3 YAYA 1
1
1Cen Yaya, tuʹa dalem Mpun diaʹ ngelan Tuhan:
Palaʹ Gayus, pengemalaʹ keʹ, iaʹ atek akeʹ malaʹ lan.
2Ahaʹ cenganak keʹ iaʹ akeʹ malaʹ, neng singket naʹan ne akeʹ lemameʹ Tuhan mikoʹ, apan mung puyan usa hoʹ tai maget ngan tiga, koʹ baʹan puyan berua hoʹ iaʹ akeʹ tisen un tiga. 3Bioʹ tekaʹ bangen nceʹ tegoʹ kenai palai diaʹ cenganak le are. Ida badaʹ ban puyan ncoʹ nemek bayaʹ katuk iaʹ telit, kuaʹ baʹan ncoʹ lemuto mudip dalem katuk iaʹ telit lete. 4Abeʹ un inu iaʹ pebangen tawai heʹ lapa cen uʹo denga puyan anak keʹ mudip dalem katuk iaʹ telit.
Yaya pada Gayus
5Ahaʹ cenganak keʹ iaʹ akeʹ malaʹ, temek ban gayeng ngkoʹ neng diaʹ cenganak le, naʹ pe ikoʹ abeʹ un tisen ida cen kena. 6Ida lepa badaʹ pengemalaʹ koʹ palaʹ Mpun diaʹ ngelan Tuhan kini. Tiga hoʹ mepo ida metuk asat de, koʹ baʹan iaʹ tekep bayaʹ pengubaʹ Allah. 7Uban kuʹun gayeng Keristus de tai masat. Abeʹ de dayo kelunan diaʹ abeʹ un ngelan ke mepo ida. 8Ina ukoʹ o tekep le diaʹ ngelan ke mepo kelunan diaʹ pekina, apan le petebulung ngan nte dalem gayeng iaʹ menco katuk iaʹ telit.
Diutripis ngan Dimitrius
9Lepa heʹ ti ca surat buʹet le palaʹ Mpun diaʹ ngelan Tuhan kina. Un Diutripis iaʹ ubaʹ ngadan iaʹ ading neng ahang ida, abeʹ e nyingo dau isiu meʹ. 10Tegoʹ keʹ nai ʹo, ina heʹ badaʹ mung ban pemuyan ne, ngan dau palo ho, ngan puyan ne pejaʹat dau neng ameʹ. Abeʹ e bang puyan ina tuaʹ le, pincaʹ pe laʹa abeʹ e dayo alaʹ diaʹ cenganak le diaʹ tai menoʹ dina. Kun ne mulen kelunan diaʹ ubaʹ ke alaʹ cenganak le dina, pa ha ten ke muyung ida cen Mpun diaʹ ngelan Tuhan ina.
11Ahaʹ cenganak keʹ iaʹ akeʹ malaʹ, ayen ngatap bayaʹ seʹ puyan iaʹ jaʹat, di lareʹ ngatap puyan iaʹ tiga le. Aheʹ kelunan iaʹ menco puyan iaʹ tiga, ida lete diaʹ anun Allah. Kelunan iaʹ menco puyan iaʹ jaʹat, abeʹ de tisen Allah lepe.
12Dulu mung badaʹ tugen iaʹ tiga neng Dimitrius. Katuk iaʹ telit un luhaʹ neng usa ha mentung badaʹ tugen iaʹ tiga neng ia. Pit laʹa ameʹ badaʹ tugen iaʹ tiga mia, ngan ikoʹ pe tisen ban tugen meʹ ne lan.
Nyaheʹ ne
13Un te kadoʹ naʹan iaʹ akeʹ ubaʹ ke badaʹ mikem, un sepuʹo abeʹ keʹ ubaʹ ke nyurat man telang tinta ngan tetuk ke. 14Akeʹ nebelum ke taʹan ikem laho uʹo, ngan pisiu peseripa ngan ncem.
15Tadan lene saheʹ kem.
Mung diaʹ cenganak kem badaʹ tiga saheʹ mikem. Tiga hoʹ pabeʹ dau saheʹ meʹ palaʹ singket singket usa diaʹ cenganak le.
Currently Selected:
3 YAYA 1: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.