2 KURINTUS 13
13
Katuk mulen ngan dau nyaheʹ ne
1Ini ne iaʹ ketelu liwai kenai heʹ menoʹ ikem. Koʹ baʹan dau Kitap: “Buk un dau iaʹ pesalaʹ kelunan, tekep un dua buk are telu usa iaʹ ke badaʹ tugen neng puyan ina.” 2Dau heʹ neng ikem diaʹ uyan penyalaʹ cen kena, peging ikem diaʹ ca lete, kuaʹ dau heʹ ading nte, dalau heʹ nai menoʹ ikem iaʹ kedua liwai are. Un sepuʹo tiga lete akeʹ ke numpak badaʹ a laʹa naʹkini dalau heʹ coʹ kaʹ ikem. Tegoʹ kenai heʹ laʹa, abeʹ keʹ ke petakau kelunan cen ukum. 3Atek kenai luhaʹ puyan ban Keristus iaʹ pisiu cen akeʹ. Abeʹ e Keristus iaʹ ngkang ikem ngan puyan lemaʹ, di lareʹ ia peluhaʹ puyan penyukat te neng ahang ikem. 4Kenuen pe puyan pengelemaʹ Keristus luhaʹ dalau dulu lematai ia neng usun kayu tecek are, atek kuʹun ban penyukat Allah iaʹ tuman ne mudip naʹkini. Ameʹ diaʹ pebulung ngan ne, un lemaʹ lete, di lareʹ neng puyan meʹ pesihoʹ ngan ncem, ameʹ diaʹ ke mudip pemung ngan ne kuʹun penyukat Allah lete.
5Tiga hem ten puyan ncem tengen, ngan metep isiu neng ata hem tengen, apan ncem ke tisen buk lan pengudip kem un dalem pengelan. Buk kem are tapa lan, atek kem ke tisen lan ban Keristus iaʹ un dalem ikem. 6Akeʹ nebelum ikem ke tisen ban abeʹ meʹ kelunan diaʹ tapa. 7Ameʹ lemameʹ Tuhan Allah apan ncem abeʹ un ti iaʹ jaʹat. Abeʹ e uban meʹ ubaʹ ke niga ngadan meʹ tengen, di lareʹ apan ikem pe senteng uyan iaʹ teneng, kenuen pe puyan meʹ un seʹ tapa kata dulu. 8Uban abeʹ meʹ senteng uyan inu iaʹ ke mempeng isiu katuk telit, bang iaʹ ke mejo ho tuaʹ le. 9Midan midan meʹ un lemaʹ, bangen tekaʹ meʹ buk ikem iaʹ un pali. Pekina lete puyan meʹ lemameʹ apan tai dengkep pengudip kem. 10Ina tuman nceʹ nyurat ini dalau heʹ petem coʹ kaʹ ikem, apan tegoʹ kenai heʹ abeʹ ʹo, abeʹ titin nceʹ mahing dau neng ikem, kanan penyukat iaʹ Tuhan lepa naʹ makeʹ. Moʹ penyukat ina un tuman ke pedengkep ikem, abeʹ e tuman ke ngasing ikem.
11Naʹkini cenganak cenganak keʹ, nyaheʹ ne. Nengayet nengayet ne mita puyan iaʹ daʹam. Ngeringa tiga neng mung dau pengenyat ceʹ. Mayo ne kimet cem selepeʹ. Mudip dalem udip iaʹ tadan. Laʹa Allah, iaʹ atek puʹun puyan malaʹ ngan tadan, ke un ngan ncem.
12Tiga hem nyelama ikem selepeʹ man puyan paʹoʹ iaʹ koʹ baʹan iaʹ tekep diseʹ me ilu diaʹ pecenganak are.
Mung kelunan diaʹ anun Allah ngatu tiga saheʹ palaʹ ikem.
13Pengelesau Tuhan Yesus Keristus, ngan pengemalaʹ Allah, ngan puyan pebeka tawai kuʹun Berua Buheʹ, ke un ngan ncem mung.
Currently Selected:
2 KURINTUS 13: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
