Mwanduso 17
17
Abramu kokemighwa Abrahamu
1Abramu hayang'ali ne imiyaka tisini na tisa Imulungu kamlawila kamlongela, “Nene na Imulungu yane ngupfu. Unihulikitse na utende ghanoghile matsuwa ghose. 2Nitsakwika laghano lyangu naghwe na nitsokwing'a watsukulu ketseketse.” 3Abramu kenama chihanga chake chidonza hasi, Imulungu kamlongela, 4“Nakwika lilaghano lino naghwe. Kutsakuwa aba wa kolo nyingi. 5Taghwa lyako ng'alitsakuwa keli Abramu, ila kutsokemighwa Abrahamu, kwaapfila nokutenda kuwa aba wa kolo nyingi. 6Nitsokwing'a watsukulu wengi, na wamwenga watsakuwa wandewa. Naghwe kutsakuwa na watsukulu ketseketse, nawo watsakuwa kolo.”
7“Na nene nitsakwimitsa laghano lyangu na ghweghwe na watsukulu wako mna kolo itsikutsa ka laghano lya ghamatsuwa ghose. Nene nitsakuwa Imulungu wako ne Imulungu wa watsukulu wako. 8Nitsokwing'a ghweghwe na watsukulu wako isi ino iuli mgheni sambi. Isi yose ya Kanaani itsokuwa ya watsukulu wako ghamatsuwa ghose, na nene nitsakuwa Imulungu wawo.”
9Imulungu kamlongela Abrahamu, “Naghwe pfipfila utoghole kukindilitsa laghano lyangu, ghweghwe na watsukulu wako na kolo itsikutsa. 10Alino lilyo laghano lyangu lyautsokinda ghweghwe na watsukulu wako. Chila immale imli naye yengile ngoma. 11Ukwingila ngoma kwenu, kutsakuwa chitango cha laghano lyangu na mwemwe. 12Chila imwana mmale iyali na ghamatsuwa manane yengile ngoma. Chila mmale mna pfeleko pfenu, yawe mtumwa iyelekighwe mng'anda mwenu au imtumwa yamumghulile kwe iwagheni, kobamighwa yengile ngoma. 13Chila immale iyelekighwe mng'anda mwako na hata iyaghulighwe kwa sendi tsako kobamighwa yengile ngoma. Achino chitsakuwa chitango mna ng'uli tsenu cha lilaghano lyangu lya ghamatsuwa ghose. 14Immale wowose yang'engile ngoma baye katsobaghulighwa ne iwanu, kwaapfila ng'akindile baye laghano na nene.”
Imulungu kelaghana na Abrahamu kumwing'a imwana
15Kuya Imulungu kamlongela Abrahamu, “Ghweghwe ng'utsomkema keli baye mwehe wako Sarai, kwaapfila taghwa lyake litsokuwa Sara. 16Nitsombaliki, naye katsokwelekela imwana immale. Nitsombaliki Sara, naye katsokuwa mai wa kolo nyingi, na kutsolawila iwandewa mna watsukulu wake.” 17Abrahamu kenamila hasi na chihanga chake chidonza hasi, lekeni kaseka mmoyo no ukwalangula, “Apfi imunu yane miyaka miya imwe kodaha ukweleka imwana? Apfi Sara yane miyaka tisini kodaha ukweleka imwana?” 18Kuya Abrahamu kamghutsa Imulungu, “Ebali ung'amleka Isimaili yawe mhala wangu?”
19Lekeni Imulungu kamlongela, “Bae, mwehe wako Sara katsokwelekela imwana immale, naghwe kutsomwing'a taghwa Isaka. Na nene nitsakwika laghano lyangu na yeye liwe laghano lya ghamatsuwa ghose kwa watsukulu wake iwakutsa 20Nihulika chaubama nimtendele Ismaili, nitsombaliki ghendo, nitsomwing'a iwana wengi ne iwatsukulu wengi. Katsokuwa aba wa watawala kumi na weli, na nitsomtenda yawe aba we wanu wengi. 21Lekeni nolika laghano lyangu ne imwanagho Isaka, iyatsomweleka Sara ghamatsuwa ka ghano ghumwaka we elupfi.” 22Imulungu hayamalitse kulonga, kamleka Abrahamu.
23Litsuwa lilila Abrahamu kamsola mwanaghe Ismaili na wose iwelekighwe mkaye mwake na iyawaghulile kwa sendi tsake, iwamale wose iwali mkaye mwake. 24Abrahamu tsakakala na miyaka tisini na tisa hayengile ngoma, 25na imwanaghe Ismaili tsakakala na miyaka kumi na midatu. 26Abrahamu na imwanaghe Ismaili 27hamwe ne iwamale wose iwali mkaye mwake au iwaghulighwe kulawa mna isi ya wahenza, wose wengila ngoma mna litsuwa lilila.
Currently Selected:
Mwanduso 17: LBV
Highlight
Share
Compare
Copy
Want to have your highlights saved across all your devices? Sign up or sign in
