2 TIMUTIUS 4
4
1Lan lan dau heʹ pisiu ikoʹ neng juma Allah ngan Keristus Yesus, iaʹ ke pebetep dau neng mung kelunan diaʹ mudip, ngan diaʹ lepa matai. Ngan dalem puyan kenai Yesus, ngan dalem puyan pengaren ne ke ngaren ilu kelunan, dau heʹ cuk ikoʹ: 2Pedenga ne tiraʹ Tuhan, ngan lemuto tenup tekaʹ koʹ ke penco tiraʹ ina, mele dalau kumpin kumpin pe. Tiga hoʹ peluhaʹ pemuyan dulu, ngan negun dau neng diaʹ salaʹ. Petangen ida, ngan pekatuk ida man toʹ pengedenaʹ tawai hoʹ. 3Moʹ un te tegoʹ kenai ie ʹo, abeʹ dulu ubaʹ ke ngeringa dau katuk iaʹ telit, bang bayaʹ pengubaʹ usa re tengen. Kun nte pempun guru ke pekatuk ida bayaʹ tekaʹ asam pengubaʹ de, moʹ jaten telinga re ubaʹ ke ngeringa ha. 4Ida nyalaʹ telinga re cen katuk iaʹ telit, penco re miwaʹ a palaʹ tekenaʹ iaʹ palo. 5Un sepuʹo ikoʹ ini, tiga hoʹ peteneng ngan jagaʹ usa hoʹ, mele inu pemuyan iaʹ nantaʹ ikoʹ, ngan ngihen neng tuyen. Pegayeng ne neng gayeng iaʹ ke madut dulu palaʹ katuk Denga Injil, ngan pesukung ne gayeng iaʹ tulat coʹ.
6Un sepuʹo akeʹ ini, lepa ne akeʹ petenup ke mencai usa heʹ. Moʹ tuket ceʹ ke mecin usun tanaʹ ini, kena ha abeʹ ne ini. 7Lepa ne akeʹ nengayet lan lan dalem pasa pengelan, ngan lepa sukung ne akeʹ kidi, dalem ngkeʹ ban petubo pengelan. 8Naʹkini un bang iaʹ tenup makeʹ, iaʹ ina tapung peneneng iaʹ Tuhan ke naʹ makeʹ tegoʹ Tau Bioʹ ʹo, moʹ Tuhan iaʹ pebetep tiraʹ ngan teneng. Abeʹ e bang makeʹ le, un sepuʹo ia ke naʹ a me mung diaʹ malaʹ ngan saheʹ mengaʹ kenai ie ʹo.
Tiraʹ puyan Paulus
9Nengayet ne ikoʹ nai naʹat akeʹ laho le ʹo, 10moʹ lepa ne tai Dimas kelap akeʹ, moʹ o malaʹ neng usun tanaʹ ini. Tai ie kaʹ Tesalunika. Un Keriskis tai kaʹ Galatia, pekina pe tai Titus kaʹ Dalmatia. 11Ban Lukas iaʹ caʹ un ngan nceʹ laʹa. Ikoʹ mengin Markus nai tugung ikoʹ, moʹ bioʹ tekaʹ a mepo akeʹ dalem gayeng ini. 12Moʹ un Tikikus, lepa ne akeʹ cuk ia tai kaʹ Ipesus. 13Buk koʹ nai ʹo, tiga hoʹ ngkin sapai kapan nceʹ, iaʹ ban akeʹ mahung kaʹ lepoʹ Teruas, kaʹ amin Kapus. Ngan tiga hoʹ ngkin mung Kitap keʹ, menco ho pelaʹa neng surat anit didai.
14Un Alik-sandar, tukeng jangin idai, jaʹat buat te neng akeʹ. Tuhan lete ke nyuaʹ bayaʹ seʹ ban puyan ne. 15Jakaʹ usa hoʹ neng ia ʹo, moʹ pasak laleʹ le ia nyakat katuk le.
16Neng tiraʹ keʹ mipa diaʹ pesalaʹ akeʹ dalem amin kukoʹ dulu pebetep tiraʹ iaʹ ading are, abeʹ un aheʹ iaʹ payo ngan nceʹ. Mung nte iaʹ kelap akeʹ. Ayen ne baʹan le Allah ke pesihoʹ ida neng puyan ina ʹo. 17Naʹ pia pekina, Tuhan iaʹ un ngan nceʹ, ia iaʹ ngepali akeʹ apan nceʹ sukat pedenga Denga Injil kenahan mung dulu diaʹ tahaʹ awang Yahudi, ngan Tuhan iaʹ ban sau akeʹ cen paʹ lencau ina. 18Tuhan iaʹ ke sau akeʹ cen mung diaʹ jaʹat, ngan ke pudip akeʹ pa heʹ ketai kedalem puyan pengaren ne kaʹ surga. Palaʹ Tuhan ketai serema peniga pa pa majan ʹo. Amin.
Nyaheʹ ne
19Badaʹ tiga saheʹ keʹ me Periskila ngan Akila, pekina pe me mung diaʹ amin Unisipurus. 20Un Irastus lepa ngelineʹ kaʹ Kurintus. Ngan Terupimus, ina heʹ mahung ia kaʹ lepoʹ Militus, moʹ o sakit. 21Nengayet coʹ nai kini kena kenai awang sengim ini ʹo.
Ibulus ngan Pudis, ngan Linus, ngan Keludia, peging mung diaʹ cenganak le dalem Tuhan kini, ngatu tiga saheʹ mikoʹ.
22Awaʹ pe Tuhan ke pemung ngan berua hoʹ, pekina pe pengelesau Allah ke pemung ngan ncem mung. 9
Currently Selected:
2 TIMUTIUS 4: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
