Aisaia 4
4
1Haen amuppa geha ah eblaih aɗit ele ag danab laippu laa aɗaglag.
Ag aɗan, ag inam amegppa akkulag. “⌊Ig igakka nug gumat daagnignu elele.⌋ Ig igakka, anen anen ee ihinig latata, amu ig igakka anen anen lamen ihinig ele takkagnig.
Amge ig am danab laa ii aomut amunu, ig uɗa nak nau guittak ele doottem.
Anam amunu, uɗa nak nau guittak ele amu iitta mekkunu amu, na ig gamunig daakkutnu oɗ medattem,” aon akkulag.
Yawe Nug heeb, Israel ag eɗun, genab tutukku daaglag
2Aria haen amuppa amu, Yawenu wan, am Israel amu, wan amuam aben anttaknu enanag, onig binag oppiaawak ele daakku. Am geha wanppanu ee meulkad ena huan obeppeg, Israel danab ah qagaiettaknu ii mauhppig daatteb, ag amu oh anidna, diig amunu ag oolag gamag huan ahebeb, danab ah laa ag binalag mekkulag. 3Amu inam bekku.
Danab ah Sion daatteb,
aun aɗi ag Jerusalem daatteb,
Yawe Nug ag bau daaglagnu tituanattom amu, danab ah laa ag ahilagnu, “Ag am Yawenu oppiaawak ele daatteb,” aon akkulag. 4⌊Danab laa ag Israel danab dilagnu, “Ag am Yawenu, oppiaawak ele,” akkulagnu diig am,⌋ Naɗi Nug nuhig ɠagattagppa Nug danab ah amu epeɗiatta, bappalatteb, ag Naɗinu, oppiaawak ele bena daan oiglag. Ib amuppa Naɗi Nug Sion ah oolagnu dubuttid, oolagppa aɗak daatte amu, Nug amu oh iha, oppieb ukkeb, Nug Jerusalem danab ag laa aqaeg mauhppig, ag beɗulagppa aab ele, Nug aab amu oh iha, oppieb gokku. 5Amu Yawe Nug ⌊anukka lombigppa dayaya, Nug Israel Isipnu omalatta uɗiom bia,⌋ Nug heeb, lombig am Sion qaukoppa dayaya, tonakku. Amunppa amu, lombig boppala daakku, tuqan amu, lombig amuam aab bia eokku. Am danab ah ag mettid hekkulagnu qagmeppeg, lombig nug na, ahilagppa boppalkku. Aɗinu? Yawenu binag amahlak oppiaawak ele, binag amahlak oppiaawak ele amuam keeke amu oh tonatta, piag bia daakku. 6Amu Yawenu binag amahlak oppiaawak ele amuam Sion toneb, aamnu gakkaɗak ɠagattag qehakkebeb, danab ah ii aqama. Amu gu, ulah, hakkaɗ ele huana heebeb, haen amuppa ele Jerusalem danab ah ag qagaiettak ii anidmana. Iitta. Ag ena daaglag.
© (Active), Wycliffe Bible Translators, Inc. All rights reserved.