Daˍyeˍlaˆ li‸ 1
1
Daˍyeˍlaˆ leh yawˇ ve awˬ chawˇ teˇ hpaˍ
1Yuˇda‸ mvuhˇmiˬ hta‸ Yawˇyaˍkenˍ uˉ peunˍ chehˇ ve shehˆ hkʼaw‸ teˇ hkʼaw‸ htaˇ, Baˍbuˍlonˍ jawˇmawˇ Neˍbuˍhkaˍneˍzaˍ lehˬ, Yeˍruˆsaˍlehnˍ venˇ hta‸ ca bawˆ la ve yoˬ. 2Gʼuiˬsha lehˬ, Neˍbuˍhkaˍneˍzaˍ hta‸ ma‸ bawˆ gʼaˇ tcuh leh, Yawˇyaˍkenˍ hta‸ hpeh yuˬ peuˬhkʼaw‸ nawˉ, bon yehˬ hkʼaw cawˬve mawˇ teˇ hpaˍ hta‸ yuˬ kʼai piˇ lawˬ ve yoˬ. Hkʼe te leh, Neˍbuˍhkaˍneˍzaˍ lehˬ, hpeh‸ yuˬtaˍ ve chaw teˇ hpaˍ hta‸ Baˍbuˍlonˍ mvuhˇmiˬ lo shiˍ kʼai leh, yuˬveu laˇ ve mawˇ teˇ hpaˍ hta‸ yawˇ hui ve bon yehˬ hkʼaw keu taˍ ve yoˬ.
3Jawˇmawˇ lehˬ, yawˇshiˍ veu laˇ ve Iˉsaˍreˍlaˆ chaw awˬ hkʼaw lo, jawˇmawˇ ve awˬ ceuˬ awˬ hkʼaˇ yaˇ nehˬ teˇ hpaˍ hta‸ leuˆ yuˬ tuˬ, yawˇ ve a ma‸ lonˉ Aˍshaˆpeˍnaˆ hta‸ tawˇ piˇ ve yoˬ. 4Yaˇ nehˬ oˇ ve teˇ hpaˍ lehˬ, awˬ hkiˇ awˬ na da‸ leh cuˇ yiˍ gehˬ ve chaw, chehˇ sha puiˉ ve chaw hpeh‸ ve yoˬ. Aˍshaˆpeˍnaˆ lehˬ, yawˇ hui hta‸ Baˍbuˍlonˍ chaw hui ve li‸ maˍ piˇ ve yoˬ. 5Yawˇ hui hta‸ hawˉ yehˬ hkʼaw chehˇ ve chaw hui hkʼe shawˍ leh, caˇ tuˬ dawˬ tuˬ hkʼa deh‸ te caˍ te taw piˇ tuˬ jawˇmawˇ tawˇ piˇ taˍ ve yoˬ. Yawˇ hui hta‸ shehˆ hkʼaw‸ hkʼa biˇ maˍ piˇ peuˬ hkʼaw‸ nawˉ, jawˇmawˇ geh shiˍ laˬ tuˬ ka‸ kʼoˆ piˇ taˍ ve yoˬ. 6Leuˆ yuˬ taˍ ve yaˇ nehˬ oˇ ve teˇ hpaˍ hkʼaw, Yuˇda‸ awˬ ceuˬ awˬ hkʼaˇ, Daˍyeˍ laˆ, Haˍnaˍniˆ, Miˆsheˍlaˆ leh Aˍzaˍriˆ hui htawˇ lo‸-e taˍ ve yoˬ. 7A ma‸ lonˉ oˇ ve lehˬ, yawˇ hui hta‸ Beˍlaˍshaˍzaˍ, Shaˆdraˆ, Meˍshehˆ, Aˍbeˍdaˍneˍgoˍ teh‸ awˬ meh awˬ suhˉ kʼaw‸ meh piˇ taˍ ve yoˬ.
8Daˍyeˍlaˆ lehˬ, yawˇ awˬ to hta‸ cha‸ chiˆ tuˬ maˇ te gaˇ ve pa taw, hawˉ yehˬ hkʼaw shu caˍ laˇ ve caˇ tuˬ oˇ ve teˇ hpaˍ hta‸ maˇ caˇ tuˬ dawˇ cheˆ ve yoˬ. Chi hta‸ pa taw, caˇ tuˬ oˇ ve teˇ hpaˍ maˇ caˍ laˇ tuˬ, yawˇ Aˍshaˆpeˍnaˆ hta‸ lawˬ hkawˉ ve yoˬ. 9Hkʼe te leh, Gʼuiˬsha lehˬ Daˍyeˍlaˆ hta‸ ha kʼaˉ piˇ tuˬ Aˍshaˆpeˍnaˆ ve nyi ma hta‸ gu piˇ ve yoˬ. 10Ya‸ hkʼaˇ, Aˍshaˆpeˍnaˆ lehˬ jawˇmawˇ hta‸ kawˆ ve pa taw, Jawˇmawˇ lehˬ caˇ tuˬ chi teˇ hpaˍ nawˬ hui hta‸ caˍ piˇ tuˬ ngaˬ hta‸ tawˇ pe‸ laˇ taˍ peuˬ. Aˬ muiˬ nawˬ hui awˬ nu ve yaˇ nehˬ teˇ hpaˍ hkʼe taw awˬ gʼaˇ maˇ cawˬ ve kʼo, jawˇmawˇ ngaˬ hta‸ tiˇ pehˍ laˇ tuˬ yoˬ hehˉ, teh‸ Daˍyeˍlaˆ hta‸ kʼoˆ piˇ ve yoˬ.
11Oˇ htaˇ, Daˍyeˍlaˆ lehˬ yawˇ hui hta‸ nyi ha‸ shaˉ tuˬ Aˍshaˆpeˍnaˆ leuˆ teh taˍ ve shaw shehˍ hpaˇ geh kʼai leh, yawˇ hta‸ chi hkʼe kʼoˆ piˇ ve yoˬ. 12Ngaˬ hui hta‸ teˇ chi nyi hkʼa gaˬ lawˇ nyi-o. Gʼawˇ hpa‸ mvuhˬ naweh leh iˉ kaˆ ceh tiˉ pe‸ laˇ-oˆ. 13Oˇ hkʼe te peuˬ hkʼaw‸ nawˉ, hawˉ yehˬ hkʼaw ve caˇ tuˬ caˇ ve chaw hui leh, ngaˬ hui hta‸ tehˆ da‸ nyi-o, teh‸ yawˇ hta‸ kʼoˆ piˇ ve yoˬ.
14Hkʼe te leh, yawˇ hui hta‸ teˇ chi nyi hkʼa gaˬ lawˇ nyi tuˬ, shaw shehˍ hpaˇ oˇ ve nyi ma cawˇ ve yoˬ. 15Teˇ chi nyi biˇ peuˬ ve teˇ yanˇ, yawˇ hui lehˬ awˬ nu ve yaˇ nehˬ teˇ hpaˍ a‸ kehˉ chehˇ sha leh awˬ gʼaˇ awˬ shaˉ cawˬ ve hta‸ shaw shehˍ hpaˇ gʼa mawˬ ve yoˬ. 16Hkʼe te leh, oˇ ve teˇ nyi hta‸ te leh yawˇ hui hta‸ gʼawˇ hpa‸ mvuhˬ naweh ceh tiˉ caˍ piˇ ve yoˬ.
17Gʼuiˬsha lehˬ yaˇ paˍ chi ve awˇ gʼaˇ hta‸ shiˍ puiˉ ve cuˇ yiˍ leh, da‸ ve dawˇ hkʼaˇ cawˬ la piˇ ve yoˬ. Chi hkʼoˆ ka‸Yawˇ lehˬ Daˍyeˍlaˆ hta‸ zuh‸ maˆ ve tcuhˉ kuiˬ yuˬ tawˆ puiˉ ve cuˇ yiˍ htawˇ piˇ taˍ ve yoˬ.
18Jawˇmawˇ tiˍ taˍ ve awˬ yanˇ shehˆ hkʼaw‸ biˇ peuˬ ve teˇ yanˇ, Aˍshaˆpeˍnaˆ lehˬ, yaˇ paˍ oˇve hkʼa peu-eˬ hta‸ jawˇmawˇ Neˍbuˍhkaˍneˍzaˍ geh shiˍ kʼai ve yoˬ. 19Jawˇmawˇ yawˇ hui hta‸ na‸ uˉ te da‸ nyi ve teˇ yanˇ, Daˍyeˍlaˆ, Haˍnaˍniˆ, Miˆsheˍlaˆ leh Aˍzaˍriˆ hui lehˬ, awˬ nu ve yaˇ paˍ teˇ hpaˍ a‸ kehˉ cheuˬ ve hta‸ jawˇmawˇ gʼa mawˬ ve yoˬ. Hkʼe te leh, yawˇ hui teˇ hpaˍ jawˇmawˇ ve hawˉ yehˬ hkʼaw kanˉ gʼa te ve yoˬ. 20Jawˇmawˇ hkʼa na nyi ve tawˇ teˇ hpaˍ hta‸, yawˇ hui lehˬ awˬ nu ve mawˉ paˍ leh faˍ te puiˉ paˍ hkʼa peu-eˬ a‸ kehˉ teˇ chi pun shiˍ leh yaw hkʼaw‸ gʼa ve yoˬ. 21Paˇshaˇ mvuhˇmiˬ ve jawˇmawˇ Kuˇruˆ Baˍbuˍlonˍ mvuhˇmiˬ hta‸ ca bawˆ yuˬ la htaˇ hkʼa gaˬ, Daˍyeˍlaˆ lehˬ jawˇmawˇ ve hawˉ yehˬ hkʼaw lo chehˇ taˍ ve yoˬ.
Currently Selected:
Daˍyeˍlaˆ li‸ 1: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.