Matyu 27

Judas nug nukka nug beɗu he mauhom

1Wakkaɗe buttua mana mettak danab okkai oh, amu Juda dilag ikki danab ele ag Jesus qeppeg mauhkkunu nai qagappig. 2Qakkona amu, ag Jesus eppeg muɗippa qakkana, aon gona, Pailat eppegppa meppig. Pailat nug gawana dayom.

3Aria Judas, nug Jesus kekeɗ eppelagppa meum ele, nug ag Jesus mauhkkunu nai qagappig doya, nug oo uug daye, silwa men doɗo 30 amu eɗua awa ukka, mana mettak danab okkai amu danab ah dilag ikki danab ele madakkunu haaha, 4nug aum. “Da hipunin hemi. Da danab nug eheɗ laa ii heum amu da hamu kekeɗ eppelagppa mauhkkunu memi,” awa aum. Anam awa a doona ag appig. “Amu ihinig keeke iitta. Am nahip keeke,” aon appig. 5Ag anam aeg amu, Judas nug men doɗo amu Kayaknu mettid lag ooppa mawe ukke, nug ukka, muɗippa aiha mauhom.

6Mana mettak danab okkai ag men doɗo amu aon appig. “Imu amu danab mauhkkunu daden maknu men doɗo. Ɗo daatte amunu, ig Kayaknu mettid lagnu ofa inaknu kunup-ppa ii memata,” aon appig. 7Amunu ag nai mattin, oolag laippu mena, ag men doɗo amu aona, waa keeke hak danabnu wan laa daden mena, ag wan amuppa wan laihnu danab boumadkkulagnu tituanppig. 8Diig amunu amu, ag wan amu onig inam ataɗppig. “Danab Mauhkkunu Daden Awak Wan,” aon appig. Onig amu gemu ⌊nai imu yaak haenppa⌋ ele daatte. 9Amuppa amu, anukka propet Jeremaia nai laa mattiom, nai amu elele mettom. Nug aum. “Israel ag silwa men doɗo 30ppa nug daden mekkulagnu nai qagappig amu, ag silwa men doɗo 30 amu aon, 10waa keeke hak danabnu wan laa daden meppig, Naɗi Nug da amelppa aumbia.”

Pailat Jesus hettoɗittom

11Aria, Jesus Pailat noobppa hibaitta dayeye, Pailat Jesus oɗ mettom. “Na Juda dilag kingte?” awa aum. A amu Jesus, “Na aakku attem,” awa aum. 12Nug anam a amu, mana mettak danab okkai, amu Juda dilag ikki danab ele ag nuhignu nai yaan heeg, Nug nai nob laa ii meum. 13Nug anam heehe amu, Pailat nug Jesus amegppa aum. “Ag na eheɗ kuɗum hemenu atteb amu, na amu iite doottem?” awa aum. 14A amu, Jesus Nug nai laippu laanu Pailat oɗeppa ii awom. Anam he amu, Pailat nug dabmak kuɗum awom.

15Aria, maɗ ohppa Pasowa Hobulnu deɗppa gawana nug danab ah ag maniguittak danab atten uhuqa madakkunu appig amu, nug maniguittakppanu od matule dottom. 16Am haen amuppa danab laa nug ɗo tippalak danab onig okkainab ele, ag nug aon maniguittakppa meeg dayom. Danab amu onig Barabas. 17Am danab ah kuɗum ag qagmeeg amu, Pailat nug ag oɗ mattom. “Ag maniguittak danab aun uhuqe madakkulnu oolag daatte; Barabas o Jesus? Ag nuhignu Kristus aon atteb,” awa aum. 18Pailat nug Juda okkai ag Jesusnu amelag qe oolag elele ii daye, Jesus hettoɗiakppa meppig doyom amunu, nug anam oɗ mattom.

19Pailat nug anam oɗ matta, nug hettoɗiak abenppa dayeye, nug wau nai inam me uɗiom. “Danab beɗuppa aab iitta amunu amu, na nuhigppa keeke laa aib heme. Da gemu nuhignu tul niimi, amu da uug, guittak ele huanak doomi,” awa aum.

20Aria, Pailat nug nai amu doyeye, mana mettak danab okkai, amu Juda dilag ikki danab ele ag Pailat nug Barabas uhuqa madatta, Jesus qeeb mauhkkunu danab ah oolag yaan heppig. 21Anam, gawana nug baula, “Danab aɗit imu oolahppanu da aun uhuqe ag madakkul?” oɗ matte amu ag, “Barabas,” aon appig. 22Ag anam aeg amu, Pailat nug aum. “Amge da Jesus, nuhignu laa ag Kristus atteb amu, nuhignu da attem hekkul?” awa aum. Nug anam a amu, ag oh appig. “Ad emaitakppa atule!” aon appig. 23Ag anam eppig, amge Pailat nug oɗ mattom. “Aɗinu? Nug aɗi eheɗ heum?” awa aum. Nug anam aum, amge ag huanak ena appig. “Ad emaitakppa atule!” appig. 24Aeg amu, Pailat nug doyom, nug heeb, ag Jesus ii mauhmanu ii amana. Iitta. Ele amu, nug qak bekkunu daye anttom amunu, nug le awa, danab ah oh amelagppa eppeg ihaaha nug aum. “Danab imu mauhkku amu, mauhak amunu aab am dahil iitta. Ag ahilag hipuninib daakku,” awa aum. 25Nug anam a amu, ag appig. “Am ena. Nuhig mauhaknu aab am ig, ihinkad nid naunau ele, ig oh ihinigppa dayaɗ!” aon appig.

Daup ag Jesus aon aon qedappig

26Ag anam aeg amu, Pailat nug Barabas uhuqa matta, nug nuhikkud daup ag Jesus bu qaun eleppa eheɗ mataɗkkulagnu ana, ag ad emaitakppa atulkkulagnu ag eppelagppa meum.

27Aria, gawananu ban danab ag Jesus aon, aben onig Pretorium, appa noppig. Nona heeg amu, ban danab ameg amu laa oh ele uɗin qagmena, Jesus talilidna daappig. 28Anam daanna, ag lamen nuhig uɗidna, ag lamen elab kokoɗnab laa aɗuitteg noum. 29Lamen aɗuitteg no, ag haɗ muɗi qaun eleppa hewona, igippa aɗaeg noum. Aɗaeg no, ag gumu laa, qaittobttob gumu bia, Nug eppeg naɗiap-ppa meppig. Mewona, ag Nug noobppa gatelag qaun ona, aon aon qettanna appig. “Na am Juda dilag king! Na binan ele,” aon appig. 30Ag anam anana, iɗuppa hununa, gumu Nug medappig amu, ag amu aon, ikki eɗunna oppig. 31Haen ag aon aon qettan malan, ag lamen elab kokoɗnab uɗittona, ag lamen nuhig eɗun aɗuitteg no, ag ad emaitakppa atulkkulagnu aon goppig.

Jesus ad emaitakppa atulppig

32Ag aon gonana, ag wan laa onig Sairini ted onig Saimon uɗappa tena, ag nug duttuna heeg, nug Jesusnu ad emaitak mawom. 33Nug anam mawewe gona, aben laa onig Golgata, appa teppig. Golgata meu am Ikki Ebehinu Aben. 34Ag appa tena, ag Jesus wain marasin laa ele kaboliak, Nug amu lakkunu medappig, amge Nug nakok lemaɗuppa ya anttowa, Nug baula ii laum. 35Aria, ag Nug ad emaitakppa atulona, ag nuhig lamen aoglagnu otina, ameg waɗele mewona, aun nug ameg atten aokku amu ag om yaakppa hena aoppig. 36Amu dimppa ag Jesus gumana, appa daappig. 37Amu haen Rom danab ag danab ad emaitakppa atuladttappig ele, ag aɗi nai ag beɗulagppa yaappig ele, danab ag amu anidkkulagnu, ag ad mahappa yaana, ad emaitakppa atulppig. Aria, Jesusnu amu, ag Nug igippa ad emaitakppa, ag nai imu yaan atulppig. “Imu Jesus, Nug Juda dilag king.” 38Ag danab aɗit laa, aa am yab danab naunab amu, ag aa Jesus ele oh atuladppig. Ag danab laa ag Jesus eppeg naɗiap-ppa ad emaitakppa atulona, laa am eppeg nanehppa ad emaitakppa atulppig. 39Aria, danab ah ag Nug noobppa dona wanana, ag ikkilag matuɗna, aon aon qettanna inam appig. 40“Na, na am Kayaknu mettid lag loppaɗna, eɗun deɗ ewamppaib hekkutnu ame amu, na Kayak Bekka daattem dayeb, na nakka na ehanidna, na beɗun uhuqna, na ad emaitakppanu nee!” aon appig.

41Amubia mana mettak danab okkai, ɗo mehuqak danab, amu Juda dilag ikki danab ele ag Nug aon aon qettanna appig. 42“Nug danab laa ehanattom, amge nug Nugakka ehanidkkunu elele iitta. Nug am Israel dilag kingde! Nug ad emaitak uua, honap neeb amu, ig nuhignu oonigppa genab doognig. 43Nug Kayaknu ooppa genab dootte amunu, Kayak Nug nuhignu oo heeb amu, geha iikku Nug ehanittaɗ! Aɗinu? Nug aum, ‘Da Kayak Bekka,’ ” aon appig. 44Am yab danab naunab aɗit ad emaitakppa Jesus guguittak atulatppig, aa ele Jesus amegppa awa awa qettak nai madipiɗ.

Jesus mauhom

45Aria, aam ameg 12ppa gatatu na, wan amu oh tone ukke, tueb aam ameg ewamppa batom. 46Aria, aam ameg ewamppa anam amu, Jesus Nug baag okkaippa, “Eloi, Eloi, lama sabaktani?” ewa aum. Nai amu eɗuak am, “O dahil Kayak, O dahil Kayak, na aɗinu da uuiɗmenu diig appe dookkulnu oɗ medattem.” 47Jesus Nug anam e, danab laala appa daappig ele, ag amu doon appig. “Nug Elaiya onigppa ette,” aon appig. 48Ag anam ana, laippu laa ag oolagppanu pahanab aha, qaiqaɗ ukka, yuppanu keeke laa, nug le huanak eeɗtte ele onig span, nug amu awa, wain ena iittappa mewowa awa, gumu laa, qaittobttob gumu bia, amuppa ita, Jesus lakkunu hume teum, 49amge laa ag appig. “Uuppe, Elaiya nug uɗia ehanidkkutai, o iittatai, ig amu anidkkunig,” aon appig. 50Ag anam aeg, Jesus baula baag okkaippa ewowa, Nug mauhom.

51Nug mauhom, haen amuppa Kayaknu mettid lag ooppa, lamen naɗi aiheg dayom attannu kattiɗa ukka, honap noa, aɗit meum. Anam amu, wan uɗale, men ele aoɗppig. 52Boumak aben laala ele matulatte, Kayaknu danab ah oppiaawak ele kuɗum anukka mauhadppig amu Kayak he, ag eɗun hippaidppig. 53Ag moɗppanu hippaidppig amunu, dimppa Jesus eɗua hibaitte, ag ahan gona, Jerusalem noeg, danab kuɗum ag anadppig. 54Amu ban daup 100 dilag ikki nug, amu daup laa ag nug ele daanna Jesus guman daappig, ag mim ne, keeke laala oh ele beeg anidna, baɗak eheɗ nau doon appig. “Genab, danab imu Nug Kayak Bekka!” aon appig. 55Aria, ah kuɗum ag Jesus ehanidkkulagnu Galilinu dim lamidna goppig ele, ag piɗe daanna, neegna daappig. 56Ag oolagppan laa am Maria, Makdala ted, laa amu Maria, Jems Josep ele anilah, laa amu Sebedi bekoɗ anilah.

Jesus gaɗa men oɗe moɗppa meppig

57Aria tueb meeme, Arimatea ted onig Josep, nug am danab enub ele, nug uɗiom. Nug ele am Jesusnu ippunittak awak danab. 58Nug Pailat gumitta ukka, Jesus gaɗa aokkunu oɗ mettom. Oɗ mette, Pailat nug haknunab nai laa a, daup ag Jesus gaɗa Josep medappig. 59Ag Josep mettaeg, nug Jesus gaɗa awa, linen lamen dubuttid iittappa itom. 60Nug itowa, nuhig moɗ bau menppa babaittom amuppa meum. Mewowa, men okkai laa buɗibɗib mette ukka, moɗ oɗe qehakkom. Nug anam hewowa amu, nug ukkom. 61Aria, nug anam heehe amu Maria, Makdala ted amu Maria laa ele aa moɗ guguittak appa heɗep neya daapiɗ.

Daup ag moɗ oɗe gumappig

62Amu deɗ ag Sabatnu bappaidppig ele, deɗ amu uue, wagɗe deɗ amuppa mana mettak danab okkai am ɗo gumak danab-Parasia ele ag gona Pailat laugppa qagmeppig. 63Qagmena ag appig. “Naɗi, ig hambuppuak danab amu, nuhig nai laa daunigppa doum. Nug bau dayaya Nug, ‘Deɗ ewam ukkeb, da eɗue hippaidkkul,’ aum 64amunu, nuhig ippunittak awak danab ag gona, gaɗa awona, ag danab amelagppa, ‘Nug eɗua hibaittom,’ amananu, na appe, laa ag moɗ amuppa epponak keeke laa heppeg, moɗ am hag mak anam dayeb ukkeb, deɗ ewam bataɗ! Nuhikkud ippunittak awak danab ag, ‘Kayak he, Nug eɗua hibaittom,’ appeg amu, nai hambuppuak dimppanu amu nai hambuppuak tatamnu amu eɗidkku,” aon appig. 65Ag anam aeg am Pailat nug aum. “Ag daup laa moɗ gumaknu diina, ag moɗ amu ameg manakib daakkunu aɗi hekkulagnu elele dootteb amu, ag gona anamib aakku heig!” awa aum. 66Nug anam a, ag gona, hag maknu epponak keeke laa menppa mewona, ban danab laa maatteg, moɗ amu guman daappig.

Currently Selected:

Matyu 27: NB

Highlight

Copy

Compare