Lewitikas 4
4
Ib etta, hipunin haknu ofanu ippu
1Amu Yawe Nug Moses amegppa aum. 2“Na Israel amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Laa nug ii doyaya ib apiɗitta, nug Yawe aɗi keeke ii haknunab aum amu haaha, hipunin hekku amu, nug inam iikku hekku.
3Laa amu hekku, nug mana mettak ikki danab daatte dayeb, nug Israel oh ag hipunin hekkulagnu elele daatteb bia hipunin hekku dayeb, nug Yawe toppa makau gaiɗ laa, ib etta hipunin haknu ofa daakkunu, beɗuppa eheɗ laa iitta ele amu awa, Yawe gumitta ukka, Nug medakuoitte. 4Nug makau gaiɗ amu mettid haknu peh lag danab ah appa qagmetteb ele, nug lag amu odppa, Yawe toppa awa wakku. Wana, nug eppeg makau amu igippa mewowa, nug Yawe noobppa baag otaɗkkuoitte. 5Nug baag otaɗa, mana mettak ikki danab amu, nug makau amunu tiig laa awa, mettid haknu peh lag danab ah appa qagmetteb ele, nug lag amu ooppa nokku. 6Nug noa, eppeg doɗo laa meeb, tiig amu ooppa nob, taula awa, nug haen eblaih aɗit ele Yawe noobppa Oo Gun Ele, Oo Gunnab Ele makkulaknu lamen guguittak tauɗ qedakku. 7Mana mettak danab nug amu hewowa, nug tiig laa qeqeɗi waɗele oh, kalu muttuɗig ena ele manaknu qaɗabppa daatteb, qaɗab amuam mettid haknu peh lag danab ah appa qagmetteb ele, lag amu ooppa, Yawe noobppa daatte amu, nug qeqeɗi amuppa mekku. Makau tiig laa oh amu, nug mettid haknu peh lag danab ah appa qagmetteb ele, lag amu odppa, manaknu ofa haknu qaɗab diigppa, appa gokkaɗkku. 8Mana mettak danab nug makau gaiɗ amu, ib etta hipunin haknu ofa daatte, nug makau gaiɗ amu ittag ooppan keeke aɗak daatte oh, nug amu awa, 9nug aɗitta doɗo aɗit, ittalah ele, maɗog guguittak daattep, gamagnu maha nakok ele aokku. Danab nug aɗitta doɗo awawa, nug gamagnu maha nakok ele awaɗ! 10Amu nug makau okkai ebehi ele dawai, o makau okkai ebehi ele anig, amuppa laippu dayaknu ofa hetteb, amu bianab aakku hekku. Mana mettak danab nug anam hewowa, nug manaknu ofa haknu qaɗabppa manakkuoitte. 11-12Mana mettak danab nug anam aakku hekku, amge nug aben dubuttid iitta ele, haen tutu dayaknu aab kalak dimittim, nug appa makau gaiɗ huppu laa oh akka gokku. Amuam, makau gaiɗ gaɗa, teppu, ikki, baekkud, gamagppan keeke, oo, biig, uɗuag, am keeke laa oh ele. Nug akka ukka, aben ag uhuɗ gokkaɗttebppa appa, nug aab aɗuppa maneb ewa, uhuɗ mekku.
13Amu Israel danab ah oh ag ii doonna ib apiɗidna, ag Yawe keeke ii haknunab aum amu henana, hipunin hekkulag dayeb, Israel danab ah oh ag oh beɗulagppa aab ele. Ge, Israel ag keeke amuppa hipunin ii doonna hekkulag dayeb amu, ag aakku beɗulagppa aab ele. 14Amu haen ag hipunin heppig, ag amu doona, ag ib etta hipunin haknu ofa hekkulagnu, ag makau gaiɗ aon uɗiglagoitte. Ag doɗ amu aon, mettid haknu peh lag danab ah appa qagmetteb ele, ag lag amu odppa Yawe gumidna wana, Nug mettaglagoitte. 15Appa amu, tamaniak ikki danab ag Yawe noobppa eppelag makau gaiɗ amu igippa mewona, Yawe noobppa baag otaɗkkulagoitte. 16Ag anam heppeg, mana mettak ikki danab nug makau gaiɗ amu tiig laa awa, mettid haknu peh lag danab ah appa qagmetteb ele, nug lag amu ooppa nokkuoitte. 17Nug noa, eppeg doɗo meeb, tiig ooppa nob, taula awa, nug haen eblaih aɗit ele Yawe noobppa Oo Gun Ele, Oo Gunnab Ele makkulaknu lamen guguittak tauɗ qedakku. 18Mana mettak danab nug amu hewowa, nug tiig laa qeqeɗi waɗele oh, kalu muttuɗig ena ele manaknu qaɗabppa daatteb, qaɗab amuam mettid haknu peh lag danab ah appa qagmetteb ele, lag amu ooppa, Yawe noobppa daatte amu, nug qeqeɗi amuppa mekku. Makau tiig laa oh amu, nug mettid haknu peh lag danab ah appa qagmetteb ele, lag amu odppa, manaknu ofa haknu qaɗab diigppa appa gokkaɗkku. 19Mana mettak danab nug doɗ ittag oh awa, qaɗabppa maikkuoitte. 20Nug ib etta hipunin haknu ofa, mana mettak ikki danab hipunin hewowa heum, amubia hekku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele medakku. Kayak Nug hipunin uhuqa madakku. 21Am mana mettak danab nug makau gaiɗ amunu huppu laala daatteb, amu oh haen tutu dayaknu aab kalak dimittim awa ukka, appa maneb eokkuoitte. Amu laa nug ib etta hipunin haknu ofa hekkunu, mana mettak ikki danab hipunin hewowa heumbianab hekkuoitte. Amuam ib etta hipunin haknu ofa, Israel dilag tamaniak oh dilag aakku.
22Am haen Israel dilag ikki danab laa nug ii doyaya ib apiɗitta, Yawe, nuhig Kayak, Nug keeke ii haknunab aum amu haaha, hipunin hekku dayeb, nug aakku beɗuppa aab ele. 23Haen nug hipunin heum doya amu, nug meeme dawai laa, eheɗ laa beɗuppa iitta ele amu awa, nug hipunin heumnu mana mettak hekkunu wakkuoitte. 24Nug eppeg meeme dawai amu igippa mewowa, aben manaknu ofa baag otaɗttebppa ele, appa Yawe noobppa baag otaɗkkuoitte. Amuam ib etta hipunin haknu ofa aakku. 25Nug amu heeb, mana mettak danab nug eppeg doɗo ib etta hipunin haknu ofanu tiigppa meeb noob awa, manaknu ofa haknu qaɗabnu qeqeɗi waɗeleppa mekku. Nug amuppa meeb, tiig laa oh am qaɗab diigppa gokkaɗkku. 26Am nug qaɗabppa, Yawe ele laippu dayaknu ofa hetteb bianab ha, meeme ittag oh maneb eokkuoitte. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.
27Aun laa Israel ooppa nug ii doyaya Yawenu ib apiɗitta, Yawe Nug keeke ii haknunab aum amu haaha, hipunin hekku dayeb, nug aakku beɗuppa aab ele. 28Haen nug hipunin heum doya amu, nug mana mettak haknu meeme balat, beɗuppa eheɗ laa iitta ele, amu awa, nug hipunin heumnu mana mettak hekkunu wakkuoitte. 29Nug eppeg am ib etta hipunin haknu ofa hekkunu doɗ amu igippa mewowa, amu manaknu ofa haknu abenppa, amuppa baag otaɗkkuoitte. 30Nug amu heeb, mana mettak danab nug eppeg doɗo doɗ amunu tiigppa meeb noob awa, manaknu ofa haknu qaɗabnu qeqeɗi waɗeleppa mewowa, amu tiig laih oh qaɗab diigppa gokkaɗeb nokku. 31Am laa nug beɗuppa aab ele nug meeme ittag oh, ag laippu dayaknu ofa hetteb bianab doɗ beɗuppanu aokkuoitte. Nug anam heeb, mana mettak danab nug ittag qaɗabppa maneb eokku. Mana mettak amunu muttuɗignu, Yawe Nug ooppa ena dootte. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.
32Am laa nug ib etta hipunin haknu ofa hekkunu haaha, nug sipsip awa dotte dayeb, nug sipsip balat eheɗ laa beɗuppa iitta ele, amuppa hekkuoitte. 33Nug eppeg am ib etta hipunin haknu ofanu doɗ igippa mewowa, aben manaknu ofa baag otaɗttebppa ele, appa Yawe noobppa baag otaɗkkuoitte. Amuam ib etta hipunin haknu ofa aakku. 34Nug amu heeb, mana mettak danab nug eppeg doɗo ib etta hipunin haknu ofanu tiigppa meeb noob awa, manaknu ofa haknu qaɗabnu qeqeɗi waɗeleppa mekku. Nug amuppa ma, tiig laa oh am qaɗab diigppa gokkaɗkku. 35Aun laa nug beɗuppa aab ele nug ag Yawe ele oolag laippu dayaknu ofanu sipsip-ppa, mana mettak hetteb bianab, nug sipsip amu ittag oh aokkuoitte. Anam heeb, mana mettak danab nug ittag qaɗabppa, Yawe mettaknu aab aɗunu ofa daatte ele, nug amu qaɗeppa maneb eokku. Mana mettak amuppa amu, mana mettak danab nug heeb, eheɗ haknu nob nau doɗ tiigppa iitta meeb elele metteb, Kayak Nug hipunin uhuqa medakku.
Currently Selected:
Lewitikas 4: NB
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
