2 TESALUNIKA 1
1
1Cen Paulus, Silas, ngan Timutius:
Palaʹ mung kelunan dalem Mpun diaʹ ngelan Tuhan kaʹ Tesalunika, diaʹ anun Allah iaʹ Amai le, ngan Tuhan le Yesus Keristus.
2Awaʹ pe Amai Bioʹ ngan Tuhan le Yesus Keristus ke naʹ pengelesau ngan udip iaʹ tadan mikem.
Pebetep ukum tegoʹ Tau ke kenai Keristus
3Ahaʹ cenganak cenganak, tekep meʹ lemuto nyuaʹ tiga saheʹ palaʹ Allah tuman ikem. Ngan tekep lete ameʹ pekina dau uban pengelan ncem iaʹ nai un pit un pit, ngan pekina pe uban puyan pengemalaʹ singket usa hem neng diaʹ ca kenai bioʹ kuʹo ke. 4Ina tuman meʹ un selum tekaʹ kimet tegoʹ meʹ badaʹ puyan ncem neng ahang diaʹ Mpun diaʹ ngelan Allah. Selum pe tekaʹ meʹ tuman puyan ncem lemuto ke nengayet ngan ngelan dalau penaru ngan tuyen iaʹ ikem tisen tekaʹ naʹkini.
5Neng puyan ini, luhaʹ ban Allah iaʹ pebetep tiraʹ ukum ngan teneng. Allah iaʹ petenup ikem apan ncem tekep ke kahum dalem pengaren ne. Ia petenup ikem man penuyen iaʹ ikem tisen tekaʹ naʹkini. Ina tuman ncem sihoʹ tuyen. 6Inu iaʹ teneng, idi lete iaʹ Allah ke uyan. Ngan ia ke naʹ penuyen neng usun kelunan diaʹ ban petuyen ikem.
7Ngan laʹa ia ke naʹ kelineʹ mikem diaʹ tuyen, peging ngan meʹ. Allah ke uyan puyan ini tegoʹ Tuhan Yesus kenai luhaʹ cen surga pemung ngan melikat te diaʹ un penyukat bioʹ dina. 8Kenai ie peging ngan luten iaʹ bangoʹ. Man dina ne ia ke ngukum kelunan diaʹ abeʹ un tisen Allah, peging ngan kelunan diaʹ abeʹ un bayaʹ dau Denga Injil Tuhan le Yesus ina. 9Kelunan dina ke tasaʹ pa pa majan, pa re abeʹ un senteng ke ngejuma Tuhan laʹa, pekina pe neng pengemuhat serema peniga ha ina. 10Tegoʹ Tuhan kenai luhaʹ dalau ina, ia ke alaʹ serema peniga ha tengen cen mung kelunan diaʹ anun ne. Pekina pe ia ke alaʹ selama cen mung kelunan diaʹ ngelan ia. Ngan ikem ne iaʹ ke kahum ngan nte dina ʹo, moʹ kem ban ngelan dau katuk iaʹ ameʹ lepa badaʹ mikem are.
11Ina tuman meʹ lemuto lemameʹ mikem, ameʹ nyat Tuhan Allah le ke uyan ikem kelunan diaʹ un puyan pengudip iaʹ marung neng pengin ne. Awaʹ pe Tuhan man penyukat te ke palup mung pengubaʹ kem iaʹ ubaʹ uyan iaʹ tiga, ngan ke pesukung gayeng ngkem iaʹ nuyan kuʹun pengelan ncem. 12Man janan ini ne peniga ngadan Tuhan le Yesus ina kenai nyerema cen ikem, ngan peniga hem kenai nyerema cen ia lete. Mung puyan ina iaʹ nuyan kuʹun pengelesau Allah le iaʹ ia lebang naʹ milu, ngan kuʹun Tuhan Yesus Keristus.
Currently Selected:
2 TESALUNIKA 1: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.