Aposel 18

Pol nug Korint ukka uɗat heum

1Amu dimppa amu Pol nug Atens uua aha, Korint ukkom. 2Nug ukka, Korint ta, Juda danab laa onig Akwila anttom. Nug appag diig amu Pontus. Nakok matu bia, nug amu wau Prisila ele aa Itali wannu aab okkai Rom, aa appanu ahai uɗipiɗ. Aɗinu? Rom dilag king Klodias, nug Juda danab ah amelagppa, “Ag Rom ii daamna; ag Rom uun, aab laalappa gona dayeg!” awa aum amunu, Akwila, Prisila ele aa Korint appa daapiɗ. Aria Pol nug ukka, aa anate, 3nug aa ele uɗat laippu amunu, nug aa ele daanna, ag oh uɗat amu heppig. Ag peh lag koitak uɗat heppig. 4Ag uɗat amu henana, Pol nug Sabat deɗ ohppa amu Juda dilag nai doyak lakka noono, nug ag ele nai mattina, nug heeb Juda amu Grik ele ahilag dabmak amu eɗun, ag Jesusnu oolagppa genab dooglagnu oolag yom.

5Am Pol nug anam heehe, dimppa Silas, Timoti ele aa ahai, Makedonia uuya neeh, Pol nug uɗat laa heum amu uua, nug Kayak naiib deɗ oh mehuqom. Nug Juda danab amelagppa, “Jesus Nug am Kristus,” mattia aum. 6Amge Juda ag Pol nug Jesusnu nai amu ii mattimanu wagai mena, aon aon qedappig amunu, Pol nug lamen elab nuhigppa kauko dayom amu he ne, nug amelagppa aum. “Ag padal mekkulagtai amu akka beɗulagppa, da eheɗ ii hemi. Amunu gemu da iitta aɗi gumatte gokkul,” awa aum.

7Pol nug anam ana, nug Juda dilag nai doyak lag amu uua doa, danab laa onig Titius Jastus laugppa ukkom. Titius Jastus nug Kayak noobppa dup noa binag mak danab dayom. Nug laug am Juda dilag nai doyak lag heqo laih dayom. 8Pol nug appa daye, Juda dilag nai doyak lagnu ikki danab onig Krispus, amu nug baekkudppa ele ag oh Jesusnu oolagppa genab dooppig. Korint kuɗum laa ele ag Pol nai mehuqe, ag oolagppa genab doona, layattak aoppig.

9-10Amu deɗ laa tuqan Pol nug tulegleg laa antte, tulegleg amuppa Naɗi nug amegppa aum. “Da na ele daattep amunu, na aib baɗame! Na dahil nai appe doyeg! Oɗen aib qamutme! Danab laa nug ii nitteb guittak aokkut. Aɗinu? Dahilad danab ah kuɗum ag aab okkai imuppa daatteb,” awa aum. 11Amu Pol nug Naɗi anam a doyowa, nug Korint appa maɗ laippu kalam eblaih laippu ele dayaya, nug Kayak nai ippuanattom.

12Am Pol nug Korint dayaya, anam heum, amge dimppa Galio nug prowins Akaia dilag gawana dayeye, haen amuppa Juda ag oh qagmena, Pol kekeɗ mettan, aɗan aon hettoɗiak abenppa goppig. 13Ag Pol aon hettoɗiak abenppa gona, ag nuhigppa nai yaan, inam appig. “Danab imu nug danab ah oh ag ɗo nai daatte amu tabappeg neebeb, ag kobol laappa Kayak noobppa dup nona binag mekkulagnu ippunadtte,” aon appig.

14Ag anam aeg, Pol nug ag nai appig amunu nug nob eɗua akkunu heehe, Galio nug aha, Juda amelagppa aum. “Danab imu nug ɗo laa tippallo o nug kobol nau laa helo amu, ag nug heum amu appeg, da nai amu dookkulnu ib ele. 15Amge ag uɗin, ag nai onignu, onig laalanu ele amu ag akka ahilag ɗonu ele da oɗ meɗatteb amunu, da amu ii hepa; ag akka babaitteg! Da keeke amu epeɗikkulnu, da uumi!” awa aum. 16Nug anam ana amu nug ag hettoɗiak aben amuppanu lamattom. 17Galio nug lamatte amu ag ahan hettoɗiak aben guguittakppa Sostenes, nug am Juda dilag nai doyak lagnu ikki danab amu, ag nug aɗan makkuɗppig. Juda ag anam heppig, amge Galio nug amunu ii dabmeum.

Pol nug eɗua Antiok ukkom

18Juda danab ag Pol aɗan anam heppig, amge Pol nug paha aab laappa ii ukkom. Iitta. Nug deɗ nakok kuɗum appa dayowa, dimppa nug Kristen tamaniak appanu uuatta, nug Siria gokkunu ukkom. Nug Prisila Akwila ele oh goppig. Amu Pol nug matu Kayak amegppa keeke laa genabnab hekkunu nai ana qakkom amunu, nug Juda dilag kobol dim lamitta, Senkria appa nug he, danab laa nug nug ikki uɗug hoiye ukkom. 19-21Aria, ag gona Epesus tena, Pol nug ukka, Juda dilag nai doyak lakka no, Juda danab ag nug ele nai madippig. Nug ag ele nai mattin, ag nug amegppa appig. “Na haen nakok elab ig ele daatu!” aon appig amge nug aum. “Da anam hekkulnu elele ii doottem,” awa aum. Pol nug anam awowa, gokkunu haaha, nug ag amelagppa aum. “Kayak Nug dabmaknab amu awa ab amu, da eɗue uɗie anadkkul,” awa aum. Nug anam awowa, nug Prisila, Akwila ele aab okkai amuppa daaglahnu uuate daaeheh, nug uubppa ta, Epesusnu aha ukkom.

22Aria, uub amu ukka Sisaria eeɗe, Pol nug uubppanu noa, nug Jerusalem ukkom. Ukka ta, nug Kristen tamaniak humattatta amu nug noa, Siria wanppa aab onig Antiok appa ukkom. 23Amu Pol nug ukka Antiok noa, nug appa haen nakok elab dayowa amu dimppa nug aha, Galesia, amu Prigia ele dilah wan atu, nug appa aab laalappa ukka oiyaya, Kristen oh ɠagattag aqom.

Apolos nug Epesus ukka nai mehuqom

24Pol nug anam heehe amu Juda danab laa, onig Apolos, nug anig aab laa onig Aleksandria, Isip wanppa appa menue dayeye ukke, Pol Epesusnu aha oiyeye, Apolos nug ukka Epesus dayom. Nug am doyak kuɗum ele, amu nug Kayak nai, Juda ag aɗappig ele, nug amu oh doyom. 25Nug anam doya, Naɗi ippunu ippunittak ele awa doya, nug yagbak doyaya, Jesusnu nai elele mattiom, amge nug Layattak Jon Jesusnu mattiom, nug amu aakkuib doyom. 26Aria nug ii baɗaɗa, nug Juda dilag nai doyak lakka noa, nai mehuqom. Amu Prisila Akwila ele aa nug anam anidya, nug aoya, lakka goya, Kayak Nug ib ihinig babaittom amu aa keeke amu ohnu ippunidpiɗ.

27Aa ippunitteh, amu dimppa Apolos nug prowins onig Akaia appa gokkunu he, Epesusnu Kristen oh ag nug nai doyom amu awa ukka tuɗidkkunu dabmak nuhig amu ɠagattag qedappig. Aria, Epesusnu Kristen ag danab Akaia appa Kristen meppig ele, ag amu dilag uɗug yaak laa yaan, ag Apolos ag ele laippu dayaknu oolagppa eleleib dooglagnu yaan, ⌊Apolos awa gokkunu medappig⌋. Metteg, Apolos ukka Akaia te amu, danab ah Kayaknu ehanittak okkai hamu megatte amu aona, ag oolagppa genab dooppig ele amu, Apolos nug ag ɠagattag aqom. 28Nug Juda danab ele danab ah noolagppa nai mattinna, nug Kayak naippanu, Jesus am Kristus ippuanattatta mattiaya heehe, nuhig nai am Juda dilag nai huana eɗittom.

Currently Selected:

Aposel 18: NB

Highlight

Copy

Compare