2 KURINTUS 3
3
Diaʹ ulaʹ Tuket Mading
1Kumpin puyan ini tupe? Seʹ meʹ pempau ngadan meʹ tengen tupe? koʹ baʹan puyan palai dulu diaʹ nebelum surat iaʹ ke badaʹ peniga ngadan nte, surat iaʹ ida ngkin palaʹ ikem, ngan un pe surat iaʹ ikem naʹ mida pe. 2Ikem tengen ne iaʹ surat meʹ. Surat ina lepa senurat neng kimet meʹ lete, apan dulu mung senteng tisen ngan baca ha. 3Lepa tugen ne ban Keristus tengen iaʹ uyan surat ina ngan pekatu ue man ameʹ. Abeʹ surat ina nuyan man telang kadeng, di lareʹ man Berua Allah iaʹ mudip. Abeʹ surat ina nuyan neng usun kudaʹ liʹap batu diaʹ pilau, di lareʹ neng usun kimet kelunan.
4Un dau meʹ pekina uban bioʹ tekaʹ penina meʹ neng Allah kuʹun Keristus. 5Neng usa meʹ tengen abeʹ inu iaʹ puko meʹ ke kuma ha ameʹ senteng ngkang gayeng ini. Moʹ penyukat iaʹ un neng ameʹ, bang cen Allah kenai ie. 6Bang kuʹun Allah ne ameʹ sukat pubo Tuket Mading, abeʹ e tuket kuʹun ca surat adet, di lareʹ kuʹun Berua Tuhan. Surat adet iaʹ ngkin patai, di lareʹ Berua Tuhan iaʹ pudip kelunan.
7Cen naʹaʹ Katuk Adet Musa ina, Allah ngalung neng kudaʹ liʹap batu pilau, sulo nai luhaʹ puyan serema peniga ha tegoʹ o naʹ a me kelunan. Kelunen pe serema iaʹ un neng silung Musa keno ketai sirep ne, selaʹ laleʹ tekaʹ lepoʹ Israil are, pa re are senteng ngetaneng naʹat ia. Lan te gayeng Katuk Adet usa ngkin ca puyan patai, un sepuʹo nai ie serengan puyan serema peniga. 8Buk pekina, atek bioʹ kuʹo ne puyan serema peniga iaʹ kenai serengan puyan gayeng Berua Tuhan ina. 9Buk puyan gayeng iaʹ nyalet ukum penyalaʹ neng kelunan lepa un serema peniga ha, nco pelaʹa ke un serema peniga neng puyan gayeng iaʹ ke muheʹ kelunan cen penyalaʹ de. 10Senteng le badaʹ peniga iaʹ nyerema cen naʹaʹ idai lepa salai kuʹun peniga iaʹ bioʹ serema naʹkini. 11Buk puyan iaʹ un nuat tuaʹ le ke un serema peniga ha, atek bioʹ kuʹo ne serema peniga iaʹ ke un neng puyan iaʹ are ketai salai.
12Ilu un tebelum ina, ina ukoʹ tempa lan dau meʹ. 13Abeʹ meʹ koʹ baʹan Musa iaʹ mekep silung nge man apeʹ are, apan kelunan lepoʹ Israil abeʹ un taʹan serema ina tai ludau ngan salai. 14Lan te kimet lepoʹ Israil pekep cen naʹaʹ are, ngan pa abeʹ tau ini pe seleket apeʹ idai are caʹ mekep kimet te dalau re baca Kitap Tuket Puʹun. Un sepuʹo buk kelunan ketai pebeka tawai ngan Keristus, penco pesau ne apeʹ kep ina. 15Pabeʹ tau ini pe, mele midan nte baca Katuk Adet Musa, petem un lepe kep ina iaʹ mekep kimet lepoʹ Israil. 16Un sepuʹo tai ie pesau buk ke koʹ baʹan dau Kitap iaʹ kuma ha: “Apeʹ kep silung Musa tai pesau dalau ue pupa sileʹ tahaʹ Tuhan.” 17Isiu “Tuhan” neng jo isiu ini are, un sen ne sihoʹ neng Berua Tuhan, uban mele kempi Berua ina un, kina lete un pengudip iaʹ muga tekaʹ. 18Tuman ina ne ilu mung diaʹ nukak serema peniga Tuhan ngan silung iaʹ abeʹ un pekep. Atek serema peniga ina lete iaʹ nai cen Tuhan, iaʹ ina Berua idai are. Mentung nge pekaliu ilu keno ketai le kuaʹ layen ia lete, moʹ puyan serema peniga ha kenai un pit un pit serema ha neng ilu.
Currently Selected:
2 KURINTUS 3: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
