Eksodas 5

Moses, Aron ele aa Paro toppa gopiɗ

1Aria, amu dimppa amu Moses, Aron ele aa Paro gumidya goya apiɗ. “Yawe, Nug ig Israel, ihinig Kayak, Nug atte. ‘Na dahil danab ah uuadppe, ag da dabmeɗanna qagmak gamag ahak ele hekkulagnu atu taɗakppa ukkeg!’ Yawe Nug anam atte.” Aa Paro amegppa anam aoya apiɗ. 2Aa anam apiɗ, amge Paro nug aum. “Yawe am aun? Genab, Nug am aun amunu, da nuhig nai doyen, Israel danab ah uuadppi gokkulag? Yawe amu, da Nug ii doottem amunu, da Israel uuadppi iinab gomana,” awa aum. 3Nug anam a amu aa apiɗ. “Kayak, Nug ig Hibru danab, ihinig Kayak amu, Nug ihinihppa na, Nug ig inam hekkunignu aum. Ig atu taɗak ooppa gokkunignu amu, ig deɗ ewam oit oit gokkunig. Ig gota, aben ig tekkunig ele, ig appa doɗ mait, Yawe mettagnig. Nug am ihinig Kayak. Na ig uuigppe gokkunignu atte. Ig gota, nuhignu anam ii hekkunig dayeb amu, Nug heeb, ig oɗe nau danab kuɗum aqe mauhtteb digdig aognigtai, o banppa eheɗ nauhkkunigtai,” aoya apiɗ. 4Aa anam apiɗ, amge Isip dilag king nug Moses, Aron ele amelahppa aum. “Aa hepeɗ, danab ah ag uɗat uuglagnu am, aɗin hettep? Aa paha eɗuya, uɗatppa ukkeɗ!” awa aum.

5Aria, Paro nug anam Moses, Aron ele amelahppa awowa, nug inam dabmeum. “Antteɗ! Israel ag kuɗumnab appatna, huanak daatteb, am gemu aa aɗinu ag uɗat uun, hamu daaglagnu hettep?” awa dabmeum.

6Am deɗ amuppaib Paro nug Isipnu uɗat gumak danab nau oo doyak iitta ele, amu Israel buɗubppanu danab laala, ag Isipnu uɗat gumak danab amu waalagppa daappig, amge ag ele gumak uɗat amu heppig amu, nug ag oh amelagppa inam aum. 7“Ag brik aoɗmananu gikkiɗah bunaɗak aon, Israel brik hekkulagnu madatteb, amge ag gemu digmena, anam aib heppig! Israel ag akka gona, brik hekkulagnu gikkiɗah aweg! 8Ag akka aoglag, amge ag briknu ebqak hanhan hetteb bia anamib hekkulag. Ag aib heppeg, briknu ebqak amu tutu meum! Iittanab iitta! Aɗinu? Ag uɗat elele ii hetteb amunu, aakku ag, ‘Uuigppe ig gota, ig doɗ mait, ihinig Kayak mettagnig,’ atteb. 9Danab ah imu ag uɗat hik awak ele iitta henana, ag nai hambuppuak, meu iitta ele ii dabmemananu ag uɗat kuɗum, ɠagattag ele matteg!” awa aum.

10Paro nug anam a amu, Isipnu uɗat gumak danab nau oo doyak iitta ele, am Israel buɗubppan gumak danab ele ag Israel gumadna gona, amelagppa appig. “Paro nug aum. ‘Da appi, laa ag gikkiɗah baula aon ii mattamna. 11Ag akka gona, gikkiɗah adeppa adeppa mattin anidna amu, ag appanu aweg! ⌊Amge ag brik ebqak aɗa nak hekkulagnu aib dabmeppig.⌋ Iitta! Ahilag uɗat ɠagattag hak dayom, anamib daakku; nakok laa iinab bodoettama!’ awa aum.” Ag Israel danab amelagppa anam aeg dooppig. 12Anam daye, aria Israel danab ag akka brik hekkulagnu gikkiɗah bunaɗak mattin, qagmena akkan uɗiglagnu Isip dilagppa aben ohppa goppig. 13Amu Isipnu uɗat gumak danab nau oo doyak iitta ele ag Israel tappaɗadnana appig. “Ag deɗ anen anen ohppa uɗat gane hekkulagnu daatte amu, ag amu anam hekkulagnuib heig! Ig gikkiɗah aot mattautut heppig bia heig!” aon appig. 14Amu Isipnu uɗat gumak danab nau oo doyak iitta ele ag gona, Israel buɗubppan gumak danab, uɗat hekkulagnu epeɗiadppig amu, ag ag makkuɗadnana appig. “Attem daye ag gemu, tumai ele briknu ebqak elele, haen oh heppig bia ii heppig?” aon appig.

15Ag anam heeg amu, Israel buɗuppan gumak danab ag Paro gumidna gona, amegppa appig. “Aɗi diignu na ig, nahipad begbeg maɗi nid, na ihinignu kobol inam hettem? 16Ag ig gikkiɗah ii megatteb, amge ig brik kuɗum hekkunignu amenigppa atteb. Amuib iitta. Ihinig gumak danab amu, ag ig oigtteb, amge ⌊ig brik elele ii hettem,⌋ amunu diig am ig beɗunigppa iitta. Ig eheɗ laa ii hemut. Amunu diig am nahipad maɗi nid, akka ahilag, ag beɗulagppa,” aon appig. 17Ag anam aeg amu, Paro nug ag amelagppa aum. “Ag uɗat elele ii hetteb. Ge, ag uɗat elele ii hetteb amunu ag, ‘Ig uuigppe gota, ig doɗ mait, Yawe mettagnig,’ atteb. 18Ag paha eɗun gona, ahilag uɗat heig! Laa, ag gikkiɗah ii mattamna, amge ag brik hekkulagnu, ebqak gane hekkulagnu amelagppa matu appig amu, ag anamib heig! Ebqak amu aib aɗappeg, honap neum!” awa aum.

19Am Israel buɗubppan uɗat gumak danab ag Paro nai anam a doon, ag briknu ebqak heppeg, honap ii nema amu doon, aakku ag dooppig, gemu ag uug naɗi qaɗelagppa beum. 20Amu ag Paro gumidna gona nai doyona, ag eɗun uuidna, ag Moses, Aron ele, aa ag uɗiglagnu amelag meya daapiɗ amu, ag aa uɗalah teppig. 21Ag uɗalah tena, ag aa amelahppa inam appig. “Yawe Nug ahilah kobol andatta, bu matakkunu oonig daatte. Aɗinu? Aa heeh, Paro nug nuhikkud ehanittak anuqak danab ele ag ihinignu, ig am keeke naunab nau bia dooigtteb. Ib aa hepiɗ amu, ib amuam Paro, nuhikkud ehanittak ele ag ig iqappeg mauhkkunignu ib,” aon appig.

Moses nug Yawe, “Aɗinu na anam hettem,” oɗ mettom

22Ag anam aeg amu, aria Moses nug eɗua, Yawe gumitta ukka, nug aum. “O Naɗi, aɗi diignu na nahipad danab ah inam eheɗ nau hadattem? Na aɗi diignu he, da ippa uɗimi? 23Haen da digmein ukke, nahip nai oh Paro amegppa ami, uɗie uɗie, gemu batak, nug danab ah imu eheɗib hadatte. Amu na ehanatte, ag keeke laanu qagaiettakppa ii daamnanu, laa ii heme,” awa aum.

Currently Selected:

Eksodas 5: NB

Highlight

Copy

Compare