Maika 3
3
Maika Nug danab okkai, propet hambuppuak ele alattom
1Aria dimppa da ⌊Maika,⌋ da ami. “Ag Jakop buɗub dilag danab okkai ag daulag human, nai imu doyeg!
Ao, ag amu dilag gumak danab, ag daulag human, nai imu doyeg!
Ag nai doya mala hettoɗia epeɗia elele mettak kobol iite dootteb?
2Amge ag, ag keeke enanu nau ninig ele doon, keeke naunu amu, ag oolag mauhtte.
Ag am danab nug doɗ gaɗa doɗ beɗuppan aagtte, amubia ag dahilad danab ah eheɗ nau madatteb.
Ao, ag danab nug teppu ebehippanu hihia aotte, ag amubia dahilad danab ah eheɗ nau madatteb.
3Ag am danab nug doɗ gaɗa tola awa, teppu tuqa, otaɗe ne, ebehi ele qiialatte ne, nug teppu biliken ooppa maknu oppate ne, ewa male latte, amubia ag danab ah dahilad eheɗ nau anam hadatteb,” awe ami.
4⌊Amu ag Israel dilag okkai danab, ag anam hetteb amunu, Yawe Nug bu madakku.⌋ Haen amu uɗieb amu, ag Yawe ehanadkkunu gaaglag, amge Nug ag ii ehanadma. Ag eheɗ heppig amunu, haen amuppa Yawe Nug ag ehanadkkunu ii neekkadma. Iitta. 5Amu Yawe Nug inam atte. “Propet hambuppuak ag dahilad danab ah ib eheɗ ippunadtteb.
Laa nug propet hambuppuak ee madette, ag nug maɗoɗ daakkunu atteb.
Amge laa nug ee ii madakku dayeb amu, ag uug nau, mauhak keeke, danab amu, nuhigppa bekkunu atteb.
6Ag eheɗ amu hetteb amunu, ag tuqannu gatatu ooppa daan, buttinu keeke dooglagnu ag tul niiak nakok laa ii anidmana.
Ao, gatatu ag tonatteb, emanppa ag dimppa aɗi keeke bekkun daatte doon mattiglagnu ehanittak ii aomna.
Aam am propet hambuppuak ag amahlak ii mattama.
Ao, propet hambuppuak ag amunppa ele gatatuppaib daaglag.
7Propet hambuppuak, ag uɗalag nekku.
Ao, eman hak danab ag uɗa nak nau guittak ele dooglag.
Da Kayak, da nai nakok laa ii madapa.
Anam amunu, propet hambuppuak ag uɗa nak doon, ag iɗulag hautkkulag,” awa atte.
8Amge ⌊da Maika⌋ dahilnu amu, da Jakop buɗub, ag hipunin hetteb ele amelagppa akkulnu,
ao, da Israel danab ag hipunin hetteb akkulnu,
Yawe Nug he, nuhig Ouɗi, ɠagattag, nai doya mala hettoɗia epeɗia elele mettak kobol, aria ooppa ɠagattag doyak ele dahilppa ambe, da oittem.
9Ag Jakop buɗub dilag danab okkai ag daulag human, nai imu doyeg!
Ao, ag amu dilag gumak danab, ag daulag human, nai imu doyeg!
Ag danab okkai, ag nai doya mala hettoɗia epeɗia elele mettak kobolnu ena iinab dootteb.
Ao, ag danab okkai, ag kobol genab tutukku ele oh aona, ag heeg, kaboliak dayeye, kaliak okkai aakku daatte.
10Ag danab okkai, ag danab laa aqaeg mauheg, ahilag keeke hamu aon, amuppa Sion appa lag okkai okkai hetteb.
Ao, ag danab okkai, ag hak nau henana, amuppa ag keeke aon, ag amuppa Jerusalem appa lag okkai okkai hetteb.
11Jerusalemnu danab okkai ag epeɗiak henana, ag lokkumakppa eheɗ haknu ehanittak aon hetteb. Danab ah ag Jerusalemnu mana mettak danab men doɗo mattaeg, ag ippunittak madatteb. Amu danab ag Jerusalemnu propet men doɗo mattaeg, ag propet nai ahilag maditteb. Ag nau amu oh hetteb, amge ag atteb. “Ig Yawe waappa daat, ehanittak aottem,” atteb. Ag anam anana, ag inam ele atteb. “Yawe Nug ig oonigppa iite daatte? Uug nau laa ihinigppa ii bema,” aon atteb. 12Ag Jerusalem danab okkai, ag nau amu hetteb, ag nai hambuppuak amu ele maditteb amunu,
ag beɗulagppa kekeɗ ag heppeg, Sion am datta wan buuak bia daakku.
Ao, kekeɗ ag heppeg, Jerusalem am kinipan ameg okkai hume tak bia daakku.
Anam amu, Kayaknu mettid lag, amunu tomppan keeke oh ele qauko nakokppa daatte amu, aben amu oh am ad naunau qataiettak bena, wan tonan daaglag.
© (Active), Wycliffe Bible Translators, Inc. All rights reserved.