PEMUYAN 23

1Kun Paulus nekeneng naʹat Mpun diaʹ Lataʹ dina, kun dau ue: “Ahaʹ amai, ngan cenganak keʹ mung, akeʹ ne mudip neng juma Allah peging dema tekaʹ kimet penawai heʹ pa abeʹ tau ini ne.” 2Kun Ananias, Pengebioʹ Detaʹu ina, cuk diaʹ nekejeng nyeng kata Paulus nepap paʹ Paulus. 3Un dau Paulus neng ia: “Allah iaʹ ke nepap ikoʹ puʹo, E nting iaʹ kadeng puteʹ. Seʹ koʹ madung kini ke ngukum akeʹ bayaʹ Katuk Adet Musa petem pe ikoʹ tengen ngesa Katuk Adet Musa ne, moʹ koʹ cuk dulu nepap akeʹ.”

4Un dau laki iaʹ nekejeng dudo Paulus ina: “Seʹ koʹ pejaʹat Pengebioʹ Detaʹu tupe?”

5Un dau Paulus: “Ahaʹ cenganak keʹ, abeʹ keʹ tisen buk ban ia Pengebioʹ Dataʹu, moʹ un dau dalem Kitap Tuhan: ‘Ayen ncem pejaʹat dau neng tuʹa lepoʹ kem.’ ”

6Dau Paulus taʹan palai mida dina diaʹ ban Seduki ngan un pe diaʹ Perisi, bioʹ dau ue pisiu kuma ha: “Ahaʹ amai, ngan cenganak keʹ mung, akeʹ ne ca diaʹ Perisi lete, ca anak ban mela Perisi. Moʹ ban nceʹ un tebelum kelunan matai ke nai numpak mudip laʹa, ina iaʹ ukoʹ dulu kini ke petugen akeʹ.” 7Uʹo Paulus pekina dua, tai paseʹ ne dau re diaʹ Perisi ngan nte diaʹ Seduki dina. Un mpun dina tai bese dua re. 8(Moʹ un nte diaʹ Seduki, abeʹ de ngelan diaʹ matai kenai numpak mudip laʹa, ngan abeʹ pe ida ngelan un melikat ngan un berua. Un sepuʹo ida diaʹ Perisi ngelan mung nte dina.) 9Tai bioʹ kuʹo ke dau re pesakat neng ahang ida. Un palai diaʹ guru Katuk Adet Musa diaʹ ban sekula Perisi dina, nai re beteʹ, pali dau re mepo diaʹ pesakat dina. Un dau re: “Tegoʹ ameʹ dini, nyahut laki ini un ca puyan iaʹ jaʹat ne. Masaʹ un ca puyan berua, buk are ca melikat pe iaʹ pisiu ia?”

10Dalau ketai ie kenyarem dau re pekenca, un mayur sedadu ina tai takut ne ia, malap dulu ke pesepit Paulus. Kun ne cuk sedadu dina puno nai alaʹ Paulus cen ahang mpun ina, penco ngkin ia kaʹ amin sedadu.

11Neng alem iaʹ uʹo ina, nai kun Tuhan nekejeng dudo Paulus, kun dau ue: “Bawaʹ ne ading Paulus, moʹ lepa ne ikoʹ badaʹ ban ncoʹ tugen neng akeʹ kaʹ lepoʹ Yerusalim, pekina pelaʹa atek koʹ ke tai lete badaʹ ban ncoʹ tugen neng akeʹ kaʹ lepoʹ Rum laʹa ʹo.”

Dulu peseket ke lematai Paulus

12Kenai dema neng kenempam me, un lepoʹ Yahudi peseket ngkang ca santet kuma: “Abeʹ meʹ ke uman, pekina pe nisep, buk meʹ abeʹ un ke lematai Paulus ading.” 13Lapa pat puloʹ usa kadoʹ de iaʹ peseket man santet ina. 14Mung nte dina tai palaʹ diaʹ detaʹu lataʹ kina, pemung ngan diaʹ lataʹ lepoʹ ina, kun dau re: “Lepa ne ameʹ man ca santet iaʹ bioʹ, moʹ abeʹ meʹ ubaʹ ke uman ca inu kena meʹ ke lematai Paulus. 15Ina ukoʹ o naʹkini tiga hem pemung ngan Mpun diaʹ Lata dina, katu tiraʹ me mayur sedadu ina apan ne ngkin Paulus puno palaʹ ikem. Lemalo diseʹ kem badaʹ ikem ubaʹ ke nyituk ngetisen neng puyan Paulus pelaʹa. Un meʹ sepuʹo ke mabang petenup ke lematai ia kena ha kenai abeʹ kini ʹo.”

16Un sadin Paulus ca leto, un anak laki ie, ia kenahan dau peket dulu ina, penco ketai ie kedalem amin sedadu, badaʹ isiu ini me Paulus. 17Kun Paulus mengin ca usa kaptin sedadu, un dau ue: “Ngkin ne demanai ini palaʹ mayur hem, moʹ un ca tiraʹ ia ubaʹ ke badaʹ mia.” 18Kun sedadu ina ngkin demanai ina palaʹ mayur. Un dau ue: “Ban Paulus, laki iaʹ sihoʹ sepin ina, mengin akeʹ, cuk akeʹ nai ngkin demanai ini palaʹ amai, moʹ un ca tiraʹ ia ubaʹ ke badaʹ me amai.”

19Kun mayur ina ajak ujoʹ demanai ina, ngkin ia tengen tai ceng bese, un dau ue: “Inu iaʹ ikoʹ ubaʹ ke badaʹ makeʹ tupe?”

20Un dau demanai ina: “Un lepoʹ Yahudi lepa peseket ke nyat neng amai, nempam ke ngkin Paulus tai puno nyeripa Mpun diaʹ Lataʹ, seʹ de ke lemalo badaʹ ida ubaʹ ke nyituk ngetisen neng puyan Paulus pelaʹa. 21Ayen amai alaʹ dau re, moʹ suheʹ pat puloʹ usa re diaʹ ke mabang Paulus. Lepa ne ida uyan santet abeʹ un ubaʹ ke uman ngan nisep, buk de abeʹ un ke lematai Paulus ading baʹan dau re. Naʹkini, lepa ne ida petenup ke pekena ikoʹ ke ngahaʹ ia nai kawang.”

22Un dau mayur sedadu ina: “Ini hoʹ badaʹ a makeʹ ne, ayen ncoʹ badaʹ a me dulu laʹa ʹo ko.”

Paulus dulu matet palaʹ Gebenur Pilik

23Penco mayur sedadu ina mengin dua usa kaptin dina, un dau ue: “Petenup ne dua ato sedadu iaʹ ke tai kaʹ Kaisaria, ngan tujoʹ puloʹ usa diaʹ ngedung neng kuda, ngan dua ato usa diaʹ ngkang nyatap, petenup ne tai puke jam piʹen alem ini. 24Ngan petenup pe me Paulus ca kuda, ukoʹ o ngedung, ngan tai re ngkin ia tiga le palaʹ Pilik, gebenur ina.” 25Kun mayur ina nyurat neng ca suart iaʹ pekini dau ue:

26“Dau heʹ badaʹ tiga kimet ceʹ, Keludius Lisias, palaʹ iaʹ paren bioʹ, Pilik gebenur. 27Ban lepoʹ Yahudi dakep laki ini, ubaʹ ke lematai ia. Nai heʹ peging ngan sedadu heʹ, sau ia, moʹ keʹ kenahan dau ue ca anak lepoʹ Rum. 28Moʹ keʹ ubaʹ ke ngetisen inu tuman nte mekem salaʹ mia, ina ukoʹ ke ngkin ia puno palaʹ Mpun diaʹ Lataʹ de. 29Tisen nceʹ ia abeʹ un ca inu puyan iaʹ tekep ukoʹ o ke sihoʹ ukum patai ngan sepin. Un iaʹ ukoʹ de ban ke pesalaʹ ia sihoʹ neng pemuyan adet de tengen. 30Nai luhaʹ ne palaʹ akeʹ ban nte peseket ke ngejaʹat laki ini. Ina ukoʹ keʹ teto tekaʹ pekimet ke naʹ ia palaʹ ikoʹ. Akeʹ cuk mung diaʹ peneti ngan ne nai nyeripa ikoʹ.”

31Ina ukoʹ sedadu dina ngkin Paulus koʹ baʹan dau mayur re cuk ida are. Penco re ngkin ia ngahu kaʹ lepoʹ Antipatis. 32Neng kenempam me, un diaʹ lepat dina nai re ngeliwet kaʹ lepoʹ Yerusalim kaʹ amin nte ne. Un diaʹ ngedung neng kuda dina, ida diaʹ tai penco tugung Paulus. 33Uʹo re abeʹ kaʹ Kaisaria, kun nte mencai surat ina palaʹ gebenur, mentung nte naʹ Paulus palaʹ ia. 34Kun gebenur baca surat ina, penco ho lemutu tanaʹ cen mpi ukoʹ o. Tegoʹ o tisen ban Paulus ne ca laki cen tanaʹ Kilikia, 35penco dau ue neng Paulus: “Ubaʹ keʹ ke ngeringa dau hem buk mung diaʹ ti ngan ncoʹ nai abeʹ kaʹ ini ʹo.” Kun ne cuk ida meput Paulus dalem amin sepin kaʹ amin Paren Bioʹ Herudis.

Currently Selected:

PEMUYAN 23: KNT

Highlight

Copy