Zaˍhkaˍriˆ li‸ 4
4
Awˬ ha hkʼaw lo aˬ miˍ tuˉ teh kuiˬ hta‸ gʼa mawˬ ve
1Ngaˬ hta‸ tawˇ yaw laˇ jaw ve mvuhˇ naw ma tcuh yaˇ oˇ ve lehˬ, zuh‸ muiˉ kʼa chehˇ ve chaw hta‸ nawˍ piˇ ve hkʼe, ngaˬ hta‸ ca nawˍ la leh, 2Nawˬ aˬ hto‸ ma gʼa mawˬ le, teh‸ ngaˬ hta‸ na nyi laˇ ve yoˬ.
Oˇ htaˇ ngaˬ lehˬ, Shi te taˍ ve aˬ miˍ tuˉ teh kuiˬ teˇ maˬ hta‸ gʼa mawˬ ve yoˬ. Oˇ ve awˬ hkʼoˆ lo, naˍ manˇ keu taˍ ve kawˆ teˇ maˬ leh, kawˆ faiˇ suhˍ maˬ teh taˍ ve yoˬ. 3Aˬ miˍ tuˉ teh kuiˬ oˇ ve awˬ paˇ lo shaˍ lonˍ cehˬ teˇ paˉ teˇ cehˬ cawˬ taˍ ve yoˬ, teh‸ ngaˬ kʼaw‸ yaw hkʼaw‸ piˇ ve yoˬ. 4Oˇ htaˇ ngaˬ lehˬ, Jawˇmawˇ-oˬ, chi teˇ hpaˍ aˬ hto‸ ma tcuhˉ kuiˬ le, teh‸ yawˇ hta‸ na nyi ve yoˬ.
5Yawˇ kʼaw‸ yaw hkʼaw‸ leh, Nawˬ maˇ shiˍ laˇ, teh‸ ngaˬ hta‸ kʼoˆ laˇ ve yoˬ.
Jawˇmawˇ-o, ngaˬ maˇ shiˍ, teh‸ yawˇ hta‸ kʼaw‸ kʼoˆ piˇ ve yoˬ. Oˇ htaˇ mvuhˇ naw ma tcuh yaˇ ngaˬ hta‸ kʼoˆ laˇ ve, Kawˆ faiˇ oˇ ve suhˍ maˬ lehˬ, miˬguiˬ teˇ kaˬ le le lo mawˬ hpeh‸ ve Gʼuiˬsha ve mehˆ shiˍ suhˍ maˬ hpeh‸ ve yoˬ, teh‸ kʼoˆ laˇ ve yoˬ.
Zeˍruˆbaˍbeˍlaˆ hta‸ Gʼuiˬsha ka ti‸ te ve
6Oˇ htaˇ mvuhˇ naw ma tcuh yaˇ oˇ ve lehˬ, Gʼuiˬsha ve tawˇ chi teˇ hpaˍ Zeˍruˆbaˍbeˍlaˆ hta‸ ca hto piˇ tuˬ ngaˬ hta‸ kʼoˆ laˇ ve yoˬ. Ngaˬ ve awˬ ha hpu hta‸ pa taw nawˬ te chehˇ ve kanˉ teˇ hpaˍ uiˍ la da‸ la tuˬ yoˬ. Ma‸ moˍ ma‸ cuˇ ve awˬ gʼaˇ hta‸ pa taw maˇ heˆ. Nawˬ ve awˬ gʼaˇ awˬ shaˉ hta‸ pa taw ka‸ maˇ heˆ. 7Haˍ jaˇ ve kanˉ teˇ hpaˍ nawˬ mehˆ gʼuˇ suhˍ lo mehˉ kʼai tuˬ yoˬ. Nawˬ lehˬ bon yehˬ hta‸ gʼa kʼaw‸ gu te tuˬ yoˬ. Nawˬ haˉ pui shiˍ awˬ leh meuˇ teˇ shiˍ hta‸ chiˇ kawˍ chehˇ ve teˇ yanˇ, Bon yehˬ chi hkʼaˬ ma da‸ jaˇ ve le, teh‸ chaw yaˇ teˇ hpaˍ hpoˆ kuˬ tuˬ yoˬ.
8Gʼuiˬsha ngaˬ hta‸ tawˇ teˇ pawˆ kʼaw‸ yaw laˇ ve yoˬ. 9Yawˇ kʼoˆ ve, Zeˍruˆbaˍbeˍlaˆ bon yehˬ awˬ hkuiˉ puiˍ tanˬ kawˍ chehˇ taˍ peuˬ. Yawˇ lehˬ maˇ maw maw bon yehˬ oˇ ve hta‸ te peuˬ tuˬ yoˬ. Chi hkʼe hpeh‸ la ve teˇ yanˇ, ngaˬ nawˬ hta‸ yawˇ hui geh kʼai peu taˍ ve hta‸ ngaˬ ve chaw teˇ hpaˍ shiˍ la tuˬ yoˬ. 10Yawˇ hui lehˬ bon yehˬ hta‸ haˆ haˆ te maˇ peuˬ puiˉ ve pa taw, nyi ma luˬ chehˇ ve yoˬ. Ya‸ hkʼaˇ, Zeˍruˆbaˍbeˍlaˆ awˬ hoˉ te leh bon yehˬ hta‸ kʼaw‸ gu te chehˇ ve hta‸ yawˇ hui gʼa mawˬ ve teˇ yanˇ, yawˇ hui ha lehˬ jaˇ tuˬ yoˬ, teh‸ ngaˬ hta‸ kʼoˆ laˇ ve yoˬ.
11Oˇ htaˇ ngaˬ lehˬ, Aˬ miˍ tuˉ teh kuiˬ teˇ paˉ teˇ maˬ lo cawˬ ve shaˍ lonˍ cehˬ oˇ ve teˇ hpaˍ aˬ hto‸ ma tcuhˉ kuiˬ le. 12Naˍ manˇ ngeuˍ tawˆ kuiˬ, shi te taˍ ve naˍ manˇ caˆ oˇ ve nyiˇ maˬ awˬ paˇ lo cawˬ ve shaˍ lonˍ kʼaˉ oˇ ve nyiˇ maˬ aˬ hto‸ ma tcuhˉ kuiˬ le, teh‸ ngaˬ yawˇ hta‸ na nyi ve yoˬ.
13Nawˬ maˇ shiˍ leh laˇ, teh‸ yawˇ ngaˬ hta‸ kʼaw‸ kʼoˆ laˇ ve yoˬ.
Jawˇmawˇ-oˬ, ngaˬ maˇ shiˍ, teh‸ yawˇ hta‸ kʼaw‸ kʼoˆ piˇ ve teˇ yanˇ,
14yawˇ kʼoˆ ve, Chi lehˬ miˬguiˬ hkʼa peu-eˬ ve hta‸ uˉ peunˍ chehˇ ve Gʼuiˬsha leuˆ yuˬ leh naˍ manˇ pfuhˍ piˇ taˍ ve yawˇ ve awˬ ceˬ paˍ nyiˇ gʼaˇ hpeh‸ ve yoˬ, teh‸ ngaˬ hta‸ kʼoˆ laˇ ve yoˬ.
Currently Selected:
Zaˍhkaˍriˆ li‸ 4: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.