IPESUS 3
3
Gayeng Paulus me lepoʹ tahaʹ awang Yahudi
1Cen diaʹ pekina, ina ukoʹ keʹ lemameʹ palaʹ Allah. Akeʹ iaʹ Paulus, iaʹ ban tai sihoʹ sepin kuʹun Keristus Yesus moʹ tuman ikem diaʹ tahaʹ awang Yahudi. 2Masaʹ lepa ne ikem kenahan dau denga puyan Allah naʹ gayeng ini makeʹ ke uyan tiga mikem, cen bioʹ pengelesau ue iaʹ ia lebang naʹ milu ina. 3Un kaʹ sedep Allah, lepa ne ia peluhaʹ a makeʹ. (Lepa ne akeʹ nyurat kediʹut de neng puyan ina. 4Buk kem baca surat ceʹ are ʹo, tai te ikem tisen katuk keʹ neng kaʹ sedep Keristus ina are.) 5Cen naʹaʹ abeʹ Allah peluhaʹ diseʹ sedep pe. Un ne naʹkini ʹo, ia peluhaʹ a man Berua Buheʹ palaʹ diaʹ lawa Injil ngan diaʹ pegawa a diaʹ buheʹ. 6Pekini sen sedep pe: bayaʹ dau Denga Injil ini, lepoʹ diaʹ ca pemung ngan lepoʹ Yahudi, kuaʹ le pemung nganun peniga Allah. Pemung le nganun ca le usa. Ngan pemung le nganun mung iaʹ Allah petuket kedalem Keristus Yesus.
7Allah iaʹ uyan akeʹ petubo katuk Injil bayaʹ ban tulat pengencai ie makeʹ, ngan naʹ gayeng ini peging ngan penyukat te. 8Naʹ pe akeʹ iaʹ libaʹ neng ʹo pengelibaʹ neng ahang diaʹ anun Allah, gayeng ini ne Allah mencai makeʹ man nceʹ tai palaʹ lepoʹ diaʹ tahaʹ awang Yahudi pedenga pengekayaʹ peniga Keristus. 9Idi heʹ senteng mepo kelunan mung tai tisen kumpin diseʹ puyan Allah iaʹ ban uyan mung inu ne, ke pedaʹam sedep pe, iaʹ lepa kudaʹ sun udip majan ne iaʹ abeʹ un nai luhaʹ kuʹun Allah, 10apan naʹkini ʹo, ia ke kanan Mpun diaʹ ngelan Tuhan, man ne ke badaʹ me melikat ngan diaʹ ngkang penyukat tahaʹ ntaʹ langit ke tisen ban kumpin selawan seʹ mung naʹan penudi Allah.
11Puyan ini bayaʹ tengangan Allah, iaʹ ia pebetep neng kimet te cen tading te, iaʹ ia pedaʹam dalem Keristus Yesus, Tuhan le. 12Ilu diaʹ pebeka tawai dalem me, ngan ngelan ne, senteng nyeripa Allah ngan tempa, moʹ abeʹ un palan ne. 13Cen diaʹ pekina, ukoʹ keʹ nyat neng ikem, ayen iʹut tawai, moʹ penaru iaʹ sihoʹ akeʹ ban suaʹ ikem iaʹ ke nuyan peniga mikem.
Pengemalaʹ Keristus
14Ina ukoʹ keʹ tai pelenyun pa heʹ sutlep lemameʹ palaʹ Amai Bioʹ. 15Ban singket naʹan pemanak un ngadan nte cen Amai Bioʹ le Allah, inu pia diaʹ kaʹ surga, pekina pe diaʹ kusun tanaʹ ini. 16Akeʹ nyat Amai Bioʹ naʹ mikem penyukat Berua ha, bayaʹ pengekayaʹ serema peniga ha, apan ncem tai pali dalem berua kimet cem, 17apan Keristus nai mudip kedalem penawai hem kuʹun pengelan ncem. Akeʹ lemameʹ apan toʹ pakat puʹun pengudip kem tai salet neng pengemalaʹ Allah, 18apan ncem tai pemung pebulung ngan toʹ diaʹ anun Allah, apan ncem un penyukat ke ngetisen pengemalaʹ Keristus; kudaʹ berang nge, dadoʹ o, mpau ue, ngan kudaʹ dalem me. 19Awaʹ ne ikem tisen toʹ pengemalaʹ Keristus iaʹ lapa neng ʹo penisen le kelunan, apan ncem tai dengkep kuʹun inu iaʹ dengkep neng Allah.
20Palaʹ Allah ketai tapi saheʹ le, moʹ sukat Allah uyan mung inu iaʹ lapa neng ʹo pengenyat le, buk are neng ata kimet le pe, bayaʹ penyukat iaʹ un pegayeng kedalem ilu. 21Palaʹ Allah ne ketai mung serema peniga dalem Mpun diaʹ ngelan, ngan dalem Keristus Yesus, singket sun udip pa abeʹ bayaʹ. Amin.
Currently Selected:
IPESUS 3: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
