2 KURINTUS 10
10
Paulus nyalet tulat gayeng nge
1Akeʹ, Paulus tengen iaʹ naten nyat neng ikem, naʹ pe dulu kuma akeʹ iaʹ lemaʹ saheʹ dalau heʹ un ngan ncem are, ngan makang dalau usa heʹ coʹ cen ikem. Akeʹ nyat ikem, kuaʹ puyan Keristus iaʹ un lemaʹ saheʹ ngan lesau. 2Ayen lemejen akeʹ nai ngkin akang palaʹ ikem. Man akang ngkeʹ senteng pisiu kelunan diaʹ badaʹ ban ameʹ kanan penyaheʹ usun tanaʹ dalem gayeng meʹ. 3Lan te ameʹ mudip kusun tanaʹ, un sepuʹo abeʹ meʹ ti ngan bunoʹ meʹ man puyan penyaheʹ usun tanaʹ. 4Ameʹ ti ngan ca naʹan senganan, abeʹ e senganan iaʹ man kelunan ke pepatai kusun tanaʹ ini, di lareʹ senganan iaʹ bioʹ penyukat cen Allah, iaʹ sukat nasaʹ kerahan bunoʹ le. Ameʹ nasaʹ tiraʹ panyi. 5Ameʹ ngasing puyan balang iaʹ dulu medeng man nte ke mempeng kelunan ke ngetisen Allah. Ameʹ meput singket sedep kimet kelunan apan ne semamet bayaʹ Keristus. 6Dalau hem lepa pedaʹam puyan ncem semamet are, ameʹ ke un tenup tekaʹ ke mukum inu puyan iaʹ muau ʹo.
7Ikem iaʹ naʹat seʹ puyan tahaʹ awang. Koʹ baʹan kelunan mele aheʹ pe iaʹ kuma neng ata ha tengen, Keristus iaʹ un ia, tiga ha numpak pekimet puyan usa ha tengen laʹa, moʹ kuaʹ baʹan ameʹ diaʹ anun Keristus, pekina pe ia nuyan anun Keristus lete. 8Lan te akeʹ badaʹ kaʹ keʹ selum kuʹun puyan penyukat iaʹ Tuhan naʹ mameʹ telu. Naʹ pe dau heʹ selum ina un pelapa kediʹut, abeʹ keʹ saʹe, moʹ penyukat ina ne puyan iaʹ sukat medeng ikem salet, abeʹ e puyan iaʹ ke ngasing ikem. 9Abeʹ keʹ ubaʹ seʹ puyan surat ceʹ ke pebisau ikem. 10Dau palai kuma ha: “Surat Paulus un nyarem ngan pali dau, un sepuʹo tegoʹ usa ha un ngan le, lemaʹ seʹ e ne, ngan tiraʹ a pe abeʹ un ateng nte.” 11Kelunan iaʹ pekina dau tekep pe tai tisen, ban puyan isiu iaʹ ameʹ nyurat cen coʹ, abeʹ e tekajaʹ cen puyan meʹ ke uyan dalau meʹ ke ngelineʹ ngan ncem.
12Abeʹ meʹ makang ke kahum cap ngan kelunan diaʹ pempau ngadan nte tengen. Abeʹ senteng pata pekimet ameʹ ngan nte. Puyan nte puyan mapaʹ. Ida nup uyan kuaʹ man pekuaʹ ngadan nte tengen. Ida metep kimet de neng puyan usa re tengen man kuaʹ iaʹ ida tengen uyan lete. 13Un sepuʹo puyan meʹ badaʹ selum tekaʹ meʹ, abeʹ e pelapa iaʹ tekep. Moʹ tekep meʹ selum tekaʹ dalem tulat gayeng iaʹ Allah lepa petulat mameʹ, kahum pe ikem kidi. 14Moʹ ban ikem iaʹ kahum kidi, abeʹ meʹ pelapa neng iaʹ tekep dalau meʹ nai ngkin Denga Injil neng Keristus palaʹ ikem cen naʹaʹ are. 15Ban ne pekina, abeʹ meʹ selum tekaʹ kuʹun gayeng kelunan diaʹ ca iaʹ lapa neng tulat iaʹ Allah petulat mameʹ. Di lareʹ ameʹ nebelum pengelan ncem kenai un pit un pit pa ketai puyan gayeng meʹ neng ahang ikem kenai un bioʹ kuʹo ne. Un sepuʹo lemuto gayeng meʹ un tahaʹ dalem sahang iaʹ Allah badaʹ ban iaʹ tekep. 16Tuman ina, ameʹ senteng pedenga Denga Injil dalem tanaʹ iaʹ ca iaʹ coʹ cen ikem. Abeʹ titin meʹ selum kuʹun gayeng ca naʹan kelunan uyan dalem tulat te.
17Un sepuʹo kuaʹ baʹan dau Kitap iaʹ kuma ha: “Aheʹ iaʹ ubaʹ tekaʹ ke selum, tekep pe selum kuʹun puyan iaʹ Tuhan lepa uyan.” 18Moʹ tegoʹ Tuhan ke pada ca kelunan, luhaʹ ban Tuhan iaʹ ubaʹ neng ia. Abeʹ e pekina tegoʹ ca kelunan ke pada usa ha tengen.
Currently Selected:
2 KURINTUS 10: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
