PEMUYAN 16

Timutius Tai Serengan Paulus Ngan Silas

1Tai Paulus de dua masat pabeʹ kaʹ lepoʹ Derbe, uʹo ina kaʹ lepoʹ Listera. Kaʹ ina te un ca laki iaʹ bayaʹ katuk Tuhan, ngadan ne Timutius, anak ca leto Yahudi iaʹ ngelan Tuhan. Un amai Timutius ca lepoʹ Gerika. 2Mung diaʹ cenganak dalem Tuhan kaʹ lepoʹ Ikunium ngan lepoʹ Listera pada Timutius. 3Paulus ubaʹ ke ngkin Timutius masat tugung ia, ina ukoʹ o nyunat ia. Paulus uyan puyan pekina, moʹ un lepoʹ Yahudi iaʹ mudip kaʹ dale ina tisen nte amai Timutius ca lepoʹ Gerika. 4Jinan nte telu masat singket singket lepoʹ, kun nte badaʹ me diaʹ ngelan Tuhan dina tiraʹ diaʹ lawa Injil ngan diaʹ tuʹa Mpun ban pebetep kaʹ Yerusalim are, cuk ida kanan dau tiraʹ ina. 5Pekina te mung Mpun diaʹ ngelan Tuhan kina tai pali dalem pengelan nte, ngan singket tau nai un pit kadoʹ de.

Penaʹat Paulus kaʹ lepoʹ Teruas

6Ketai re pelibut tanaʹ Perigia ngan Galatia, uʹo ina Berua Buheʹ mulen nte tai badaʹ katuk Tuhan kaʹ dalem tanaʹ Asia. 7Tegoʹ de abeʹ seripa neng dale Misia, kun nte ten ketai kaʹ dalem dale Bitinia, un ʹo abeʹ Berua Yesus pedayo ida ketai kina. 8Ina ukoʹ penco ketai re dalau dale Misia, puno kaʹ lepoʹ Teruas. 9Alem ina Paulus taʹan neng penaʹat te, idi diseʹ ca usa lepoʹ Makedunia nekejeng, naten mengin ia kuma: “Baka, nai ne pelawat, nai mepo ameʹ ading.” 10Lepa Paulus taʹan neng penaʹat ina are, un tekaʹ meʹ lan ban Allah iaʹ mengin ameʹ kaʹ ina ke badaʹ Denga Injil palaʹ lepoʹ Makedunia. Penco meʹ petenup ketai kaʹ tanaʹ Makedunia.

Pesik penawai Lidia kaʹ lepoʹ Pilipi

11Uʹo meʹ puke bayaʹ kapen cen Teruas, penco tai meʹ kaʹ lepoʹ Samutake. Neng kenempam me, abeʹ ne ameʹ kaʹ lepoʹ Napulis. 12Cen ina ketai meʹ metik sungai kaʹ lepoʹ Pilipi. Ina ca lepoʹ iaʹ paren kaʹ tanaʹ Makedunia te. Lepoʹ ina kukoʹ lepoʹ Rum diaʹ ban nai bulak. Neng lepoʹ ini un pe kudaʹ kudaʹ tau pe majan meʹ ngelineʹ kidi. 13Tegoʹ Tau Kelineʹ, tai meʹ kawang lepoʹ ina kaʹ sada bahi sungai. Kidi meʹ ngihoʹ ke un kukoʹ lepoʹ Yahudi lemameʹ. Penco meʹ madung pisiu ngan leto diaʹ pempun kina. 14Un ca leto neng ahang ida diaʹ ngeringa dau meʹ, iaʹ pebeli keluma diaʹ silem, ca usa lepoʹ Tatira, ngadan ne Lidia, ca leto iaʹ tudep lemameʹ palaʹ Allah bayaʹ Katuk Adet Musa. Tuhan iaʹ mesik penawai ie, ina ukoʹ o alaʹ dau katuk Paulus. 15Un Lidia ne, kun nte ngebatis ia peging ngan diaʹ amin ne. Kun ne mengin ameʹ: “Nai ne ikem telu, tudo kaʹ amin nceʹ buk betep tekaʹ kimet cem kuma akeʹ ca iaʹ lan ngelan neng Tuhan.” Naten dau ue mengin ameʹ telu ne.

Neng amin sepin kaʹ lepoʹ Pilipi

16Ca tau ue laʹa dalau ketai meʹ kaʹ ukoʹ dulu lemameʹ ina, kun meʹ tegoʹ ca usa dekiʹit leto iaʹ un bali mencam ngelingai inu inu. Dulu diaʹ alaʹ ia ulaʹ, bioʹ bang nte neng ia kuʹun puyan ngelingai ina. 17Nai dekiʹit leto ina bayaʹ ameʹ telu Paulus, mentung nge ngelengap, un dau ue: “Kelunan dini iaʹ ngkang gayeng Allah iaʹ atek mpau. Ida iaʹ badaʹ janan mikem neng iaʹ ke pudip ikem dalem Tuhan.” 18Selu kudaʹ tau pe majan ne tesep tesep ke pekina dau ue, pa Paulus tai miat laleʹ tekaʹ. Sulo ho nyileʹ ngan pisiu bali ina, un dau ue: “Man ngadan Yesus Keristus akeʹ cuk ikoʹ nai kawang cen leto ini.” Dalau ina tuaʹ ne tai bali ina kelap.

19Tisen kun dulu diaʹ ban alaʹ leto ina ulaʹ are, ban pesau ne bali neng leto idai cen ukoʹ tebelum nte alaʹ ligit are. Penco re dakep Paulus de dua Silas, mihit ida dua kaʹ beluaʹ lepoʹ tai ngejuma diaʹ paren. 20Penco tai re ngkin ida dua pelaʹa ngejuma diaʹ pengelataʹ lepoʹ Rum dina. Un dau re: “Ida dini lepoʹ Yahudi diaʹ aleʹ aleʹ ngasing lepoʹ ilu. 21Ida diaʹ penco katuk adet iaʹ kepetuduk ngan adet le. Moʹ le lepoʹ Rum, abeʹ le senteng ke kanan adet mading ini.” 22Kadoʹ kenai dulu pampo ngenca ida dua. Kun diaʹ lataʹ lepoʹ dina lemerit sapai re dua, penco cuk dulu lemeta ida.

23Lepa ne ida dina lemeta ida dua pa kumpin, kun nte nyuntung ida dua kedalem amin sepin, mentung nte cuk laki bioʹ iaʹ ngkang amin sepin ina jagaʹ ida tiga tiga. 24Ina ukoʹ laki bioʹ ina penco naʹ ida dua neng beluaʹ amin sepin ina, ngan metak kayu ukoʹ taket de nyalet.

25Kena beluaʹ alem, kun Paulus ngan Silas lemameʹ, mentung nte dua dayung pempau Allah. Mung diaʹ dalem amin sepin ina ngeringa dau re dua. 26Belekaʹ pali tekaʹ tanaʹ liung kina, pa tai tekicuk tentan besun sukaʹ amin sepin ina. Ngan dalau ina lete mung pamen tai pesik, ngan mung ampit malat beka re diaʹ sepin dina tai pesau.

27Laki bioʹ iaʹ ngkang amin sepin ina kecet te cen ken ne, kun ne naʹat mung pamen ban pesik ne. Un tekaʹ a ngihoʹ ida diaʹ dalem amin sepin ina muʹo tai kelap ne ida. Sulo ho menat bahing nge, ubaʹ ke lemueng. 28Kun Paulus lemikaʹ ngan bioʹ dau ue: “Ayen ngejaʹat usa hoʹ ne. Mung meʹ te iaʹ un kini.”

29Kun laki bioʹ iaʹ ngkang amin sepin ina nyat titiu, mentung tai ie ngasa ngan ngeregen diseʹ e, penco ho muʹup nusau taket Paulus de dua Silas ne. 30Uʹo ina, kun ne ngkin ida dua kawang. Un dau ue: “Ahaʹ amai, kumpin iaʹ ke tekep pemuyan nceʹ apan nceʹ senteng alaʹ iaʹ ke pudip akeʹ dalem Tuhan tupe?”

31Un dau re dua: “Ngelan ne ikoʹ neng Tuhan Yesus, peging ngan diaʹ neng pengamin ncoʹ mung, ina le ikem ke un udip dalem Tuhan.” 32Penco re dua badaʹ tiraʹ Tuhan me mung dulu diaʹ dalem amin ina.

33Neng alem ina, kun laki bioʹ amin sepin ina ngkin ida dua tai muheʹ suhat de dua. Dalau ina pe laki bioʹ sihoʹ ngebatis, peging ngan mung nte panak neng amin nte. 34Kun ne ngkin Paulus de dua Silas pejakaʹ kaʹ amin nte, penco ho naʹ penguman mida dua. Bangen seʹ de panak mung dalem amin nte, moʹ de ngelan Tuhan Allah.

35Neng kenempam me, kun diaʹ pengelataʹ lepoʹ Rum ina cuk pulis, kun dau re: “Nakau ne kelunan dua dina.”

36Penco laki bioʹ ina badaʹ tiraʹ ina me Paulus, kuma ha: “Ina pengelataʹ lepoʹ ini cuk ke nakau ikem dua Silas cen sepin. Tiga hem dua nai kawang, ngan nyaheʹ ne ikem dua tai masat ʹo.”

37Un dau Paulus neng pulis ina: “Abeʹ de badaʹ inu penyalaʹ meʹ lepe, belekaʹ penco re lemeta ameʹ taʹan dulu mung, petem lepoʹ Rum lete ameʹ dua ne. Sulo re nyepin ameʹ. Naʹkini seʹ de cuk ameʹ ketai kelap nyelem le nuʹo. Nyahut meʹ ubaʹ ia ke pekina ne. Iaʹ ke tekep pe, pengelataʹ Rum tengen nai nakau ameʹ.”

38Kun pulis naʹ tiraʹ ina pelaʹa palaʹ diaʹ lataʹ lepoʹ ina. Penco tai takut ne tekaʹ de, moʹ de kenahan dau re dua ban lepoʹ Rum. 39Ina ukoʹ kenai diaʹ lataʹ dina nyat lesau, nyeluk ida dua, penco re ngkin ida dua kawang, cuk ida dua mecin lepoʹ ina. 40Lepa Paulus ngan Silas nai kawang cen amin sepin ina, penco tai re dua kaʹ amin Lidia. Kina re dua petegoʹ ngan mung diaʹ cenganak dalem Tuhan kina, kun nte penco katuk iaʹ petangen ida. Uʹo ina tai re dua puke pelaʹa.

Currently Selected:

PEMUYAN 16: KNT

Highlight

Copy