Roˉma‸ li‸ 13

Uˉ peunˍ shehˍ hpaˇ awˬ hawˉ lo hkʼa deh‸ chehˇ-oˆ

1Chaw teˇ gʼaˇ le le uˉ peunˍ shehˍ hpaˇ teˇ hpaˍ awˬ hawˉ lo hkʼa deh‸ chehˇ-oˆ. Awˬ lawn kʼo, Gʼuiˬsha geh gʼa ve maˇ heˆ kʼo, uˉ peunˍ tuˬ kanˇ paˆ maˇ cawˬ. Yawˇ hui cawˬ taˍ ve kanˇ paˆ teˇ hpaˍ Gʼuiˬsha teh taˍ ve yoˬ. 2Hkʼe te leh, uˉ peunˍ shehˍ hpaˇ teˇ hpaˍ hta‸ hpfuhˆ ve chaw lehˬ, Gʼuiˬsha teh taˍ ve aˉ yaˇ hta‸ tawˍ taˍ shehˍ hpaˇ hpeh‸ ve yoˬ. Tawˍ taˍ ve chaw hui lehˬ, ciˍ yanˍ ve hta‸ gʼa hkanˍ tuˬ yoˬ. 3Awˬ lawn kʼo, da‸ ve kanˉ hta‸ te ve chaw teˇ hpaˍ lehˬ, jawˇmawˇ teˇ hpaˍ hta‸ kawˆ tuˬ maˇ cawˬ. Haiˬ ve hta‸ te ve chaw teˇ hpaˍ lehˬ kawˆ tuˬ cawˬ ve yoˬ. Uˉ peunˍ shehˍ hpaˇ teˇ hpaˍ hta‸ kawˆ tuˬ maˇ cawˬ ve chaw hpeh‸ gaˇ laˇ. Da‸ ve hta‸ te-o. Chi hkʼe te ve kʼo, yawˇ nawˬ hta‸ chiˇ mvuh tuˬ yoˬ. 4Nawˬ awˬ pon awˬ bon cawˬ tuˬ, yawˇ Gʼuiˬ sha ve awˬ ceˬ hpeh‸ ve yoˬ. Ya‸ hkʼaˇ, nawˬ haiˬ ve hta‸ te ve kʼo, kawˆ chehˇ-oˆ. Awˬ lawn kʼo, yawˇ lehˬ aˉ htaw hkʼe leˇ pfuhˇ taˍ ve maˇ heˆ. Awˬ haiˬ hkʼa te ve chaw hui hta‸ ciˍ yanˍ piˇ tuˬ, yawˇ lehˬ Gʼuiˬsha ve awˬ ceˬ hpeh‸ ve yoˬ. 5Hkʼe te leh, uˉ peunˍ shehˍ hpaˇ awˬ hawˉ lo hkʼa deh‸ chehˇ-oˆ. Ciˍ yanˍ ve hta‸ kawˆ ve pa taw ceh tiˉ maˇ heˆ. Nawˬ ve shiˍ puiˉ ve nyi ma htawˇ, dawˇ sha hpeh‸ tuˬ hkʼa deh‸ chehˇ-oˆ.

6Chi hta‸ pa taw, nawˬ hui a moˇ ka‸ keu piˇ chehˇ ve yoˬ. Awˬ lawn kʼo, uˉ peunˍ shehˍ hpaˇ teˇ hpaˍ lehˬ, Gʼuiˬsha ve kanˉ te shehˍ hpaˇ hpeh‸ leh kanˉ chi ve hta‸ yawˇ hui hkʼaˬ htaˆ ka‸ te tcuhˉ taˍ ve yoˬ. 7Yawˇ hui hkʼa peu-eˬ hta‸ piˇ keunˍ piˇ cawˇ ve hkʼe piˇ-oˆ. A moˇ shaw ve chaw hui hta‸ a moˇ keu piˇ-oˆ. Awˬ hkawnˍ shaw ve chaw hui hta‸ awˬ hkawnˍ keu piˇ-oˆ. Kawˆ keunˍ ve chaw hui hta‸ kawˆ-oˆ. Yawˆ yan keunˍ ve chaw hui hta‸ yawˆ yan-o.

Jeˬ taˇ pfuhˇ

8Jeˬ a ciˉ ka‸ taˇ pfuhˇ. Ya‸ hkʼaˇ, teˇ gʼaˇ leh teˇ gʼaˇ ha‸ da‸ ve jeˬ teˇ ceuˬ hta‸ pfuhˇ taˍ-o‸. Awˬ lawn kʼo, awˬ paˇ awˬ kui chehˇ ve chaw hui hta‸ ha‸ ve chaw lehˬ, awˬliˇtawˇhkawˇ hta‸ te biˇ peuˬ. 9Haˉ chawˇ haˉ paˆ maˇ gʼa te, chaw hta‸ maˇ gʼa tiˇ pehˍ, shu ve mawˇ hta‸ maˇ gʼa hkʼawˇ, shu mawˇ shu jeˬ hta‸ maˇ gʼa sheˉ lai teh‸ kʼoˆ taˍ ve awˬliˇtawˇhkawˇ teˇ hpaˍ maˇ kʼoˆ,#Taw 20:13-17 awˬ kaˍ awˬ nu cawˬ taˍ ve awˬliˇtawˇhkawˇ teˇ hpaˍ htawˇ maˇ kʼoˆ, tawˇ chi hkʼa peu-eˬ lehˬ, Nawˬ awˬ to hta‸ ha‸ ve hkʼe, awˬ paˇ awˬ kui chehˇ ve chaw teˇ hpaˍ hta‸ ha‸-o‸ teh‸ kʼoˆ taˍ ve teˇ hkawˇ awˬ hkʼaw lo biˇ la ve yoˬ.#Okʼo 19:18 10Ha‸ ve teˇ ceuˬ lehˬ, awˬ paˇ awˬ kui chehˇ ve chaw hta‸ awˬ haiˬ maˇ te. Hkʼe te leh, ha‸ ve teˇ ceuˬ lehˬ, awˬliˇtawˇhkawˇ hta‸ te biˇ ve yoˬ.

11Chi hkʼoˆ ka‸, chi beu‸ awˬ yanˇ lehˬ nawˬ hui zuh‸ nawˇ la tuˬ ve awˬ yanˇ gaˬ peuˬ ve hta‸ nawˬ hui shiˍ chehˇ ve yoˬ. Awˬ lawn kʼo, ngaˬ hui awˉ lawˉ yonˍ gehˇ ve teˇ yanˇ a‸ kehˉ, chi beu‸ htaiˍ hkʼaw‸ ve teˇ ceuˬ leuˉ leh ngaˬ hui hta‸ neˇ la peuˬ. 12Mvuhˇ hpeu‸ awˬ yanˇ peuˬ la paˇ neˇ leh, mvuhˇ law‸ kʼaw awˬ yanˇ gaˬ la paˇ neˇ ve yoˬ. Hkʼe te leh, naˆ ho‸ ve hta‸ caˉ da‸ ve kanˉ teˇ hpaˍ hta‸ kʼehˆ baˬ taˉ leh, awˬ gʼeuˆ hta‸ caˉ da‸ ve la‸ caˉ teˇ hpaˍ hta‸ veu‸ deh-a veuˬ. 13Ha lehˬ tuˬ te ponˬ te leuˉ leh tzuhˬ dawˬ bvuhˆ ve, haˉ chawˇ haˉ paˆ te leh te ponˬ te leuˉ ve, shu hta‸ ya‸ da‸ jiˆ da‸ leh hkawehˉ ve, chi teˇ hpaˍ hta‸ taˇ te. Mvuhˇ law‸ kʼaw htaˇ te keunˍ ve teˇ hpaˍ hta‸ ngaˬ hui te-a veuˬ. 14Chi hkʼoˆ ka‸, Jawˇmawˇ Yeˍsuˆ Hkri‸ hta‸ veu‸ deh-o. Awˬ suhˍ awˬ shaˍ a loˍ awˬ hkʼaˇ suh te kʼai tuˬ te‸ chiˉ taˇ gu taˍ.

Currently Selected:

Roˉma‸ li‸ 13: LHBE

Highlight

Copy

Compare