Matyu 11

Jesus, Layattak Jon ele

1Jesus Nug anam nuhikkud ippunittak awak danab nai anam ippunatta malowa, Nug aben amu uua aha, Galilinu aab laalappa danab ah doyak aoglagnu ippuanattatta, nai ele mehuqom.

2Mehuqeqe, Jon nug maniguittak ooppa dayaya, Kristus uɗat oh heum doya amu nug nuhikkud ippunittak awak danab ⌊aɗit⌋ maate, aa nuhig oɗmak aoya, Jesus toppa gopiɗ. 3Goya Jesus oɗ medapiɗ. “Danab laa uɗikkunu aeg doomut am na aakkute, o iitta ig laate ameg mekkunig?” aoya apiɗ. 4Aa anam oɗ mettoya daaeheh, Jesus Nug uɗat he antteh amu Nug aum. “Aa goya, gemu aa aɗi anidpiɗ, aɗi daulahppa doopiɗ ele aakkude Jon amegppa apeɗ doyaɗ! 5Amelag gaɗuak ag eɗun neegtteb, baelag nau autaut oitteb amu, ag ena oitteb, gaɗalag oɗe nau ele amu oɗe amu iitta mette, daulag ituak amu ag eɗun nai dootteb, danab mauhppig ele, ag eɗun bau daatteb, amu daɗek danab ag Nai Ena dootteb. 6Amu danab aun nug nuhig ooppa genab doyak dahilnu ii paɗe nette amu, nug itittak ena awom daatte,” awa aum.

7Jesus nai mattia male, Jonnu ippunittak awak danab aa ukkaeh amu Jesus Nug danab ah kuɗum appa daappig amelagppa Jonnu aum. “Ag anukka Jon gumidna atu taɗakppa goppig amu, ag aɗi keeke anidkkulagnu goppig? Ag keeke gai-iitta, qaittobttob bia, ulah he uɗaltte, ag amu anidkkulagnu goppigte? Iitta. 8Anam daatte dayeb, ag aɗi anidkkulagnu goppig? Ag gona, danab laa lamen enanag kobol ele takkom anidkkulagnu goppigte? Iitta. Danab ag lamen enanagnab, kobol ele tagatteb amu, ag king laulkad enanagnabppa daatteb. 9Anam daatte dayeb, ag aɗi keeke anidkkulagnu goppig? Ag propet laa anidkkulagnu goppigte? Da ag amelagppa attem. Ao, ag propet anidkkulagnu goppig, amge nug propetib iitta. Nug propet uɗat aakkuib haknu iitta. Nug uɗat laa ele. 10Nug am laa, Kayak Nug nuhignu a, propet laa nug Kayak oɗe awa, Kayak naippa yom daatte. Nai amuam inam. ‘Antte! Da heppi, dahil nai awa ukkak danab laa nug anuqa ukka, nahip ib na noomppa bappaidkku.’ 11Da genab ag amelagppa attem, danab oh ah oolkadppanu doppig elenu laa nug Layattak Jon ii eɗittom, amge danab laa nug Kayaknu ɗo maɗoɗ ooppa danab nakokib daatte, nuhig itittak ena amu Jonnu eɗidtte. 12Jonnu haen uɗie uɗie gemu ele Kayaknu ɗo maɗoɗ nug okkai mekkunu wagai mette, amu wagai mak danab ag ele Kayaknu ɗo maɗoɗ aɗaglagnu wagai metteb. 13Propet oh dilag nai, ɗo nai ele, aa Jon beum batak danab ah propet dilag nai ippunadpiɗ, 14amu ag nai amu oolagppa genab dootteb dayeb, ag imu oolagppa genab dooglag. Elaiya uɗikkun appig amu Jon aakku. 15Danab nug daug ele dayeb, nug doyaɗ!” awa aum.

16Anam ana amu, Nug baula aum. “Da danab ah haen geha imunu da ahilagnu aɗi bia akkul? Ag am nid naunau ee oɗiak abenppa daanna, ameg laa amu ameg laa amelagppa enana, 17‘Ig ahilagnu dumuttum iwalmut, amge ag ahi ii edappig. Ig ahi oo doyak ele ettamut, amge ag ii gaappig,’ atteb amubia hetteb. 18Aɗinu? Jon nug uɗia, nug ee digdig ii laum, wain ele ii laum amunu, danab ah ag nuhignu, ‘Nug beɗuppa ouɗi nau ele,’ aon atteb. 19Aria Danab Bekkalag da, da uɗien, ee, le ele lattem amunu, ag atteb. ‘Antteg, Nug ee huanak lanana, wain ele huanak latte. Nug laikkud am takis awak danab, amu danab laa ag ig Juda, ihinig ɗo oh ii dim lamidtteb ele,’ aon atteb. Amge doyak dabmak ena ele am keeke genab amu, ag nuhig hakppa genab anidkkulag,” awa aum.

Aab laala amu, ahilagnu gadonnab gadon

20Aria, aab laalappa Jesus Nug appa kobol danab hekkunu elele iitta kuɗum heum, amge danab ag oolag ii eɗuom, diig amunu haen amuppa Jesus Nug ag alatta aum. 21“O gadonnab gadon aab Korasin, o gadonnab gadon aab Betsaida ele. Da ahilah danab oolagppa oiyeye, kobol digdig danab hekkunu elele iitta hemi amu, danab laa nug Tair, Saidon ele, danab appa daatteb ag am iitta aɗi danab amu, nug danab amu ahilagppa kobol amubia helo, Tair, Saidon ele dilah danab ag anukkanab lamen heɗiag ele takkan, uhuɗppa daanna, ag oolag eɗulo. 22Da ag amelagppa attem; epeɗiak haen okkaippa Tair, Saidon ele aa nob nau aoglah, amge aa Korasin, Betsaida ele, aa nob nau amu eɗittak aoglah. 23Aria aab Kaperneam, na onin okkai, laa oh eɗattak aokkutte? Iitta! Na padal mekkut. Danab laa nug Sodom dilagppa kobol danab hekkunu elele iitta da ahilagppa hemi amubia helo amu, Sodom ag gemu daalob. 24Da ag amelagppa attem; epeɗiak haen Sodom am nob nau aokku, amge na Kaperneam, na am nob nau amu eɗittak aokkut,” awa aum.

Danab hik aokkunu nai

25Jesus Nug haen amuppa nai amu mattia malowa Nug aum. “O Mame, na hab wan ele dilah Okkai daattem, amu na ⌊wan imuppan dabmakppa⌋ danab laala ag doyak dabmak ena ele, danab laala sul okkai heppig ele, na amu dilagppa keeke imu lokkumna, nid naunau ippunadme amunu, da na onin humattem. 26Yo, Mama, na amu hekkutnu enanag doome, amunu na heme,” awa aum.

27Jesus Nug anam ana, Nug baula tuɗitta aum. “Da Mamel Nug keeke oh da eppelppa meum. Amu danab laippu laa nug Kayak Bekka ii dootte. Kayak Nug nukkaib Nug dootte. Ele amu, danab laippu laa nug da Mamel ii dootte. Iitta. Da, Kayak Bekka, da aakkuib Nug doottem, amu danab, da ag da Mamel ippunadttem ele, ag Nug dootteb,” awa aum.

28Jesus Nug anam ana, Nug baula ele aum. “Ag danab oh, ag uɗat okkai henana, keeke uug ele maotteb amu, ag gumiɗna doig! Doppeg, da heppi, ag hik aoglag. 29Ag gugappan tuqai dahil aon gukkalagppa mewona, ag dahilppa dabmak aweg! Aɗinu? Da am wagai mak danab iitta, amu da am oo doyak ele. Ag anam henana, ag oolagppa uug iitta oiglag. 30Aɗinu? Dahil gugappan tuqai am uug iitta, amu amuppa ag keeke laa, ag maoglagnu mekkul amu, keeke amu ele am uug iitta,” awa aum.

Currently Selected:

Matyu 11: NB

Highlight

Copy

Compare