Yeˍsaˍkeˍlaˆ li‸ 48
48
Iˉsaˍreˍlaˆ chaw hui mvuhˇmiˬ pehˬ da‸ ve
1-7Awˬ na hpawˇ ve miˬ tcuhˉ lehˬ, Awˬ kʼaw ji ve laˇ tsuhˇ gʼuiˬ mvuhˇ nyi tawˆ hpawˇ te leh, Heˍtaˍlonˍ venˇ, Haˍmaˆ kʼaˬ le‸, Eˇnonˍ venˇ, Daˍmaˍsehˆ leh Haˍmaˆ miˬ tcuhˉ lo hkʼa gaˬ hpeh‸ve yoˬ. Mvuhˇ nyi tawˆ hpawˇ ve miˬ tcuhˉ hta‸ te leh mvuhˇ nyi kʼehˬ hpawˇ, Awˬ kʼaw ji ve laˇ tsuhˇ gʼuiˬ lo hkʼa gaˬ, awˬ na hpawˇ te leh awˬ hawˉ hpawˇ lo mvuhˇmiˬ pehˬ gʼa taˍve Iˉsaˍreˍlaˆ awˬ ceuˬ awˬ hkʼaˇ teˇ hpaˍ lehˬ,
Danˍ,
Aˍshaˍ,
Naˍtaˍliˆ,
Maˍnaˍseˍ,
Eˇhpaˍrenˍ,
Ruˇ benˍ leh
Yuˇda‸ hui hpeh‸ ve yoˬ.
Fuiˍ teh taˍ ve awˬ kʼaw ji ve miˬguiˬ
8Awˬ nu teˇ tawn ve miˬguiˬ hta‸ hkʼa deh‸ gʼa fuiˍ teh taˍ ve yoˬ. Miˬguiˬ oˇ ve lehˬ, Iˉsaˍreˍlaˆ chaw hui hta‸ pehˬ piˇ taˍ ve hkʼe, awˬ hawˉ hpawˇ leh awˬ na hpawˇ teˇ chi laˆ gʼa cawˬ piˇ leh, mvuhˇ nyi tawˆ hpawˇ leh mvuhˇ nyi kʼehˬ hpawˇ lo htawˇ oˇ ve hkʼa shuˍ gʼa cawˬ piˇ ve yoˬ. Bon yehˬ lehˬ, miˬguiˬ chi teˇ tawn hkʼaw cawˬ tuˬ yoˬ.
9Miˬguiˬ chi awˬ kʼaw ji teˇ tawn lo, zuhˬ hpawˇ teˇ chi laˆ, kʼehˬ hpawˇ hiˉ laˆ cawˬ ve miˬguiˬ hta‸ Gʼuiˬsha hta‸ gʼa chiˇ a‸ piˇ ve yoˬ. 10Paw hkuˇ teˇ hpaˍ lehˬ, da‸ kehˬ ve miˬguiˬ chi teˇ tawn ehˉ hta‸ yuˬ hpeh‸ ve yoˬ. Yawˇ hui gʼa tuˬ ve miˬguiˬ lehˬ, mvuhˇ nyi tawˆ hpawˇ leh mvuhˇ nyi kʼehˬ hpawˇ teˇ chi laˆ cawˬ leh, awˬ na hpawˇ te leh awˬ hawˉ hpawˇ lo awˇ laˆ cawˬ ve yoˬ. Gʼuiˬsha ve bon yehˬ lehˬ, miˬguiˬ chi ve awˬ kʼaw ji teˇ hkʼaˇ lo cawˬ tuˬ yoˬ. 11Da‸ kehˬ ve miˬguiˬ chi teˇ tawn lehˬ, Zaˍdoˆ awˬ ceuˬ awˬ hkʼaˇ paw hkuˇ teˇ hpaˍ awˬ pon hpeh‸ ve yoˬ. Yawˇ hui lehˬ, ka ti‸ yeˬ ve hkʼaw ngaˬ ve kanˉ hta‸ te leh, awˬ nu ve Leˍviˆ chaw leh Iˉsaˍreˍlaˆ chaw hui hkʼe cha‸ chiˆ ve kanˉ hta‸ maˇ te. 12Chi hta‸ pa taw, yawˇ hui lehˬ Leˍviˆ chaw gʼa taˍ ve miˬguiˬ awˬ paˇ lo cawˬ ve hkʼa deh‸ fuiˍ teh taˍ ve miˬguiˬ hta‸ gʼa leh, miˬguiˬ oˇ ve lehˬ hkʼa peu-eˬ a‸ kehˉ da‸ kehˬ jaˇ ve miˬguiˬ hpeh‸ tuˬ yoˬ. 13Leˍviˆ chaw teˇ hpaˍ htawˇ, paw hkuˇ teˇ hpaˍ ve miˬguiˬ awˬ hawˉ paˉ teˇ tawn lo cawˬ ve fuiˍ teh taˍ ve miˬguiˬ hta‸ gʼa tuˬ yoˬ. Miˬguiˬ oˇ ve ka‸ mvuhˇ nyi tawˆ hpawˇ te leh mvuhˇ nyi kʼehˬ hpawˇ lo teˇ chi laˆ cawˬ leh, awˬ na hpawˇ leh awˬ hawˉ hpawˇ lo awˇ laˆ cawˬ tuˬ yoˬ. 14Gʼuiˬsha hta‸ chiˇ a‸ piˇ taˍ ve miˬguiˬ lehˬ, hkʼa peu-eˬ a‸ kehˉ da‸ jaˇ ve teˇ tawn hpeh‸ leh, miˬguiˬ oˇ ve hta‸ hawˇ ve, pa ve, maˇ heˆ kʼo teˇ gʼaˇ gʼaˇ hta‸ piˇ tuˬ te maˇ hpeh‸. Miˬguiˬ oˇ ve lehˬ, da‸ kehˬ ve Gʼuiˬsha ve mawˇ hpeh‸ ve yoˬ.
15Hkʼa deh‸ fuiˍ teh taˍ ve miˬguiˬ oˇ ve teˇ tawn hkʼaw cawˬ taˍ sheˍ ve, zuhˬ hpawˇ teˇ chi laˆ leh kʼehˬ hpawˇ nyiˇ laˆ cawˬ ve miˬguiˬ oˇ ve lehˬ, maˇ da‸ kehˬ. Ya‸ hkʼaˇ, miˬguiˬ oˇ ve lehˬ chaw moˍ lonˉ yehˇ tuˬ awˬ pon hpeh‸ve yoˬ. Yawˇ hui oˇ kaˬ chehˇ leh miˬguiˬ oˇ ve hta‸ yehˇ hpeh‸ ve yoˬ. Miˬguiˬ oˇ ve awˬ kʼaw ji lo, yawˇ hui venˇ te hpeh‸ ve yoˬ. 16Miˬguiˬ oˇ ve lehˬ, zuhˬ hpawˇ kʼehˬ hpawˇ teˇ hinˉ loˬ hkʼa shuˍ hpeh‸ ve yoˬ. 17Venˇ oˇ ve teˇ hpawˇ le le lo, ngaˇ chi hkaw‸ loˬ kʼehˬ ve chehˇ kuiˬ gʼa cawˬ taˍ piˇ ve yoˬ. 18Daˬ kehˬ ve miˬguiˬ awˬ hawˉ hpawˇ lo venˇ hta‸ te peuˬ hkʼaw‸ nawˉ, cawˬ taˍ sheˍ ve mvuhˇ nyi tawˆ hpawˇ lo awˇ laˆ leh nyiˇ laˆ kʼehˬ ve leh, mvuhˇ nyi kʼehˬ hpawˇ lo awˇ laˆ leh nyiˇ laˆ kʼehˬ ve miˬguiˬ oˇ ve hta‸ venˇ hkʼaw chehˇ ve chaw hui ti mi te caˇ hpeh‸ ve yoˬ. 19Venˇ oˇ ve hkʼaw chehˇ ve hkʼaˬ ve chaw teˇ ceuˬ maˇ kʼoˆ, ti mi oˇ ve hta‸ te caˇ hpeh‸ ve yoˬ.
20Hkʼe te leh, hkʼa deh‸ fuiˍ teh taˍ ve miˬguiˬ oˇ ve awˬ kʼaw ji teˇ tawn lo cawˬ ve miˬguiˬ lehˬ, zuhˬ hpawˇ kʼehˬ hpawˇ teˇ chi laˆ hkʼa shuˍ cawˬ ve yoˬ. Oˇ ve awˬ hkʼaw lo venˇ te taˍ ve chehˇ kuiˬ htawˇ lo‸-e taˍ ve yoˬ.
21-22Bon yehˬ te taˍ kuiˬ, paw hkuˇ ve miˬguiˬ leh venˇ te taˍ kuiˬ miˬguiˬ chi ve mvuhˇ nyi tawˆ hpawˇ leh mvuhˇ nyi kʼehˬ hpawˇ lo cawˬ taˍ sheˍ ve miˬguiˬ lehˬ, uˉ peunˍ chehˇ ve jawˇmawˇ yaˇ awˬ pon hpeh‸ ve yoˬ. Miˬguiˬ oˇ ve mvuhˇnyi tawˆ hpawˇ lehˬ, mvuhˇ nyi tawˆ hpawˇ ve miˬ tcuhˉ lo hkʼa gaˬ hpeh‸ leh, mvuhˇ nyi kʼehˬ hpawˇ lehˬ, Awˬ kʼaw ji ve laˇ tsuhˇ gʼuiˬ lo hkʼa gaˬ hpeh‸ ve yoˬ. Miˬguiˬ oˇ ve awˬ na hpawˇ lehˬ, Yuˇda‸ chaw gʼa taˍ ve miˬguiˬ lo hkʼa gaˬ hpeh‸ leh, awˬ hawˉ hpawˇ lehˬ Beˍyaˍmenˍ chaw hui gʼa taˍ ve miˬguiˬ lo hkʼa gaˬ hpeh‸ ve yoˬ.
Awˬ nu ve chaw ceuˬ teˇ hpaˍ ve miˬguiˬ
23-27Hkʼa deh‸ fuiˍ teh taˍ ve miˬguiˬ oˇ ve awˬ hawˉ hpawˇ lo cawˬ ve, mvuhˇ nyi tawˆ hpawˇ ve miˬ tcuhˉ hta‸ te leh Awˬ kʼaw ji ve laˇ tsuhˇ gʼuiˬ lo hkʼa gaˬ, awˬ na hpawˇ te leh awˬ hawˉ hpawˇ lo mvuhˇmiˬ pehˬ gʼa taˍ ve cawˬ taˍ sheˍ ve Iˉsaˍreˍlaˆ chaw teˇ hpaˍ lehˬ,
Beˍyaˍmenˍ,
Suˉmonˍ,
Iˉsaˍhkaˍ,
Zeˍbuˆlonˍ leh
Gaˆ awˬ ceuˬ awˬ hkʼaˇ teˇ hpaˍ hpeh‸ ve yoˬ.
28Gaˆ chaw hui gʼa taˍ ve mvuhˇmiˬ awˬ hawˉ hpawˇ lo ve miˬ tcuhˉ lehˬ, mvuhˇ nyi kʼehˬ awˬ hawˉ hawˇ Taˍmaˍ venˇ lo te leh Kaˍdeˍshaˆ iˉ kaˆ gʼuiˬ tuˇ lo hkʼa gaˬ, oˇ kaˬ lo kʼaw‸ te leh mvuhˇ nyi kʼehˬ awˬ na hpawˇ Eˇjiˇtu‸ miˬ tcuhˉ hta‸ te leh Awˬ kʼaw ji ve laˇ tsuhˇ gʼuiˬ lo hkʼa gaˬ hpeh‸ve yoˬ.
29Gʼuiˬsha kʼoˆ ve, Chi ve lehˬ Iˉsaˍreˍlaˆ chaw hui hta‸ mvuhˇmiˬ hkʼaˬ hkʼe te pehˬ piˇ tuˬ ve awˬ hkʼaˇ hpeh‸ ve yoˬ, teh‸ kʼoˆ ve yoˬ.
Yeˍruˆsaˍlehnˍ ve taˍ meu‸ hpe‸ teˇ hpaˍ
30-34Yeˍruˆsaˍlehnˍ venˇ hkʼaw lo‸-e tuˬ ve taˍ meu‸ hpe‸ teˇ chi nyiˇ maˬ cawˬ ve yoˬ. Lanˇ venˇ teˇ hpawˇ ve teˇ hinˉ loˬ cawˬ leh, taˍ meu‸ hpe‸ shehˆ maˬ cawˬ ve yoˬ. Yehˬmiˉhpe‸ teˇ maˬ ve hta‸ Iˉsaˍreˍlaˆ chaw teˇ ceuˬ ve awˬ meh piˇ taˍ ve yoˬ. Awˬna hpawˇ ve taˍ meu‸ hpe‸ teˇ hpaˍ hta‸, Ruˇbenˍ, Yuˇda‸ leh Leˍviˆ teh‸ meh piˇ taˍ leh, mvuhˇ nyi tawˆ hpawˇ ve taˍ meu‸ hpe‸ teˇ hpaˍ hta‸, Yoˇseh‸, Beˍyaˍmenˍ, leh Danˍ teh‸ meh piˇ taˍ ve yoˬ. Awˬ hawˉ hpawˇ ve taˍ meu‸ hpe‸ teˇ hpaˍ hta‸ Suˉmonˍ, Iˉsaˍhkaˍ leh Zeˍbuˆlonˍ teh‸ meh piˇ taˍ leh, mvuhˇ nyi kʼehˬ hpawˇ ve taˍ meu‸ hpe‸ teˇ hpaˍ hta‸ Gaˆ, Aˍshaˍ, leh Naˍtaˍliˆ teh‸ meh piˇ taˍ ve yoˬ. 35Venˇ oˇ ve hta‸ hkʼa caw zuhˇ ko taˍ ve lanˇ venˇ awˇ hpawˇ ve lehˬ, awˇ hinˉ loˬ cawˬ ve yoˬ. Ya‸ nyi hta‸ tanˬ leh venˇ oˇ ve hta‸, Gʼuiˬsha choˬ kaˬ chehˇ ve, teh‸ gʼa kʼaw‸ meh piˇ tuˬ yoˬ.
Currently Selected:
Yeˍsaˍkeˍlaˆ li‸ 48: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.