Mika 7
7
Ukughaya kwa Isiraeli
1Nochona nene! Kwaapfila nene neghala na imunu ayula iyobawa ghamatunda gha chiyangatsi, ayula iyosalalitsa ghumghunda ghwa minzabinu, kuduhu chikungwi cha nzabibu cha ukuja, nene nobama ndiye litunda lya itini ilyanzile ukwipfa lekeni kuduhu ghendo. 2Iwanu iwompfuka Imulungu wamala ghendo mna isi, kuduhu hata yumwe iyanoghile mna iwanu, chila yumwe kompfitsila miyaghe yamkome, chila yumwe komuwinda miyaghe yamwonze. 3Ghamoko ghawo ghose meli ghakubuhu mna ukutenda ghehile, chilongotsi na mlamlitsi wose wobokela hongo. Iwanu wakulu wolaghitsa iwanu watende aghala ghehile ighobama imimoyo yawo, apfo pfipfo pfawolamla agho hamwe. 4Imunu iyakoneka kanogha mna wawo, ayo keghala na luhonga na imunu iyokemighwa kagholoka kubita wose, ayo keha ka ubanda wa mihonga. Na litsuwa lipfika lya Imulungu kuwahigha iwanu, ka apfila pfayawakanyile kubitila iwakalitsi wawo, awala manabii. Lelo sambi woweghela. 5Uleke kumtoghola imunu wa habehi yako, wala uleke kumlolela sale yako, walangitse haulonga hata kwa ayula iyowasa mmambagha mwako. 6Kwaapfila imwana mmale kombetsa aba wake, imwana pinga kehila na mai wake na pinga yakwelighwe kehila na mwalipfala wake. Maaduwi wa imunu awala iwokala mng'anda mwake.
7Lekeni nene nomlolela IMNDEWA, nombetetsa Imulungu mkombola wangu, Imulungu wangu katsonitegheletsa.
IMNDEWA kowakombola Waisiraeli
8Ghwe aduwi yangu, uleke kudeng'elela nene hanighaya, hanikughwa, nene nitsakwinuka keli ning'awa mchisi IMNDEWA katsonimwemwesela ghumwanga ghwake. 9Kwaapfila nimtendela nzambi Imulungu, nobamighwa nidudumile maghayo ghake, mbaka hatsombonela libatsi na kunihigha na kungaya haki yangu. Katsonighala kunze kwa ghumwanga nani nitsakwona haki yake. 10Kuya aduwi yangu katsakwona agho, naye katsakwona chinyala kwaapfila tsakanongela, “Yalikwani IMNDEWA Imulungu wako?” Kwa nenge tsangu mwenyegho nitsomwona aduwi yangu pfayakughwa, na iwanu watsombajugha bajugha ka kododo lya mnzila.
11Litsuwa lya kutsenga keli ubanda wa ghumji ghwenu lyakutsa. Litsuwa alyo mibaka ya isi yenu itsakwongetseka. 12Ndughu tsenu watsakuya kuna mwemwe, watsolawa Ashuru na imiji ya Misiri, watsolawa isi ya Misiri na Efurate, watsolawa mna tsiisi tsili mmbalimbali mwa ibahali, na watsolawa mna ipfidunda. 13Lekeni isi yose itsakuwa jangwa kwaapfila iwanu iwokala mna isi ayo watenda ghehile.
IMNDEWA kowonela libatsi Waisiraeli
14Uwadime iwanu wako kwa ng'weku yako, awala yuwasaghule wawe wako mwenyegho, na iwokala waliyeka mna ghumuhulo, uwaleke waje mna ghumghina ghwa Bashani na Gileadi ka pfautendile mna imiyaka ya ghumwande.
15Ka mna ghamatsuwa ghala ghatulawile Misiri, ututendele keli pfinu pfako pfa ukukangawatsa. 16Na iwanu wa isi tsingi hawatsakwona agho, wone chinyala na watenyuke hata ka wana ngupfu. Watsodiwa milomo yawo na ghamaghutwi ghawo. 17Watsotambala mna litimbwisi ka nzoka, ka pfilumbe ipfitambala, watsolawa mna tsimango tsawo aku woghudema na ukupfuka, watsokutsila ghweghwe IMNDEWA Imulungu wetu, nawo watsokupfuka.
18Yuhi iyali ka ghweghwe Imulungu? Ghweghwe koleghusa nzambi tsa iwanu wako iwasighale, wala ng'ulola matotso ghawo. Maya yako ng'aikala matsuwa ghose, na konoghelighwa ghendo kutulangusa unoghelo wako. 19Imulungu kutsotwonela keli libatsi, kutsotuleghusila nzambi tsetu, tsose kutsotsasa mna ibahali. 20Kutsolangusa inoghola yako na unoghelo wako, kwa iwanu wa Abrahamu na Yakobu ka pfaulaghane na aba tsetu kulawa ghumwande.
Pioneer Bible Translators and The Word For The World
Learn More About Laghano Lya Sambi Kwe Iwanu Wose