1 KURINTUS 7
7
Putu neng puyan pepeto
1Naʹkini heʹ ke mipa putu hem dalem surat cem idai are. Ca puyan iaʹ tiga buk ca laki abeʹ un leto. 2Naʹ pe lan diaʹ pekina, un sepuʹo kadoʹ dulu diaʹ aleʹ aleʹ petaro, ina ukoʹ o tekep le laki un ca le leto, ngan pekina pe leto un ca le laki. 3Tiga laki ina ngimet ke nyuaʹ iaʹ tekep me leto ho, ngan pekina pe leto ho me laki ie, man adet iaʹ ke pedaʹam ida selepeʹ apan. 4Ngan laʹa abeʹ e leto ina senteng ke ngaren usa ha tengen pit laki ie. Pekina pe laki ina abeʹ e senteng ke ngaren usa ha tengen pit leto ho. 5Ayen mulen ikem selepeʹ buk abeʹ un kuaʹ kimet cem, ngan ayen majan kanan kimet cem ina, bang alaʹ ne pengebiʹen ncem lemameʹ Tuhan. Uʹo ina puyan ncem pekuaʹ ngan udip kem cen kena laʹa, malap tegoʹ Sitan ke ten ikem, luhaʹ tepa ban ncem mapo pengubaʹ usa hem.
6Dau heʹ pekini, abeʹ seʹ keʹ lemejen ke cuk ikem, di lareʹ seʹ keʹ ke lesau ikem, ina ukoʹ keʹ badaʹ penisen nceʹ mikem. 7Pengubaʹ keʹ apan ncem mung ke pekuaʹ koʹ baʹan akeʹ are. Un sepuʹo singket usa un pengencai iaʹ Allah lepa naʹ mia. Ca kelunan pekini puyan pengencai ie, ngan ca kelunan pekina pe.
8Dau heʹ palaʹ kelunan diaʹ muga ngan leto diaʹ balu, tiga re tengen mudip koʹ baʹan akeʹ are. 9Un sepuʹo buk de abeʹ un senteng ke mapo pengubaʹ usa re tengen, talan pe ida pepeto, uban pulang tiga re pepeto neng ʹo re kaseng neng kimet iaʹ jaʹat.
10Ngan laʹa palaʹ kelunan diaʹ lepa pepeto, un dau pengecuk, abeʹ e akeʹ iaʹ cuk, iaʹ atek lan ne Tuhan iaʹ cuk, ayen iaʹ leto tai mecin laki ie. 11Buk ke lepa mecin iaʹ laki, tiga ha lemuto muga ngajan udip pe. Buk ke abeʹ un pekina, tai ngeliwet palaʹ laki ie laʹa. Ngan pekina pe ayen ca laki petat ngan leto ho.
12Palaʹ kelunan diaʹ ca, dau heʹ mikem, (abeʹ e isiu iaʹ Tuhan badaʹ makeʹ,) buk ca laki iaʹ cenganak le dalem Tuhan un leto iaʹ abeʹ un ngelan Tuhan, ngan leto ina ubaʹ ke ngelineʹ pemung ngan ne, ayen laki ina petat ngan ne. 13Ngan pekina pe leto iaʹ cenganak le dalem Tuhan iaʹ un laki iaʹ abeʹ un ngelan Tuhan, ngan laki ina ubaʹ ke ngelineʹ pemung ngan ne, ayen leto ina petat ngan laki ie. 14Moʹ laki iaʹ abeʹ un ngelan Tuhan ina nai sihoʹ neng pengubaʹ Allah tuman ne pemung ngan leto ho ina. Ngan leto iaʹ abeʹ un ngelan Tuhan ina nai sihoʹ neng pengubaʹ Allah kuʹun laki iaʹ cenganak le ina. Buk ke abeʹ un pekina, seʹ anak de ketai pekuaʹ ngan anak dulu diaʹ abeʹ un ngelan Tuhan, di lareʹ naʹkini anak de dua nai sihoʹ neng pengubaʹ Allah. 15Ca laʹa, buk kelunan iaʹ abeʹ un ngelan Tuhan ina ubaʹ tai kelap, talan ne ia tai kelap. Cenganak le laki, ngan cenganak le leto diaʹ pekina, abeʹ de kedatung laʹa. Tuhan Allah iaʹ mengin ikem mudip dalem udip iaʹ tadan. 16Dau heʹ neng ikem leto diaʹ cenganak le dalem Tuhan, masaʹ ikem iaʹ senteng ke mawang udip me laki hem taʹin. Pekina pe ikem laki diaʹ cenganak le dalem Tuhan, masaʹ ikem iaʹ senteng ke mawang udip me leto hem taʹin.
Denaʹ neng tulat udip kuʹun Tuhan
17Tekep ne singket usa le mudip denaʹ neng tulat udip iaʹ Tuhan lepa petulat milu, pekina pe kuaʹ layan udip kem cen tading Tuhan mengin ikem are. Ini ne adet iaʹ akeʹ pekatuk dalem singket Mpun diaʹ ngelan Tuhan. 18Buk ca kelunan iaʹ lepa sihoʹ adet sunat kenai bayaʹ pengin Allah, ayen janga ke sau ban adet sunat ina. Ngan laʹa buk ca kelunan ke sihoʹ pengin Allah, abeʹ lepe ia sihoʹ adet sunat, ayen ncem nyunat ia. 19Moʹ puyan sunat ina abeʹ un ca bang nge. Pekina pe puyan diaʹ abeʹ un sunat dina, abeʹ e inu, di lareʹ puyan iaʹ atek bioʹ, iaʹ ina ilu bayaʹ dau katuk ukum Allah. 20Tekep ne singket usa le mudip koʹ baʹan layen udip dalau tading le beteʹ bayaʹ dau pengin Allah cen kena are. 21Buk koʹ ban ulaʹ dulu tegoʹ Allah ban mengin ikoʹ, ayen ncoʹ miat. Un sepuʹo buk ke un ca awang iaʹ ukoʹ koʹ pejo tekaʹ ke mudip, alaʹ ne kebiʹen ina, apan ncoʹ mudip neng iaʹ pejo. 22Un sepuʹo ulaʹ iaʹ lepa Tuhan ban mengin, ia lete iaʹ atek ke un udip pejo dalem Tuhan. Ngan pekina pe kelunan iaʹ mudip pejo tegoʹ Keristus mengin ia are, ia lete iaʹ atek ke nuyan ulaʹ Keristus. 23Allah iaʹ lepa lemeli ikem man ca suaʹ. Tuman ina ayen ncem tai nuyan ulaʹ dulu laʹa. 24Ahaʹ cenganak cenganak keʹ, tekep ne singket usa le ngelineʹ pebulung ngan Tuhan Allah kuaʹ baʹan puyan pengudip le tegoʹ Allah mengin ilu cen kena are.
Putu neng diaʹ abeʹ un pepeto, ngan neng diaʹ balu
25Neng puyan diaʹ abeʹ un pepeto, abeʹ e tiraʹ pengecuk cen Tuhan iaʹ akeʹ badaʹ mikem. Un sepuʹo akeʹ ke badaʹ kimet ceʹ tengen, koʹ baʹan ca kelunan iaʹ ikem sukat ke nina uban kuʹun pengelesau Tuhan neng akeʹ.
26Ngimet puyan penusa iaʹ un naʹkini. Bayaʹ kaʹ kimet ceʹ, tiga ne singket usa laki ke mudip koʹ baʹan kelayan nte naʹkini. 27Buk koʹ lepa un leto, ayen ncoʹ pekimet ke petat ngan ne laʹa. Buk koʹ abeʹ un leto, ayen ncoʹ tai mita leto laʹa. 28Un sepuʹo buk koʹ ban pepeto, abeʹ koʹ un uyan penyalaʹ. Ngan pekina pe buk leto iaʹ abeʹ un laki ke alaʹ laki, abeʹ e un uyan penyalaʹ. Ban akeʹ ubaʹ ke nyalaʹ ikem cen penusa iaʹ ke sihoʹ neng kelunan diaʹ pekina singket singket tau.
29Un iaʹ baʹan nceʹ ne cenganak cenganak keʹ, pekini, abeʹ un kudaʹ dadoʹ awang nge laʹa. Ina ukoʹ cen naʹkini ʹo, laki iaʹ un leto, tiga re mudip koʹ baʹan diaʹ abeʹ un leto are. 30Ngan kelunan diaʹ nange, koʹ baʹan abeʹ re ida bampa ʹo. Ngan kelunan diaʹ petawa, koʹ baʹan abeʹ re ida bangen ʹo. Ngan kelunan diaʹ lemeli, koʹ baʹan abeʹ re ida ban nganun inu diaʹ ida ban lemeli ʹo. 31Ngan kelunan iaʹ kanan inu kusun tanaʹ ini, kanan ne koʹ baʹan diseʹ e tepahoʹ kanan ne tuaʹ le, moʹ puyan usun tanaʹ koʹ baʹan layen ne naʹkini, abeʹ e ke un majan le laʹa ʹo.
32Pengubaʹ keʹ, ayen ncem janga tekaʹ pekimet ca inu inu pe. Laki iaʹ abeʹ un leto un bioʹ tekaʹ kimet te. Leto iaʹ abeʹ un laki, pekina pe dekiʹit leto pe, bioʹ tekaʹ kimet te ke pekimet gayeng Tuhan, moʹ kimet te ubaʹ ke ti iaʹ sihoʹ neng pengubaʹ kimet Tuhan. 33Un sepuʹo laki iaʹ un leto, bioʹ tekaʹ kimet te ke pekimet pemuyan ia nuyan kusun tanaʹ, moʹ kimet te ubaʹ ke ti iaʹ sihoʹ neng pengubaʹ kimet iaʹ leto. 34Tuman ina pekedating ne tekaʹ kimet te ke pekimet gayeng Tuhan, moʹ kimet te ubaʹ Tuhan tengen iaʹ ke un usa ha peging ngan berua ha. Un sepuʹo leto iaʹ un laki, bioʹ tekaʹ kimet te ke pekimet pemuyan iaʹ nuyan kusun tanaʹ ini, moʹ kimet te ubaʹ ke ti iaʹ sihoʹ neng pengubaʹ kimet iaʹ laki.
35Un pe iaʹ ukoʹ keʹ pekini dau uban nceʹ ubaʹ ke mepo ikem. Abeʹ uban nceʹ ke mulen ikem pepeto, di lareʹ akeʹ ubaʹ ikem uyan iaʹ teneng ngan iaʹ tekep seʹ, mentung tunuk usa hem ke menco gayeng Tuhan ngan ca le kimet cem ngan teto tekaʹ.
36Neng puyan demanai ngan dekiʹit leto diaʹ lepa metep kimet ubaʹ ke pepeto. Buk laki ina ngimet tekaʹ adet te abeʹ un tekep neng dekiʹit leto ho ina, ngan buk muat tekaʹ pengubaʹ kimet te kuma tekep pe ke pepeto ngan ne, tiga pe ida dua pepeto bayaʹ kaʹ pengubaʹ kimet te. Abeʹ un penyalaʹ neng puyan ini. 37Ngan laʹa, buk ca laki iaʹ salet tekaʹ kimet te abeʹ un ubaʹ kaʹ ke alaʹ leto, ngan abeʹ un kelunan iaʹ lemejen ia, di lareʹ ia tengen iaʹ mencam mapo tekaʹ pengubaʹ kimet te, ngan lepa metep tekaʹ kimet te tengen, buk pekina, atek tiga ne puyan ne abeʹ un alaʹ leto. 38Neng iaʹ pekina, kelunan iaʹ pepeto, tiga lete puyan ne; ngan kelunan iaʹ abeʹ un tai pepeto, tiga kuʹo pe ia.
39Leto iaʹ un laki, abeʹ e ke pesau cen pebeka ngan laki ie, ngajan laki ie un mudip. Buk laki ie lepa matai, abeʹ e pebeka ngan laki ie laʹa, senteng ne ia ke petalan alaʹ laki iaʹ ia ubaʹ tekaʹ, ahaʹ ia dalem Tuhan ne. 40Un sepuʹo bangen kuʹo pe leto ina buk ke mudip luʹung koʹ baʹan kelayan ia un naʹkini. Ina dau cen kimet ceʹ, ngan kihoʹ keʹ Berua Allah iaʹ un ngan nceʹ lete.
Currently Selected:
1 KURINTUS 7: KNT
Highlight
Copy
Compare
Share
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
