Hosea 9
9
Hosea Israel bu aoglagnu daattenu nai aum
1O Israel danab ah, ag aib gamag ahak dooppig.
Ao, ag laa gamag ahak okkainab dootteb amu, ag gamag ahak amubia aib dooppig.
Aɗinu?
Ag ahilag Kayak ag ippuanattom bia Nug dim lamidkkulagnu uun hena, ag kayak hambuppuak dim lamidtteb;
ag ib baag ah nug ee aeg mumuɗaknu abenppa uɗat nuhig haaha, men doɗo awa, gamag ahak dootte, amubia ag kayak hambuppuak dim lamidkkulagnu gamag ahak doon, kobol amunu ag oo mauhak dootteb.
2Ag amu hetteb amunu, geha ee, wain ele ag lakkulagnu am tutu daakku; ag elele iitta daaglag.
Yo, geha wain bau ag lakkulagnu am ii daama.
3Ag geha Yawenu wanppa ii daamna. Geha Israel danab ah ag Isip eɗun gokkulag.
Ao, ag geha Asiria gona, appa ag ee ii lanaknu epeɗiak daatte lakkulag.
4Wan amuppa ag wain gokkaɗaknu ofa ii hemana.
Am ahilag aab aɗuppan mana mettaknu amu, Kayak Nug ena ii dooma.
Mana mettak amu, ag hekkulag dayeb amu, ag am laa mauhe, laa nug mauhom gaɗa aɗa, maɗappa dayaya, ee awa, huppu nakok la, ee ii laum daatte am laa dilagnu ee ii lanaknu epeɗiak aakku daatte, laa aib laum.
Laa aib laum, amge laa lakku dayeb, nug Kayak ele ouqa dayaknu elele iitta daakku amu, mana mettak amu ag am danab amubia daaglag.
Aun aɗi ag mana mettak amu hewona, mana mettak amuppanu ee lakkulag amu, ag Kayak ele ouqa dayaknu elele iitta.
Aɗinu?
Ee ahilag am ag beɗulag ehanittaknu ee aakkuib daakku.
Ag aon gona, Yawenu mettid lakka appa manan, Nug mettaglagnu iinab daama.
5Anam amunu, hobul dayaknu haen epeɗiak, haen amuppa ag aɗi hekkulag?
Ao, ag Yawenu qagmak gamag ahak elenu deɗppa, ag aɗi hekkulag?
6Aɗinu? Antte! Asiria ban danab ag laala ii aqaglag dayeb amu, geha Isip ag diiglag.
Ao, Isip ban danab geha ag diin gona, Mempis maadppeg, appa ag mauhppeg boumadkkulag.
Ag geha ippa ahilag wanppa ii daamna, geha uud keeke qaun ele bena, ahilag en, silwappa hak, teguadkkulag.
Ao, keeke qaun ele geha ag laulkadppa bekkulag.
7Israel dilag bu awak haen aakku uɗitte.
Ao, ahilag nob awak haen aakku uɗitte.
Israel danab ah ag amu doyeg!
Ag Israel, ag hipunin kuɗum henana;
ag Kayak, nuhikkud danab ele dilagnu kekeɗ mattan daatteb amunu,
ag propet dilag, “Ag am ootot,” atteb.
Ao, danab Kayak Ouɗi ehanatte, ag nai maditteb ele, ahilagnu ag, “Ag kaaka,” atteb.
8Propet ag Yawenu ehanittakppa, Israel dilag aɗi uɗitte anittak danab daatteb. Ag anam daatteb me, Israel danab ah ag propet ippulag ohppa pelem metteb.
Ao, ahilag Kayaknu mettid lag, amuppa ele, danab ah ag propet dilagnu kekeɗ metteb.
9Am dahilad danab ah ag kobol diig ena iitta uɗig oak ele anukka Gibea appa danab ah heppig bia hetteb.
Kayak Nug nau hak ahilag ii daug atima. Nug genab, geha ahilag hipuninnu bu madakku.
10Yawe atte. “O Israel, digmakppa haen da ag anadmi, da ag atu taɗakppa grep meu anttak bia, enanag anadmi!
Ao, haen da ag mamelkad aɗi anadmi, ag ad fig meu tatam oɗutte, amubia da enanag anadmi!
Amge haen ag Peor appa teppig amu, ag keeke danab ag eppelagppa hoyadppig ele, keeke uɗa nak ele, am kayak hambuppuak Bal aakku, ag akka ag da gumiɗna daamnanu awaidna, keeke amunu daaglagnu, ag akka ag nuhig tituanak daaglagnu anana, ag nug noobppa dup nona binag meppig.
Ag amu hena, keeke uɗig oak ele eppegppa hoiyak,
ag amunu oolag mauhe, ag keeke amubia beppig.
11Israel dilag binag amahlak oppiaawak ele, am ai laa hagagaɗa gotte bia gokku;
ag nid ii menuadmana, nid ag laulkadppa ii daamna, ag nidnu oolag ii noma.
12Ag nid ii menumna, me ag menuadlob amu da heppi, oh iitta mekkulag.
Haen da dimadattem amu, ahilagnu am gadonnab gadon.
13Da Israel, Tair bia anttaknu enanag daye anidmi;
amge gemu amu, keeke naunab Israel danab ah dilagppa bekku. Geha kekeɗ ag nid ahilkad aqaglag.”
Yawe anam awa atte. 14O Yawe, nahipad danab ah dilagnu amu, da ahilagnu aɗi na oɗ medakkul? ⌊Uug naunab nau nid dilagppa bemanu amu,⌋ da ah ag nid ii menuadmananu, huh leppulkad ele iitta daaglagnu, da amunu oɗ medakkul.
15Yawe atte. “Israel dilagnu amu, ag Gilgal appa hak nau huanak heppig amunu, appa da digmein, ahilagnu oolppa uuaknab doomi.
Ge, da geha ag, ahilag hipunin amunu, da laulppanu lamadppi ahaglag.
Da geha ahilagnu tuɗitten, ool ii hema;
ikki danab ahilkad oh ag am nai tappe nak danab.
16Israel danab ah ag uug naunab nau ooppa daatteb, ad oɗe ele bia.
Ao, ag ad laa diɗi qaɗaiette, bunaɗkkunu daatte, ag amubia daatteb.
Ge, ag ad meu ii otte bia daatteb.
Amunu Israel danab ah ag nid iitta ele daaglag, me ag nid ele menuadlob amu da geha heppi, nid amu ag ahilagnu oolag huana hette ele, ag mauhkkulag.” Yawe anam atte.
17Israel danab ah ag Kayak dahil oɗe dim ii lamidppig amunu, geha Nug ag geɗadkku. Ag am geha qati qati oiyak danab ah bena, ag appalag diig iitta, wanppan wan laalappa anam daaglag.
© (Active), Wycliffe Bible Translators, Inc. All rights reserved.