Yohane 21
21
Yesu kowalawila wanafunzi saba
1Hambele Yesu kawalawila keli wanafunzi wake mmbalimbali mwa litsimbu lya Tiberiya. Tsakawalawila apfino, 2Simoni Petiri, Tomasi iyakemighwe Basa, Nasanaeli iyalawile Kana, ghumji ghwa Galilaya, iwana wa Sebedayo, na iwanafunzi wake wangi weli, wose tsawakala hamwe. 3Simoni Petiri kawalongela, “Noghenda kulowa somba.”
Wamlongela, “Na twetwe twoghenda naghwe.” Apfo woka, wengila mna ghumnumbwi; lekeni ichilo achila chose ng'awapatile chinu baye.
4Nemitondotondo hakuchele, Yesu katsa kema mmbalimbali mwa litsimbu; lekeni iwanafunzi ng'awamtangile baye kama tsa Yesu.
5Baho Yesu kawaghutsa, “Wanangu, mna somba?”
Wamwidika, “Baye.”
6Kuya kawalongela, “Yaseni ichelo lubali lwa kujilo lwa ghumnumbwi, mtsoghogha somba.” Baho wachasa ichelo mmatsi; na wapata somba wengi ng'ani mbaka wang'ali wokukuluka nacho ukuchikwegha ichelo.
7Baho imwanafunzi ayula iyakundighwe na Yesu kamlongela Petiri, “Ayuno Imtwatsa.” Bahala Simoni Petiri hayahulike ayula tsakakala Imtwatsa, keyoha ligwanda lyake, kwaapfila tsakalitsula, kuya keyasa mna ghamatsi. 8Iwanafunzi wangi watsa kuna ghyumnumbwi, kwaapfila tsang'awakalile hatali na isi baye, ila tsawakala utali wa futi miya ndatu apfino, wawapfila ukuchikwegha ichelo ichimemile wasomba. 9Hawapfikile kumbalimbali kwa litsimbu, wona makala ighakwaka moto na somba wekighwa mchanya mwake, hamwe na chighate.
10Yesu kawalongela, “Seghetseni ahano somba chidogho wamghoghile sambi.”
11Kuya Simoni Petiri kadina mna ghumnumbwi, kakwegha ichelo mbaka mmbalimbali mwa litsimbu, chimema somba wakulu miya imwe na hamsini na ndatu. Lekeni hamwe na wasomba awo kuwa wengi apfo, ichelo ng'achidegheke baye. 12Yesu kawalongela, “Itseni mje.” Wala kuduhu hata mnu yumwe mna iwanafunzi awala iyaghetsile kumghutsa, “Ghweghwe uli nani?” Kwaapfila tsawamanya yuyo Imtwatsa. 13Yesu katsa, kasola ichighate kaweng'a, pfipfila kasola na wasomba awala, kaweng'a.
14Aino ikala mala ya kadatu Yesu kuwalawila wanafunzi wake kulawa hayatsihiluke mlifwa.
Yesu kolonga na Petiri
15Hawamalitse ukuja, Yesu kamlongela Simoni Petiri, “Simoni mwana wa Yohane, apfi ghweghwe kwonikunda kubita awano?”
Naye kamwidika, “Ona, Ghwemtwatsa, ghweghwe kwomanya kama nene na sale yako ghendo.”
Yesu kamlongela, “Wadime iwanang'olo wangu.” 16Kuya Yesu kamghutsa mala ya kabili, “Simoni mwana wa Yohane, apfi ghweghwe kwonikunda nene?”
Naye kamwidika, “Ona, Ghwemtwatsa, ghweghwe kwomanya ka nene nasale yako ghendo.”
Yesu kamlongela, “Wadime wang'olo wangu.” 17Kamghutsa keli mala ya kadatu, “Simoni mwana wa Yohane, apfi ghweghwe kwasale yangu ghendo?”
Simoni Petiri kahutsunika kwaapfila kamghutsa mala ya kadatu, “Apfi ghweghwe kwa sale yangu ghendo?” Kamwidika, “Ghwemtwatsa, ghweghwe kwomanya pfinu pfose; ghweghwe kwomanya kama nene na sale yako ghendo.”
Yesu kamlongela, “Wenge ghumghina wang'olo wangu. 18Nokulongela kweli ghendo, haukalile msongolo, ung'ali wiyoha msipi ghumwenyegho na kughenda hanu haubamile; lekeni hautsolala kutsogholosa ghamoko ghako, munu yungi katsokwoha na msipi na kukughala hanu ghumwenyegho ng'auhabama.” 19Kalonga apfo kulangusa Petiri pfayatsakufa na kumtunitsa Imlungu. Hayamalitse ukulonga apfo, kamlaghitsa, “Niwinze!”
Yesu na imwanafunzi iyamkundile
20Petiri kahunduka, kamwona imwanafunzi ayula iyakundighwe na Yesu kowawinza. Imwanafunzi ayuno ambe tsaayula iyeghame mmambagha mwa Yesu mna ichijo cha Ipasaka, na iyamghutsile, “Ghwemtwatsa, yuhi iyatsokubiduka?” 21Petiri hayamwonile ayo, kamghutsa Yesu, “Ghwemtwatsa, ayuno naye pfihi?”
22Yesu kamwidika, “Ana nibama ayo yakale mgima mbaka hanikutsa, agho ughabamila choni ghweghwe? Ghweghwe niwinze nene!”
23Apfo imbuli aino yenela kuna wandughu kuwa imwanafunzi ayula tsang'atsakufa baye. Lekeni Yesu ng'alongile kuwa imwanafunzi ayula ng'atsakufa baye, ila, “Ana nibama ayo yakale mgima mbaka hanikutsa, agho ughabamila choni ghweghwe?”
24Ayuno yuyo imwanafunzi iyoghalonga aghano, na iyaghandike; natwe twomanya kuwa agho ghayalongile kalongesa ghendo.
Kumalitsila
25Kuna pfinu pfingi ng'ani pfayatendile Yesu; na apfo pfose pfing'andikighwa chimwechimwe, nakona isi yose ng'aibamile iwe na hanu baye ha ukwika ipfitabu ipfibamighwe pfandikighwe.
Currently Selected:
Yohane 21: LBV
Highlight
Copy
Compare
Share
Want to have your highlights saved across all your devices? Sign up or sign in
Pioneer Bible Translators and The Word For The World
Learn More About Laghano Lya Sambi Kwe Iwanu Wose
