PUYAN LUHA’ 1
1
1Neng surat ini un kudaʹ naʹan puyan iaʹ luhaʹ kuʹun Yesus Keristus. Allah lepa badaʹ a me Yesus apan ne peluhaʹ a me diaʹ pegayeng mia. Puyan ini iaʹ atek ke nuyan laho ʹo. Keristus iaʹ cuk melikat te nai badaʹ a me ulaʹ a Yaya. 2Kun Yaya badaʹ mung puyan inu iaʹ ia lepa taʹan. Surat ini ne dau ue badaʹ tiraʹ Allah milu, ngan katuk telit iaʹ luhaʹ kuʹun Yesus Keristus. 3Bangen kimet ne kelunan iaʹ baca surat ini. Pekina pe bangen kimet diaʹ kenahan dau tiraʹ iaʹ badaʹ seluhan kimet Allah ini, pekina pe diaʹ tudep bayaʹ dau surat ini. Uban nyeng le laʹa tegoʹ puyan ini atek ke nuyan ʹo.
Tiga saheʹ palaʹ diaʹ tujoʹ Mpun diaʹ ngelan Tuhan
4Cen Yaya me diaʹ tujoʹ Mpun diaʹ ngelan Tuhan kaʹ tanaʹ Asia:
Tebelum ngkeʹ pengelesau ngan denaʹ tawai cen Allah iaʹ un ngan ncem: Allah iaʹ lemuto un, ngan iaʹ lepa ban un, ngan iaʹ ke nai ʹo. Pekina pe cen diaʹ tujoʹ berua iaʹ nyeripa padung pengaren ne. 5Pekina pe cen Yesus Keristus iaʹ semamet badaʹ tugen ne. Ia iaʹ Anak ading iaʹ lepa nai numpak mudip cen ahang diaʹ matai. Ia pe iaʹ paren neng usun diaʹ laja kusun tanaʹ ini.
Yesus iaʹ ban malaʹ ilu, ngan ia nakau ilu cen penyalaʹ le ban kuʹun musa dahaʹ a. 6Mentung nge uyan ilu ca lepoʹ paren, ngan uyan ilu detaʹu diaʹ pegayeng me Allah ha, iaʹ Amai ie ne. Palaʹ Yesus Keristus tai serema peniga ngan penyukat pa abeʹ majan ʹo. Amin.
7Naʹat ne, kenai ie tugung abun. Mung kelunan diaʹ ke taʹan ia uʹo, peging ngan diaʹ ban mesuk ia are. Mung kelunan kusun tanaʹ ke nange ngan bisau kuʹun kenai ie uʹo. Atek pekina lan ʹo. Amin.
8“Akeʹ iaʹ atek ading, ngan akeʹ pe atek ngebayaʹ, iaʹ Alpa ngan iaʹ Umiga.” Pekina dau Tuhan Allah iaʹ Atek Bioʹ Penyukat: Allah iaʹ un naʹkini, iaʹ lepa ban un, ngan iaʹ ke nai ʹo.
Penaʹat neng Keristus
9Akeʹ ne Yaya iaʹ cenganak kem. Moʹ le pebeka ngan Yesus, akeʹ iaʹ pebulung ngan ncem neng tuyen. Pekina pe ilu pebulung dalem gaham pengaren ne, ngan pekina pe puyan le nengayet neng penaru. Lepa ne dulu nyepin akeʹ kaʹ tanaʹ ia dulu pisiu Patmus moʹ suaʹ keʹ ban badaʹ tiraʹ Allah ngan katuk telit, iaʹ Yesus peluhaʹ milu. 10Tegoʹ tau Tuhan, un Berua Tuhan nai mesun neng akeʹ. Kun nceʹ kenahan dau lengap tahaʹ likut akeʹ, koʹ bioʹ dau ca tuyau tekepip are. 11Un dau ue: “Inu iaʹ ikoʹ taʹan, nyurat ne dalem ca Kitap. Ikoʹ ngatu ue me diaʹ tujoʹ Mpun diaʹ ngelan Tuhan, kaʹ lepoʹ Ipesus, ngan kaʹ Semirna, ngan kaʹ Pegamus, ngan kaʹ Tatira, ngan kaʹ Sardis, ngan kaʹ Piladipia, ngan kaʹ Ludikia ʹo.”
12Kun nceʹ pupa naʹat aheʹ iaʹ pisiu ngan nceʹ. Belekaʹ keʹ taʹan tujoʹ de teken peritaʹ mat. 13Neng beluaʹ teken peritaʹ dina un ca usa koʹ baʹan diseʹ puyan kelunan. Ia un sapai dadoʹ pa abeʹ taket te. Un sebilang mat neng usuk sapai ie. 14Ngan puk ke puteʹ koʹ baʹan bulu dumba buk are kuntan pe. Un pe mata ha koʹ baʹan seʹ serema luten. 15Taket te un mening koʹ baʹan seʹ jangin iaʹ dulu lepa masi neng lalung, ngan ngepilau laʹa. Ngan dau isiu ue pe ukoʹ dau tengo uʹung kasa re. 16Dalem ujoʹ taʹu ue, ia ngkang tujoʹ betuʹen. Cen paʹ a kenai ca bahing iaʹ nyahit seripa. Silung nge pe dema ukoʹ baʹan diseʹ tegoʹ tau katan re. 17Kun nceʹ taʹan ia, penco tubang ne akeʹ kata taket te, koʹ baʹan ca kelunan matai are. Kun ne napoʹ ujoʹ taʹu ue kempau akeʹ, penco dau ue: “Ayen ncoʹ takut. Akeʹ iaʹ ading, ngan iaʹ ngebayaʹ. 18Akeʹ iaʹ mudip. Lepa ne akeʹ matai, belekaʹ akeʹ pe mudip pa majan ʹo. Akeʹ iaʹ un penyukat neng patai, pekina pe neng tanaʹ diaʹ matai. 19Ban pekina nyurat ne mung puyan iaʹ ikoʹ ban taʹan, puyan iaʹ un naʹkini, ngan puyan iaʹ ke nuyan uʹo.” 20Un dau Yesus laʹa: “Ini sen ne iaʹ linget neng tujoʹ betuʹen iaʹ ikoʹ taʹan dalem ujoʹ taʹu heʹ ne, ngan sen neng tujoʹ teken peritaʹ mat ina: un iaʹ tujoʹ betuʹen ina, ina ne tujoʹ de tuʹa neng diaʹ tujoʹ Mpun dina. Ngan un tujoʹ teken peritaʹ ina, ida lete tujoʹ Mpun diaʹ ngelan Tuhan.”
Currently Selected:
PUYAN LUHA’ 1: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
