Yohane 12

Maria kombakatsa Yesu ghamapfuta

(Mat 26:6-13; Malk 14:3-9)

1Matsuwa sita ng'ana ichihungo cha pasaka chipfike, Yesu kaghenda Betaniya, ukaye kwa Lazaro, imunu ayula Yesu iyamtsihilule kulawa mna lifwa. 2Ako wamtandila Yesu ichijo cha nemihe, na Marita yang'ali yowasang'anila. Lazaro tsakakala yumwe wa iwanu iwang'ali wakuja na Yesu. 3Kuya Mariya kasola isupa ya ghamapfuta gha bei ng'ulu ighonung'ila ghoya, ighalawile mna ghummeya ighukemighwa narido, kambakatsa Yesu ghamaghulu na kumbaghusa kwa tsimvili tsake. Baho ing'anda yose inung'ila ghoya, fumu ghendo! 4Yuda Isikarioti, yumwe wa iwanafunzi wake, ayula hambele iyatsombiduka, kaghutsa, 5“Heule ghamapfuta aghano ng'aghautsighwe kwa dinari miya ndatu na tsisendi atso weng'ighwe iwahingwa?” 6Lekeni Yuda tsakalonga apfo, si kwa kuwonela libatsi iwahingwa baye, ila kwaapfila tsakakala mhitsi; pfayakalile yuyo iyang'ali yokindagha ghumfuko ghwa ukwikila tsisendi, yang'ali yakwibagha ichikwikighwa amwo.

7Naye Yesu kalonga, “Mlekeni! Ibamighwa yagheke kwa ajili ya litsuwa lya ukuandaa ukutsikighwa kwangu. 8Iwahingwa mwokala nawo mghati mwenu matsuwa ghose, lekeni nene ng'amtsakuwa nani matsuwa ghose baye.”

Iwakulu wa iwatambika wobama kumkoma Lazaro

9Wayahudi wengi wahulika kuwa Yesu kakala ako Betaniya, waghenda ako, ng'awaghendile kumwona Yesu yaliyeka baye, ila pfipfila wakamwone na Lazaro, imunu ayula Yesu iyamtsihilule. 10Apfo iwakulu wa iwatambika wabama inzila ya kumkoma Lazaro, 11kwa apfila kwa ajili ya ukutsihiluka kwake Wayahudi wengi wang'ali wowaleka na kumghendela Yesu, na kumtoghola.

Yesu kakwingila Yerusalemu kwa kudeng'elelighwa

(Mat 21:1-11; Malk 11:1-11; Luk 19:28-40)

12Litsuwa liwinzile iwanu wengi iwatsaile kuna Ichihungo cha Ipasaka wahulika kama Yesu yang'atsile Yerusalemu. 13Apfo wasola maputila gha mibiki ya mitende, waghenda kumbokela, wakemelela, “Hosana! Yuyo imbarikighwa iyakutsa kwa litaghwa lya Imtwatsa, Kabarikighwa Imfalume wa Isiraeli!”

14Yesu kapata imwana ipunda, kamdina na kejegha mchanya mwake, kama pfayandikighwe mna Ghamaandiko,

15“Uleke kupfuka, ghwe neghe Sayuni,

Lola, mfalume wako kakutsa,

kadina imwana wa ipunda.”

16Imbuli aino aho mwanduso wanafunzi wake tsa ng'awaimanyile baye; lekeni Yesu hayatsihiluke na kutunitsighwa, baho hawakumbuke kuwa agho tsaghandikighwa kwa ajili yake, na kuwa iwanu wamtendela pfipfo.

17Iwanu iwakalile na Yesu hayamkemile Lazaro kulawa mna likabuli, na kumtsihilula kulawa mna lifwa, walonga aghala ighalawile. 18Kwa ajili ya alyo pfipfila, wanu wengi waghenda kumbokela, kwaapfila wahulika ghumuwujitsa agwo ghwayatendile. 19Apfo lelo Mafarisayo welongela, “Mwakona? Ng'atudaha kutenda chinu chochose baye. Iwanu wa isi yose womuwinza!”

Wagiriki wobama ukumwona Yesu

20Mna iwanu iwaghendile Yerusalemu mna ichihungo cha Ipasaka wamwenga tsa Wagiriki. 21Awo wamghendela Filipi, iyalawile Betisaida mna isi ya Galilaya, wamlongela, “Mkulu, twetwe twobama tumwone Yesu.”

22Filipi kaghenda, kamlongela Andeleya, kuya wose weli, Filipi na Andeleya, waghenda kumlongela Yesu. 23Yesu kawedika, “Ichipindi chipfika cha ukutunyighwa kwake Imwana wa Adamu! 24Nowalongela kweli ghendo, ka imbeghu ya ingano ng'ailaghala mdongo na ukufa, yokalagha pfipfo imwe iliyeka. Lekeni ing'afa, itsakweleka mbeghu bwelele. 25Imunu iyoukunda ugima wake katsowaghitsa, ila imunu iyowihila ugima wake mna iduniya aino, katsoutenda ugima wake ukale matsuwa ghose ing'aghohupa. 26Munu wowose yang'anitumikila kobamighwa yaniwinze; hanu hanikala nene baho na imtumighwa wangu hayatsokala. Imunu yang'anitumikila, Aba wangu katsomheshimu.

Yesu kolonga mbuli tsa lifwa lyake

27“Sambi ghumoyo ghwangu ghughanzika ghendo, nene nonge choni lelo? ‘Baba unikombole na isaa aino?’ Baye, acho chicho chanitsile, nibitile isaa aino ya ghamaghayo. 28Baba, ulitunye litaghwa lyako!”

Baho litsa litsi kulawa kulanga lilonga, “Nilitunya, na nitsolitunya keli.”

29Likingili lya iwanu iwemile ahala wahulika litsi alyo, na walonga, “Mlungu kaduma”, na wanu wangi walonga, “Malaika kalonga naye!”

30Lekeni Yesu kawalongela, “Litsi alino ng'alinitsile nene baye, ila liwatsilani mwemwe. 31Lelo ichipindi cha ukuhighighwa isi aino chipfika, lelo imkulu wa isi aino katsakwasighwa kunze. 32Lekeni nene, hanitsakwinulighwa muisi, nitsowakwegha iwanu wose watse kuna nene.” 33Alyo kalilonga kulangusa lifwa liyatsakufa pfalitsakuwa.

34Mtingano ghwa iwanu wamghutsa, “Ghamalaghitso ghetu ghotulongela Kiristu katsokala ghamatsuwa ghose ing'aghohupa, heule lelo ulonga ‘Imwana wa Adamu kobamighwa yenulighwe?’ Apfi ayo Imwana wa Adamu nani?”

35Kuya Yesu kawalongela, “Ghumwanga ghung'ali na mwemwe kwa chipindi chidodo. Mwange hamng'ali naghwo ghumwanga, ng'ana ichisi chiwatsile; mana imunu iyakwanga mchisi ng'omanya baye kuyoghenda. 36Hamng'ali naghwo ghumwanga, mghutoghole ghumwanga aghwo, ili muwe wana wa ghumwanga.” Hayamalitse kulonga apfi, Yesu koka, kepfisa waleke kumwona.

Wayahudi wolema ukumtoghola Yesu

37Hata ka Yesu tsakasang'ana miujitsa mingi yose ayo hambele hawo, lekeni ng'awamtoghole baye. 38Aghano ghose ghalawila ili ghatimile aghala ghayalongile Nabii Isaya:

“Ghwe Mtwatsa, nani iyautoghole usenga wetu?

Na ghumoko ghwa Imtwatsa ghughubulighwe kwa nani?”

39Acho chicho ichiwatendile waleke ukutoghola; kwaapfila Isaya pfipfila tsakalonga hanu hangi,

40“Kawabopfula tsinenge tsawo,

na kaitenda imimoyo yawo iwe mikomu,

waleke ukwona kwa tsinenge tsawo,

wala ukumanya kwa imimoyo yawo,

hela watsonihundukila nene niwahonye.”

41Agho Isaya kaghalonga kwaapfila tsakawona utunitso wa Yesu, na kalonga mbuli tsake.

42Hata apfo, wengi mna iwakulu wa Wayahudi tsawamtoghola Yesu, lekeni kwa ajili ya Mafarisayo, ng'awadahile kulonga mwatsimwatsi baye, wang'ali wopfuka watsowawinga mna ghamasinagogi. 43Kwaapfila tsawanoghelighwa ng'ani na ukuheshimighwa na iwanu kubita ukuheshimighwa na Imlungu.

Lilonga lya Yesu litsohigha iwanu

44Yesu kakemelela kalonga, “Imunu wowose iyonitoghola nene, ng'onitoghola nene baye, ila komtoghola ayula iyanitumile. 45Na ayula iyombona nene komwona ayula iyanitumile. 46Nene nitsa muisi niwe ghumwanga ghwa iwanu, ili chila munu iyonitoghola nene yaleke kukala mchisi. 47Na imunu yang'ahulika ghamalonga ghangu na kulema kughakinda, nene simhigha baye, kwaapfila sitsile kuwahigha iwanu wa isi baye, lekeni nitsa kuwakombola. 48Yeye iyonilema nene na kulema imbuli yangu, ayo kenaye iyatsomhigha. Imbuli yiyo yanilongile itsomhigha mna litsuwa lya utsighilo. 49Kwaapfila silonga tsimbuli tsangu nimwenyegho baye, ila Aba wangu iyanitumile kandaghitsa cha ukulonga, na nilongetse. 50Nomanya laghitso lyake lyoghala ugima wa ghamatsuwa ghose ing'aghohupa, apfo chila chanilonga, kama Baba pfayanilongele pfipfo pfanilonga.”

Currently Selected:

Yohane 12: LBV

Highlight

Copy

Compare