RUM 11
11
Peneglesau Allah neng lepoʹ Israil
1Un pe dau heʹ pelaʹa: Lepa ne Allah nyekang lepoʹ diaʹ anun ne tupe? Nyahut te pekina ne. Akeʹ ca lepoʹ Israil lete, cen mela Ibrahim ngan lepoʹ Benyamin pe akeʹ. 2Abeʹ Allah nyekang ida diaʹ anun ne, iaʹ ban ia lemileʹ cen kena are. Tisen ncem dau Kitap iaʹ badaʹ puyan Ilia, kumpin ne lemameʹ Allah badaʹ penyalaʹ lepoʹ Israil are, kuma ha: 3“Ahaʹ Tuhan, lepa ne ida lematai pegawa hoʹ. Bang akeʹ le iaʹ caʹ un laʹa. Mung padung ukoʹ meʹ mencai mikoʹ, lepa ne ida ngasing nge, ngan kenai re ke lematai akeʹ pelaʹa.” 4Inu kun Allah mipa Ilia tupe? Pekini dau Allah: “Un diaʹ akeʹ mahung makeʹ tujoʹ ibu usa laki, diaʹ abeʹ un tunuk bali Baal.” 5Pekina pe pabeʹ naʹkini, un pe lepoʹ Israil, kediʹut de le diaʹ Allah lemileʹ ngan pelelum moʹ kuʹun pengelesau ue neng ida. 6Allah lemileʹ ida dina ban kuʹun pengelesau ue, abeʹ e ban kuʹun pemuyan nte. Moʹ buk Allah lemileʹ ban kuʹun pemuyan nte, abeʹ pengelesau ina atek pengelesau lan.
7Buk pekina, kumpin puyan ne laʹa tupe? Inu iaʹ lepoʹ Israil ina mita, abeʹ e nalan. Un nte diaʹ Allah ban lemileʹ ngan pelelum didai, kuʹun nte ketai ie nalan. Un diaʹ ca dina tai mahing kuʹo ke seʹ kimet de. 8Koʹ baʹan dau Kitap: “Allah naʹ mida kimet ngan penawai iaʹ kedawan, ngan mata iaʹ abeʹ un taʹan, ngan telinga iaʹ abeʹ un kenahan, pa abeʹ tau ini ne.” 9Un dau Daut:
“Inu pia pengebangen penguman nte nuyan ca kelabak,
ngan ca tepap mida.
Talan pe ida laboʹ sihoʹ ukum.
10Inu pia mata re tai pekep, idi re abeʹ un taʹan,
ngan likut de lemuto tai utut kuʹun penyalaʹ de.”
11Ina ukoʹ keʹ lemutu ikem: Kumpin puyan lepoʹ Yahudi diaʹ ban petatek dina, lan nte laboʹ penco re abeʹ un senteng nai beteʹ laʹa mo? Abeʹ e pekina. Moʹ lepoʹ Yahudi dina un penyalaʹ, ina ukoʹ udip iaʹ pudip ilu dalem Tuhan nai palaʹ lepoʹ diaʹ tahaʹ awang Yahudi, apan lepoʹ Yahudi ke miʹet kidi. 12Buk puyan penyalaʹ lepoʹ Yahudi ina iaʹ mawang peniga nai kusun tanaʹ, ngan puyan muau re ina iaʹ mawang peniga nai palaʹ dulu diaʹ ca, atek ke bioʹ kuʹo ke kenai peniga buk kadoʹ kuʹo ke Yahudi kenai ngelan.
Puyan iaʹ pudip lepoʹ tahaʹ awang Yahudi
13Naʹkini akeʹ pisiu mikem diaʹ tahaʹ awang lepoʹ Yahudi. Pekini dau heʹ: Toʹ pengajan nceʹ lawa Injil me dulu tahaʹ awang Yahudi, selum tekaʹ keʹ neng gayeng ngkeʹ are. 14Baʹan nceʹ, mele sukat pe akeʹ uyan kelunan diaʹ lepoʹ keʹ ke miʹet neng peniga lepoʹ dulu diaʹ ca. Selu buk ke pekina pe senteng ngkeʹ pudip palai mida ʹo. 15Moʹ dalau Allah nyelikut ida Yahudi, kun ne uyan udip me mung dulu diaʹ ca kusun tanaʹ ne. Kumpin puyan ne buk Allah ketai alaʹ ida laʹa baʹan ncem? Ini atek koʹ baʹan diaʹ matai kenai mudip are.
16Buk le mencai ca gaham untat iaʹ ading ading me Allah, mung untat dina anun ne lete. Buk le mencai pakat ca inan kayu me Allah, mung sangat inan kayu ina anun ne lete.
17Un ca inan ampang pula, kun iaʹ un ne pelajap palai daʹan ne. Sulo ho alaʹ ca daʹan ampang cen dalau baʹi, petuk ke ngan ampang pula ina. Pekina kata hem diaʹ tahaʹ awang lepoʹ Yahudi, seʹ kem koʹ baʹan ampang iaʹ dalau baʹi are. Naʹkini seʹ kem pebulung alaʹ pengali cen pakat lepoʹ Yahudi ina. 18Moʹ ina abeʹ tekep kem ke jum neng ida diaʹ koʹ baʹan daʹan diaʹ ban lajap didai. Ayen jum neng ida. Petawai hem, bang daʹan le ikem, abeʹ e ikem iaʹ suʹun tekaʹ neng pakat te, di lareʹ pakat iaʹ suʹun tekaʹ neng ikem.
19Masaʹ kem kuma ha: “Daʹan ina lepa lajap pawang akeʹ tai petuk kidi.” 20Ahaʹ lan te. Moʹ ida abeʹ un ngelan, ina ukoʹ de pesau. Un sepe ikem dini, moʹ kem ngelan, ina ukoʹ kem nai petuk kidi. Ayen ncem tai mpau penawai hem, di lareʹ ngelibaʹ kimet cem ne. 21Naʹ pe lepoʹ Yahudi koʹ baʹan daʹan inan pula ina, abeʹ Allah munung ida mung. Ayen ncem tina kuma ha: “Allah ke munung meʹ ʹo.” 22Cen ini ne ilu ke tisen puyan lesau Allah ngan puyan kateng kimet Allah. Un te kateng kimet te neng dulu diaʹ muau. Un sepuʹo lesau ue neng ikem buk kem abeʹ un beto ke malaʹ ia ngan pesente palaʹ ia. Buk kem abeʹ un ke tudep ʹo, ikem lete iaʹ Allah ke pelajap pet ʹo. 23Ubaʹ Allah ke petuk lepoʹ Yahudi laʹa, buk de lepo puyan nte leko ngelan ne. Sukat Allah petuk ida laʹa. 24Ikem diaʹ tahaʹ awang lepoʹ Yahudi, ikem iaʹ koʹ baʹan utun daʹan ampang dalau baʹi are. Naʹ pe baloʹ o ban dalau baʹi, Allah iaʹ petuk ikem ngan ampang pula idai. Lepoʹ Yahudi, ida iaʹ koʹ baʹan ca inan ampang pula are. Melai le Allah ke petuk lepoʹ Yahudi, koʹ baʹan utun daʹan idai, ngeliwet neng inan ne tengen.
Pengelesau Allah neng mung kelunan
25Ahaʹ cenganak keʹ, abeʹ keʹ ubaʹ ikem ke turan neng sen iaʹ linget dalem katuk ini, moʹ ina iaʹ ke mulen ikem tai tina neng pengencam ngkem. Ini ie: Mahing tawai lepoʹ Israil abeʹ e ke pekina lemuto, tai te pekaliu ʹo. Seʹ de mahing kena ketai sukung kadoʹ lepoʹ diaʹ ca nai ngelan Allah. 26Pekina puyan mung lepoʹ Israil ke tai un udip iaʹ ke pudip ida dalem Tuhan, koʹ baʹan dau Allah dalem Kitap kuma ha:
“Cen lepoʹ Siun kenai Laki Keniga Udip.
Ia ke sau pengejaʹat neng mela Yakup.
27Dalau ina heʹ ke sau penyalaʹ de.
Pekina dau tuket iaʹ akeʹ nyalet neng ida.”
Pekina dau Allah.
28Moʹ lepoʹ Yahudi nyekang Denga Injil ina, seʹ de pebunoʹ ngan Allah. Ina iaʹ ngkin ca bang mikem diaʹ tahaʹ awang Yahudi. Un sepuʹo lepa ne Allah lemileʹ lepoʹ Yahudi ina. Seʹ e malaʹ neng ida, moʹ ban kuʹun tepun nte cen naʹaʹ are. 29Moʹ abeʹ e tai pekaliu kimet Allah neng ban pengencai ie, pekina pe neng ida diaʹ ia ban mengin. 30Ko baʹan ikem are, diaʹ tahaʹ awang Yahudi ne, lepa ne ikem muau neng Allah cen kena. Un sepe naʹkini ʹo, ikem ne iaʹ un pengelesau Allah, moʹ ban kuʹun puyan lepoʹ Yahudi iaʹ muau. 31Pekina ban lepoʹ Yahudi ne, muau re neng Allah naʹkini. Ikem iaʹ un pengelesau Allah, apan nte nai alaʹ pengelesau ina naʹkini puʹo. 32Moʹ Allah ban meput kelunan mung uban nte muau, apan ne senteng ke peluhaʹ pengelesau ue me kelunan mung.
Pempau Allah
33Muʹo tekaʹ tawai le pekimet pasak bioʹ ban peniga Allah, pekina pe penudi ngan penisen ne. 34Abeʹ un aheʹ iaʹ sukat ke mabat kimet te. Abeʹ un aheʹ iaʹ tisen janan puyan ne. Koʹ baʹan dau Kitap Tuhan:
“Aheʹ iaʹ sukat ngetisen kimet Tuhan tupe?
Aheʹ iaʹ sukat pekatuk ia tupe?
35Aheʹ iaʹ ban ading naʹ inu me Allah,
apan ne nyat Allah ke nyuaʹ a pelaʹa?”
36Mung inu ne ban un kuʹun Allah, ngan Allah iaʹ ngkang nge, ngan me Allah ketai ie. Bang me Allah ketai mung serema peniga pabeʹ bayaʹ. Amin.
Currently Selected:
RUM 11: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
