Aposel 12

Engel Pita maniguittakppanu uhuqom

1Haen amuppa King Herot Agripa nug Kristen tamaniaknu toliak laala eheɗ hadakkunu aɗalattom. 2Aɗalatta amu nug Jems qep elabppa duug o mauhom. Jems, Jon ele aa am eamag. 3Nug kobol am he, Juda danab ⌊ag Jesusnu oolagppa genab ii dooppig ele,⌋ ag oolag ena daye antta, nug Pita ele aɗom. Kobol amu Bret Yis Iitta Lanaknu Hobul Nakok haenppa beum. 4Nug aɗa amu nug Pita maniguittak ooppa meum. Nug maniguittak gumak danab ameg waɗele, ameg ohppa danab waɗele waɗele anam daappig, ag guman daaglagnu eppelagppa meum. Herot nug Pasowanu Hobul uueb, Juda noolagppa Pita epeɗia ⌊heeb mauhkkunu⌋ dabmeum.

5Anam amunu, Pita nug maniguittak ooppa dayeye, Kristen tamaniakppanu danab ah ag nuhignu oolag unuqagppanu Kayak unuqidppig. 6Unuqittegeg, deɗ Herot nug Pita danab noolagppa mekkunu heum, deɗ amu ii wagkkaɗom, tuqan amuppa maniguittaknu gumak danab aɗit, laa laih, laa laih laappa daaeheh, Pita nug gamagppa niiom. Ag sen aɗitppa nug hippalppig. Nug anam niieye, gumak danab aɗit laa aa odppa daayya, od gumapiɗ. 7Ag anam daaegeg, laippun Naɗinu engel laa appa hibaitta dayeye, amahlak lag oo amuppa amahlom. Amahlele, engel nug Pita qetti laih qeqala, maɗetta aum. “Pahanab ahe!” awa aum. Awa a amu, laippun sen Pita eppegppanu amu uhuqya nepiɗ. 8Neeh, engel aum. “Imuanppa matagiɗ takkan, baen gaɗa ele maate!” awa aum. Pita nug anam he amu engel aum. “Ulahnu lamen amu aon mena, doppe goɗu!” awa aum. 9Awa a amu Pita nug engel aakku dim lamittom, amge nug kobol amu genab aakku beum oo ii maittom. Nug nukka, nug ooppa, “Da tulegleg niittem,” awa aum. 10Goyaya, maniguittaknu gumak danab anuqakppanu aa aa eɗatya waya, aɗit laa ele eɗatya wapiɗ. Aa danab amu oh eɗadyaya, uɗi uɗi, batakppa od aen eleppa, ag matulna aab okkaippa notteb ele, amuppa wapiɗ. Waeh od ɠagattag amu nug nukka matule, aa dimittim goya, ibppa noyaya, laippun engel nug Pita uuitta ukkom.

11Aakku Pita nug aɗi kobol beum amu doya aum. “Herot nug da aɗailele, Juda danab ag da eheɗ heiɗkkulagnu dabmeppig, amge gemu da genab doottem, Naɗi Nug he, engel nuhig uɗia, da ag eppelagppanu awiɗom,” awa aum. 12Nug anam ana, kobol beum amunu dabma, meu anam doyom, Jon Mak anig Maria, nug laugppa ukkom. Appa danab kuɗum ag qagmena, unuqidnana daappig. 13Daaegeg, Pita nug dimittimnu od qeqale, maɗi ah onig Roda, nug od matulkkunu doa, 14Pita baag doya, maɗoɗppan gamag ahak okkai doye, od ii matulom. Iitta. Nug eɗua lag ooppa qaietta ukka, amelagppa aum. “Pita dimittim hibaittom daatte!” awa aum. Awa a amu ag qagmena daappig ele ag appig. 15“Na kaaka!” aon appig. Amge nug, “Iitta! Da ham-ii-bubuttem,” baubau mattieye, ag baubau appig. “Amu nuhig engel,” aon appig. 16Anam mattiegeg, Pita nug od qeqalala dayeye, daaeg wana ukke, ag od matulna nug anidna, ag ottaina dabmak kuɗum aoppig. 17Ottaina dabmak kuɗum aoeg, nug eppegppaib toettaglagnu awowa, Naɗi attem he nug maniguittak ooppanu dimittim doumnu amelagppa mattiom. Nug amunu mattia mala, nug, “Ag Jems amu ig lainkad laala ele imunu appeg doyeg!” awa aum. Anam awowa, nug laih ukkom.

18Aria, wakkaɗe gumak danab ag ootot okkai aqe, akka akka nai huan madippig. Ag appig. “Pita nug attem heum?” aon appig. 19Amu Herot Agripa nug Pita ii daatte amu doyowa, ag mattiglagnu a madippig, amge ag nug ii anidppig amunu, nug gumak danab hettoɗiatta aut autanab awa, nuhig dabmakppa ag elele iitta antta, amu ag aqappeg mauhkkulagnu aum. Imu dimppa Herot nug Judanu aha, Sisaria ukka appa nakok dayom.

Herot Agripa mauhom

20Aria, Herot Agripa nug Tair, Saidon ele dilah danab ah dilagnu oo aeg beum. Amu amun danab ag ee Judanu hanhan daden meppig amunu ag enug aqamanu, danab ah amu ag qagmena gumidna gona, ag Herot ele nai bappaidkkulagnu dabmeppig. Ag amu hena, ag nuhig ehanittak anuqak danab okkai laa onig Blastus gumidna gona, amegppa Herot nug oo aeg bak amu uukkunu, ag oh maɗoɗ ele daaglagnu aeg, nug ehanadkkunu aum. 21Ag anam heeg, Blastus ehanadkkunu ana, Herot amegppa a, aria Herot nug doya, amu hekkunu deɗ laa mewowa, nug deɗ amuppa nug kingnu lamen elab ma, nuhig balal enanagnabppa dayaya, ag amelagppa nai mattiom. 22Nug nai mattie, danab ah ag amu doona inam aon eppig. “Nai mattiom umu am kayak laa baag. Danab baag iitta,” aon appig. 23Ag anam aeg, Herot nug nai amu doya, Kayak binag ii meum amunu, Naɗinu engel laippun oɗe metta he, gawat beɗu qena laeg, aakku mauhom.

24Amge Kayaknu nai am tuɗitta okkai ma, tuala ukkom. 25Kayaknu nai amu anam aha ugekke, Barnabas, Saul ele aa Jerusalem daayya, maɗi ahilah maloya, eɗui Antiok gokkulahnu heya, aa Jon Mak aoeh, nug ele oh goppig.

Currently Selected:

Aposel 12: NB

Highlight

Copy

Compare