Mwanduso 25
25
Watsukulu wa Abrahamu
1Abrahamu tsakakwela ipinga yungi, taghwa lyake Ketura. 2Ketura kamwelekela Abrahamu iwana, Zimrani, Yokishani, Medani, Midiani, Ishibaki na Shua. 3Yokishani tsakaweleka Sheba na Dedani, watsukulu wa Dedani tsawakala Waashuru, Waletushi na Waleumi. 4Iwana wa Midiani tsawakala Efa, Eferi, Hanoki, Abida na Elidaa. Awano wose tsawakala watsukulu wa Ketura.
5Abrahamu tsakamwing'a Isaka pfinu pfose pfayakalile napfo. 6Lekeni hala hayang'ali mghima, iwana we iwapinga wake wangi kaweng'a nzawadi. Kuya kawaghala iwana awo isi ya ubali mashaliki, kutali na mwanaghe Isaka.
Ukufa kwa Abrahamu
7Abrahamu tsakakala kwa miyaka miya imwe sabini na tano. 8Kuya Abrahamu tsakafa aku kalala pfinoghile, kuya kahupa kaghenda kuwasa ne iwabala wake iwalongole kufa. 9Iwana wa Aburahamu Isaka na Ismaili wamtsika aba wawo mna mango ya Makipela habehi na Mamre, mna mghunda ghwaghulile kwa Efuroni imwana wa Zohari, Mhiti. 10Abrahamu tsakaghula mghunda aghwo kwa Wahiti. Abrahamu tsakatsikighwa ako kwatsikighwe mwehe wake, Sara. 11Abrahamu hayafile, tsakambaliki Isaka mwanaghe. Isaka tsakakala habehi ne Beerilahairoi.
Wana wa Ismaili
12Aluno lweleko lwa Ismaili imwana wa Abrahamu, iyelekighwe na Hagari mtumwa wa Sara iyalawile Misiri. 13Awano iwana wa Ismaili ka pfawelekighwe, chaudele Nebayosi, Kedari, Adibeeli, Mibusamu, 14Mishima, Duma, Masa, 15Hadadi, Tema, Yeturi, Nafishi na Kadema. 16Awano iwo iwana wa Ismaili, kolo kumi na mbili ghalawila mna iwana wano, kaye tsawo na pfijiji pfawo tsapfimanyika kwa mataghwa ghawo. 17Ismaili hayafile tsakakala na miyaka miya imwe na selasini na saba, naye kahupa kaghenda kuwasa ne iwabala wake iwamlongole ukufa. 18Watsukulu wa Ismaili tsawang'ali wokala Hawila na Shuri, habehi na Misiri, ka kwoghenda Ashuru. Tsawakala webaghula na watsukulu wangi wa Abrahamu.
Yakobu na Esau
19Aluno lweleko lwa Isaka, imwana wa Abrahamu. 20Isaka tsakakala na miyaka alubaini hayamkwelile Rebeka neghe Betueli, Mwaramu wa Padani Aramu. Rebeka tsakakala lumbu wa Labani. 21Kwaapfila Rebeka tsakakala ng'akweleka baye, Isaka kamlombela kwe Imulungu. Imulungu kamwidika chayalombile, naye Rebeka, tsakakinda hinda. 22Inda yake tsaikala ya wana weli, nawo tsawebanyabanya munda mwake, naye kalonga, “Ule ghano ghondawila nene?” Kuya kaghenda kumghutsa Imtwatsa.
23IMNDEWA kamlongela,
“Kolo mbili tsamunda mwako.
Iwanu weli iwali munda mwako watsesonga,
yumwe katsakuwa na ngupfu kubita yungi,
imkulu katsomtumikila mdodo.”
24Ghamatsuwa gha kweleka aghapfikile, Rebeka keleka iwana weli. 25Chaudele tsakakala mdung'u, na lukuli lwake lwose tsalumema tsimvili. Apfo tsawamkema Esau. 26Imwana wa keli tsakelekighwa aku kamkinda Esau chisegheyu, apfo wamkema Yakobu. Isaka tsakakala na miyaka sitini Esau ne Yakobu hawelekighwe.
Esau kohutsa haki yake
27Iwana awo tsawakula, Esau tsakakala imunu iyamanyile ghendo kuwinga, yeye yang'ali yoghendagha kunyika, ila Yakobu tsakahola, tsakakala imunu wa kukala ukaye. 28Isaka tsakamnoghela Esau, kwaapfila Isaka tsaanga'ali yodengelelagha ukuja inyama ye iwanyama iwakomighwe na Esau, lekeni Yakobu tsakamnoghela Rebeka.
29Litsuwa limwe Yakobu hayang'ali yakwambika ghamapande, Esau koya ukaye kalawa kuwinga aku kana nzala ng'ani.
30Apfo kamlongela Yakobu, “Chonde chonde, ngaya chijo acho chidung'u ndiye miyagho nzala yakwawa.” Ndo mana tsawamkema taghwa lyake Edomu.
31Yakobu kamwidika, “Tanu nihutsile haki yako ya chaudele.”
32Esau kalonga, “Ulole, miyagho nahabehi ukufa, haki ya chaudele inyapfila choni?”
33Yakobu kamlongela, “Tanu wilahe.” Apfo Esau kelaha na kamuhutsila Yakobu haki yake ya uchaudele.
34Kuya Yakobu kamwing'a Esau chighate na ghamapande. Esau kaja, kanwa, kuya kenuka koka. Apfo pfipfo Esau pfayaibetsile haki yake ya mwana chaudele.
Currently Selected:
Mwanduso 25: LBV
Highlight
Share
Compare
Copy
Want to have your highlights saved across all your devices? Sign up or sign in
