PEMUYAN 20

Tai Paulus kaʹ tanaʹ Makedunia ngan kaʹ tanaʹ Gerika

1Uʹo bikaʹ ina pekenaʹ, kun Paulus mengin diaʹ bayaʹ katuk Tuhan dina nai pempun. Sulo ho pekatuk ngan petangen dau mida. Uʹo ina ha badaʹ nyaheʹ mida kena ha ke puke tai kaʹ tanaʹ Makedunia. 2Ketai Paulus pelibut ketoʹ dale ina, mentung nge petangen dulu man kadoʹ katuk ke. Uʹo ina tai ie abeʹ kaʹ tanaʹ Gerika. 3Telu bulan ne kina. Dalau ue pedaʹam inu ue ngimet ketai bayaʹ kapen sungai kaʹ tanaʹ Siria, tecu tekaʹ a tisen ban lepoʹ Yahudi peseket ubaʹ ke nyakit ia. Sulo teto kaʹ kimet te ubaʹ ke ngeliwet tai cen tanaʹ Makedunia pelaʹa. 4Diaʹ serengan Paulus, un Supatar anak Pirus lepoʹ Beria, ngan Aristakus, ngan Sekundus lepoʹ Tisalunika, ngan Gayus lepoʹ Derbe, ngan Timutius. Un pe Tikikus ngan Terupimus lepoʹ apau Asia pelaʹa. 5Mung nte dina ading tai re pekena ameʹ kaʹ lepoʹ Teruas. 6Un meʹ tai bayaʹ kapen cen lepoʹ Pilipi neng uʹo Tau Bioʹ Adet Ruti iaʹ are un Lamut ina. Dalem lema tau, abeʹ ne ameʹ kaʹ Teruas palaʹ ida diaʹ ading tai didai. Kina meʹ ngelineʹ mung, tujoʹ tau majan ne.

Paulus menoʹ lepoʹ Teruas

7Tai tahup Tau Kelineʹ, tai meʹ pempun ke pemung uman neng daya Tuhan. Petiraʹ ne Paulus me mpun nte kina ngan dadoʹ dau tiraʹ a, pa ketai ie beluaʹ alem, moʹ kaʹ kimet te ubaʹ ketai puke neng kenempam me. 8Kadoʹ pelitaʹ dalem amin kukoʹ meʹ pempun neng iaʹ sada tahaʹ mpau ina. 9Un ca demanai, ngadan ne Utikus, madung kaʹ paʹ awang, tai ngerungun ne ia. Moʹ majan Paulus petiraʹ, tai gahaʹ ne demanai ina luntoʹ, pa tai ie laboʹ kaʹ tanaʹ cen tekuduk amin iaʹ ketelu ue. Uʹo ina tai dulu alaʹ ia, lepa matai ne ia. 10Ketai Paulus kentaʹ mengkup ia, mentung nyekapu ia, kun ne: “Ayen ncem janga tawai, un lepe seʹ laset te ne.” 11Nai Paulus kempau, sulo ho pepiding ruti, penco re uman. Majan pe ia petiraʹ laʹa pa nai dema. Uʹo ina le Paulus tai puke. 12Kun nte ngkin demanai idai uleʹ ngan petem mudip, ngan bioʹ tekaʹ iaʹ petangen ida.

Mecin Teruas kaʹ Militus

13Ameʹ ading tai kaʹ kapen, penco puke tai kaʹ lepoʹ Asus. Kina meʹ pekimet ke alaʹ Paulus, moʹ pekina dau ue cuk ameʹ, ngan ia tengen ubaʹ ke lepat pa ina. 14Lepa ne ia petegoʹ ngan meʹ kaʹ Asus, kun meʹ alaʹ ia, penco tai meʹ kaʹ Mitilini. 15Tai meʹ bayaʹ kapen cen ina. Neng kenempam me, abeʹ ne ameʹ seripa tanaʹ Kius. Ngan neng ketelu tau ue, ameʹ pejakaʹ kaʹ Samus. Uʹo ina, neng kenempam me pelaʹa, abeʹ ne ameʹ kaʹ Militus. 16Betep dau kimet Paulus ubaʹ ameʹ ke tai penco pelapa Ipesus, malap ke majan kaʹ tanaʹ Asia ne. Ina ukoʹ o busek dau ue, apan ne senteng abeʹ kaʹ Yerusalim tegoʹ tau bioʹ adet Pentakusta ina.

Dau Paulus badaʹ nyaheʹ me diaʹ tuʹa Mpun kaʹ Ipesus

17Cen Militus kun Paulus cuk dulu tai kaʹ Ipesus, mengin diaʹ tuʹa Mpun diaʹ ngelan Tuhan. 18Uʹo kenai re dina palaʹ ia, kun ne pisiu mida: “Tisen ne ikem kumpin diseʹ puyan nceʹ ban pejahi ngan ncem lemuto, cen tading tau kenai heʹ cut tanaʹ Asia ini are. 19Akeʹ ca ulaʹ Tuhan iaʹ pegayeng mia ngan toʹ libaʹ kimet ceʹ, ngan tite luloʹ keʹ, pekina pe dalau penaru iaʹ nai cen lepoʹ Yahudi diaʹ ban peseket ke ti akeʹ. 20Tisen ne ikem abeʹ un ca suhuk katuk keʹ neng ikem. Ban mung tiraʹ iaʹ ngkin bang mikem, mung nge akeʹ badaʹ lete mikem, dalau heʹ pekatuk ikem neng Mpun ncem, ngan pekina pe singket lubang amin ncem. 21Palaʹ lepoʹ Yahudi, pekina pe palaʹ lepoʹ Gerika, akeʹ nyebelang badaʹ ngan tugen dau neng puyan nyepuleʹ cen penyalaʹ tai palaʹ Allah, ngan puyan ngelan Tuhan le Yesus. 22Naʹkini un Berua Buheʹ seʹ ke mihit akeʹ ketai kaʹ Yerusalim. Abeʹ keʹ tisen inu iaʹ ke nuyan neng akeʹ kina. 23Bang iaʹ akeʹ tisen ke un puyan meput ngan taru iaʹ mabang akeʹ ʹo, moʹ kaʹ singket singket lepoʹ un Berua Buheʹ iaʹ ban nugen badaʹ puyan iaʹ pekina makeʹ. 24Naʹ pia pekina, abeʹ keʹ mawaʹ udip keʹ pe. Ahaʹ akeʹ senteng pelepa tulat gayeng ngkeʹ neng jo udip keʹ, iaʹ akeʹ ban alaʹ cen Tuhan Yesus are, ina ne ke badaʹ tugen puyan Denga Injil neng pengelesau Allah iaʹ ia lebang naʹ milu.

25“Lepa ne kenai heʹ masat neng ahang ikem badaʹ katuk neng puyan pengaren Allah ke ngaren ilu kelunan. Naʹkini tisen nceʹ, abeʹ kem ke taʹan akeʹ ne laʹa ʹo. 26Lan lan dau heʹ badaʹ mikem tau ini, buk ca usa mikem ke lingu ngan ke durat berua ha ʹo, abeʹ penyalaʹ ini ke sihoʹ akeʹ. 27Moʹ lepa ne akeʹ badaʹ mung ban pengubaʹ kimet Allah mikem. Abeʹ keʹ un nyuhuk palai. 28Petubo ne tiga tiga neng usa ngan kimet cem tengen, pekina pe petubo ne mung aba dumba, moʹ Berua Buheʹ ban cuk ikem ke tuʹa re. Manan ne Mpun diaʹ anun Allah. Allah ban un ne, moʹ tuman dahaʹ patai ie tengen. 29Tisen nceʹ neng uʹo heʹ ke mecin ikem ʹo, kenai lencau diaʹ minget dalau ikem ʹo diaʹ abeʹ un lesau aba dumba ina. 30Cen ahang Mpun ncem tengen pe ke kenai palai dulu diaʹ ke badaʹ katuk palo mikem, iaʹ ke ten pedaru ilu diaʹ ngelan Tuhan pa le dancun tai bayaʹ ida. 31Ina ukoʹ jagaʹ ne. ngan petawai le ʹo: telu uman majan nceʹ ngan ncem, abeʹ keʹ beto pekatuk ikem singket usa hem, naʹ tau ngan ngahu, mentung ngan tange heʹ le tahaʹ palai.”

32Sulo dau Paulus laʹa: “Naʹkini akeʹ pelek kem me Allah iaʹ sukat ke petubo ikem. Akeʹ pelek kem me katuk tiraʹ pengelesau Allah iaʹ sukat ke pedengkep ikem ngan naʹ mikem tulat sioʹ iaʹ Allah petenup ke naʹ me mung kelunan diaʹ anun ne. 33Abeʹ keʹ keloʹ neng ligit kelunan mele aheʹ aheʹ pe, pekina pe neng gelam nte. 34Moʹ ikem tengen lepa tisen ban man ujoʹ keʹ ini lete akeʹ pegayeng ngan alaʹ inu inu iaʹ tepa neng akeʹ ngan diaʹ tuyang ngkeʹ. 35Neng mung ban gayeng ngkeʹ lepa ne akeʹ peluhaʹ a, nuyan ca kata mikem, apan ncem tisen pelase diseʹ mepo dulu diaʹ lemaʹ, mentung ngkem petawai tiraʹ Tuhan Yesus iaʹ ia tengen badaʹ a milu, kuma ha: ‘Ban pelapa bioʹ bangen kelunan buk de naʹ, cen ʹo re alaʹ.’ ”

36Uʹo Paulus pekina dau, kun ne sutlep peging ngan nte mung, sulo re lemameʹ. 37Mung diaʹ tuʹa Mpun kaʹ Ipesus dina, mung nte nange, mentung nte nyekapu batuk Paulus, seʹ de maʹoʹ ia. 38Pasak bihe re ban kenahan dau tiraʹ Paulus iaʹ badaʹ ida abeʹ un ke taʹan ia laʹa ʹo. Pekina ketai re matet ia ka kapen.

Currently Selected:

PEMUYAN 20: KNT

Highlight

Copy