Tiˇtuˆ li‸ 3
3
Gʼuiˬsha ve awˬ bon hta‸ pa taw hteˇ ve cawˇ ve chaw hpeh‸ la ve
1Yawˇ hui lehˬ, jawˇmawˇ leh uˉ peunˍ shehˍ hpaˇ teˇ hpaˍ awˬ hawˉ lo chehˇ leh yawˇ hui ve hkawˇ hta‸ na yuˬ tuˬ maˇ kʼoˆ, da‸ ve kanˉ teˇ ceuˬ le le hta‸ te tuˬ awˬ pon gu taˍ hehnˇ taˍ tuˬ maˇ kʼoˆ, yawˇ hui hta‸ hkʼa deh‸ dawˇ nawˇ piˇ-oˆ. 2A shu hta‸ ka‸ maˇ shawˍ maˇ caˆ maˇ gʼa kʼoˆ. Tawˇ maˇ gʼa gʼawˬ da‸. Ya‸ hkʼaˇ, nyi ma nuˇ nehˬ taˍ leh, teˇ ceuˬ le le awˬ hkʼaw lo chaw hkʼa peu-eˬ hta‸ yawˆ yawˆ yan yan te tuˬ ka‸, yawˇ hui hta‸ hkʼa deh‸ dawˇ nawˇ piˇ-oˆ. 3Awˬ lawn kʼo, ponˬ laˬ htaˇ ngaˬ hui htawˇ cuˇ yiˍ maˇ cawˬ ve chaw, maˇ na yuˬ puiˉ ve chaw, ya‸ kʼaw ya‸ ve chaw, awˬ suhˍ awˬ shaˍ sheˉ lai leh ha lehˬ tuˬ laiˉ ceuˬ awˬ hkʼaˇ suh te kʼai ve chaw, shu hta‸ hkawehˉ leh naˬ tuˬ te ve chaw, shu ngaˬ hui hta‸ canˇ leh, ngaˬ hui teˇ gʼaˇ leh teˇ gʼaˇ hta‸ canˇ da‸ ve chaw hpeh‸ jaw ve yoˬ. 4Ya‸ hkʼaˇ, ngaˬ hui ve Htaiˍ hkʼaw‸ shehˍ hpaˇ Gʼuiˬsha ve ha kʼaˉ ve teˇ ceuˬ leh, yawˇ chaw yaˇ hta‸ ha‸ ve teˇ ceuˬ tawˆ la ve teˇ yanˇ, yawˇ ngaˬ hui hta‸ htaiˍ hkʼaw‸ laˇ ve yoˬ. 5Ngaˬ hui hteˇ ve cawˇ ve kanˉ te ve hta‸ pa taw maˇ heˆ. Yawˇ ngaˬ hui hta‸ ha kʼaˉ ve hta‸ pa taw htaiˍ hkʼaw‸ laˇ ve yoˬ. Da‸ ve kehˬ ve Awˬ ha hpu awˬ hkʼaw lo awˬ suhˉ teˇ pawˆ paw la ve hta‸ caˉ da‸ ve tsuhˇ hkʼa laˇ ve teˇ ceuˬ leh, awˬ suhˉ kʼaw‸ gu te laˇ ve teˇ ceuˬ hta‸ cuˇ leh ngaˬ hui hta‸ htaiˍ hkʼaw‸ laˇ ve yoˬ. 6Ngaˬ hui ve Htaiˍ hkʼaw‸ paˍ Yeˍsuˆ Hkri‸ hta‸ yawˇ cuˇ leh, oˇ ve nyiˇ ceuˬ ngaˬ hui awˬ hkʼoˆ hta‸ hkʼa biˇ ngeuˍ pfuhˍ laˇ veyoˬ. 7Hkʼe te leh, yawˇ ve awˬ bon hta‸ pa taw ngaˬ hui hteˇ ve cawˇ ve chaw hpeh‸ leh, co ti‸ ha ti‸ hta‸ dawˇ law ve awˬ hkʼaw lo ngaˬ hui yawˇ ve awˬ shinˉ hta‸ caˇ shehˍ hpaˇ hpeh‸ la ve yoˬ. 8Tawˇ hkawˇ chi hta‸ nawˬ yonˍ hpeh‸ ve yoˬ.
Gʼuiˬsha hta‸ yonˍ ve chaw hui lehˬ, da‸ ve kanˉ teˇ hpaˍ hta‸ gʼa te tcuhˉ taˍ ve yoˬ teh‸ dawˇ nawˇ tuˬ awˬ pon, awˬ lawn chi teˇ hpaˍ nawˬ gʼaˇ hte‸ maˍ piˇ tuˬ ngaˬ heuˆ gaˇ ve yoˬ. Chi teˇ hpaˍ lehˬ, da‸ ve kanˉ hpeh‸ leh, chaw yaˇ hui awˬ pon awˬ bon cawˬ ve yoˬ. 9Ya‸ hkʼaˇ, cuˇ yiˍ maˇ cawˬ ve jehˬ da‸ cehˇ da‸ ve teˇ hpaˍ hta‸ maˇ kʼoˆ, awˬ ceuˬ awˬ hkʼaˇ teˇ caˉ peuˬ teˇ caˉ shawˍ nyi ve hta‸ maˇ kʼoˆ, ya‸ da‸ jiˆ da‸ ve hta‸ maˇ kʼoˆ, awˬliˇtawˇhkawˇ awˬ lawn tawˇ gʼawˬ da‸ ve teˇ hpaˍ hta‸ maˇ kʼoˆ, jaw kʼai-o. Awˬ lawn kʼo, awˬ ceuˬ oˇ ve teˇ hpaˍ lehˬ, te‸ chiˉ awˬ bon maˇ cawˬ leh, hkʼe leˇ hpeh‸ ve yoˬ. 10Awˬ moˍ pehˬ da‸ hpaˆ da‸ tuˬ te ve chaw hta‸ teˇ pawˆ nyiˇ pawˆ hkʼa deh‸ maˍ piˇ peuˬ hkʼaw‸ nawˉ yawˇ hta‸ awˬ chawˇ taˇ kʼaw‸ te. 11Chi hkʼe ve chaw lehˬ, nyi ma a ciˉ ka‸ maˇ hteˇ leh, venˇbaˆ te chehˇ ve yoˬ teh‸ shiˍ-o‸. Yawˇ lehˬ, a shu yawˇ awˬ to hta‸ suhˉ taˆ peuˬ.
Pawˇlu‸ Tiˇtuˆ hta‸ tcuh ve teˇ hpaˍ
12Ngaˬ lehˬ, Aˍteˍmaˆ hta‸ maˇ kʼoˆ, Tuˇhkiˆ hta‸ maˇ kʼoˆ, nawˬ geh peu laˇ ve teˇ yanˇ, Niˇkawˇpaˍliˆ venˇ lo ngaˬ hta‸ gʼa hpuˇ da‸ tuˬ coˇ caˇ leh laˬ-o‸. Awˬ lawn kʼo, mvuhˇ kaˆ ve awˬ yanˇ htaˇ venˇ oˇ ve awˬ hkʼaw lo ngaˬ chehˇ tuˬ yoˬ teh‸ dawˇ taˍ ve yoˬ. 13Awˬliˇtawˇhkawˇ shiˍ pa Seˍnaˆ leh Aˍpawˇlu‸ hta‸ haˆ haˆ peu laˇ-oˆ. Yawˇ huiˉ maˬ laˬ ve teˇ yanˇ te‸ chiˉ ka‸ maˇ gʼa loˍ tuˬ hkʼa deh‸ ga piˇ-oˆ. 14Ngaˬ hui ve chaw teˇ hpaˍ lehˬ, da‸ ve kanˉ teˇ hpaˍ hta‸ gʼaˇ hte‸ te kʼai hpeh‸ tuˬ maˍ piˇ-oˆ. Yawˇ hui chi hkʼe te ve kʼo, loˍ jaˇ ve chaw teˇ hpaˍ hta‸ ga piˇ hpeh‸ leh, awˬ shiˍ naw‸ ve chaw hpeh‸ tuˬ yoˬ.
Bon na‸ piˇ ve hkawˇ
15Ngaˬ geh chehˇ ve chaw hkʼa peu-eˬ lehˬ, nawˬ hta‸ dawˇ nawˇ chehˇ ve yoˬ teh‸ tawˇ shanˍ feu laˇ ve yoˬ. Yonˍ ve awˬ hkʼaw lo ngaˬ hui hta‸ ha‸ ve chaw teˇ hpaˍ hta‸ ngaˬ hui dawˇ nawˇ chehˇ ve yoˬ teh‸ hto piˇ-oˆ.
Nawˬ hui hkʼa peu-eˬ geh awˬ bon awˬ shinˉ cawˬ piˇ-oˆ.
Currently Selected:
Tiˇtuˆ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.