1 TIMUTIUS 5
5
Puyan iaʹ tekep neng diaʹ ngelan Tuhan
1Ayen ncoʹ ngeretaʹ kelunan lataʹ, bang pekatuk ida le ikoʹ, koʹ baʹan ncoʹ pekatuk amai hoʹ are. Pekina pe me demanai, koʹ baʹan me cenganak koʹ are. 2Pekina pe me leto lataʹ, koʹ baʹan me ueʹ koʹ are. Pekina pe me dekiʹit leto, koʹ baʹan me diaʹ cenganak koʹ leto are man mung tekaʹ buheʹ kimet coʹ.
3Tiga le lesau leto balu iaʹ atek balu. 4Un sepuʹo buk ca leto balu iaʹ un anak ngan su, tiga re petubo balu ina man adet iaʹ tekep neng pengamin nte tengen ading. Pekina puyan anak ke nyuaʹ tiga me tuʹa ngan tepun nte, moʹ ini iaʹ sihoʹ neng pengubaʹ Allah. 5Un pe leto balu, iaʹ balu lan iaʹ luʹung mudip, iaʹ pesente tebelum me neng Allah, ngan tudep pe lemameʹ nyat lesau naʹ tau ngan ngahu. 6Un sepuʹo balu iaʹ bayaʹ asam penawai ie tengen, seʹ e mudip koʹ baʹan matai. 7Ini iaʹ ikoʹ petisen mida, apan dulu abeʹ un mekem salaʹ mida. 8Buk ca usa abeʹ un petubo ida neng pemanak de, menco pelaʹa neng pengamin ne tengen, luhaʹ seʹ e lepa ngebawaʹ pengelan ne. Lapa jaʹat kelunan ina neng diaʹ are ngelan Tuhan.
9Neng surat cap leto balu dalem Mpun, ayen ngepit ngadan balu iaʹ tahaʹ ntaʹ neng nem puloʹ uman udip de. Tiga ha tugen le bang ca le pe ban laki ie. 10Ngan tiga ban baloʹ saheʹ e, ngan mencam ban petubo anak ke, ngan selama alaʹ sakai nyabeʹ amin ne, ngan ban muheʹ taket diaʹ anun Tuhan, ngan mepo dulu dalem taru, ngan tangen neng kadoʹ naʹan puyan tiga.
11Un sepuʹo, ayen ngahum balu dia iʹut udip neng cap ina. Moʹ midan nte un tekaʹ keloʹ ke alaʹ laki, ida ke nyekang Keristus ʹo. 12Ke sihoʹ salaʹ de, moʹ de ngesa tuket iaʹ ban ading ida petuket ngan Keristus. 13Un pelaʹa leto diaʹ pekina, tai malai leko re, ketai re madung madung singket amin dulu. Pincaʹ pelaʹa tai malai ne ida patu tiraʹ bareng ngan pemiat dulu, mentung nte pisiu neng inu diaʹ abeʹ un tekep ida pisiu. 14Moʹ un tekaʹ pengubaʹ keʹ, mung balu diaʹ iʹut udip dina, tiga re alaʹ laki ngan un anak, ngan mencam petubo amin nte, apan abeʹ un tuman diaʹ bunoʹ le ke ti dau re neng ilu. 15Moʹ lan ne un palai balu diaʹ lepa tai dancun bayaʹ Sitan iaʹ tuʹa bali. 16Buk laki ngan leto diaʹ ngelan Tuhan un balu ngan nte neng amin, tiga re petubo ia, ngan ayen Mpun tai bahat pekimet ia. Idi Mpun bang petubo balu iaʹ luʹung mudip le.
17Mung tuʹa Mpun diaʹ tiga gayeng nte, tekep de alaʹ bang dua liwai liwet neng ʹo kelayen nte. Menco pelaʹa diaʹ jaya badaʹ tiraʹ Allah, ngan diaʹ pekatuk. 18Moʹ pekina dau isiu dalem Kitap Tuhan: “Ayen ncem lemeka paʹ sapi dalau ue mihik.” Ngan un pelaʹa: “Singket singket kelunan iaʹ pegayeng, un te bang gayeng nte.” 19Ayen ncoʹ alaʹ dau dulu diaʹ mekem salaʹ neng diaʹ tuʹa Mpun buk are un dua ngan telu usa diaʹ badaʹ tugen neng idi. 20Buk tugen ne ban penyalaʹ a, tekep koʹ tegun dau neng ia kata Mpun, apan mung diaʹ ca tisen tekaʹ takut.
21Lan dau heʹ pisiu ikoʹ neng juma Allah, ngan Keristus Yesus, ngan mung melikat buheʹ. Atek kelapen dau heʹ ke cuk ikoʹ kanan mung katuk dini ngan telit penawai hoʹ, iaʹ abeʹ un selepeʹ tekaʹ kimet coʹ neng aheʹ aheʹ pe, mele inu pemuyan ncoʹ. 22Ngan ayen ncoʹ nup napoʹ ujoʹ koʹ neng dulu ke nyalet ida neng gayeng Tuhan. Ngan ayen ncoʹ tai tabin dalem penyalaʹ dulu. Petubo ne usa hoʹ neng iaʹ buheʹ.
23Ayen ncoʹ nisep sungai buhe tuaʹ le, di lareʹ nisep te ikoʹ telang anggur kediʹut de, moʹ koʹ pekutat sakit usuk.
24Un penyalaʹ palai, diaʹ tugen kena re ke sihoʹ ukum. Un sepuʹo un penyalaʹ palai, diaʹ tugen neng kebayaʹ a. 25Pekina lete puyan tiga ke tugen. Naʹ pe palai abeʹ tugen laho, nyahut te ke suhuk ne.
Currently Selected:
1 TIMUTIUS 5: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
