2 Samuel 9
9
Dawit nug Mepiboset, nuhignu dabmeum
1Am deɗ laa Dawit nug nuhikkud ehanittak laala oɗ matta aum. “Da Jonatannu dabmein, nuhignu dabmak anuqak awen, Saul baekkudppan laa, nuhignu oo mauhaknab kobol doye dim lamitten hekkulnu ool daatte, amge Saul buɗub laa gemu daattete o iittate?” awa oɗ mattom. 2Dawit nug anam oɗ matte, ⌊ag Saulnu maɗi nid laa dayom onig Siba anidna,⌋ ag nug uɗia Dawit toppa tekkunu aeg uɗie, King Dawit nug Siba oɗ mettom. “Na Sibate?” awa oɗ mettom. Nug anam a, Siba nug nob ma aum. “Ao, da Siba, nahip maɗi nid,” awa aum. 3Siba anam amegppa a amu, King Dawit nug oɗ mettom. “Saul buɗub laa appan daattete? Laa daatte dayeb amu, da Kayak Nug oo mauhaknab kobol ihinignu doya dim lamidtte, amubia da danab amunu dabmekkulnu ool daatte,” awa aum. Nug anam a, Siba nug king amegppa aum. “Jonatan bekka laa appan daatte. Nug am baekuɗ oh kaliak ele,” awa aum. 4Siba nug anam a, King Dawit nug oɗ mettom. “Nid amu adeppa daatte?” oɗ mettom. Oɗ mette am Siba nug aum. “Nug aab onig Lodebar, appa Amiel bekka Makir laugppa daatte,” awa aum. 5Siba nug anam a, King Dawit nug he, nuhikkud maɗi nid ag Lodebar gona, ag Amiel bekka Makir laugppa tena, ag Mepiboset anidna, omalna Jerusalem uɗippig. 6Ag Jonatan bekka Mepiboset, Saul alag amu, ag nug omalna uɗieg, nug Dawit toppa ta, nug Dawit binag mekkunu Dawit noobppa dup noa, ikki wan yom. Nug anam he, Dawit nug oɗ metta, “Na Mepibosette?” awa oɗ mettom. Oɗ mette Mepiboset nug aum. “Ao, da Mepiboset, nahip maɗi nid,” awa aum. 7Mepiboset nug Dawit amegppa anam a, Dawit nug aum. “Da na mamen Jonatannu dabmak anuqak awen, nahipnu oo mauhaknab kobol doye dim lamidkkulnu hettem amunu, na aib baɗame! Na alan Saulnu wan oh amu, da eɗue, na eppenppa mekkul. Laa amu, na hanhan dahil balalppa ee lakkut,” awa aum. 8Dawit nug anam a, Mepiboset nug doya, nug dup noa, ikki wan ye, nug aum. “Da, nahip maɗi nid, da am aun, amu na ena anam heiɗkkutnu hettem? Da am qai mauhom bia aakkuib daattem,” awa aum.
9Mepiboset nug anam a, King Dawit nug Saulnu maɗi nid Siba onigppa e uɗie, nug amegppa aum. “Da gemu keeke oh Saulnu dayom, nug baegppan dilag ele dayom amu, da keeke amu oh nug alag Mepiboset mette malami. 10Da nug mettami amunu, na, na begapad, nahip maɗi nid ele ag wan amuppa ee eppan, meu aonna, Mepiboset baekkudppa laa oh ag keeke ele daaglagnu nug mettaglag, amge nahip okkai alag Mepiboset, nug hanhan balal dahilppa ee lakku,” awa aum. Siba nug bekkod 15, maɗi nid 20 ele. 11King Dawit nug Siba amegppa anam a, Siba nug aum. “Na am dahil okkai, na king. Da am nahip maɗi nid amunu, na da aɗi hekkulnunab attem amu, da hekkul,” awa aum. Dawit nug anam heum amunu, Mepiboset nug hanhan Dawitnu balalppa, king bekkod hetteb bia, nug appa ee lattom.
12Mepiboset nug bekka, nid nakok am onig Mika. Amu Dawit nug he, Siba, nug baekkudppa ele oh ag Mepibosetnu maɗi nid daappig. 13Mepiboset nug hanhan King Dawitnu balalppa ee lattom amunu, nug Jerusalem dayom. Nug baekuɗ oh kaliak ele.
© (Active), Wycliffe Bible Translators, Inc. All rights reserved.