IBERANI 10
10
1Abeʹ Adet Yahudi nuyan kata iaʹ sukung ngan daʹam ke peluhaʹ puyan iaʹ atek lan. Adet Yahudi bang nuyan lingai neng puyan peniga iaʹ kenai ʹo. Singket singket uman un liwa ida mencai, abeʹ e tai pekaliu. Uban ne pekina, abeʹ nyatan Katuk Adet ke pedaʹam kelunan diaʹ nai ngejuma Allah kuʹun liwa dina. 2Buk kelunan diaʹ lemameʹ Allah pekina uban ke buheʹ lan cen penyalaʹ de, abeʹ de un tekaʹ penyalaʹ dengkep neng ida laʹa, ngan abeʹ de kanan liwa laʹa. 3Un sepuʹo iaʹ lan ne, puyan liwa iaʹ ke petawai kelunan neng penyalaʹ de singket singket uman. 4Uban dahaʹ sapi manai ngan dahaʹ kading peletoʹ-letoʹ abeʹ senteng mesau penyalaʹ.
5Uban ne pekina kena kenai Keristus kusun tanaʹ ini, un dau ne neng Allah:
“Abeʹ koʹ ubaʹ pencai liwa ngan pencai diaʹ ca,
un sepuʹo ca luhan iaʹ ikoʹ petenup makeʹ.
6Abeʹ koʹ un saheʹ kimet ngan pencai pun
iaʹ tutung megung neng usun padung liwa,
pekina lete ngan liwa iaʹ ke mesau penyalaʹ.
7Lepa ina un dau heʹ neng Allah laʹa:
‘Ahaʹ Tuhan Allah, ini heʹ;
ke ti inu iaʹ ikoʹ ubaʹ,
kuaʹ iaʹ lepa senurat neng akeʹ dalem Kitap Katuk Adet.’ ”
8Isiu ue iaʹ ading are kuma: “Abeʹ koʹ ubaʹ ngan abeʹ koʹ un saheʹ kimet neng pencai liwa ngan pencai diaʹ ca, ngan pekina pe pun diaʹ tutung neng usun padung liwa, ngan pekina pe pencai liwa iaʹ ke mesau penyalaʹ.” Ia pekina dau kenuen pe mung pencai liwa dina ida mencai bayaʹ dau Katuk Adet. 9Isiu iaʹ bayaʹ ina laʹa: “Ahaʹ Tuhan Allah, ini heʹ ke ti inu iaʹ ikoʹ ubaʹ.” Uban pekina puyan Allah mesau mung puyan liwa iaʹ puʹun, penco naʹ pencai liwa Keristus saliu dina mung. 10Uban Yesus Keristus lepa ti puyan iaʹ pedaʹam pengubaʹ Allah, ina ukoʹ ilu mung tai nuyan buheʹ cen penyalaʹ kuʹun pencai usa ha tengen iaʹ ia mencai ca liwai tuaʹ le.
11Singket detaʹu Yahudi iaʹ malai nekejeng menco gayeng nge singket singket tau, ngan mencai liwa idai loʹ tesep tesep ke. Un sepuʹo liwa dini peletoʹ abeʹ senteng mesau penyalaʹ. 12Ca naʹan pe Keristus, uban ia mencai ca pencai liwa tuman penyalaʹ, iaʹ ina ca pencai iaʹ un tiga pa majan, penco ho madung tahaʹ taʹu Allah. 13Kina ha naʹkini, kun ne ngena pa Allah ke naʹ bunoʹ o kuaʹ baʹan ca tentan kentaʹ taket te. 14Ina ukoʹ man ca pencai liwa tuaʹ le Keristus lepa pedaʹam pa majan mung kelunan diaʹ buheʹ cen penyalaʹ.
15Ngan pekina pelaʹa Berua Buheʹ iaʹ badaʹ tugen ne milu. Dau ue ading are:
16“Dau Tuhan: Ini ne penyalet tuket iaʹ akeʹ ke
uyan ngan nte dalau kajan iaʹ kenai ʹo;
Akeʹ ke miget Katuk Adet ceʹ kedalem kimet de,
ngan nyurat te neng penawai re.”
17Lepa ina, un dau ue laʹa: “Abeʹ keʹ ke nawai penyalaʹ ngan pemuyan nte iaʹ jaʹat laʹa.” 18Ina ukoʹ tegoʹ dini lepa pesau, abeʹ titin le ke un pencai man mesau penyalaʹ laʹa.
Tiga le nai ngejuma Allah
19Ahaʹ cenganak cenganak, ina ukoʹ le un teto tekaʹ kenai kaʹ dalem kukoʹ iaʹ Pengekuʹo Buheʹ ban kuʹun patai Yesus. 20Yesus iaʹ mesik milu ca janan mading iaʹ mudip, iaʹ tai kaʹ dalem kuʹun usa ha iaʹ seleket nting apeʹ are. 21Ilu diaʹ un ca Laki Detaʹu iaʹ Bioʹ iaʹ ngkang kelunan diaʹ pengamin Allah. 22Ina ukoʹ tiga le nai ngejuma Allah man kimet iaʹ sebelang, ngan pengelan iaʹ salet, mentung ngan kimet iaʹ lepa buheʹ cen tekaʹ penawai iaʹ dengkep neng penyalaʹ cen kena are. Un pe usa le lepa ntoʹ kuʹun sungai buheʹ. 23Tiga le ngkang salet neng tebelum iaʹ ilu teto ngahaʹ ini, moʹ le senteng napi tawai le palaʹ Allah iaʹ abeʹ senteng lepo dau tuket te. 24Tiga le nawai neng ilu semaheʹ, ngan mepo ilu semaheʹ, idi luhaʹ seʹ puyan malaʹ ngan pemuyan tiga. 25Tiga le pempun koʹ baʹan kelayen le. Ayen leko koʹ baʹan palai are. Di lareʹ tiga le petangen ilu semaheʹ, tai tangen kuʹo uban le tisen Tau Bioʹ Tuhan kenai nyeng laʹa.
26Uban buk le lemuto nengangan ti penyalaʹ uʹo lepa le tisen katuk telit, abeʹ un liwa laʹa iaʹ senteng mesau penyalaʹ le. 27Bang ca puyan tuaʹ iaʹ nahung, iaʹ ina takut neng puyan ukum peging ngan keraban luten iaʹ ke nasaʹ mung diaʹ nyakat Allah ʹo. 28Dalem Adet Musa cen naʹaʹ are, buk dua usa, buk are telu usa, ke badaʹ tugen neng salaʹ ca kelunan mele aheʹ aheʹ pe, dulu ke pebetep dau salaʹ neng ia, penco ho ke sihoʹ ukum patai ngan abeʹ un pengelesau. 29Na, kumpin ne puyan ca kelunan iaʹ muau Anak Allah tupe? iaʹ nyigut dahaʹ iaʹ man Allah nyalet tuket te iaʹ muheʹ laki ina cen penyalaʹ a tupe? laki iaʹ nyepuhoʹ Berua pengelesau Allah tupe? Ten pekimet kumpin tai bioʹ kuʹo ne ukum iaʹ tekep suaʹ a. 30Uban ilu tisen aheʹ iaʹ pekini dau: “Akeʹ iaʹ ke mukum, ngan akeʹ iaʹ ke nyuaʹ.” Ngan ilu tisen aheʹ ia pekini dau kuma ha: “Tuhan iaʹ ke pebetep ukum neng kelunan diaʹ anun ne.” 31Siʹau pe kelunan diaʹ petantaʹ ngan penyukat kenca Allah iaʹ mudip.
32Nawai puyan ncem cen kena are. Dalau ina, lepa nai dema Allah ngedema ikem. Naʹ pe ikem nengayet neng kadoʹ naʹan, abeʹ kem supeʹ dalem tengayet cem are. 33Tahaʹ palai dulu nyepuhoʹ ikem, ngan nyakit ikem. Tahaʹ palai ikem un tenup tekaʹ ke tai pemung ngan kelunan diaʹ sihoʹ pekina puyan. 34Ikem kuaʹ tuyen ngan kelunan diaʹ sihoʹ sepin. Tegoʹ dulu magang mung inu hem, bangen seʹ kem neng puyan pengebura hem are. Moʹ ikem tisen petem un ca puyan iaʹ pelapa tiga, iaʹ ke un pa majan. 35Ina ukoʹ ayen lepo tekaʹ pengetangen tawai hem, moʹ puyan ina iaʹ ngkin ca bang bioʹ serengan ngan ne. 36Tekep ne ikem un denaʹ tawai apan ncem ke menco pengubaʹ kimet Allah, ngan alaʹ iaʹ ia petuket ke naʹ mikem. 37Uban koʹ baʹan dau dalem Kitap iaʹ kuma:
“Abeʹ un majan laʹa, Laki iaʹ ke nai,
atek nai te ia,
abeʹ un duʹai.
38Kelunan nceʹ diaʹ teneng ke ngelan ngan mudip,
un sepuʹo buk un aheʹ ia ngedut,
abeʹ keʹ saheʹ kimet neng ia.”
39Abeʹ le koʹ baʹan kelunan diaʹ ngedut ngan tasaʹ. Un sepuʹo ilu diaʹ ngelan ngan alaʹ udip me berua le.
Currently Selected:
IBERANI 10: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
