1 KURINTUS 9
9
Puyan penyukat ngan puyan gayeng Lawa Injil
1Moʹ abeʹ keʹ ca kelunan iaʹ muga tekaʹ mudip tupe? Moʹ abeʹ keʹ te ca kelunan lawa Injil tupe? Moʹ abeʹ keʹ lepa taʹan Yesus, Tuhan le tupe? Moʹ abeʹ kem dini diaʹ badaʹ uban nceʹ pegayeng me Tuhan tupe? 2Naʹ pe kelunan diaʹ ca abeʹ un putuk akeʹ ca lawa Injil, tekep ikem ke alaʹ akeʹ. Moʹ puyan pengudip kem iaʹ pebulung dalem Tuhan iaʹ badaʹ kumpin seʹ keʹ ca lawa Injil.
3Tegoʹ dulu pekabi akeʹ, pekini dau heʹ nyekang makeʹ: 4Moʹ abeʹ keʹ sukat alaʹ penguman ngan tisep suaʹ gayeng ngkeʹ tupe? 5Moʹ abeʹ keʹ sukat uyan kuaʹ baʹan puyan lawa Injil diaʹ ca, ngan diaʹ cenganak laki Tuhan, ngan Peterus tupe, sulo ngkin leto iaʹ ngelan Tuhan serengan ngan nceʹ masat? 6Bang ameʹ dua Barnabas tuaʹ le iaʹ tekep ke mita penguman mameʹ tengen tupe? 7Kempi un sedadu iaʹ ke mita penguman mia tengen tupe? Aheʹ iaʹ un pula buaʹ anggur ngan abeʹ e sukat uman buʹan ne tupe? Aheʹ iaʹ petubo ca aba pakan ne ngan abeʹ e sukat alaʹ telang iteʹ de tupe?
8Seʹ keʹ alaʹ kata cen puyan kelunan ne ini. Abeʹ e bang pekina tuaʹ le, moʹ Katuk Adet Musa un pekuaʹ dau ngan ini lete. 9Ilu baca dalem Katuk Adet Musa, un dau ue: “Ayen ncem meka paʹ sapi dalau ue mihik padai gandum ne.” Lan ne Allah iaʹ petawai sapi, 10abeʹ e pekimet ilu dalau ue pekina dau tupe? Atek sihoʹ neng ilu ne dau surat ini. Uban kelunan iaʹ nugan kuaʹ kelunan iaʹ majau, tekep re pegayeng mentung nebelum ke alaʹ tulat pada ʹo. 11Ameʹ lepa mula beneʹ udip berua neng ahang ikem. Kumpin, salaʹ bioʹ taʹin buk meʹ alaʹ cen ikem suaʹ inu ameʹ ke kanan kusun tanaʹ ini ʹo tupe? 12Buk kelunan diaʹ ca senteng nyat pekini neng ikem, nco ameʹ pe un penyukat ina ne.
Un sepuʹo, abeʹ meʹ kanan penyukat ina, di lareʹ ameʹ nengayet dalem mung naʹan, apan meʹ abeʹ un mempeng kenai asat Denga Injil Keristus. 13Tisen te ikem uban kelunan diaʹ pegayeng neng Umaʹ Palan Allah ne, sukat alaʹ penguman nte cen Umaʹ Palan Allah ina lete. Ngan kelunan diaʹ pubo padung liwa sukat alaʹ tulat cen patai liwa ina lete. 14Pekina lete Tuhan lepa cuk ilu apan kelunan iaʹ badaʹ Denga Injil, tekep pe ida alaʹ pengudip de cen Denga Injil ina.
15Un sepuʹo abeʹ awai heʹ kanan ca penyukat ina are lepe. Laʹa abeʹ keʹ un nyurat surat ini apan nceʹ ke cuk ikem uyan pekina neng akeʹ. Ceng to heʹ matai lien neng ʹo puyan pengebangen nceʹ ketai nuyan isiu pelo-lo. 16Puyan nceʹ pedenga Denga Injil, abeʹ e nuyan ukoʹ keʹ ke bangen tekaʹ. Abeʹ keʹ senteng muau dau iaʹ cuk akeʹ. Siʹau pe akeʹ buk keʹ abeʹ un pedenga Denga Injil ini. 17Moʹ buk keʹ ngkang gayeng ini ngan pengubaʹ kimet ceʹ tengen, tuman nceʹ ke pekimet gaji lete. Un sepuʹo akeʹ ti ie moʹ kuʹun dau iaʹ cuk akeʹ are. Atek Tuhan Allah iaʹ petapi gayeng ini palaʹ akeʹ, ina ukoʹ keʹ ngkang nge. 18Tuman ina, inu suaʹ akeʹ ke alaʹ tupe? Bang ini le, ban un ca awang iaʹ ukoʹ keʹ ke pedenga Denga Injil mentung ngkeʹ abeʹ un nyat suaʹ kidi, ngan abeʹ keʹ kanan penyukat ceʹ kuʹun gayeng Denga Injil ina.
19Lan akeʹ ca kelunan iaʹ muga tekaʹ mudip. Abeʹ keʹ ulaʹ kelunan mele aheʹ pe. Un sepuʹo akeʹ ngulaʹ usa heʹ palaʹ kelunan mung, apan nceʹ sukat alaʹ kelunan lapa kadoʹ me Tuhan. 20Dalau heʹ un neng ahang kelunan Yahudi, akeʹ mudip koʹ baʹan seʹ kelunan Yahudi are lete, apan nceʹ sukat ke alaʹ kelunan Yahudi ne. Naʹ pe usa heʹ tengen abeʹ un tahaʹ ntaʹ Katuk Adet Musa, dalau heʹ pegayeng neng ahang kelunan diaʹ pekina, akeʹ mudip koʹ baʹan seʹ keʹ un tahaʹ ntaʹ Katuk Adet Musa lete, apan nceʹ sukat ke alaʹ kelunan dina. 21Pekina lete dalau heʹ un neng ahang dulu diaʹ ca, akeʹ mudip koʹ baʹan dulu diaʹ ca diaʹ tahaʹ awang neng adet Yahudi, apan nceʹ sukat alaʹ dulu diaʹ ca dina. Abeʹ keʹ muau dau Katuk Adet Tuhan Allah, moʹ atek tahaʹ ntaʹ Katuk Adet Keristus ne akeʹ. 22Neng ahang kelunan iaʹ lemaʹ pengelan, akeʹ nuyan lemaʹ koʹ baʹan ida lete, apan nceʹ sukat alaʹ kelunan diaʹ lemaʹ dina. Ngan puyan pekina akeʹ lepa nuyan mung naʹan palaʹ kelunan mung, apan nceʹ sukat pudip palai kelunan, mele inu inu senganan le kanan.
23Mung puyan dina akeʹ uyan tuman ban Denga Injil ina, apan nceʹ ke kahum pemung dalem peniga ha. 24Buk le pekata kelunan diaʹ pasa taket, tisen te ikem, mung nte ngasa, un sepuʹo bang ca le iaʹ alaʹ bang iaʹ un usun. Ngasa ne ikem koʹ baʹan kelunan iaʹ nengayet ke alaʹ bang. 25Mung kelunan diaʹ malai penta lepa pekalai puyan mapo usa re ngan tangen tangen seʹ puyan nte. Ida uyan pekina apan nte ke alaʹ tapung paren iaʹ laho jaʹat, un sepuʹo ilu dini iaʹ pekalai puyan mapo usa le ngan tangen seʹ, apan le ke alaʹ ca naʹan tapung iaʹ ke un pa abeʹ bayaʹ. 26Ina ukoʹ keʹ ngasa pejo ketai heʹ palaʹ bulan janan ini. Alaʹ ca kata laʹa koʹ baʹan kelunan iaʹ malai penta pesagun, abeʹ keʹ nyagun kawang bareng. 27Akeʹ ngahing usa heʹ ngan petunuk usa heʹ neng singket naʹan, moʹ keʹ malap ketai, uʹo lepa heʹ pekatuk kelunan diaʹ ca, Laki iaʹ ngkang penta ini ke nyekang dau neng akeʹ.
Currently Selected:
1 KURINTUS 9: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
