Aisaia 2
2
Yawe Nug danab ah oh dayak ena madakku
1Yawe Nug Juda danab ah oh, laa Jerusalemnu, laa Juda wanppa laih laihnu amu, Nug amu dilagnu aɗi bekkunu Amos bekka Aisaia miagib ippunittom amu, ippunittak amunu nai ⌊laa⌋ am iikku. 2Qauko laa, Yawenu mettid lag qauko amuppa daatte amu, deɗ laa dimppa,
Yawe Nug heeb, qauko amuam qauko laa oh eɗattak daakku.
Ao, Yawe Nug heeb, qauko amuam qauko nakok laa oh eɗadkku.
Amu geha danab ah kuɗumnab, wan atu ohppanu ag appa ⌊qagmekkulagnu⌋ uɗiglag.
3Danab ah huu kuɗumnabppanu geha ag ahan uɗin,
akka akka mattin akkulag.
“Yawe Nug nuhig ib ig ippunigkkunu, ig nuhig ib dim lamidkkunignu amu, doppeg,
ig Yawenu qaukoppa tetu!
Ao, ig Jakopnu Kayaknu mettid lag, ig amuppa gotu!” aon akkulag.
Aɗinu ag anam akkulag?
Yawenu ɗo nai am Sion appanu aha, tuala gokku.
Yo, Yawenu nai Jerusalem appanu aha gokku.
4Am Yawe Nug geha wanppan wan ohnu danab ah dilag nai doya mala, hettoɗia epeɗia, elele medakku.
Ao, Nug geha wanppan wan anen anen oh dilag nai bappaidkku.
Nug anam hekku, amu danab ah buɗub ohnu ag ahilkad qep elab aon heppeg, wan buuaknu aen laa daaglag.
Ao, ag ahilkad ban lat heppeg, eɗun ad eppeg babaittaknu aen daaglag.
Wan laappan danab ag ahappeg, wan laappan danab ele baula ban ii hemana.
Ag ban hak sul ele baula ii hemana.
5O Jakop buɗub, ag doppeg, ig Yawenu ib amahlak ele,
ig amuppa teta oitu!
Kayak Nug heeb, enaen mak danab ag honap nekkulag
6⌊O Yawe,⌋ na nahipad danab ah, ag Jakop buɗub amu,
na ag uuadna dimattame.
Aɗinu?
Nahipad danab ah ag danab ah aam bedeppanu dilag dabmak hambuppuak aoeg, ahilagppa ambeum.
Ao, danab ah nahipad ag Pilistia danab ah dilag eman hak kobol aon, ag amu hetteb.
Ag danab ah Yawe ii dim lamidtteb ele laippu oinna hetteb.
7Wan ahilagppa silwa, gol ele am ambak.
Amu en ele huanak, okkai ahilagppa daatte.
Wan ahilagppa hos am ambak.
Amu bannu karis ele am kuɗum, huanak ahilagppa daatteb.
8Am laa ele, nahipad danab ah ag eppelagppa keeke dottolkad kuɗum hadattappig amunu,
wan ahilagppa kayak hambuppuak amu ag ambeppig daatteb.
Danab ah ag eppelagppa keeke dottolkad heppig amu, ag amu noolagppa dup notteb.
Ag eppelag doɗoppa amu heppig amu, ag amu noolagppa dup notteb.
9Danab ag dottolkad amu noolagppa dup nona binag metteb.
Ge! Danab ag nigul amu noolagppa dup nona, ikkilag wan yaatte.
⌊O Yawe, nahipad danab ah ag kobol amu ii uunna,⌋ ag na ahilag hipunin uhuqna madakkutnu ib oo netteb.
10⌊Anam amu, qinob ag dabmak genab iitta dim lamidna,⌋ Yawenu oppoɗi bak tonadmanu, Yawe Nug dagom onig ɠagattag okkai naɗi ele, nuhig ɠagattag amu aqadmanu, ag oolna gona, men oɗeppa nokkulag. Yo, ag wan oɗeppa gokkulag. 11Amu Yawe Nug anam uɗia, Nug beɗuppa tak danab oh onilag qeeb nekku. Nug heeb, dada danab ag nena qekkulag. Yawe Nugib haen amuppa onig okkai, binag ele daakku.
12Yawe Nukka Ɠagattag Oh Ele, Nug haen tituanom daatte, amu haen amuppa Nug epeɗiak uɗat okkai hekku.
Nug epeɗiak haaha, dada danab ah onilag qeeb nekku.
Haen amuam dada danab ah oh dilag epeɗiaknu haen.
Am keeke ⌊hamu⌋ oh, danab ah ag amunu enanag doon, gamalag ahatte ele epeɗiaknu haen ele.
13Am Lebanonnu ad sida elab elab ena ena ohnu epeɗiaknu haen,
Distrik Basannu ad ok ohnu epeɗiaknu haen ele.
14Am qauko okkai okkai ohnu epeɗiaknu haen,
Qauko nakok, amge nakok okkai oh elenu epeɗiaknu haen ele.
15Am lag attan ta ukkak menppa hak oh aab okkaippa daattebnu epeɗiaknu haen,
Aɗ ɠagattag ohnu epeɗiaknu haen ele.
16Am Tarsisnu uub okkai okkai oɗiaknu en maotteb ohnu epeɗiaknu haen,
Uub ena ena oh elenu epeɗiaknu haen ele.
17-18Am haen amuppa Yawe Nug beɗuppa tak danab tabatteb nona, uɗalag nekku.
Ao, haen amuppa Yawe Nug dada danab ah onilag qeeb nekku.
Nigul oh danab ag binalag metteb amu, ag oh iitta mekkulag.
Yawe Nugib haen amuppa onig okkai, binag ele daakku.
19Haen Yawe Nug wanppanu keeke oh eheɗ hahaɗkkulagnu aha heeb, danab ah ag Yawenu oppoɗi bak tonadmanu,
Yawe Nug dagom onig ɠagattag okkai naɗi ele, ag nuhig ɠagattag amu aqadmanu,
ag oolna gona, men oɗeppa nokkulag.
Ao, ag wan oɗeppa gokkulag.
20Haen amuppa danab ah ag geha ahilkad kayak hambuppuak dottolkad golppa, silwappa ele hak, ag amu noolagppa dup nona binalag mekkulagnu eppelagppa heppig,
ag dottolkad amu oh geha agappeg, tog, meɗeb ele daattebppa gokkulag.
21Haen Yawe Nug ha, wanppanu keeke oh eheɗ hahaɗkkulagnu aha heeb, danab ah ag Yawenu oppoɗi bak tonadmanu,
Yawe Nug dagom onig ɠagattag okkai naɗi ele, ag nuhig ɠagattag amu aqadmanu,
ag oolna gona, men oɗeppa nokkulag.
Ao, ag buttuɗppa gona, amu waappa daaglag!
22Danab oh ag wanppa haen elab ii daatteb, ag haen tutuib daan mauhtteb, ag danabib daatteb amunu, ag danab laanu, nug ag ehanadkkunu aib oolagppa genab dooppig.
© (Active), Wycliffe Bible Translators, Inc. All rights reserved.