Lewitikas 24
24
Goɗen ena, bret ele Yawe noobppa dayaknu
1Amu Yawe Nug ⌊mana mettak danab ag hanhan tueb lam amotkkulagnu⌋ Moses amegppa aum. 2“Na Israel danab ah amelagppa haknunab nai imu appe doyeg!” awa aum. ⌊Nug anam a amu, Moses nug Israel amelagppa inam aum.⌋ “Lam maattak balalppa lam daatteb ⌊tuqan⌋ hanhan eoglagnu appe, ag olip goɗen ena lamppa noaknu akkan uɗieg! 3Lam amunu amu, Aron nug geha mettid haknu peh lag danab ah appa qagmetteb ele, lag amu ooppa, Oo Gun Ele, Oo Gunnab Ele makkulaknu lamen heqo laih Oo Gun Eleppa appa bappalatta, nug Yawe noobppa, amahlak amu tuɗid ele tuebnu ukka buttua eon amahalkkulagnu, nug dabmadatta atognoatta bappaladkkuoitte. Ɗo imu ahilagnu hanhan, buɗub buɗub doobob dayebeb, ag ɗo imu aɗan autna aon, dim lamidkkulagoitte. 4Am nug lam, ag lam maattak balal gol ena dubuttid iitta eleppa hak daatteb amu, nug Yawe noobppa tuɗid ele bappaladkkuoitte,” awa aum.
5⌊Amu Yawe tuɗitta aum.⌋ “Amu ele, na 12 kilogram plaua enanag aon, bret batappatak 12 manakkutoitte. Na bret anen anen 1 kilogram plauappa hekkut. 6Bret amunu amu, na Yawe noobppa balal, gol ena dubuttid iitta eleppa hak, huu yaak aɗit anen anenppa, eblaih laippu ele maadkkut. 7Amu na prankinsens ena dubuttid iitta ele amu, na amu aon, ⌊kap aɗit nakok golppa hak eleppa inan,⌋ huu yaak aɗit amu guguittak maatkkut. Prankinsens amuam bret laa oh ou daakkunu, ag manan Yawe mettaglagnu daakku. Amuam Yawe mettaknu aab aɗunu ofa aakku. 8Sabat deɗ ohppa bret amu, Yawe noobppa anam mak daakkuoitte. Bret amuam, Yawe he, Nug ag Israel, ag ele hanhannu nug tituanna nai qagappignu at aakku. 9Bret kunum amu oh am Aron, nug buɗuppan danab ele aakkuib, ahilagnu daatte. Ag aben Kayaknu tituanak daatte ele, ag amuppa daanna lakkulagoitte. Aɗinu? Bret kunum amu, ag Yawe mettaknu aab aɗunu ofa ohnu laa aakku; amu mana mettak danab ag mana mettak amuppanu maha, ahilag ee daakkunu aoglag. Amu bret kunum imu, am maha amunu maha laa aakku; am Yawenu tituanaknab daatte,” awa aum.
Bu mettak laa epeɗia elele hak kobol dim lamittak ele
10Amu deɗ laa danab laa, nug anig am Israel ted, mameg am Isip ted, nug Israel ted danab laa ele, aa haen tutu dayaknu aab kalakppa daayya, aa nug qepiɗ. 11Nug qak ooppa, Israel ah, gamu Isip ted, nug bekka, nug Israel ted baeg qa, nug Yawe eheɗ laa awaknu anak waappa daakkunu aum. Yawenu nai aum, amuppa nug Yawenu dabittak nai mattiom. Nug anam heum amunu, ag danab amu Moses toppa ⌊hettoɗiak hekkunu⌋ aon goppig. Nug anig am onig Selomit. Nug am Dibri aɗeg, Israel dilag huu okkai laa Dan, amuppanu. 12Ag danab amu aon, maniguittakppa meeg dayeye, nuhigppa aɗi hekkulagnu Yawe ippuanatteb hekkulagnu daappig.
13Ag anam heeg ukke amu, aakku Yawe Nug Moses amegppa aum. 14“Laa nug dahilnu dabittak nai aum amu, ag nug aon, haen tutu dayaknu aab kalak dimittim gona appeg, aun aɗi ag nug nai aawo dooppig ele amu, ag eppelag igippa meppeg, tamaniak oh ag nug menppa oppeg mauhaɗ! 15Ag anam hena malappeg amu, na Israel danab ah appe doyeg!
‘Aun laa nug nuhig Kayak, Nug eheɗ laa aokkunu anak waappa daakkunu akku amu, nug eheɗ aakku ha, nug amunu bu aokku.
16Ao, aun laa nug Yawenu dabittak nai akku amu, ag nug qeppeg mauhaɗ! Israel dilag tamaniak oh ag nug menppa makkuɗkkulag.
Nug Israel ted laate, iitta wan laihnu danab laatai, nug Yawenu dabittak nai akku dayeb amu, ag nug qeppeg mauhaɗ!
17Aun laa nug danab o ah laa qeeb mauheb amu, ag laa amu heum qeppeg mauhaɗ! 18Aun laa nug laanu doɗ qeeb mauhkku, nug eɗua nob mekkuoitte. Nug doɗ qe mauhom amunu, nug doɗ bau laa, doɗ mauhom aben aokkunu, doɗ mameg eɗua nob medakkuoitte.
19Aun laa nug danab laa guittak medakku amu, ag nug laa guittak mettom bia mettaglagoitte. 20Nug laa ebehite makkulom dayeb amu, ag nug ebehi makkulkkulagoitte. Laa nug laanu ameg heeb nauhkku dayeb, ag nug ameg heppeg nauhaɗ! O nug laanu aeg heeb qiikku amu, ag nug aeg heppeg qiiaɗ! Laa nug laa guittak attem attemnab mettom, amubiaib ag nuhigppa eɗun nob mekkulagoitte. 21Aun laa nug doɗ laanu qeum dayeb, amu nug eɗua nob elele medakkuoitte, amge ag laa nug danab laa qe mauhom amu, ag nug qeppeg mauhkkuoitte. 22Ɗo dim lamittaknu imu am, Israel danab, wan laihnu danab ele, ahilag ohnu daatte. Aɗinu? Da am Yawe, ahilag Kayak.’ ” Yawe Nug anam aum.
23Yawe anam a, Moses nug Israel amelagppa a, ag danab nug Yawenu dabittak nai aum ele, ag nug omalna, haen tutu dayaknu aab kalak dimittim gona, ag menppa oeg mauhom. Yawe Nug Moses amegppa anam haknunab aum bia, ag heppig.
Currently Selected:
Lewitikas 24: NB
Highlight
Copy
Compare
Share
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
