Lewitikas 25
25
Wannu sabat maɗ
1Moses nug Sinai qaukoppa ta dayeye, Yawe nug amegppa aum. 2“Na Israel danab ah amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Wan, ag aulag daakkunu da madakkulnu hettem ele amu, ag wan amuppa nona, ag maɗ eblaih aɗit ele uuebeb, ag haen amu anen anen hanhan wan am sabatnu hik awak, anambia dayaknu mettaglagoitte. Sabat bia dayak, amuam Yawe binag awaknu. 3Ag maɗ eblaih laippu ele, ag maɗ amu ohppa dad hena, grep dadppa grep muɗi bappaidna, meu aoglag, 4amge maɗ eblaih aɗit ele, amuppa amu wan uuppeg, wan am sabatnu hik awak, anambia daakkuoitte. Sabat bia dayak, amuam Yawe binag awaknu. Ag maɗ laippu amuppa amu, ag aib keh eppaladnan, o grep dadppa grep muɗi ele bappaladppig. 5Ag ee ag akka betteb ele amu, ag ee amu aib aon, bakkalenu menana, muɗi grep ag ii bappaladtteb ele, amuppan ee ele aib aon, akkan bakkalenu maadppig. Wan nug maɗ laippu amuam hik awa daakkun daatte. 6Amge ag maɗ amuppa, maɗ amu onig am wannu sabat maɗ, maɗ amuppa ag, ahilkad maɗi nid maɗi ah ele, aria, ahilkad uɗat nid, amu wan laihnu danab, ag amu maɗ eblaih aɗit amuppa ee akka bena meu otteb ele amu lakkulagnu ele. 7Amu doɗ manan, doɗ dakkuɗ ele, ag wanppa ee akka bena meu otteb ele lakkulagnu elele. Aɗi ee nukka wanppa bette amu, am lanaknuib.
Maɗoɗnu gamag ahak dayaknu maɗ tituanak daatte
8Tuɗittak amu, ag maɗ ebqak eblaih aɗit ele, maɗ amuam wannu sabat maɗ amu, ag maɗ amunu eblaih aɗit ele ebqenana, dabmekkulagoitte. Amu oh am maɗ 49. 9Maɗ 49 ukkeb, dimppa Eheɗ haknu nob nau tiigppa iitta meeb elele medakkunu deɗ okkai, amuam kalam ebqak eblaih aɗit ele, kalam amunu deɗ 10ppa, maɗ 50 ooppa, maɗ amuppa, deɗ amuppa ag trampet wan amu ohppa huana iwaladkkulag. 10Ag maɗ amu Kayaknu tituana mettak daakkunu tituaneg! Ag Israel danab laa, ag Israel laa ag ahilkad maɗi nid daan, uɗat hetteb ele amu, ag Israel laa ag ag uhuqadppeg, baula ag waalkadppa ii daamnanu daatte. Maɗ amuam ahilag maɗoɗnu gamag ahak dayaknu maɗ tituanak daatte. Aria, gamag ahaknu maɗ amuppa amu, ag oolagppanu laa ag wan ahilkad uun gona, laa dilag maɗi nid daappig ele amu, ag gamag ahaknu maɗ amuppa eɗun gona, memetalkad dilag wanppa, ahilkad aab ikki, amuppa daaglagnu daaglag. 11Ao, maɗ 50 amu, amuam ahilag maɗoɗnu gamag ahak dayaknu maɗ tituanak daatte. Maɗ amuppa amu, ag aib ee tumu laa ebappig. Amu ee ag akka bena meu otteb, grep ag akka muɗi grep ii babaittak eleppa daatteb amu, ag aib aon akkan, bakkalenu meppig. 12Aɗinu? Maɗ amuam ahilag maɗoɗnu gamag ahak dayaknu maɗ tituanak daatte, am Kayaknu tituanak daatte ag dooglagoitte. Ag dad ooppan ee meu akka otteb ele amu, maɗ amuppa am lakkulag, amge ag aib laih am bakkalenu meppig.
13Am maɗoɗnu gamag ahak dayaknu maɗ tituanak daatte amuppa, ag anen anen eɗun, ag memetalkad dilag wanppa gona daaglagnu elele. 14Am ag oolagppanu laa nug nuhig wan meeb, nug layag, Israel ted laa, nug daden ma, uɗat medakku amu, aa nug bubuittak aib hepiɗ. 15Ag anen anen ag maɗoɗnu gamag ahak dayaknu maɗ tituanak daatte haen ganeb dayom, ukkeb ukkeb, ganeb maɗoɗnu gamag ahak dayaknu maɗ tituanak daatte baula daakku dabmenana, maɗ amuppa wan amuam eɗua, mamegnab eppegppa gokku amunu, na wan amuppa maɗ gane ee okkun daatte dabmena, daden mekkut. Laa meeb, daden mekkunu hette ele amu, nug ele anamib dabmaama meeb, laa daden mekku. 16Amu haen elab dayeb ukkeb, maɗoɗnu gamag ahak dayaknu maɗ tituanak daatte aokku dayeb amu, nug men doɗo etta tak elenu oɗ medakku. Am maɗ kuɗum iitta ukkeb, maɗoɗnu gamag ahak dayaknu maɗ tituanak daatte aokkunu daatte dayeb amu, nug men doɗo honapnu oɗ medakkunu elele. Aɗinu? Wan amu hanhan wan mamegnab, nuhig daatte amunu, danab nug wan dadennu mette, nug laa meu laala awaknu dabmette aakkuib dabmekku. 17Ag aib nug bubuittak heppig. Iitta! Ag Kayaknu ebehilag oh bodoetta le maɗ! Aɗinu? Da am Yawe, ahilag Kayak.
18Ag dahil ɗo iɗu iɗu dabmettan, pehettak dim lamidna hekkulag amu, ag wan amuppa baɗak iittappa daaglag. 19Anam hena, ag wanppan keh huana aona, ag lappeg, oolag aɗebeb, wan amuppa baɗak iittappa daaglag. 20Amge ag inam oɗ mekkulagtai, ‘Ig maɗ eblaih aɗitppa eppaknu, meu awaknu ele am aib anak daatte. Anam daatte amunu, ig amu hekkunig dayeb amu, ig maɗ amuppa aɗi lakkunig?’ aon akkulagtai. 21Ag anam akkulagtai, amu amunu nob mak am, ‘Da, Kayak, da geha maɗ eblaih laippu amuppa itadkkul amunu, wan nug heeb, ee meu huana okku. Ag maɗ ewam oh, ee amu lakkulagnu elele daakku. 22Am ag maɗ eblaih ewam ele, ag maɗ amuppa ee tumu eppanna, ag ee alag amu lakkulagib. Am tutukkunab, ag geha, ee alag amu labeppeg ukkeb, ee meu bau maɗ eblaih waɗele amuppa awaknu daakku,’ awa aum.
23⌊Am aib daulag atiom,⌋ wan amu dahilnab daatte amunu, ag wan amu aib hanhannu daden maknu meppig. Aɗinu? Wan am dahil; ag am wan laihnu danab ah daan, dahil wanppa daan, dahil uɗat hetteb.
Keeke eɗua mettak
24Am wan oh ahilag daatte, wan amu ohppa wan mameg laa nug wan maha laa meeb, laa uɗat medakkunu daden mekku dayeb amu, keeke amu hekkulahnu aa nug tituanak hekkulah. Amu tituanak nai amuppa wan mameg nug haen ganeb wan amu eɗua awa, uɗat medakkunu elele dookku, nug hekkunu elele tituanak nai amuppa dayaɗ!
25Ag lailag, Israel ted laa, nug daɗeknab daya, nug aug wan laa dadennu meeb, laa daden mekku dayeb, nug laikkud oolagppanu laa, nug daɗek amu ele tiig laippu ele, nug aug wan amu laa eppegppa dayaknu qagaiettakppanu eɗua uhuqak hekku. 26Am auntai laa nug eɗua uhuqak amu hekkunu ii daakku dayeb, wan mameg nug dadennu me, laa daden me, wan mameg amu nug elele ha, men doɗo elele awa, nug wan amu laa eppegppa dayaknu qagaiettakppanu eɗua uhuqak hekku; 27danab amu nug aun wan daden meum ele, nug nuhignu eɗua uhuqak hekkunu am nai iitta. Amu hekkunu nug wan amunu nob am maɗ gane ee okkunu dayeb ukkeb, maɗoɗnu gamag ahak dayaknu maɗ tituanak daatte bekku dabmaama, men doɗo ee oak amu elele tonaknu, men doɗo amuppa laa eppegppanu eɗua uhuqkku. Amu hak dimppa amu, wan mamegnab nug eɗua, nuhig wanppa ukka daakku. 28Amge wan mamegnab nug eɗua aokkunu elele iitta dayeb amu, am aakku danab laa nug wan mameg ma dayebeb ukkeb, maɗoɗnu gamag ahak dayaknu maɗ tituanak daatte laa dokku. Maɗoɗnu gamag ahak dayaknu maɗ tituanak daatte, maɗ amuppa amu, wan amu eɗua mamegnab eppegppa wab, nug eɗua ukka, amuppa daakku.
29Aun laa aab okkai aɗ ooppan lag laa dadennu me, daden meppig amu, nug maɗ laippu ooppa nug lag amu laa eppegppa dayaknu qagaiettakppanu eɗua uhuqak hekkunu elele; am nai iitta. Haen amuppa, dadennu meum ele, danab amu nug lag amu laa eppegppa dayaknu qagaiettakppanu eɗua uhuqak hekkunu elele daatte. 30Amge nug maɗ laippu amuppa eɗua uhuqak amu ii hekku dayeb, lag aab okkai aɗ ooppan aakku danab nuhigppan daden meum ele amu, nuhig hanhan daakku. Maɗoɗnu gamag ahak dayaknu maɗ tituanak daatte, haen amuppa amu, lag mameg tatamnu, am baula nuhig ii daama. 31Amge lag laa aab nakok laa, aɗ iitta ele, amuppa daatte, amuam keeke aab dimittim, dad okkai keeke, amubia daakku. Lag aben anamppan amu, wan mamegnab nug haen adekku lag amu laa eppegppa dayaknu qagaiettakppanu eɗua uhuqak hekkunu elele doya hekku, o maɗoɗnu gamag ahak dayaknu maɗ tituanak daatte dokku, maɗ amuppa lag amuam lag mamegnab eppegppa eɗua gokkuoitte.
32Lewi buɗub ag appalkadppan lag dadennu meppeg, laa ag daden mekkulag amu, Lewi buɗub ag hanhan lag amu laa eppegppa dayaknu qagaiettakppanu eɗua uhuqak hekkulagnu elele; ɗo anam daatte. 33Anam amunu, Lewi buɗub ag lag dadennu meppeg, laa daden mekku amu, ag lag amu laa eppegppa dayaknu qagaiettakppanu eɗua uhuqak hekkulagnu hanhan elele daatteb. Ag amu ii hekkulag dayeb amu, maɗoɗnu gamag ahak dayaknu maɗ tituanak daatte dokku, maɗ amuppa laa nug lag mameg mette ele, nug haen amuppa nug eɗua, Lewi buɗub danab medakkuoitte. Aɗinu? Lewi buɗub laulkad am ag appalkad, Israel ooppa aguppa aakku daatteb. Am ahilag keeke aakku, ag wan keeke laa iitta. 34Aria, gikkiɗah dad okkai, Lewi buɗub dilag aab taliliak daatteb, amuam ag dadennu ii memana. Aɗinu? Wan amu, ⌊am aab amu ele laippu daattep, wan amuam aab amuppan danab, Lewi buɗub, ag oh uɗat mettaglagnu elele,⌋ am wan amu hanhan Lewi buɗub eppelagppa daakkunu daatte.
Maɗi nid, maɗi ah ele, ag eɗun anam ii daamnanu ɗo
35Ag lailag, Israel ted laa, nug ag oolagppa dayebeb, aɗi uug beeb, daɗek ma, nug ee keeke aokkunu ib iitta daakku dayeb, nug tuɗid ag oolagppa daakkunu, ag wan laihnu danab ehanidtteb, o ag danab laa nug wan laappan uɗia, haen tutuib dayak danab ehanidtteb, amubia ag laa daɗek meum amu, nuhignu heig! 36Na laa lon mettana, na lonnu intres aib aome. Iitta! Na Kayaknu ebehin oh bodoetta le maɗ! Na anam heppe, na layap, Israel ted, nug na, amu nahipad danab ah ele oolagppa daakkunu elele dayeb daaglag. 37Na layap laa nahip-ppanu lon aokku dayeb amu, na lonnu intres ii aokkutoitte. Nug nahip-ppan ee daden meeb amu, na aib men doɗo daden meme ele, amu etta tak, eɗua ele medakkunu heme. 38Da am Yawe, ahilag Kayak. Da ag Isipnu diie, omalatti, Kanan wan madakkulnu uɗippig. Da ag Isipnu, ahilag Kayak daakkulnu diimi.
39Am na layap, Israel ted laa, nug daɗeknab daya, nug nukka nug nahip maɗi nid daakkunu heeb, na daden mekkut dayeb, na nug begbeg maɗi nidnab bia aib hettame. 40Iitta. Na nug uɗat nid bia, o na danab laihnu uɗiak, ag oolagppa daatte bia nuhigppa he! Amge ib amuppa nug nahip uɗat heeb ukkeb, maɗoɗnu gamag ahak dayaknu maɗ tituanak daatte aokkun daatte. 41Haen amuppa nug bekkod ele ag nahipad maɗi nid maɗi ah ele ii daan, ag eɗun, ahilkad aab ikki, amu mamelkad aɗi aulag wanppa gokkulag. 42Aɗinu? Israel danab ah amu, ag dahil maɗi nid maɗi ah ele daatteb. Da ag Isipnu diie uɗimi. Ag ag laa dilag begbeg maɗi nid daaglagnu, ag maadppeg iinab daden maadkkulagoitte. 43Aibnab oo doyak ii doyaya hakppa nau hadappig. Iitta! Ag Kayaknu ebehilag oh bodoetta le maɗ!
44Am ag begbeg maɗi nid laate, o begbeg maɗi ah laate aoglagnu oolag dayeb amu, ag wan laala, ag taliliadna daatteb amu, ahilagppan daden mattan diiglagnu daatte. 45Amu ag wan laihnu danab ah ag uɗin, ahilag wanppa daatteb, aria huu amunu aab ikki anen anen ag ahilag wanppa daanna, nid menuatteg dotteb amu, ag Israel ag amu oolagppan ele ahilkad maɗi nid daaglagnu daden mattaglagnu elele. Ag daden madappeg, ag ahilag aakku daaglag. 46Ag ahilag daappeg, ag Israel, ag mauhak haen miag dob, ag heppeg, begbeg maɗi nid maɗi ah amu ag ag bekkalkad dilag daaglag. Danab amu ag hanhan ahilag begbeg maɗi nid daaglag, amge Israel danab ah, ag lailkadnab amu, ag ahilagnu oo doyak ii doonna, nau hattak ii hekkulagoitte.
47Am wan laihnu danab, o wan laappanu uɗia, haen tutuib dayak danab ag uɗin, ag oolagppa daatteb, amunu laa, nug enub okkai ele awa daakkutai, amu na layap, Israel ted laa, nug daɗektai ba daakkutai. Anam dayeb amu, daɗek amu nug nukka nug heeb, wan laihnu danab daden meeb, o wan laihnu danab, danab amunu aab ikkinu laa nug daden meeb, nug danab amu maɗi nid daakku dayeb, 48amu nug begbeg maɗi nidnu qagaiettakppanu eɗua uhuqak aokkunu elele. Nug tiig laippu laa nug begbeg maɗi nidnu qagaiettakppanu eɗua uhuqak hekkunu elele. 49Amuam nug mameg laa, o awag, o amag laa, o aun laa tiig laippu daatte amu, nug nug eɗua uhuqak amu hekkunu elele. O danab amu, nugnab elele ha, men doɗo elele aokku dayeb amu, nug nukka begbeg maɗi nidnu qagaiettakppanu eɗua uhuqak hekkunu elele. 50Am laa nug nid amu maɗi nid dayaknu qagaiettakppanu, en mettakppa uhuqkku amu, nid maɗi nid daatte amu, laa nug daden meum ele, aa maɗi nid amu laanu maɗi nid beum ukka, maɗoɗnu gamag ahak dayaknu maɗ tituanak daatte dokku batak am maɗ gane dooya, nid laa nug okkai amunu uɗat nid dayaya, uɗat haaha, men doɗo maɗ amu oh aolo amu dooya, nug maɗ anen anen gane aolo ele dooya, maɗ gane gemu ukkeb, maɗoɗnu gamag ahak dayaknu maɗ tituanak daatte bekkunu daatte dooya, men doɗo awaknu uɗat nid nug melemel amuppa men doɗo maɗ ebqak amuppa gane aolo dooya hepeɗ, laa nug nid amu maɗi nid dayaknu qagaiettakppanu en mettakppa uhuqkkunu hette amu nug nid amu mameg men doɗo anam medakku. 51Am maɗ kuɗum ukkeb, maɗoɗnu gamag ahak dayaknu maɗ tituanak daatte dokku dayeb amu, nug en mettakppa qagaiettakppanu eɗua uhuqak aokkunu nug men doɗo okkai daden hekku. 52Am maɗ kuɗum ii uueb, maɗoɗnu gamag ahak dayaknu maɗ tituanak daatte dokku dayeb amu, nug en mettakppa qagaiettakppanu eɗua uhuqak aokkunu nug men doɗo honap daden hekku. 53Danab laihnu uɗiak, ag oolagppa daatteb amu, ag uɗat nid onilagppa eeg, ag uɗin uɗat maɗ laippu hetteb, ag amu dilagppa attem attem hetteb, amubia ag ahilkad maɗi nid, Israel dilagnu, ag anamib hekkulagoitte. Ag aib uuppeg, wan laihnu danab ele laa, nug Israelnu maɗi nid laanu oo doyak ii doyaya, nau hettom.
54Am Israel ted laa nug maɗoɗnu gamag ahak dayaknu maɗ tituanak daatte, nug maɗ amu ii nak haenppa nug begbeg maɗi nidnu qagaiettakppanu eɗua uhuqak aolo, amge ii uhuqak daakku dayeb amu, maɗ amuppa ag heppeg, nug, nid nuhikkud ele oh ag haen amuppa uhuqak daaglagoitte. 55Aɗinu? Israel danab ah ag dahil maɗi nid maɗi ah ele daatteb, da ag Isip wanppanu diie uɗimi. Da am Yawe ahilag Kayak.
Currently Selected:
Lewitikas 25: NB
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
Lewitikas 25
25
Wannu sabat maɗ
1Moses nug Sinai qaukoppa ta dayeye, Yawe nug amegppa aum. 2“Na Israel danab ah amelagppa nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Wan, ag aulag daakkunu da madakkulnu hettem ele amu, ag wan amuppa nona, ag maɗ eblaih aɗit ele uuebeb, ag haen amu anen anen hanhan wan am sabatnu hik awak, anambia dayaknu mettaglagoitte. Sabat bia dayak, amuam Yawe binag awaknu. 3Ag maɗ eblaih laippu ele, ag maɗ amu ohppa dad hena, grep dadppa grep muɗi bappaidna, meu aoglag, 4amge maɗ eblaih aɗit ele, amuppa amu wan uuppeg, wan am sabatnu hik awak, anambia daakkuoitte. Sabat bia dayak, amuam Yawe binag awaknu. Ag maɗ laippu amuppa amu, ag aib keh eppaladnan, o grep dadppa grep muɗi ele bappaladppig. 5Ag ee ag akka betteb ele amu, ag ee amu aib aon, bakkalenu menana, muɗi grep ag ii bappaladtteb ele, amuppan ee ele aib aon, akkan bakkalenu maadppig. Wan nug maɗ laippu amuam hik awa daakkun daatte. 6Amge ag maɗ amuppa, maɗ amu onig am wannu sabat maɗ, maɗ amuppa ag, ahilkad maɗi nid maɗi ah ele, aria, ahilkad uɗat nid, amu wan laihnu danab, ag amu maɗ eblaih aɗit amuppa ee akka bena meu otteb ele amu lakkulagnu ele. 7Amu doɗ manan, doɗ dakkuɗ ele, ag wanppa ee akka bena meu otteb ele lakkulagnu elele. Aɗi ee nukka wanppa bette amu, am lanaknuib.
Maɗoɗnu gamag ahak dayaknu maɗ tituanak daatte
8Tuɗittak amu, ag maɗ ebqak eblaih aɗit ele, maɗ amuam wannu sabat maɗ amu, ag maɗ amunu eblaih aɗit ele ebqenana, dabmekkulagoitte. Amu oh am maɗ 49. 9Maɗ 49 ukkeb, dimppa Eheɗ haknu nob nau tiigppa iitta meeb elele medakkunu deɗ okkai, amuam kalam ebqak eblaih aɗit ele, kalam amunu deɗ 10ppa, maɗ 50 ooppa, maɗ amuppa, deɗ amuppa ag trampet wan amu ohppa huana iwaladkkulag. 10Ag maɗ amu Kayaknu tituana mettak daakkunu tituaneg! Ag Israel danab laa, ag Israel laa ag ahilkad maɗi nid daan, uɗat hetteb ele amu, ag Israel laa ag ag uhuqadppeg, baula ag waalkadppa ii daamnanu daatte. Maɗ amuam ahilag maɗoɗnu gamag ahak dayaknu maɗ tituanak daatte. Aria, gamag ahaknu maɗ amuppa amu, ag oolagppanu laa ag wan ahilkad uun gona, laa dilag maɗi nid daappig ele amu, ag gamag ahaknu maɗ amuppa eɗun gona, memetalkad dilag wanppa, ahilkad aab ikki, amuppa daaglagnu daaglag. 11Ao, maɗ 50 amu, amuam ahilag maɗoɗnu gamag ahak dayaknu maɗ tituanak daatte. Maɗ amuppa amu, ag aib ee tumu laa ebappig. Amu ee ag akka bena meu otteb, grep ag akka muɗi grep ii babaittak eleppa daatteb amu, ag aib aon akkan, bakkalenu meppig. 12Aɗinu? Maɗ amuam ahilag maɗoɗnu gamag ahak dayaknu maɗ tituanak daatte, am Kayaknu tituanak daatte ag dooglagoitte. Ag dad ooppan ee meu akka otteb ele amu, maɗ amuppa am lakkulag, amge ag aib laih am bakkalenu meppig.
13Am maɗoɗnu gamag ahak dayaknu maɗ tituanak daatte amuppa, ag anen anen eɗun, ag memetalkad dilag wanppa gona daaglagnu elele. 14Am ag oolagppanu laa nug nuhig wan meeb, nug layag, Israel ted laa, nug daden ma, uɗat medakku amu, aa nug bubuittak aib hepiɗ. 15Ag anen anen ag maɗoɗnu gamag ahak dayaknu maɗ tituanak daatte haen ganeb dayom, ukkeb ukkeb, ganeb maɗoɗnu gamag ahak dayaknu maɗ tituanak daatte baula daakku dabmenana, maɗ amuppa wan amuam eɗua, mamegnab eppegppa gokku amunu, na wan amuppa maɗ gane ee okkun daatte dabmena, daden mekkut. Laa meeb, daden mekkunu hette ele amu, nug ele anamib dabmaama meeb, laa daden mekku. 16Amu haen elab dayeb ukkeb, maɗoɗnu gamag ahak dayaknu maɗ tituanak daatte aokku dayeb amu, nug men doɗo etta tak elenu oɗ medakku. Am maɗ kuɗum iitta ukkeb, maɗoɗnu gamag ahak dayaknu maɗ tituanak daatte aokkunu daatte dayeb amu, nug men doɗo honapnu oɗ medakkunu elele. Aɗinu? Wan amu hanhan wan mamegnab, nuhig daatte amunu, danab nug wan dadennu mette, nug laa meu laala awaknu dabmette aakkuib dabmekku. 17Ag aib nug bubuittak heppig. Iitta! Ag Kayaknu ebehilag oh bodoetta le maɗ! Aɗinu? Da am Yawe, ahilag Kayak.
18Ag dahil ɗo iɗu iɗu dabmettan, pehettak dim lamidna hekkulag amu, ag wan amuppa baɗak iittappa daaglag. 19Anam hena, ag wanppan keh huana aona, ag lappeg, oolag aɗebeb, wan amuppa baɗak iittappa daaglag. 20Amge ag inam oɗ mekkulagtai, ‘Ig maɗ eblaih aɗitppa eppaknu, meu awaknu ele am aib anak daatte. Anam daatte amunu, ig amu hekkunig dayeb amu, ig maɗ amuppa aɗi lakkunig?’ aon akkulagtai. 21Ag anam akkulagtai, amu amunu nob mak am, ‘Da, Kayak, da geha maɗ eblaih laippu amuppa itadkkul amunu, wan nug heeb, ee meu huana okku. Ag maɗ ewam oh, ee amu lakkulagnu elele daakku. 22Am ag maɗ eblaih ewam ele, ag maɗ amuppa ee tumu eppanna, ag ee alag amu lakkulagib. Am tutukkunab, ag geha, ee alag amu labeppeg ukkeb, ee meu bau maɗ eblaih waɗele amuppa awaknu daakku,’ awa aum.
23⌊Am aib daulag atiom,⌋ wan amu dahilnab daatte amunu, ag wan amu aib hanhannu daden maknu meppig. Aɗinu? Wan am dahil; ag am wan laihnu danab ah daan, dahil wanppa daan, dahil uɗat hetteb.
Keeke eɗua mettak
24Am wan oh ahilag daatte, wan amu ohppa wan mameg laa nug wan maha laa meeb, laa uɗat medakkunu daden mekku dayeb amu, keeke amu hekkulahnu aa nug tituanak hekkulah. Amu tituanak nai amuppa wan mameg nug haen ganeb wan amu eɗua awa, uɗat medakkunu elele dookku, nug hekkunu elele tituanak nai amuppa dayaɗ!
25Ag lailag, Israel ted laa, nug daɗeknab daya, nug aug wan laa dadennu meeb, laa daden mekku dayeb, nug laikkud oolagppanu laa, nug daɗek amu ele tiig laippu ele, nug aug wan amu laa eppegppa dayaknu qagaiettakppanu eɗua uhuqak hekku. 26Am auntai laa nug eɗua uhuqak amu hekkunu ii daakku dayeb, wan mameg nug dadennu me, laa daden me, wan mameg amu nug elele ha, men doɗo elele awa, nug wan amu laa eppegppa dayaknu qagaiettakppanu eɗua uhuqak hekku; 27danab amu nug aun wan daden meum ele, nug nuhignu eɗua uhuqak hekkunu am nai iitta. Amu hekkunu nug wan amunu nob am maɗ gane ee okkunu dayeb ukkeb, maɗoɗnu gamag ahak dayaknu maɗ tituanak daatte bekku dabmaama, men doɗo ee oak amu elele tonaknu, men doɗo amuppa laa eppegppanu eɗua uhuqkku. Amu hak dimppa amu, wan mamegnab nug eɗua, nuhig wanppa ukka daakku. 28Amge wan mamegnab nug eɗua aokkunu elele iitta dayeb amu, am aakku danab laa nug wan mameg ma dayebeb ukkeb, maɗoɗnu gamag ahak dayaknu maɗ tituanak daatte laa dokku. Maɗoɗnu gamag ahak dayaknu maɗ tituanak daatte, maɗ amuppa amu, wan amu eɗua mamegnab eppegppa wab, nug eɗua ukka, amuppa daakku.
29Aun laa aab okkai aɗ ooppan lag laa dadennu me, daden meppig amu, nug maɗ laippu ooppa nug lag amu laa eppegppa dayaknu qagaiettakppanu eɗua uhuqak hekkunu elele; am nai iitta. Haen amuppa, dadennu meum ele, danab amu nug lag amu laa eppegppa dayaknu qagaiettakppanu eɗua uhuqak hekkunu elele daatte. 30Amge nug maɗ laippu amuppa eɗua uhuqak amu ii hekku dayeb, lag aab okkai aɗ ooppan aakku danab nuhigppan daden meum ele amu, nuhig hanhan daakku. Maɗoɗnu gamag ahak dayaknu maɗ tituanak daatte, haen amuppa amu, lag mameg tatamnu, am baula nuhig ii daama. 31Amge lag laa aab nakok laa, aɗ iitta ele, amuppa daatte, amuam keeke aab dimittim, dad okkai keeke, amubia daakku. Lag aben anamppan amu, wan mamegnab nug haen adekku lag amu laa eppegppa dayaknu qagaiettakppanu eɗua uhuqak hekkunu elele doya hekku, o maɗoɗnu gamag ahak dayaknu maɗ tituanak daatte dokku, maɗ amuppa lag amuam lag mamegnab eppegppa eɗua gokkuoitte.
32Lewi buɗub ag appalkadppan lag dadennu meppeg, laa ag daden mekkulag amu, Lewi buɗub ag hanhan lag amu laa eppegppa dayaknu qagaiettakppanu eɗua uhuqak hekkulagnu elele; ɗo anam daatte. 33Anam amunu, Lewi buɗub ag lag dadennu meppeg, laa daden mekku amu, ag lag amu laa eppegppa dayaknu qagaiettakppanu eɗua uhuqak hekkulagnu hanhan elele daatteb. Ag amu ii hekkulag dayeb amu, maɗoɗnu gamag ahak dayaknu maɗ tituanak daatte dokku, maɗ amuppa laa nug lag mameg mette ele, nug haen amuppa nug eɗua, Lewi buɗub danab medakkuoitte. Aɗinu? Lewi buɗub laulkad am ag appalkad, Israel ooppa aguppa aakku daatteb. Am ahilag keeke aakku, ag wan keeke laa iitta. 34Aria, gikkiɗah dad okkai, Lewi buɗub dilag aab taliliak daatteb, amuam ag dadennu ii memana. Aɗinu? Wan amu, ⌊am aab amu ele laippu daattep, wan amuam aab amuppan danab, Lewi buɗub, ag oh uɗat mettaglagnu elele,⌋ am wan amu hanhan Lewi buɗub eppelagppa daakkunu daatte.
Maɗi nid, maɗi ah ele, ag eɗun anam ii daamnanu ɗo
35Ag lailag, Israel ted laa, nug ag oolagppa dayebeb, aɗi uug beeb, daɗek ma, nug ee keeke aokkunu ib iitta daakku dayeb, nug tuɗid ag oolagppa daakkunu, ag wan laihnu danab ehanidtteb, o ag danab laa nug wan laappan uɗia, haen tutuib dayak danab ehanidtteb, amubia ag laa daɗek meum amu, nuhignu heig! 36Na laa lon mettana, na lonnu intres aib aome. Iitta! Na Kayaknu ebehin oh bodoetta le maɗ! Na anam heppe, na layap, Israel ted, nug na, amu nahipad danab ah ele oolagppa daakkunu elele dayeb daaglag. 37Na layap laa nahip-ppanu lon aokku dayeb amu, na lonnu intres ii aokkutoitte. Nug nahip-ppan ee daden meeb amu, na aib men doɗo daden meme ele, amu etta tak, eɗua ele medakkunu heme. 38Da am Yawe, ahilag Kayak. Da ag Isipnu diie, omalatti, Kanan wan madakkulnu uɗippig. Da ag Isipnu, ahilag Kayak daakkulnu diimi.
39Am na layap, Israel ted laa, nug daɗeknab daya, nug nukka nug nahip maɗi nid daakkunu heeb, na daden mekkut dayeb, na nug begbeg maɗi nidnab bia aib hettame. 40Iitta. Na nug uɗat nid bia, o na danab laihnu uɗiak, ag oolagppa daatte bia nuhigppa he! Amge ib amuppa nug nahip uɗat heeb ukkeb, maɗoɗnu gamag ahak dayaknu maɗ tituanak daatte aokkun daatte. 41Haen amuppa nug bekkod ele ag nahipad maɗi nid maɗi ah ele ii daan, ag eɗun, ahilkad aab ikki, amu mamelkad aɗi aulag wanppa gokkulag. 42Aɗinu? Israel danab ah amu, ag dahil maɗi nid maɗi ah ele daatteb. Da ag Isipnu diie uɗimi. Ag ag laa dilag begbeg maɗi nid daaglagnu, ag maadppeg iinab daden maadkkulagoitte. 43Aibnab oo doyak ii doyaya hakppa nau hadappig. Iitta! Ag Kayaknu ebehilag oh bodoetta le maɗ!
44Am ag begbeg maɗi nid laate, o begbeg maɗi ah laate aoglagnu oolag dayeb amu, ag wan laala, ag taliliadna daatteb amu, ahilagppan daden mattan diiglagnu daatte. 45Amu ag wan laihnu danab ah ag uɗin, ahilag wanppa daatteb, aria huu amunu aab ikki anen anen ag ahilag wanppa daanna, nid menuatteg dotteb amu, ag Israel ag amu oolagppan ele ahilkad maɗi nid daaglagnu daden mattaglagnu elele. Ag daden madappeg, ag ahilag aakku daaglag. 46Ag ahilag daappeg, ag Israel, ag mauhak haen miag dob, ag heppeg, begbeg maɗi nid maɗi ah amu ag ag bekkalkad dilag daaglag. Danab amu ag hanhan ahilag begbeg maɗi nid daaglag, amge Israel danab ah, ag lailkadnab amu, ag ahilagnu oo doyak ii doonna, nau hattak ii hekkulagoitte.
47Am wan laihnu danab, o wan laappanu uɗia, haen tutuib dayak danab ag uɗin, ag oolagppa daatteb, amunu laa, nug enub okkai ele awa daakkutai, amu na layap, Israel ted laa, nug daɗektai ba daakkutai. Anam dayeb amu, daɗek amu nug nukka nug heeb, wan laihnu danab daden meeb, o wan laihnu danab, danab amunu aab ikkinu laa nug daden meeb, nug danab amu maɗi nid daakku dayeb, 48amu nug begbeg maɗi nidnu qagaiettakppanu eɗua uhuqak aokkunu elele. Nug tiig laippu laa nug begbeg maɗi nidnu qagaiettakppanu eɗua uhuqak hekkunu elele. 49Amuam nug mameg laa, o awag, o amag laa, o aun laa tiig laippu daatte amu, nug nug eɗua uhuqak amu hekkunu elele. O danab amu, nugnab elele ha, men doɗo elele aokku dayeb amu, nug nukka begbeg maɗi nidnu qagaiettakppanu eɗua uhuqak hekkunu elele. 50Am laa nug nid amu maɗi nid dayaknu qagaiettakppanu, en mettakppa uhuqkku amu, nid maɗi nid daatte amu, laa nug daden meum ele, aa maɗi nid amu laanu maɗi nid beum ukka, maɗoɗnu gamag ahak dayaknu maɗ tituanak daatte dokku batak am maɗ gane dooya, nid laa nug okkai amunu uɗat nid dayaya, uɗat haaha, men doɗo maɗ amu oh aolo amu dooya, nug maɗ anen anen gane aolo ele dooya, maɗ gane gemu ukkeb, maɗoɗnu gamag ahak dayaknu maɗ tituanak daatte bekkunu daatte dooya, men doɗo awaknu uɗat nid nug melemel amuppa men doɗo maɗ ebqak amuppa gane aolo dooya hepeɗ, laa nug nid amu maɗi nid dayaknu qagaiettakppanu en mettakppa uhuqkkunu hette amu nug nid amu mameg men doɗo anam medakku. 51Am maɗ kuɗum ukkeb, maɗoɗnu gamag ahak dayaknu maɗ tituanak daatte dokku dayeb amu, nug en mettakppa qagaiettakppanu eɗua uhuqak aokkunu nug men doɗo okkai daden hekku. 52Am maɗ kuɗum ii uueb, maɗoɗnu gamag ahak dayaknu maɗ tituanak daatte dokku dayeb amu, nug en mettakppa qagaiettakppanu eɗua uhuqak aokkunu nug men doɗo honap daden hekku. 53Danab laihnu uɗiak, ag oolagppa daatteb amu, ag uɗat nid onilagppa eeg, ag uɗin uɗat maɗ laippu hetteb, ag amu dilagppa attem attem hetteb, amubia ag ahilkad maɗi nid, Israel dilagnu, ag anamib hekkulagoitte. Ag aib uuppeg, wan laihnu danab ele laa, nug Israelnu maɗi nid laanu oo doyak ii doyaya, nau hettom.
54Am Israel ted laa nug maɗoɗnu gamag ahak dayaknu maɗ tituanak daatte, nug maɗ amu ii nak haenppa nug begbeg maɗi nidnu qagaiettakppanu eɗua uhuqak aolo, amge ii uhuqak daakku dayeb amu, maɗ amuppa ag heppeg, nug, nid nuhikkud ele oh ag haen amuppa uhuqak daaglagoitte. 55Aɗinu? Israel danab ah ag dahil maɗi nid maɗi ah ele daatteb, da ag Isip wanppanu diie uɗimi. Da am Yawe ahilag Kayak.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.