GALATIA 2
2
Paulus ngan lawa Injil diaʹ ca
1Puloʹ pat uman ʹo ina, tai heʹ ngan Barnabas ngeliwet kaʹ Yerusalim. Pekina pe Titus un pemung ngan meʹ. 2Akeʹ ban tai kaʹ Yerusalem, moʹ Allah iaʹ cuk akeʹ. Tai sabeʹ meʹ kaʹ Yerusalim, penco heʹ badaʹ puyan Denga Injil, iaʹ akeʹ pedenga palaʹ kelunan diaʹ tahaʹ awang Yahudi, me mung diaʹ lataʹ dina neng ata re tengen. Moʹ keʹ malap gayeng ngkeʹ iaʹ lepa, ngan iaʹ naʹkini, tai abeʹ un tuman. 3Kenuen pe cenganak keʹ Titus ca kelunan lepoʹ Gerika, abeʹ un dau tuʹa Mpun dina lemejen ke nyunat ia. 4Naʹ pia pekina, un palai kelunan diaʹ ngaloʹ badaʹ ida cenganak dalem Tuhan, mentung nte pebulung ngan Mpun meʹ, ida ne diaʹ ubaʹ ke nyunat Titus. Kun nte nyelem mile seʹ puyan meʹ, moʹ de ubaʹ ke tisen neng puyan udip pejo iaʹ ameʹ un ban tuman pebeka tawai meʹ ngan Keristus Yesus. Kun nte ten ke ngulaʹ usa meʹ neng adet ina laʹa. 5Un sepuʹo ca bute pe, abeʹ meʹ ubaʹ ke tunuk palaʹ ida, moʹ meʹ ubaʹ ke pubo iaʹ telit dalem Denga Injil ina mikem.
6Un sepuʹo kelunan diaʹ dulu tisen, koʹ baʹan diaʹ lataʹ dina, abeʹ keʹ nyingo ngadan nte, moʹ abeʹ Allah selepeʹ neng kelunan bayaʹ seʹ ngadan usa re. Moʹ kelunan dina are, ca katuk iaʹ mading pe, abeʹ de un badaʹ makeʹ. 7Di lareʹ bang seʹ de tisen Allah lepa naʹ tulat gayeng ini makeʹ, apan nceʹ tai pedengan Denga Injil ina palaʹ lepoʹ dulu diaʹ ca, koʹ baʹan Allah lepa naʹ tulat gayeng me Peterus, apan ne tai pedenga Denga Injil ina palaʹ kelunan lepoʹ Yahudi. 8Koʹ baʹan penyukat Allah iaʹ lepa uyan Peterus lawa Injil me kelunan lepoʹ Yahudi, pekina lete Allah lepa naʹ penyukat te uyan akeʹ lawa Injil me lepoʹ dulu diaʹ ca. 9Yakup, Peterus, ngan Yaya, iaʹ dulu kuma ha diaʹ lataʹ, ida lepa nugen moʹ Allah lepa naʹ tulat gayeng ini makeʹ kuʹun ban pengelesau ue. Ina tuman nte alaʹ ameʹ dua Barnabas ngan selama dau. Mentung kuaʹ dau ayo meʹ pemung pegayeng ngan nte, iaʹ ina akeʹ ngan Barnabas tai mejo gayeng ina neng ahang lepoʹ dulu diaʹ ca, ngan ida tai palaʹ kelunan lepoʹ Yahudi. 10Bang ca le pengubaʹ de neng ameʹ, iaʹ ina lesau kelunan kasip. Ini ne iaʹ atek akeʹ ke uyan pa mpi tekaʹ penyukat ceʹ.
Paulus nyekang dau neng Peterus kaʹ lepoʹ Antiukia
11Tegoʹ Peterus nai abeʹ kaʹ lepoʹ Antiukia, penco heʹ nyekang dau neng ia neng juma kelunan kadoʹ, moʹ luhaʹ seʹ puyan ne salaʹ. 12Moʹ kena kudaʹ usa kelunan, iaʹ Yakup ban cuk, nai abeʹ kaʹ lepoʹ ina, Peterus lepa pemung uman ngan cenganak le diaʹ tahaʹ awang lepoʹ Yahudi. Un sepuʹo lepa kelunan dina abeʹ, sulo tai Peterus ngerada ngan abeʹ e pemung uman ngan nte laʹa. Peterus takut kelunan Yahudi dina, moʹ ida diaʹ menco katuk iaʹ ke nyunat kelunan diaʹ tahaʹ awang lepoʹ Yahudi. 13Pekina pe cenganak le diaʹ lepoʹ Yahudi tai pubut kimet pemung ngan Peterus, pa Barnabas tai pihit kuʹun pemuyan nte ina. 14Un sepuʹo dalau heʹ taʹan pemuyan nte abeʹ un telit bayaʹ katuk Denga Injil ina, sulo heʹ pisiu Peterus neng juma kelunan kadoʹ dina. Un dau heʹ: “Ikoʹ ca kelunan Yahudi, un sepuʹo pengudip koʹ kuaʹ ngan kelunan lepoʹ dulu diaʹ ca. Moʹ inu hoʹ lemejen kelunan diaʹ tahaʹ awang lepoʹ Yahudi ke mudip bayaʹ adet kelunan Yahudi tupe?”
Lepoʹ Yahudi ngan lepoʹ diaʹ ca un udip dalem Tuhan kuʹun pengelan
15Ameʹ ne iaʹ pempet kaʹ lepoʹ Yahudi. Abeʹ meʹ koʹ baʹan kelunan penyalaʹ diaʹ tahaʹ awang lepoʹ Yahudi dina are. 16Naʹ pia pekina, ameʹ tisen moʹ ca kelunan ketai teneng ngan Allah, abeʹ e kuʹun pemuyan ne bayaʹ Katuk Adet, di lareʹ bang kuʹun pengelan ne palaʹ Yesus Keristus le. Lepa ne ameʹ ngelan palaʹ Yesus Keristus apan meʹ sukat tai teneng ngan Allah kuʹun pengelan meʹ neng Keristus ina, abeʹ e kuʹun pemuyan meʹ bayaʹ Katuk Adet. Moʹ kuʹun Katuk Adet ina, ca kelunan pe abeʹ un sukat ketai teneng ngan Allah. 17Tebelum meʹ neng puyan le pebeka tawai ngan Keristus ke ngkin ilu tai teneng ngan Allah. Un sepuʹo buk luhaʹ seʹ meʹ un penyalaʹ koʹ baʹan lepoʹ diaʹ ca are, un sen ina kuma Keristus iaʹ ngkin penyalaʹ milu mo? Naʹun. Nyahut te pekina ne. 18Buk keʹ ke medeng laʹa inu iaʹ akeʹ lepa ngasing are, atek luhaʹ seʹ keʹ ca kelunan iaʹ ngesa adet. 19Un sepuʹo neng puyan Katuk Adet ina, lepa ne akeʹ matai kuʹun ne, apan nceʹ sukat ke mudip me Allah. Lepa ne akeʹ matai neng kayu tecek pemung ngan Keristus. 20Ina ukoʹ pengudip keʹ naʹkini, abeʹ e akeʹ laʹa, di lareʹ Keristus iaʹ mudip dalem akeʹ. Pengudip keʹ naʹkini, iaʹ ina kuʹun pengelan nceʹ palaʹ Anak Allah, iaʹ malaʹ akeʹ ngan iaʹ lepa mencai pengudip pe tuman akeʹ. 21Abeʹ keʹ nyekang pengelesau Allah iaʹ ia lebang naʹ makeʹ ina. Moʹ buk ca kelunan tai teneng ngan Allah ban kuʹun Katuk Adet ina, patai Keristus abeʹ un tuman tuman ne.
Currently Selected:
GALATIA 2: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
