Epesus 2
2
Kristen ag Kristusnu uɗat okkaippa bau daatteb
1Ag anukka oittappig amu, haen amuppa ag hipunin digdig heegeg, Kayak ele oolag laippu ii oinna, mauhak bia daattappig. 2Haen amuppa ag wan imuppan kobol nau, ouɗi nau ikkilag Satan ele dim lamidppig. Gemu ele danab ag Kayak oɗe ii dim lamidtteb amu, ag Satan waappa daatteb. 3Ig oh anamib anukka daamut, amu haen amuppa ig dabmak geha iikkunu aakkuib dim lamidmut. Ig beɗunig, amu ihinig dabmak ena iitta ele, aa aɗi apiɗ ig hettamut amunu, ig danab laa oh ele amuppa Kayaknu oppoɗi bak ig iqakkunu elele daattamut. 4Amge Kayak, Nug ihinignu oo mauhak okkai dootte ele, Nug oo gai-iitta doya oo metta ehanittak kobol okkai ele dim lamidtte amu, 5haen ig hipunin heta, mauhak bia daatta, Kayak ii dim lamidttamut ele, haen amuppa Kayak Nug Kristus maɗette ahe, ig ele bau mekkom. Nuhig ehanittak okkai hamu megatte amuppa aakkuib Kayak Nug ig eɗua awikkom. 6Kayak Nug Kristus, ig ele oh eɗua maɗeɗikke, ig Kristus Jesusnu daaut, Kayak Nug he, Kristus ig ele, ig oh hab aabppa heɗep neta daattem. 7Nug anam heumnu diig am, Nug nuhig ehanittak okkai hamu mettak laa oh eɗattak kobol, Nug amu dim lamittatta, ig Kristus Jesusnu daattem amu, Nug ihinignu oo bodoettak kobol dim lamidtte, Nug danab oh butti aɗi haen amu daaglag amu ippunadkkunu heum. 8Ag Kayaknu oolagppa genab dooppig amu, amuppa Kayak Nug ehanittak okkai hamu matta, Nug ag eɗua diia, bauklel mattom. Nug ahilag uɗat, Nug amunu dabmaama ii mattom. Iitta! Nug ag ahilag daakkunu hamu mattom. 9Nug danab laa nug nukka nug onig humamanu, Kayak Nug ahilag uɗat hakppa ii mattom. Iitta. 10Amu Kayak Nug nuhig doyakppa he, ig bemut. Ge, Kayak Nug he, ig Kristus Jesusnu daatta, ig kobol ena hekkunignu daattem amunu, ig ig oninig humagnignu elele iitta. Kayak Nug ig amuppa oignignu anukka babaitta mekkom.
Kristus Nug ig Nug ele ou iqe, laippu daattem
11Aria ag iitta aɗi, anukka Juda, ag akka eppelagppa ag beɗulagnu gaɗalag otaɗtteb ele amu, ag ahilagnu amu, “Ag gaɗalag ii otaɗtteb ele,” aon adappig amu, ag iitta aɗi ag anukka attem daadttappig amu daulagppa doaɗ! 12Haen amuppa amu ag umanab Kristus iittappa daadttappig. Ag Israel baekkudppa ele ii daadttappig. Kayak Nug he, Nug Israel ag ele nug tituanna nai qakkan, Kayak Nug Israel ag nuhikkud daan, keeke ena laala ele aoglagnu nai qakka aum, amge ag iitta aɗi ag amu ooppa ii daadttappig. Ag wan imuppa daappig amu, ag keeke ena laa dimppa bekkunu ameg mak ele ii daappig. Iitta. Ag hamu daappig. Ag Kayak ele ii dooppig, umanab daappig. 13Amge gemu ag Kristus Jesusnu daatteb. Ag tatam uma daappig, amge Kayak Nug Kristus tiigppa ag omalatte, Nug gumidna uɗippig.
Jesus Nug iitta aɗi danab Juda ele ouaqom
14Ao, Kristus Nugib am ihinig maɗoɗ danab. Anukka Juda amu ag gaɗalag ii otaɗak ele, ag ele kekeɗ daadttappig. Kobol amu nug ouqa laippu oiyaknu ib oo ne, ameg aɗit aakku daattapiɗ, amge Kristus Nug beɗuppa ib oo nak amu loppaɗa, ameg aɗit amu ouaqatom. 15Nug ameg aɗit amu ouaqateb, ameg aɗit dilah danab ag danab bau bena, ameg laippu daaglagnu, Nug nuhig mauhakppa Nug ɗo nai, amuppa ɗo digdig dim lamidkkunignu yaak dayom amu, Nug amu hokalom. Kobol amuppa Nug he, ig Juda, ag iitta aɗi ele, ig oh maɗoɗ daattem. 16Nug ad emaitakppa mauhom, amuppa ameg aɗit amu ouaqate, aa laippu daattep. Ad emaitak amuppaib Nug kekeɗ kobol qe iitta me, Nug danab amu oh omalatta, Kayak toppa ukkom. 17Nug aakkuib uɗia, ameg laa uma daappig, ameg laa miag daappig ele amu, Nug ag oh ag oolag laippu maɗoɗppa daaglagnu aum. 18Amunu ig ameg aɗit amu, ig oh Kristusnu uɗat okkaippa, Kayak Ouɗi laippunu ehanittakppa, ig oh Mame toppa gokkunignu elele.
19Anam daatte amunu, ag iitta aɗi ag baula wan laihnu danab, o aab diig danab iitta, ag amubia iitta. Ag Kayaknu danab ah oppiaawak ele, ag ag ele huu laippu; ag ele Kayak bekkod. 20Ig oh am Kayak laug bia daatteb. Ig nuhig totol danab amu nuhikkud propet ele, ig lag amunu ukku meut, ag amu qaɗeppa daatteb. Kristus Jesus Nug am lag amu ukku ɠagattag daakkunu men anuqak daatte. 21Danab ag lag ebehi oh tutukku tuɗidtteb, amubia Kristus Nugib he, Kristen danab oh ag laippu qagmena, Naɗi noobppa oppiaawak daanna, nuhig uɗat hekkulagnu, Kayaknu mettid lag bia beegeg, okkai mette. 22Kristusnu uɗat okkaippaib ameg aɗit amu ag ouaqe, laippu bena, ag Kayak Ouɗippa, Kayak Nug daakkunu laug aakku betteb.
© (Active), Wycliffe Bible Translators, Inc. All rights reserved.