems, Jon ele ag ahan, Juda dilag nai doyak lag amu uuidna, tutukku Saimon, Andru ele laulahppa goppig. 30Ag gona, lakka teegeg, ag Saimon nome nug beɗu gakkaɗak oɗe ele niieye, ag Jesus amegppa aeg, Nug doyom. 31Aeg doya amu, Jesus Nug gumitta wana, ah amu eppeg aɗa ehanitte ahe, beɗu gakkaɗak iitta me, nug aha digma ehanittak keeke babaitta ehanattom.

32Aria, tueb amu aam no, appan danab ag ahan, oɗe danab oh, amu danab ouɗi nau ele oh omaladna, Jesus toppa goppig. 33Ag gona, Saimon, Andru ele aa laulah odppa qagmeeg, 34Jesus Nug oɗe danab kuɗum, ag oɗe digdig ele bappalattatta, laa ouɗi nau ele amu, Nug ouɗi nau amu lamattom. Lamattom amge, ag Nug dooppig amunu, Jesus Nug he, ag amunu ii appig.

35Aria, wagɗe buttuanab Jesus Nug lakkanu aha, aab uua, aben danab haen oh ii daattebppa ukka, unuqittatta dayom. 36Dayeye, nakok dimppa Saimon laikkud ele ag Jesus mattin 37anidna, Nug amegppa appig. “Danab oh ag na mattidtteb,” aon appig. 38Aon aeg amu Jesus Nug aum. “Ippan danabib nai dahil dooglagnu amu, da ool ii daatte amunu, ig ahat, aab laala miag daatteb ele amuppa da nai dahil mehuqkkulnu gokkunig. Da amunu uɗimi,” awa aum. 39Nug anam ana, Nug aha, Galili wan oh talilitta oiyaya, Nug Juda dilag nai doyak lakka nai mehuqaqa, ouɗi nau danab beɗulagppa daappig ele lamattom.

Jesus danab gaɗa oɗe ele ehanittom

40Dimppa deɗ laa danab laa nug gaɗa oɗe nau ele nug Jesus noobppa ukka, gateg qaun o, nug unuqa aum. “Na oot heeb, na heppe, oɗe dahil iitta mekkunu amu, na elele daattem,” awa aum. 41Nug anam a, Jesus Nug oo bodoetta le me, Nug eppeg bahia, danab beɗu aɗa, amegppa aum. “Da ool anam daatte, na ena daye!” awa aum. 42Awa a amu pahanab gaɗa oɗe nau amu iitta me, danab nug elele dayom.

43Elele dayeye, Jesus Nug gokkunu paha amegppa a, gokkunu dayeye, Jesus Nug ɗo ɠagattag danab amu amegppa inam aum. 44“Na danab laa amegppa da na bappaidminu aib ame. Iitta. Na gona, na beɗun mana mettak danab ippunidna, na Mosesnu ɗo atte bia na doɗ main Kayak mette! Aɗinu? Danab oh ag amuppa dooglag, na oɗe amu iitta,” awa aum. Jesus Nug anam awowa, Nug he ukkom. 45Jesus anam aum, amge danab amu nug Jesus oɗe bia ii heum. Iitta. Nug ukka, danab kuɗum amelagppa a dooppig amunu, Jesus Nug aabppa miag nokkunu elele iitta dayaya, Nug aben aben danab haen oh ii daattebppa dayom, amge appa ele danab aben ohppanu Nug gumidna goppig.

Currently Selected:

Mak 1: NB

Highlight

Copy

Compare