MARK 13
13
Tüopa Jin Üküm Ngoilak Füo
(Mt 24.1-14; Lk 21.5-19)
1 #
Mt 24; Lk 21.5-36. Khümjing tüohyange Jesu ngaiwante, I pinlan yo mepu jawe i, “Leihu, Konnyüopa! Hangke yashanlak long hüyange nok üyong!” 2#Lk 19.43-44; Mk 14.58; 15.29; Jn 2.19; Lam 6.14.Jesuwe jan, “Nange tüopa nok üyong ngenang kü a? Hatüome long ja nehoi yoi yoi nyoi me yengohlak; iman üshei toiloi talak.”
3 #
Mk 5.37; 9.2. Khümjing phei janhüowe leiye Olive Kahtang me Jesu shotte ngohwante, Peter, Jeams, John hüyange Andrew I tangte pei hüyange lowe tong. 4#Lk 17.20.Iman-e i; “Hatüo aope ngailak, hüyange tüolan khongkümpu ngai shao me füo hangke ngohlak, tomante ipha.”
5Jesuwe imante nyüo ne wang, “Kentinge ngohyah, hüyange aote-o numan ünyong yete woine tahtam. 6#Jn 8.24; 1 Jn 2.18.Kahta maawe ü-min me peikülak, hüyange ilak ‘Taowa I!’ hüyange kahta maawe ünyong yete woilak. 7Hüyange aope numan-e ü-o me hokpu ngaolan hüyange üjai me wehokpu ngaolan jailakei, numan mong tahshang. Tüolan ngailak wongpong, hüpoi tüolan kaiye üküm ngoipu ne yeje. 8Hangjingne jat jawe jat ja phei tüi-e, ahngching jawe ahngching ja phei tüi-e tei hoklak. Minwe leipu kenphe me ngohlak, hüyange seanyao yenglepu ngohlak. Tüolan-a shangne ükong wangpu.
9 #
Mt 10.17-22. “Hüyange numan-e yoi jingne kentingyah. Hangjingne kahtalan-e numan pho phalak hüyange numan ngaophün jingme phakülak. Synagogue me numante shetphalak; numan wanglam lampalan hei ahnglan shaome, imante Pungao ümei ilak jingne hüyange Üjingne yonglak. 10Hüyange üwangne jatlan üsheite Pungao ümei nyüolak. 11#Jn 14.26; 16.7-11; Lk 12.11-12.Hüyange aope iman-e numan phophalakei hüyange ngaophün jingte teilakei, numan-e hanghe ngaolak hipak manngoipe mongtah shang; aope hipak peilakeih, hüwante numante hanghe phakülakei ngaotüoh. Hangjingne numan-e ngaopuwa numan-e yeje; Yaha Üjao mepu peilak. 12Kahtalan-e yoi jei yoi nao teilowe li ne tamlak, hüyange payonglan yoi hayimlan phei tüi-e, hayimlan-e yoi nyu heipa phei tüi-e teilowe li ne teitamlak. 13#Jn 15.21.Hüyange Ü-min jingne kahta üsheiye numante nuphalak. Hüyangpoi üküm ngoiye aowe tükke oklakei I yinlak.
Nyam Nyam Shepu Hipak
(Mt 24.15-28; Lk 21.20-24)
14 #
Dan 9.27; 11.31; 12.11. “Hüpoi aope numan-e nunushepu mahlakpa hipak, I yeyonghah shepu nyoi me yongyange ngelakei; (Hanghete leppu ipalan-e shingyah) hüwante aoyin Judea me ngoh kahtang yete phettüoh. 15Noktok me ao ngohlakei, noksa mepu toi yahlak jingne tah ye. 16Hüyange kahme ao ngohlakei nyemo yahlak jingne nokte tah ye. 17#Lk 23.29.Tüopa nyih hei hipak me aoyin sheko püm yekengpe ngoh, hüyange naotak ha pheipu nyuyonglan ngoh, iman jingne onyukei! 18Hatüolan eanyu hipak me yengailak jingne Kahwangte yopyah! 19Hangjingne tüopa nyih hei hipak me ngaipu shangepongpuwa Kahwange kahtoknyu lingpu nyih mepu tenyihpu jin ngoiye shangpu phei shemeng she ngohlak. Yejema-a hükihpu hipak üne ye-ngelak. 20Hüpoi Youngwanpawe tüopa nyih hei hipak shoh tamyangki; Iye hüke yeling shihma-a, kahtanyuha ao-o yeyin hah shepu, hüyangpoi Iye leyangpulan ngohpu jingne tüopa nyih hei hipak shoh ne tamyangki.
21“Hümma-a, kahta ütam-e nangte, ‘Leitüoh, hatüo me Messiah’ yejema-a ‘Leitüoh, hatüo me I!’ she ima-a Ite üting tahlak. 22#Mt 7.15; Jn 4.48.Hangjingne tahleih Messiahlan hüyange tahleih hipalan ngaikülak. Okma-a Kahwange leyangpulan ünyong yete woilak jingne, iman-e füo hüyange kahnyingwüngha hüokülak. 23Hüyangpoi numan kentingyah! Hipak peishao me Taowe numante khongküm inang.”
Kahta Üha Peipu
(Mt 24.29-31; Lk 21.25-28)
24Hüyangpoi shange pongpu tüolan nyih hei hipak linyang phei me, wanghe nyaklak, linnyuwe leta yephalak; 25wang mepu shanhalan yeilak, hüyange wangmepu wonglan polak. 26#Mk 8.38; Mt 10.23; Dan 7.13.Tüophei me Kahta Üha ngailak, wangphom me wong üyong phei hüyange müktishiwa puphei yupu iman-e ngelak. 27Hüwante Iye wangdang shongmokpalan kahtoknyu üshok peli yete shonlak hüyange Kahwange lepalan kahtoknyu jaye üshok mepu jaye üshok ngoipu mepu shaijemlak.
Phukpee Me Konnyüopu
(Mt 24.32-35; Lk 21.29-33)
28“Phukpee me leppe konnyüopu numan-e shingyah. Aope peequi üyoi meiye ngai, hüyange üyak ngaine wang, jüo oteki she numan-e shingnang. 29Tüopa leye aope numan-e tüoyin ngaipu ngelakei, hipak oteki, I tafün shongme ngoh nang she shingyah. 30#Mk 9.1.Taowe ütingme numante inang, tüolan khongkümpu ngaiye manküm manküm tüopa jin linne yetailak. 31#Mt 5.18; Lk 16.17.Wangdang hüyange kahtok linne tailak, hüpoi ü-ngao linne yetailak.”
Nyih Hipak Aowe-o Yeshing
(Mt 24.36-44)
32 #
Lam 1.7. “Hüyangpoi, tüopa nyih hei hipak aope ngoilak, Ipa tokte kaiye wangme ngohpu shongmokpa ne jeyah, yejema-a Iha jeyah aowe-o yeshing. 33#Eph 6.18; Kol 4.2.Kentingyah, menghayah, hangjingne hipak aope peilak numan-e yeshing. 34#Mt 25.14.Hatüowa, inok toishao üshei shaoshanpalan yakjonge angyange, tafün yompa te leitüoh she iyange kahmük üjai te kahta ja yintaipu lenang. 35#Lk 12.35-40.Tüokhei, kentingyah, hangjingne nok nokpupa aope peilak yaning heiya, phawo phatang me heiya awko shaome heiya, yejema-a shomme numan-e yeshing. 36I mokhshe peiwante, nang shiye yengohlak jingne kentingyah! 37Taowe hanghepa numante inang, numan üsheite inang, kentingyah!”
Currently Selected:
MARK 13: KONYBSI
Highlight
Copy
Compare
Share
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
