Hébreux 1
1
Na Tëvë Na Bâô Wêyê Né Na O Xi-E
1Ö Bâô ré pè aʼ mâʼ xiréé pâr̂â pâ pevaa xé-ré, cér̂é vi wêyê né na pâr̂â pérövéta rö-i pâr̂â nô mâ pâr̂â ké waa ka pôr̂ô, 2wè na tëvë yè-ré bar̂ee rèi pâr̂â nédaa xina, na vi wêyê na O xi-e, ö ce ré é pugèwè-è ki ye nôâ yè-è pâr̂â kââ wânii, mâ yaxai rö xi-e pâr̂â bwêêiapâ wânii, 3aè ce rö ka kar̂a xè-i rhîrhér̂é Bâô mâ na ûr̂û mêr̂ê kaa töö xi-e, na pè tömâ vè mör̂ö pâr̂â kââ wânii xè-i nô xi-e ka ar̂inadö, aè na wê cowa nyââmöi rö-i pâr̂â yerii, na bör̂i wê cuè rö ékar̂aè é gaamëë i ka vi kwéjî rö rua.
Na Vi Kwéjî Aau Na O Rai Pâr̂â Angéla
4É pè vi kwéjî-e rai pâr̂â angéla, wè na wii na néé-é ka vi kwéjî rai-r̂é. 5Wè wîr̂î na angéla ré na êr̂ê yè-è na Bâô, êr̂ê:
«Gèi rö O xi-nya ré gö ër̂i-e,
Rèi nédaa xina, ökââ tëë mwâr̂â, gö yè dè Pevaa xi-i.»
Aè nè yè dè O xi-nya na ce?
6Ökââ tëë mwâr̂â, rèi ö nédaa ré na ër̂i vè döwöö ka paxanii rö bwêê jë, na bör̂i êr̂ê:
«Na e na ké-r̂é tâ nôô yè-è na pâr̂â angéla wânii i Bâô.»
7«Na bör̂i êr̂ê yè pâr̂â angéla xi-e
Cè ké-r̂é ûr̂û pâr̂â ko,
Aè pâr̂â kâmö yar̂i xi-e, wè cér̂é ûr̂û mèèjar̂a kêmör̂u.»
8Aè na êr̂ê na Bâô wa O xi-e, êr̂ê:
«Ö mwâcir̂i xi-i, wè Bâô, na kwéyë rua waavi,
Aè ö mèèjö né gaamëë, wè ökâré rö mèèjö né mwâcir̂i xi-i,
9Gè wê cowa méar̂i târi, mâ rhîaa yaané;
Tö ökâré na wê cowa ôâ-i na Bâô, wè Bâô xi-i,
Xè-i rhëë ka borhêê né vi or̂o;
Na waa yè-i rai pâr̂â pâ béé-i.»
10Ökââ dèxâ mwâr̂â, wè:
«Ör̂ökau mwêê, gè wê cowa waa kavèè bwêê jë rö ka rhavûû,
Aè pâr̂â nékö, wè nêr̂ê i duö néxar̂a â-i;
11Nè yè bör̂i dè bwir̂i rö,
Aè gè yè bâ tö aau na gèi;
Nè yè rhau bo röi na pâr̂â kââ-ré wânii ûr̂û dèxâ mêr̂ê cur̂i,
12Aè gè yè pwîr̂i pâr̂â kââ-ré na ûr̂û dèxâ âmëë pè yakôwîî,
Aè na ûr̂û bar̂ee cur̂i, nè bör̂i pi dèxâ na kétöné-r̂é,
Aè dè bâ gèi rö ré tö yawi mâ na yèri mèèwâ pâr̂â nédaa xi-i.»
13Aè wîr̂î na angéla ré na êr̂ê yè-è yawi na Bâô êr̂ê:
«Cuè ria rö ékar̂a-nya é gaamëë,
Kwéyë rua na göi pugèwè pâr̂â paxa vi rhîaa xi-i
Vè kavèè duö néxar̂a â-i xè ria.»
14Na wêr̂êi, cér̂é da pâr̂â ko pâ kâmö yar̂i i Bâô na pâr̂â angéla, vè ké-r̂é paxa é vi ye nôâ yè-r̂é vi pè mör̂u?
Currently Selected:
Hébreux 1: ANT
Highlight
Copy
Compare
Share
Want to have your highlights saved across all your devices? Sign up or sign in
Ajie New Testament of New Caledonia © Bible Society of the South Pacific, 2014.
