Aposel 25

Pol nug Pestus noobppa dayom

1Pestus nug prowins amu gumakkunu uɗia, Sisaria dayeye, deɗ ewam uue nug aha, Jerusalem teum. 2Pestus nug Jerusalem te, mana mettak danab okkai amu Juda danab dilag ikki danab ele ag gumidna gona, ag nug amegppa Pol beɗuppa nai yaappig. 3Ag yona, ag inam ele appig. “Na ig ehanigna, danab amu aon meppe, ippa Jerusalem uɗikkunu oɗ medattem,” ii daye daye oɗ medappig. Ag anam appig, amge diigppanab ag ib aɗan lokkumna daanna, Pol qeppeg mauhkku dabmeppig. 4Ag anam aeg amu Pestus amelagppa aum. “Pol nug Sisaria appa maniguittakppa daatte amu, haen elab iitta da eɗue Sisaria nokkul 5amunu, haen amuppa Juda dilag ikki danab laala ag da dim lamiɗppeg oh notu! Aria, danab amu nug eheɗ heum dayeb amu, ag nug beɗuppa nai yaaglag,” awa aum.

6Pestus nug Jerusalem ag ele deɗ eblaih ewamtai iitta eblaih tanig ele anam dayona, nug eɗua Sisaria noum. Wagɗe deɗ amuppa nug aha, hettoɗiak abenppa dayeye, nug daup nuhikkud amelagppa, “Ag Pol omalna uɗieg!” awa aum. 7Ag Pol omalna doeg amu, aria Juda Jerusalemnu noppig ag dona daanna, ag nai kuɗum eheɗ hak naunu Pol beɗuppa yaan madippig, amge ag ahilag nai am genab laa ippuanadkkunu elele iitta.

8Ag anam heeg amu Pol aha, ahilag nai amu nob ma, inam aum. “Da keeke aɗitai eheɗ laa ii hemi. Da Juda dilag ɗonu, Kayaknu mettid lagnu, amu Sisarnu ele eheɗ laa ii hemi,” awa aum. 9Pol anam awa aum, amge Pestus nug Juda, ag oolag ena daakkunu, ag oolagppa ya, nug Pol amegppa inam aum. “Da heppi, ig oh Jerusalem teta, appa na nai danab imu ag na beɗunppa yaatteb elenu da noolppa hettoɗiakppa daakkutnu elele doottemte?” awa aum. 10Nug anam aum amge Pol nug aum. “Da gemu Rom dilag hettoɗiakppa daattem, amuam tutukku. Da eɗuen Juda dilag hettoɗiakppa ii daapa. Na aakku doome, da Juda, ahilagppa eheɗ laa ii hemi. 11Da mauhkkulnu keeke laa hemi dayeb amu, ag heppeg mauhkkul am elele; ag ena da iuppeg mauhkkul. Amge Juda ag da hettoɗiakppa meiɗna, nai madippig ele amu, nai amuam genab iitta dayeb, danab laa nug da ag eppelagppa meiɗkkunu amu eheɗ amunu da Rom ukken, Sisar toppa tein appi, nug dahil hettoɗiak amu nug dookkunu ool daatte,” awa aum. 12Pol nug anam a amu Pestus nug nuhikkud kaunsil danab ele tatam nai mattiona, nug Pol amegppa aum. “Na Sisar nug nahip hettoɗiak dookkunu onigppa ettem amunu, aria na Sisar gumidna gokkut,” awa aum.

Pestus Polnu Agripa oɗ mettom

13Am deɗ laala uue amu King Agripa amu Bernaisi ele, ⌊aa eappinag amu⌋, aa Pestus humidkkulahnu Sisaria uɗipiɗ. 14Aa uɗiya, deɗ nakok kuɗum Sisaria daaeheh amu Pestus nug king amu amegppa Polnu nai imu mattia aum. “Peliks nug danab laa nug anukka maniguittakppa meum ina daatte. 15Amu haen da Jerusalem tein daaiyi, mana mettak danab okkai amu Juda dilag ikki danab ele ag nai nug beɗuppa yaan, ag da amelppa nuhig eheɗ haknu nai beɗuppa yaappig amu, ag da nug amunu nob medakkulnu appig.

16Amge da eɗuen ag amelagppa inam ami. ‘Ig Rom, ihinig kobolppa, ig danab laa, laa ag nug beɗuppa nai yaatteb ele, ig nug paha eheɗ heum ii attem. Iitta. Tatam danab nug eheɗ heumtai o iittatai doyaknu nug hettoɗiakppa danab nai nug beɗuppa yaatteb noolagppa daya, nug nukka nuhignu nug aɗi heum ab doot, ig nai amu oh dabmettem. Ig amu hewota, ig nug eheɗ heum anidta amu, ig nug nob mettagnig. Iitta am iitta,’ awe ami. 17Ag anam heeg, da ai, ag da ele oh uɗit daamut. Amu da haen ii kakidmi. Iitta! Wagɗe deɗ amuppa amu da he, ig hettoɗiak abenppa daata, danab amu omalna dokkulagnu amelagppa ai, aon doeg, 18danab ag nug beɗuppa nai yaappig ele ag ahan hippaidna, nug beɗuppa nai yaappig, amge ag ahan, nug kobol laa eheɗ heumnu, da ag hekkulagnu dabmemi bia laa ii madippig. Iitta. 19Ag ahilag mettid hak kobolnu, amu danab laa onig Jesus, Nug mauhom amge Pol nug, ‘Danab amu Nug bau daatte,’ awa atte amu, ag amunu nug ele oolag laippu iitta. 20Ag anam mattieg amu da nai amu ool ii maitte, diig dookkulnu hemi amge da elele iitta, ool ii maittom amunu, da nug oɗ mettami. ‘Da heppi, ig oh Jerusalem teta, appa na nai danab imu ag na beɗunppa yaatteb elenu hettoɗiakppa daakkutnu elele doottemte?’ awe ami. 21Da anam ami, amge Pol nug maniguittakppa dayebeb, dimppa Sisar nuhig nai doya bappaidkkunu oo daye aum amunu, da nug maniguittak lag ooppa dayebeb, haen laa da keeke oh babaitten heppi, nug Sisar toppa gokkunu haknunab ami, amge gemu nug tuɗitta ippa ina daatte,” awa aum. 22Pestus anam a amu, aria King Agripa nug Pestus amegppa aum. “Aakku amu da ele, da danab amu nuhig nai dookkulnu ool daatte,” awa aum. A am Pestus nug aum. “Am ena, butti ab dookkut,” awa aum.

Pol nug Agripa amegppa nai mattiom

23Aria deɗ amu uue, wagɗe deɗ amuppa King Agripa nug Bernaisi ele aa laa ag binalah mak kobol kobol heegeg, aa qagmak lag ooppa noya daaeheh, ban daup danab okkai okkai amu aab okkai amunu ikki danab oh ele nona daaegeg, Pestus nug he, Pol omalna wappig. 24Pol omalna waeg, Pestus nug ag daappig ele nug ag amelagppa aum. “King Agripa na, amu danab laa oh ippa ina daatteb, ag danab imu antteg! Juda danab ah oh ag Jerusalem appa am ippa ele, ag da amelppa nug dimug mena, ag nai ɠagattag appig. ‘Na danab amu qeppe mauhaɗ! Nug ii daama,’ aon appig. 25Amge da nug mauhkkunu keeke laa ii anidmi. Amge nug nukka Sisar nug nuhig nai dookkunu a amu, da nug Sisar toppa meppi gokkunu ai, nug amu ameg ma daatte. 26Amge imu ele, da nug keeke aɗi heumnu nai amu genab anttena, uɗug yaappi ukkeb, ihinig okkai Sisar anidkkunu laa ii anidmi. Anam daatte amunu, King Agripa, da laa oh daatteb dabmemi, amge nahipnu tutukkunab dabmein, da danab imu omale ahilagppa domi. Ig oh nai nuhig anidta, da nuhignu nai laa uɗugppa yen meppi gokkunu anam hemi. 27Aɗinu? Da maniguittak danab laa nug eheɗ aɗi heum uɗugppa ii yen meppi gokkunu oolppa ena ii doottem,” awa aum.

Currently Selected:

Aposel 25: NB

Highlight

Copy

Compare