Aposel 15

Kristen tamaniaknu qagmak okkai Jerusalem beum

1Pol, Barnabas ele aa Antiok appa Kristen tamaniak ele daaegeg amu, danab laala ag Juda wanppanu uɗina, Kristen amelagppa appig. “Laa nug Jesusnu ooppa genab dootte amu, nug gaɗa ele otaɗak awaɗ! Laa ag Mosesnu ɗo amu ii dim lamidna, gaɗa otaɗak ii aoglag amu, aria geha Kayak Nug ag eɗua ii diiadma,” aon ippunadna appig. 2Ag anam aon aeg, Pol, Barnabas ele nai amu dooya, amunu ena ii dooya ahaeh, Juda ele huanak aeg ona aeg doum amunu, Kristen ag Pol, Barnabas amu danab laala oolagppa genab dooppig ele ag ahan, Jerusalem goppeg, totol danab amu ikki danab ele ag nai amu bappaidkkulagnu otiadppig. 3Amu Kristen tamaniak ag heeg, ag ahan Ponisia, Samaria ele tikkun gonana, ag appan Kristen amelagppa, Kayak Nug he, iitta aɗi ag oolag eɗuom amunu amelagppa appig. Ag anam heegeg, Kristen amu ag maɗoɗppan gamag ahak okkai dooppig. 4Ag anam henana gona, Jerusalem teeg, Kristen tamaniak danab ah amu totol danab am ikki danab ele ag ag ele laippu dayaknu oolagppa eleleib doyeg, Pol, Barnabas ele aa keeke oh Kayak he hepiɗ ele, aa amunu amelagppa madipiɗ. 5Aa amu mattieheh, ɗo gumak danab-Parasia dilag huuppan, ag Jesusnu oolagppa genab dooppig ele ag ahan appig. “Kayak anukka gaɗa otaɗaknu ɗo meum niitte amunu, iitta aɗi danab ag Kristen daaglagnu oolag dayeb, ag ele gaɗalkad otaɗkkulagnab. Ele amu ig apput, ag Mosesnu ɗo oh ele dim lamidkkulag,” aon appig.

6Ag anam appig amunu, totol danab amu Kristen tamaniak ikki danab ele ag nai amu bappaidkkulagnu qagmeppig. 7Qagmena ag amunu nai kuɗum mattin hena, Pita nug aha amelagppa aum. “O lailad, ag imu dootteb. Anukka Kayak Nug uɗat ig mekkowa, Nug da iitta aɗi amelagppa Nai Ena appi, ag doon oolagppa genab dooglagnu otiɗom. 8Amu Kayak, Nug danab ah oh oolag diig dootte ele, Nug iitta aɗi nuhig Ouɗi ig mekkom bia ag mattom, amuppa Nug eɗua diiadkkunu oo dayom ig ippunikkom. 9Nug ihinigppa kobol laa haaha, ahilagppa kobol laa ii heum. Iitta. Ag oolagppa genab doyeg, ahilag ooppa genab doyak amuppa Nug he, ag oolag oppiak dayom. 10Ig anam anidttem, amge ag iitta aɗi ag Juda dilag ɗo oh dim lamidkkulagnu atteb, amuppa ag keeke uug ele aon, Kristen qaɗelagppa mena hetteb. Anukka ig mamenkad amu ig ele uug amu mawaknu amu elele iitta. Ag aɗinu Kayak ma anttak anam mettaglagnu hetteb. 11Doyeg! Ig Kayak, Nug ehanittak okkai, Naɗi Jesus Nug hamu megatte ele, amuppa Nug ig eɗua awikkom amubiaib Nug iitta aɗi ag ele amuppa eɗua diitte, oonigppa genab doottem,” awa aum.

12Pita nug nai amu anam mattieye, ag qagmak amuppa daappig ele, ag nai laa ii madippig. Ag nai ii mattieg amu Pol, Barnabas ele aa nai mattieheh, amuib dabmettaegeg, aa Kayak Nug aa eppelahppa Kayak dabmettaknu kobol danab haknu elele iitta kuɗum, digdig ele, iitta aɗi oolagppa heum amunu madipiɗ. 13Pol, Barnabas ele aa nai amu mattiya malaeh amu Jems nug aum. “O lailad, da nai imu appi ag doyeg! 14Saimon nug ig amenigppa a, ig aakku doomut. Amuam digmakppa Kayak Nug iitta aɗi ehanadkkunu dabmaama, Nug ahilagppa na, Nug danab ah amu oolagppanu danab ah nuhikkud diiattom. 15Amuam propet ag Kayak oɗe aon yaappig amubia. Kayak naippa, nai amunu daatte am inam. 16-17Naɗi Nug atte. ‘Danab oɗo yaak daaglag ag Naɗi mattin anidkkulagnu hekkulagnu, amu iitta aɗi ag da onil waappa daatteb ele, ag ele da mattiɗna aniɗkkulagnu hekkulagnu, da danab lag na qeum bappaitte, eɗua enanag daatte, laih atten nauhak daatte bappaitte, dayom bia eɗua daatte, da amubia ag Israel, da ahilagppa hekkul.’ Naɗi Nug keeke amu oh heeb bekku amu, Nug anam awa atte. 18Anukka Kayak Nug nai amu mattia aum, amu gemu ele Nug anamib atte.

19Anam amu dahil dabmak am inam; iitta aɗi ag oolag eɗueb, Kayak dooppeg amu, ig ag uug ii mattamta. 20Iitta. Ig imuib uɗugppa yaat apput dooglag. ‘Ag doɗ, danab ag doɗ amu main kayak hambuppuak dottolkad madappig ele, ag doɗ amu teppu ii lamana. Ag gappai kobol ii hemana. Amu danab ag doɗ muɗippa o eppelagppa baag aɗaeg mauhom amu, ag teppu amu ii lamana. Aria, ag doɗ tiig amu ele ii lamana.’ Ig amuib apput dooglag. 21Aɗinu? Ig doottem, anukkan uɗie gemu ele, aab okkai ohppa danab ag Mosesnu ɗo nai mehuqna, ag ele Sabat deɗppa Juda dilag nai doyak lag ohppa nai amu ebqetteb,” awa aum.

Nai yaak uɗug laa iitta aɗi dilagppa ukkom

22Jems nug nai amu a amu, totol danab amu ikki danab amu Kristen tamaniak oh ele ag nai amu bappaidna, ag danab aɗit otiatppeg, aa Pol, Barnabas ele oh Antiok gokkulagnu dabmeppig. Ag anam dabmewona, ag Judas, onig laa Barsabas, amu Silas ele, danab aɗit amu aa tamaniak ooppa anuqak daapiɗ ele, aa otiatona, 23ag uɗug yaak ele aoya gokkulahnu eppelahppa meppig. Uɗugppa yaappig am inam.

“O iitta aɗi lainkad Antiok, Siria amu Silisia ele daatteb, ig Kristen tamaniaknu totol danab, ikki danab ele, ig ag lailkad daattem amu, ig pas imu ag ebqena dooglagnu iikku yaattem. O lainkad ig ag humadttem.

24Amu ig aakku anidmut. Ihinigppan danab laala ag gona, ag nai mehuqegeg, ag appanu ag nai amu doon ottaippig. Amu ihinigppanu ag gona, nai mattinna, ag ahilag dabmak kabolippig ele amu, ag gona appa anam hekkulagnu ig laa ii amut. 25Ag gona anam heeg, nai amu uɗie ig doota, ig nai mattit, oonig laippu meta, ig lainti gokkulahnu otiatmut. Amu ig lainti aɗit laa ele ig ahilahnu oonig huana hette ele, amuam Barnabas, Pol ele, aa ele aakku gokkulagnu amut. 26Anukka aa Jesusnu nai mehuqyaya oieheh, danab laala ag aqatkkulagnu dabmeppig, amge aa ihinig Naɗi Jesus Kristus onignu uug maoya mauhkkulahnu ii baɗaya, uɗat amu ii uupiɗ, gemu ele anam oittep. 27Ig Judas, Silas ele aakku maatut goya, aa oɗelahppa nai ig yaamut ele ɠagattag qettaglahnu gottep. 28Ig qagmeta nai mattiutut, Kayak Ouɗi Nug ig ehanikka, ig ɗo laa aot, ag qaɗelagppa ii memata, ag imu iikkuib dim lamidkkulagnu ippunikkom, aakku ig Nug oɗe dim lamidta, inam attem. 29‘Ag doɗ, danab ag doɗ amu main kayak hambuppuak dottolkad madappig ele amu, ag doɗ amu teppu ii lamana. Ag doɗ tiig ele ii lamana. Amu danab ag doɗ muɗippa o eppelagppa baag aɗaeg mauhom amu, ag teppu amu ii lamana. Aria, ag gappai kobol ele ii hemana.’ Ag keeke amu oh tutukku dabmettan, ii hemana am ena. Aakkuib. Ag ena daaglagnu oonig daatte.”

Ag anam yaappig.

30Aria, Kristen tamaniak ag otiatna, maatteg gona, Antiok nona amu ag Kristen tamaniak qagmaattan, ag uɗug yaak amu madappig. 31Amu Kristen tamaniak ag uɗug yaak amu ebqena, ag ɠagattag aqak nai amunu ena doon gamalag ahom. 32Amu Judas, Silas ele, aa am propet amunu, aa nai meu ele Kristen ippunadya ɠagattag aqapiɗ. 33Aa anam heyaya, nakok haen elab Antiok daayoya, aa eɗuya Jerusalem tamaniakppa gokkulahnu heeh, aa lailti Antioknu ag “Aa maɗoɗ ele enad ukkeɗ!” appig, 34((amge Silas nug Antiok daakkunu dabmeum.)) 35Aria Pol, Barnabas ele aa Antiok daaeheh, aa danab kuɗum laala ele oh ag Naɗinu nai mehuqna, danab ah ippunadppig.

Pol, Barnabas ele aa oppatpiɗ

36Dimppa deɗ laala ukke amu Pol nug Barnabas amegppa aum. “I ahaɗ eɗuɗ goɗa, aab ohppa anukka i Naɗinu Nai Ena amelagppa auɗ dooppig ele amu, i laintad amu anadta, ag nai amu aɗan ena daattebtai o iittatai amu anidtu!” awa aum. 37Pol nug anam awa a amu Barnabas nug ena doya, Jon Mak ele oh gokkulagnu oo heum. 38Oo heum, amge Pol nug Jon Mak nug anukka Pampilia aa uuate, nug aa ele oh uɗatppa ii goppig dabmeum amunu, nug Jon Mak aa ele oh gokkulagnu oo ii dayom. 39Pol anam doyom amu, aa amunu nai okkai mattiya hepiɗ amunu, aa uɗatppa laippu baula ii oidpiɗ. Iitta. Barnabas nug Jon Mak awe, aa uub laappa teya, Saiprus gopiɗ. 40Anam amge Pol nug Silas tituane, gokkulahnu daaeheh, Kristen ag, “Naɗinu ehanittak okkai hamu megatte ahilahppa dayaɗ!” aon appig. 41Anam aeg amu, aa goya, Siria, Silisia ele tikkui goya, Kristen tamaniak ɠagattag aqapiɗ.

Currently Selected:

Aposel 15: NB

Highlight

Copy

Compare