Suhˉ jehˬ ve li‸ 1
1
Yuˇda‸ leh Suˉmonˍ awˬ ceuˬ awˬ hkʼaˇ teˇ hpaˍ Aˍdawˇniˆbeˍzehˆ hta‸ bawˆ yuˬ ve
1Yawˇsuˆ suh peuˬ hkʼaw‸ nawˉ Iˉsaˍreˍlaˆ chaw teˇ hpaˍ lehˬ, Hkaˍnaˍniˆ chaw hui hta‸ a shu awˉ lawˉ gʼa ca bawˆ tuˬ le, teh‸ Gʼuiˬsha hta‸ na nyi ve yoˬ.
2Oˇ htaˇ Gʼuiˬsha lehˬ, Yuˇda‸ awˬ ceuˬ awˬ hkʼaˇ teˇ hpaˍ awˉ lawˉ gʼa kʼai ve yoˬ. Mvuhˇmiˬ oˇ ve ngaˬ yawˇ hui hta‸ piˇ tuˬ yoˬ, teh‸ kʼaw‸ yaw hkʼaw‸ piˇ ve yoˬ.
3Oˇ htaˇ Yuˇda‸ chaw teˇ hpaˍ lehˬ, Ngaˬ hui hta‸ piˇ laˇ taˍ ve mvuhˇmiˬ hta‸ ca bawˆ yuˬ tuˬ, nawˬ hui a ciˉgʼa ga laˇ-oˆ. Oˇ hkʼe te taˉ peuˬ ve kʼo, nawˬ hui hta‸ piˇ laˇ taˍ ve mvuhˇmiˬ hta‸ htawˇ, ngaˬ hui ga bawˆ laˇ tuˬ yoˬ, teh‸ Suˉmonˍ awˬ ceuˬ awˬ hkʼaˇ teˇ hpaˍ hta‸ kʼoˆ piˇ ve yoˬ. 4Hkʼe te leh Suˉmonˍ awˬ ceuˬ awˬ hkʼaˇ teˇ hpaˍ leh, Yuˇda‸ awˬ ceuˬ awˬ hkʼaˇ teˇ hpaˍ ma‸ ca bawˆ tuˬ tawˆ kʼai ve yoˬ. Gʼuiˬsha lehˬ Hkaˍnaˍniˆ chaw leh Hpeˍraˍziˆ chaw hui hta‸ yawˇ hui ve la‸ sheh hkʼaw lo chiˇ a‸ piˇ leh, yawˇ hui lehˬ Beˍzehˇ venˇ hkʼaw lo chaw 10,000 gʼaˇ hta‸ tiˇ pehˍ piˇ ve yoˬ. 5Aˍdawˇniˆbeˍzehˆ hta‸ yawˇ hui oˇ kaˬ lo hpuˇ da‸ leh, yawˇ hta‸ bawˆ da‸ ve yoˬ. 6Aˍdawˇniˆbeˍzehˆ gʼuiˇ hpaw-e ve yoˬ. Ya‸ hkʼaˇ yawˇ hui yawˇ hta‸ gʼa‸ yuˬ leh, yawˇ ve la‸ ma peuˍ leh hkui ma peuˍ teˇ hpaˍ hta‸ tawˆ baˬ piˇ ve yoˬ. 7Oˇ htaˇ Aˍdawˇniˆbeˍzehˆ kʼoˆ ve, La‸ ma peuˍ hkui ma peuˍ tawˆ baˬ ve hta‸ gʼa hkanˍ ve jawˇmawˇ suhˍ chi gʼaˇ lehˬ, ngaˬ ve hpui lawˇ hawˉ sheˆ taˍ ve caˇ tuˬ hta‸ gʼawˆ caˇ jaw ve yoˬ. Ngaˬ yawˇ hui hta‸ te piˇ ve hkʼe, Gʼuiˬsha ngaˬ hta‸ oˇ hkʼe kʼaw‸ te hkʼaw‸ laˇ ve yoˬ, teh‸ kʼoˆ ve yoˬ. Yawˇ hui yawˇ hta‸ Yeˍruˆsaˍlehnˍ venˇ lo shiˍ kʼai leh yawˇ oˇ kaˬ lo suh-e ve yoˬ.
Yuˇda‸ chaw hui Yeˍruˆsaˍlehnˍ leh Heˍbronˍ venˇ hta‸ bawˆ yuˬ ve
8Yuˇda‸ awˬ ceuˬ awˬ hkʼaˇ teˇ hpaˍ, Yeˍruˆsaˍlehnˍ venˇ hta‸ ca bawˆ yuˬ ve yoˬ. Venˇ oˇ ve hkʼaw chehˇ ve chaw teˇ hpaˍ hta‸ yawˇ hui tiˇ pehˍ leh, venˇ hta‸ aˬ miˍ tuˉ baˬ ve yoˬ. 9Oˇ ve hkʼaw‸ nawˉ, hkʼaw hkʼoˆ lawˬ hkʼoˆ lo chehˇ taˍ ve Hkaˍnaˍniˆ chaw hui hta‸ ca kʼaw‸ bawˆ-e ve yoˬ. 10Kiˇriˇyaˆtaˍbaˆ teh‸ kʼoˆ ve Heˍbronˍ venˇ hkʼaw chehˇ ve Hkaˍnaˍniˆ chaw hui hta‸ htawˇ yawˇ hui bawˆ yuˬ leh, Sheˍshehˇ, Aˍhiˆmanˍ, leh Taˍlaˍmehˇ chaw hui hta‸ tiˇ pehˍ piˇ ve yoˬ.
Awˇtanˍyeˍlaˆ Deˍbiˇraˆ venˇ hta‸ bawˆ yuˬ ve
11Oˇ ve hkʼaw‸ nawˉ, yawˇ hui lehˬ Kiˇriˇyaˆseˍhpaˍ venˇ teh‸ kʼoˆ ve Deˍbiˇraˆ venˇ hta‸ ca kʼaw‸ bawˆ yuˬ ve yoˬ. 12Oˇ htaˇ Kaˍlehˆ lehˬ, Kiˇriˇyaˆseˍhpaˍ venˇ hta‸ bawˆ gʼaˇ ve chaw hta‸ ngaˬ yaˇ miˇ Aˍhkeˍtaˆ piˇ laˇ tuˬ yoˬ, teh‸ kʼoˆ ve yoˬ. 13Hkʼe te leh, Kaˍlehˆ ve awˬ nyi paˍ Keˍnaˆ ve yaˇ Awˇtanˍyeˍlaˆ lehˬ, venˇ oˇ ve hta‸ ca bawˆ leh gʼaˇ ve yoˬ. Hkʼe te leh, Kaˍlehˆ yawˇ hta‸ yawˇ ve yaˇ miˇ Aˍhkeˍtaˆ piˇ ve yoˬ. 14Yawˇ huiˉ maˬ heuˆ da‸ ve awˬ nyi gaˬ la ve teˇ yanˇ, Awˇtanˍyeˍlaˆ lehˬ yaˇ miˇ oˇ ve hta‸ awˬ pa geh ti mi teˇ peˆ ca lawˬ tcuh ve yoˬ. Yaˇ miˇ oˇ ve piˉ laˬ hkʼoˆ ya‸-e ve teˇ yanˇ yawˇ ve awˬ pa lehˬ, Nawˬ aˬ hto‸ ma heuˆ gaˇ ve le, teh‸ na nyi ve yoˬ. 15Yaˇ miˇ oˇ ve lehˬ, Ngaˬ iˉ kaˆ gʼuiˬ tuˇ teˇ hpaˍ heuˆ gaˇ ve yoˬ. Nawˬ ngaˬ hta‸ piˇ laˇ ve mvuhˇmiˬ lehˬ goˇ choˆ jaˇ ve yoˬ, teh‸ awˬ pa hta‸ kʼoˆ piˇ ve yoˬ. Hkʼe te leh Kaˍlehˆ yawˇ hta‸ awˬ na hpawˇ ve iˉ kaˆ gʼuiˬ tuˇ leh, awˬ hawˉ hpawˇ ve iˉ kaˆ gʼuiˬ tuˇ teˇ hpaˍ piˇ ve yoˬ.
Yuˇda‸ leh Beˍyaˍmenˍ chaw hui ma‸ bawˆ gʼaˇ ve
16Moˉseˍ ve awˬ puˍ Keˍniˆ awˬ ceuˬ awˬ hkʼaˇ lehˬ, Yuˇda‸ awˬ ceuˬ awˬ hkʼaˇ teˇ hpaˍ geh teˇ geh tcuhˉ pui cehˬ hkʼa biˇ cawˬ ve Yeˍriˆhkoˇ venˇ lo tu leh, Aˍraˆ mvuhˇmiˬ awˬ hawˉ hpawˇ lo cawˬ ve Yuˇda‸ mvuhˇmiˬ lo kʼai ve yoˬ. Oˇ kaˬ lo yawˇ hui Aˍmaˍlehˆ chaw hui geh chehˇ taˍ ve yoˬ. 17Yuˇda‸ chaw teˇ hpaˍ lehˬ, Suˉmonˍ chaw hui geh teˇ geh Seˍhpaˆ venˇ hkʼaw chehˇ ve Hkaˍnaˍ niˆ chaw hta‸ ca bawˆ-e ve yoˬ. Yawˇ hui venˇ oˇ ve hta‸ hkeu leh te luˬ te sheˆ piˇ ve yoˬ. Venˇ oˇ ve hta‸ yawˇ hui Hawˇmaˍ#1:17 Chi lehˬ luˬ ve sheˆ ve teh‸ kʼoˆ gaˇ ve yoˬ. teh‸ kʼaw‸ meh piˇ ve yoˬ. 18Ya‸ hkʼaˇ yawˇ hui lehˬ, Gaˍsaˍ, Aˍshaˆkeˍlonˍ, Eˇkaˍronˍ leh venˇ oˇ ve teˇ hpaˍ awˬ paˇ awˬ kui lo cawˬ ve mvuhˇmiˬ teˇ hpaˍ hta‸ maˇ bawˆ yuˬ ve yoˬ. 19Gʼuiˬsha Yuˇda‸ chaw hui hta‸ ga piˇ ve pa taw, yawˇ hui lehˬ hkʼaw hkʼoˆ lo cawˬ ve mvuhˇmiˬ teˇ hpaˍ hta‸ bawˆ gʼaˇ ve yoˬ. Ya‸ hkʼaˇ, yawˇ hui lehˬ miˬ tawˬ kuiˬ lo chehˇ ve chaw hui hta‸ gʼa‸ kʼoˬ piˇ maˇ gʼa. Awˬ lawn kʼo chaw oˇ ve teˇ hpaˍ, sho yuˬ te taˍ ve iˉ mvuhˇ lawˬ cawˬ ve pa taw yoˬ. 20Moˉseˍ kʼoˆ taˍ ve hkʼe, yawˇ hui Heˍbronˍ venˇ Kaˍlehˆ hta‸ piˇ ve yoˬ. Yawˇ lehˬ Aˍnaˍkaˆ ve yaˇ paˍ shehˆ gʼaˇ hta‸, venˇ oˇ ve awˬ hkʼaw lo gʼa‸ kʼoˬ piˇ ve yoˬ. 21Ya‸ hkʼaˇ, Beˍyaˍmenˍ awˬ ceuˬ awˬ hkʼaˇ teˇ hpaˍ lehˬ, Yeˍruˆsaˍlehnˍ venˇ hkʼaw chehˇ taˍ ve Yeˍbuˇsiˆ chaw hui hta‸ maˇ gʼa‸ kʼoˬ piˇ. Chi hta‸ pa taw, Yeˍbuˇsiˆ chaw hui lehˬ ya‸ nyi hkʼa gaˬ Beˍyaˍmenˍ awˬ ceuˬ awˬ hkʼaˇ teˇ hpaˍ geh teˇ geh oˇ kaˬ lo chehˇ taˍ ve yoˬ.
Eˇhpaˍrenˍ leh Maˍnaˍseˍ chaw hui Beˍteˍlaˆ venˇ hta‸ ca bawˆ yuˬ ve
22Eˇhpaˍrenˍ leh Maˍnaˍseˍ awˬ ceuˬ awˬ hkʼaˇ teˇ hpaˍ lehˬ, Luˇzaˆ teh‸ kʼoˆ ve Beˍteˍlaˆ venˇ hta‸ ca bawˆ yuˬ ve yoˬ. 23Gʼuiˬsha yawˇ hui geh chehˇ taˍ ve yoˬ. Yawˇ hui lehˬ venˇ oˇ ve hta‸ ca bawˆ yuˬ tuˬ, chaw jaˆ teˇ hpaˍ hta‸ hpehˇ peu leh, 24chaw oˇ ve teˇ hpaˍ lehˬ, venˇ hkʼaw tawˆ la chehˇ ve chaw teˇ gʼaˇ hta‸ gʼa mawˬ ve yoˬ. Hkʼe te leh yawˇ hui yawˇ hta‸ kʼoˆpiˇ ve, Ngaˬ hui hta‸ venˇ hkʼaw lo‸-e ve ya‸ kʼaw maˍ laˇ-oˆ. Oˇ hkʼe te ve kʼo, ngaˬ hui nawˬ hta‸ te‸ chiˉ maˇ te, teh‸ kʼoˆ piˇ ve yoˬ. 25Hkʼe te leh, chaw oˇ ve yawˇ hui hta‸ ya‸ kʼaw maˍ piˇ ve yoˬ. Oˇ htaˇ yawˇ hui venˇ hkʼaw chehˇ ve chaw hkʼa peu-eˬ hta‸ tiˇ pehˍ ve yoˬ. Ya‸ hkʼaˇ, yawˇ hui lehˬ chaw oˇ ve hpaˇ leh yawˇ ve yehˬ yaˇ kʼa yaˇ hui hta‸ ponˬ piˇ ve yoˬ. 26Chaw oˇ ve lehˬ Hiˇtiˆ chaw hui ve mvuhˇmiˬ lo kʼai leh, Luˇzaˆ teh‸ kʼoˆ ve venˇ teˇ maˬ ca te chehˇ kʼai ve yoˬ. Ya‸ nyi hkʼa gaˬ venˇ oˇ ve hta‸ oˇ hkʼe meh taˍ sheˍ ve yoˬ.
Iˉsaˍreˍlaˆ chaw hui maˇ gʼa‸ kʼoˬ piˇ ve chaw teˇ hpaˍ
27Maˍnaˍseˍ chaw teˇ hpaˍ lehˬ Behˆshanˍ, Taˍnehˆ, Dawˇraˆ, Iˇbaˍlanˍ, Mehˆgiˇdoˍ venˇ leh, venˇ chi teˇ hpaˍ awˬ paˇ awˬ kui lo chehˇ ve Hkaˍnaˍniˆ chaw hui hta‸ maˇ gʼa‸ kʼoˬ piˇ. Hkʼe te leh yawˇ hui oˇ kaˬ lo chehˇ taˍ sheˍ ve yoˬ. 28Iˉsaˍreˍlaˆ chaw teˇ hpaˍ awˬ gʼaˇ uiˍ la ve teˇ yanˇ, yawˇ hui lehˬ Hkaˍnaˍniˆ chaw oˇ ve teˇ hpaˍ hta‸ awˬ ceˬ te tcuh ve yoˬ. Ya‸ hkʼaˇ, yawˇ hui hta‸ maˇ gʼa‸ kʼoˬ piˇ.
29Eˇhpaˍrenˍ chaw teˇ hpaˍ lehˬ, Geˍzaˍ venˇ hkʼaw chehˇ ve Hkaˍnaˍniˆ chaw hui hta‸ maˇ gʼa‸ kʼoˬ piˇ. Hkʼe te leh Hkaˍnaˍniˆ chaw oˇ ve teˇ hpaˍ yawˇ hui geh chehˇ taˍ ve yoˬ.
30Zaˍbuˆlonˍ chaw hui lehˬ, Kiˇtaˍronˍ venˇ leh Naˍhaˍlawˇlaˆ venˇ hkʼaw chehˇ ve Hkaˍnaˍniˆ chaw hui hta‸ maˇ gʼa‸ kʼoˬ piˇ. Hkʼe te leh chaw oˇ ve teˇ hpaˍ yawˇ hui geh chehˇ leh, yawˇ hui ve awˬ ceˬ te chehˇ ve yoˬ.
31Aˍshaˍ chaw teˇ hpaˍ lehˬ, Aˍhkawˍ, Siˉdonˍ, Aˍlaˆ, Aˍhkaˍziˆ, Heˍlaˍbaˆ, Aˍhpehˆ, Reˍhawˇbaˆ venˇ chi teˇ hpaˍ hkʼaw chehˇ ve chaw hui hta‸ maˇ gʼa‸ kʼoˬ piˇ. 32Aˍshaˍ chaw teˇ hpaˍ lehˬ, Hkaˍnaˍniˆ chaw oˇ ve teˇ hpaˍ geh teˇ geh chehˇ taˍ ve yoˬ.
33Naˍtaˍliˆ chaw hui lehˬ, Behˆseˍmehˆ leh Beˍtaˍnaˆ venˇ hkʼaw lo chehˇ ve Hkaˍnaˍniˆ chaw hui hta‸ maˇ gʼa‸ kʼoˬ piˇ. Yawˇ hui lehˬ chaw oˇ ve teˇ hpaˍ geh teˇ geh chehˇ taˍ leh, yawˇ hui hta‸ awˬ ceˬ te tcuh ve yoˬ.
34Aˍmawˇriˆ chaw hui lehˬ, Danˍ awˬ ceuˬ awˬ hkʼaˇ teˇ hpaˍ hta‸ hkʼaw hkʼoˆ lo gʼa‸ kʼoˬ leh, yawˇ hui hta‸ miˬ tawˬ kuiˬ lo maˇ ya‸ la tcuh piˇ. 35Aˍmawˇriˆ chaw hui lehˬ, Heˍheˍrehˆ, Aˍyaˍlonˍ, Shaˍbaˍbenˍ venˇ chi teˇ hpaˍ hkʼaw chehˇ taˍ sheˍ ve yoˬ. Ya‸ hkʼaˇ, yawˇ hui lehˬ Eˇhpaˍrenˍ leh Maˍnaˍseˍ chaw hui uˉ peunˍ ve awˬ hawˉ lo gʼa chehˇ leh, yawˇ hui ve awˬ ceˬ gʼa te chehˇ taˍ ve yoˬ.
36Eˇdonˍ chaw hui ve miˬ tcuhˉ lehˬ, awˬ na hpawˇ Sheˍlaˆ venˇ hta‸ te leh Aˍkaˍraˍbenˍ kʼaˍ le‸ lo hkʼa gaˬ hpeh‸ ve yoˬ.
Currently Selected:
Suhˉ jehˬ ve li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.