Matyu 24

Jesus gog taknu epponak keeke, keeke laalanu ele aum

1Amu Jesus Nug Kayaknu mettid lag uua no, nuhikkud ippunittak awak danab ag Nug gumidna doppig. Ag dona, Nug amegppa appig. “Antte! Kayaknu mettid lag nuhig tomppan keeke oh ele imu, ag imuppa lag enanag hadna autna aoppig,” aon appig. 2Anam aeg amu Jesus Nug oɗelagppa awa aum. “Ag keeke amu oh anidtteb, amge da genab ag amelagppa attem, men imu laa ag loppaɗppeg, nena qena, laa nug laa qaɗeppa iinab daama. Ohnab loppaɗppeg, honap nena qekkulag,” awa aum.

3Jesus Nug Olipnu Qaukoppa ta dayeye amu ippunittak awak danab ag akka gumidna goppig. Ag gona appig. “Na ig amenigppa ame amu, kobol amu haen ganeb bekku? Ele amu, epponak keeke aɗi tatam beeb, ig na uɗikkutnu, amu gog tak haen miag daatte ele doognig,” aon appig. 4Ag anam aeg, Jesus oɗelagppa awa aum. “Danab laa ag hambuppualadmanu ag dabmeig! 5Aɗinu? Danab kuɗum ag da onilppa uɗin, ‘Da am Kristus,’ anana, kuɗum laa buppualadkkulag. 6Ag bannu doonna, bannu ulah nai ele dooglag. Keeke amu genab bekkulag, amge doyeg! Ag aib ottaippig! Keeke amu bekkulagnab, amge wan haen malak iitta. 7Wan laa ag wan laa ele nug qekkulag. Ɗo maɗoɗ laa ag ɗo maɗoɗ laa ele nug qekkulag. Aben laalappa amu enug haen okkai nebeppeg, mim ele nekkulag. 8Kobol amu oh am nid dokkunu ah ag guittak tatam dootteb, amubia aakkuib.

9Anam amu haen amuppa laala ag ag aɗualadna, eheɗ hattanna, ag aqappeg mauhkkulag. Am geha danab ah oh ag ahilagnu nau ninig ele dooglag. Aɗinu? Da onil ahilagppa daatte. 10Am haen amuppa danab ah kuɗum ag dahilnu oolagppa genab doyak ele, ag amu uun, da dimeɗan, akka akka nug dimug mekkulag. 11Propet hambuppuak kuɗum ele ag ahan, danab ah kuɗum buppualadkkulag. 12Nau hak kobol am okkai mekku amunu, danab ah ag nug oo mauhak kobol uuglag, 13amge laa nug ɠagattag dayebeb ukkeb, keeke oh ba maleb, haen amuppa ele nug ɠagattag daakku amu, nug padal ii mema. 14Amu danab ah oh dooglagnu ag Kayaknu ɗo maɗoɗnu Nai Ena wan atu ohppa mehuqppeg, danab ah dooppeg, geha haen amuppa gog tak haen bekku.

15Aria, propet Daniel nug keeke naunab laa, nug aab he nauhtte ele amu, nug amunu yom. Danab aun nug nai imu ebqette amu nug meu nuhig tutukku aokkunu dabmaɗ! Aria, ag keeke naunab amu aben gun eleppa meppeg dayebeb anidna amu, laa ag 16Juda wanppa daatteb, ag oolna qaukoppa ukkeg! 17Danab nug nuhig lag koɗokko uɗem ukkakppa daatte, nug aguppa dayaya, nug oolkkunuib dabmaama, nug lag ooppa noa keeke aib awom. Iitta! Nug oola ukkaɗ! 18O laa nug dad okkaippa dayaya, nug oolkkunuib dabmaama, eɗua ulahnu lamen nuhig aokkunu lakka aib ukkom. 19Am haen amuppa ah oolkad ele, ah ag nid yuɗ huh madatteb ele amu, ahilagnu gadonnab gadon. 20Ag oug haenppa o Sabat deɗppa oolmananu ag unuqitteg! 21Aɗinu? Haen amuppa amu, uug naunab bekku. Uug naunab amubia nug digmak haenppa uɗiak gemu ele laa ii beum, dimppa ele amubia ii daama. 22Anam daatte amunu, Kayak Nug haen amu tutu daakkunu, haen amu ii okkullo, danab ah oh padal melob, amge Kayak Nug nuhikkud tituanattom ele, Nug amu dilag dabma, haen tutu okkulkku. 23Aria, haen amuppa laa nug ag amelagppa, ‘Antteg! Kristus Nug ippa ina daatte,’ o iitta, ‘Kristus uppa uma daatte,’ ab amu ag oolagppa genab aib dooppig. 24Aɗinu? Geha danab laa ag hambuppuna, ‘Da am Kristus,’ o ‘Da am propet,’ akkulag. Ag anam anana, ag epponak keeke danab haknu elele iitta okkainab, amu kobol danab haknu elele iitta laala ele hekkulag. Ag amuppa Kayak danab ah, nuhikkud tituanattom ele, ag agnab hambuppualadkkulagnu hekkulag, amge elele iitta. 25Doyeg! Keeke amu ii neumppa, da ag dabmekkulagnu nai iikku ag amelagppa ain malami.

26Amunu laa ag, ag amelagppa, ‘Nug atu taɗakppa daatte,’ aon amelagppa appeg am ag appa aib goppig. O ag, ‘Nug lag imu ooppa daatte,’ aon amelagppa appeg amu, ag oolagppa genab aib dooppig. 27Ag aakku dootteb, amemɗi nug aam bedeppa digma amahala ukka, aam nodeppa malatte, amubia Danab Bekkalag da, da uɗikkulnu haen amu, da anamib uɗippi aniɗkkulag. 28Mauhak gaɗalag niitteb, aben amuppa kaub ag uɗin appa qagmetteb.

29Aria, haen amunu uug nau iitta meeb, pahanab aam ii amahalma, kalam ele ii amahalma, hoɗoppai laa ag habppanu nena qebeppeg, laa ag ippulag tutukku ii dim lamidmana. 30Haen amuppa amu Danab Bekkalag da, dahil epponak keeke habppa bekku. Beeb amu wanppanu danab ah oh gaaglag. Gaappeg, Danab Bekkalag da, da lombig hab waappa daatteb, da lombig amuppa ɠagattag okkai, binag amahlak oppiaawak ele uɗippi aniɗkkulag. 31Uɗien, trampet gayebeb, da dahilad engel heppi, ag gona, danab ah dahilad da tituanadmi amu aben oh wanppanu, habppanu ele qagmaadna, diin uɗiglag.

32Nai amunu amu ag ad fignu kobol dabmena dabmak aweg! Ag ad fig nug uɗug bau bekkunu digma haultte anidna amu, ag haen amuppa, ‘Aam haen aakku digmette,’ aon atteb. 33Anam amu, amubia ag kobol digdig oh da amunu ami ele amu bebeppeg anidna, ag dahilnu, ‘Nug eɗua uɗikkunu haen miag, odppa daatte,’ dooglag. 34Da genab ag amelagppa attem, danab ah haen imunu oh ii mauhadppeg, geha keeke amu oh bekku. 35Hab wan ele am iitta mekkulah, amge nai dahil am iitta iinab mema.

Danab laippu laa nug haen deɗ ele ii dootte

36Anam, amge laippu laa nug amunu haen, deɗ ele ii dootte. Engel hab aabppa daatteb ele ii dootteb. Da ele ii doottem. Mama nukka keeke amu dootte. 37Noanu haenppa danab ag kobol aɗi aɗi heppig, amubia Danab Bekkalag da, da eɗue uɗikkulnu haenppa amu, danab ag kobol anamib hekkulag. 38Hiɗ naɗi ii beum haenppa danab ah ag ee lanana, le lanana, ewau matulak aona, ah nug mettanna, anam heegeg ukke, Noa uubppa teum. 39Ag amu henana, hiɗ bekkunu dab-ii-mettaegeg, hiɗ ba diia ukkom, amubia Danab Bekkalag da, da uɗikkul haenppa, ag anamib daaglag. 40Geha danab aɗit omelahppa daapeɗ, Kayak Nug laippu awawa, laa uuitteb daakku. 41Ah aɗit aa bretnu plaua kalu nekkunu hebepeɗ, laa amu awawa, laa am uuitteb daakku.

42Amunu ag Danab Bekkalag da, da eɗuen nekkulnu dabmenan dayeg! Aɗinu? Deɗ adekkuppa ahilag Naɗi uɗikku amu, ag ii dootteb. 43Ag doyeg! Lag mameg nug haen adekkuppa tuqan yabhok danab uɗikku doolo, nug ib aɗaɗa heeb, yabhok danab nug laug loppaɗa, lag ooppa ii nolo. 44Amunu ag ele bappaidna dayeg! Aɗinu? Danab Bekkalag da, da haen laa ag ii dabmekkulag ele, haen amuppa uɗikkul,” awa aum.

45Jesus Nug anam ana, Nug nai tuɗitta aum. “Maɗi nid laa doyak dabmak ena ele, nug oo metta ii uuak kobol haaha daatte amu, nuhig okkai nug maɗi nid amu nuhikkud maɗi nid laa gumattatta, haenppa ee madakkunu uɗat medakkunu elele. 46Aria, dimppa maɗi nid amunu okkai nug laih ukkakppanu eɗua uɗia, maɗi nid amu nug danab okkai nuhig anukka amegppa aumbia hette anidkku dayeb amu, nuhignu am ena. 47Da genab ag amelagppa attem. Danab okkai nug maɗi nid amu nuhig keeke ohnu ikkilag meeb daakku. 48Amge maɗi nid amu nug danab ena iitta daya, ooppa, ‘Danab okkai dahil nug paha ii uɗima,’ dabmekku dayeb, 49nug digma, maɗi nid laa, maɗi ah laa ele makkuɗattatta, nug le ɠagattag laeg kaaka aqak danab ele ee lanana, le ele labeppeg, 50nuhig okkai nug haen, deɗ ele maɗi nid amu nug ii doyom, ii dabmeum ele, amuppa eɗua uɗikku. 51Uɗia amu, danab okkai nug maɗi nid amu eheɗnab hettowa, awa meeb, nug hambuppuak danab ele daaglag. Appa danab ag gaanna, aelkad emalna daaglag.

Currently Selected:

Matyu 24: NB

Highlight

Copy

Compare