MALAKHAI 1
1
1Hatüowa Israel kahtalante ngaowe tamlak jingne Youngwanpawe Malakhai te phapu ngaolan.
Israelte Youngwanpawe Kenpu
2 #
Rom 9.13. #Isa 34; 63.1-6; Jer 49.7-22; Eze 25.12-14; 35; Amos 1.11-12; Oba.Youngwanpawe yoi kahtalante i, “Taowe hipak phe me numante ken.”
Hüpoi iman-e jan, “Toman jingne nange kenyangpuwa nange hangke hüopu?”
Youngwanpawe jan, “Esau hei Jacob ni-a jeiheinao, hüpoi Taowe Jacob hüyange Ijing huhayimlante ken, 3hüpoi Esau hei Ijing huhayimlante nuyangki. Esau jing phaotang kahmüklan Taowe jajang japu ne menge tam hüyange kahmük-a phao yinmoklante wo ne tam.”
4“Toman jing Chingshaolan meng winyangki, hüpoi tüolan-a toman-e linge yelakei,” she Esau huhayim Edomlan ne ima-a, hüwante Youngwanpawe ilak, “Iman-e linge yene tamtüoh, Taowe tüolan-a üne-o menge tamlak. Kahtalan-e imante ‘Ümeng kahtok’ she hüyange ‘Ao phei Youngwanpawe jinte mongshih ngaipu jat’ she nyiklak.”
5Israel kahtalan-e tüopa-a iman mük-e ngelak, hüyange iman-e ilak, “Youngwanpa-a Israel kahtok ü-at yeme nehoi wong ngoh nang!”
Ngengpalan Yemeipu
6Ütahpa Youngwanpawe ngengpalante inang, “Netan naha jawe yoipate yihnoon nang, hüyange shaoshanpa jawe yoi nokpupate yihnoon nang. Taowa numan üpa, hangne numan-e üte ye-i-yeshepu? Taowa numan nokpu, hangne numan-e üte ye-i-yeshepu? Numan-e üte yaowele, tüoyangpoi numan-e tong, ‘Toman-e nangte hangke yaowelepu?’ 7Ü-wümjong me angsa hahyinglan dopu kaiye tüopa-a ngainang. Hümma-a numan-e tongtüoh, ‘Hangke toman-e nangte ye-i-yeshe yangpu shi?’ Ü-wümjong winne tüohwe hüopuwe Taowe numante ipha peih. 8Aope numan-e üte toidolak jingne mükmüotephei yejema-a dakpu yejema-a yafaitephei yinmok yah peilakeih, tüolan me hang ümengo yenang she numan-e teih nangkü a? Governor ja te tokke nyaopune yinmok ümeng phalak a? Iye nangte mongmeiye yejema-a monghahpu hüokülak a?”
9Sha-a, numan ngengpalan, tomante meiye lingpha she Kahwangte tongne ngangte hu. Numan-e yoppute Iye yejan phalak, hüyange tüowa numan-e püohpu. 10Ütahpa Youngwanpawe inang, “Ü-wümjong me numan-e jajang japu vün pahlak mepu tienlak jingne numan yo mepu shejawe khümjing taküp küp-e tampu meilak yang she Taowe teihnang. Numan phei Tao mong yehah; numan-e üte yahpeipu dopulan Taowe yeyahlak. 11Wanghe ongpu mepu wanghe nyippute ngoi-e kahtalan-e Ü-min-a yihnoon nang. Ükenphe me iman-e üte üpeameipulan jaknang, hüyange toidopu yah oklakpa ne phanang. Iman moilanne üte yihnoon nang, she Ütahpa Youngwanpawe inang. 12Hüpoi aope numan-e ü-wümjonga jajang japu she iyapeih hüyange aope numan-e yaowelepu hahying tüopa tangme doyapeih, numan-e üte yaoweleye tamnang. 13Numan-e i, ‘Tüolan khongkümpu phei teman hangshin tonyailak!’ Hüyange ü-mepu numan nateang lüp. Numan-e üte dopu yahpeiwante numan-e kuhyahpu yinmok yejema-a yafaipupa yejema-a dakpupa yah peinang. Numan mepu tüopa Taowe yahkülak she numan-e teihnang kü a? she Ütahpa Youngwanpawe inang. 14Aope Ijing nyeekhong yo me Iye üte pha ne janpu yinmok ümei ngohyange, aowe üte jajang japu yinmok toidolakei lowelampate phoiwümpu ngohlak! Hangjingne Taowa ahng üyongpa, she Youngwanpawe inang, hüyange jatlan mepu kahta liliye üte nyamnang.”
Currently Selected:
MALAKHAI 1: KONYBSI
Highlight
Copy
Compare
Share
Want to have your highlights saved across all your devices? Sign up or sign in
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
