Hpeu‸maˍ ve li‸ 20

Teˇ hinˉ hkʼaw‸ ve awˬ yanˇ awˬ lawn

1Oˇ htaˇ, mvuhˇ naw ma tcuh yaˇ teˇ gʼaˇ mvuhˇ naw ma lo ya‸ la chehˇ ve hta‸ ngaˬ gʼa mawˬ ve yoˬ. Leh kuiˬ maˇ cawˬ ve miˬ kʼoˍ ve shawˇ leh sho caˆ lonˉ hta‸ yawˇ ve la‸ sheh awˬ hkʼaw lo vawˆ taˍ ve yoˬ. 2Neˇhaiˬ leh Saˍtanˍ hpeh‸ ve cawˇ shehˍ ma hta‸ yawˇ hpeh yuˬ leh, teˇ hinˉ hkʼaw‸ hkʼa gaˬ hpeh tiˍ taˍ ve yoˬ. Cawˇ shehˍ ma oˇ ve lehˬ, aˬ sho-eˬ htaˇ ve vuiˬ haiˬ hpeh‸ ve yoˬ. 3Teˇ hinˉ hkʼaw‸ maˇ peuˬ ve ceh ceh, chaw ceuˬ teˇ hpaˍ hta‸ yawˇ maˇ gʼa heˍ yuˬ beˬ yuˬ tuˬ, leh kuiˬ maˇ cawˬ ve miˬ kʼoˍ awˬ hkʼaw lo yawˇ hta‸ baˬ keu sheˬ leh, hoˆ taˍ leh yinˉ tcuhˉ taˍ ve yoˬ. Teˇ hinˉ hkʼaw‸ peuˬ hkʼaw‸ nawˉ, yawˇ hta‸ teˇ hkui ceh gʼa hpehˇ piˇ tuˬ yoˬ.

4Oˇ htaˇ, kʼaw jaw teˇ hpaˍ hta‸ ngaˬ gʼa mawˬ ve yoˬ. Kʼaw jaw oˇ ve teˇ hpaˍ awˬ hkʼoˆ hta‸ mui chehˇ ve chaw hui lehˬ, suhˉ jehˬ suhˉ taˆ tuˬ a hkaw-anˬ gʼa taˍ ve yoˬ. Yeˍsuˆ leh Gʼuiˬsha ve tawˇ hkawˇ awˬ lawn shaˉ hkiˆ hkanˍ ve hta‸ pa taw, oˉ kʼoˍ tawˆ ve hta‸ gʼa hkanˍ ve chaw hui ve co ha teˇ hpaˍ hta‸ htawˇ ngaˬ gʼa mawˬ ve yoˬ. Yawˇ hui lehˬ, haiˬ ve to nuˇ to shaˆ hta‸ maˇ kʼoˆ, yawˇ ve shaˉ ho‸ hta‸ maˇ kʼoˆ, oˉ kʼoˍ maˇ pui leh, yawˇ ve yinˉ tcuhˉ taˍ ve hta‸ a shu yawˇ ve naˍ kʼaˍ pui awˬ hkʼoˆ hta‸ maˇ kʼoˆ, la‸ sheh awˬ hkʼoˆ hta‸ maˇ kʼoˆ, maˇ hkanˍ yuˬ ve chaw teˇ hpaˍ hpeh‸ ve yoˬ. Yawˇ hui kʼaw‸ te‸ la leh, Hkri‸ geh teˇ hinˉ hkʼaw‸ hkʼa ga uˉ peunˍ ve yoˬ. 5Cawˬ taˍ sheˍ ve suh taˍ ve chaw teˇ hpaˍ lehˬ, teˇ hinˉ hkʼaw‸ maˇ peuˬ ve ceh ceh maˇ gʼa kʼaw‸ te‸ la. Chi lehˬ, awˉ lawˉ peuˇ ve kʼaw‸ te‸ tu la ve teˇ ceuˬ hpeh‸ ve yoˬ. 6Awˉ lawˉ peuˇ ve kʼaw‸ te‸ tu la ve teˇ ceuˬ awˬ hkʼaw lo gʼa chehˇ ve chaw lehˬ, awˬ bon uiˍ leh da‸ kehˬ ve chaw hpeh‸ ve yoˬ. Nyiˇ pawˆ teˇ pawˆ suh ve teˇ ceuˬ yawˇ hui awˬ hkʼoˆ hta‸ kanˇ paˆ maˇ cawˬ. Yawˇ hui lehˬ, Gʼuiˬsha leh Hkri‸ ve paw hkuˇ teˇ hpaˍ hpeh‸ leh, Hkri‸ geh teˇ hinˉ hkʼaw‸ hkʼa gaˬ uˉ peunˍ tuˬ yoˬ.

7Teˇ hinˉ hkʼaw‸ peuˬ hkʼaw‸ nawˉ, Saˍtanˍ hta‸ htawnˍ awˬ hkʼaw lo hpehˇ piˇ tuˬ yoˬ. 8Miˬguiˬ awˇ ceˍ awˍ hpawˇ lo chehˇ ve chaw ceuˬ teˇ hpaˍ hta‸ heˍ yuˬ beˬ yuˬ leh ma‸ bawˆ tuˬ awˬ pon hpawnˬ da‸ piˇ tuˬ, yawˇ tawˆ kʼai ve yoˬ. Chaw ceuˬ oˇ ve teˇ hpaˍ lehˬ, Gawˇgaˆ leh Maˍgawˇgaˆ teh‸ kʼoˆ ve yoˬ. Yawˇ hui lehˬ, laˇ tsuhˇ gʼuiˬ shehˇ shiˍ hkʼa shuˍ shuˍ maˇ ve yoˬ. 9Yawˇ hui lehˬ, miˬguiˬ hkʼoˆ hkʼaˬ hpawˇ chi hpawˇ taˆ-e leh, Hkri‸ yaˇ teˇ hpaˍ ve deh kuiˬleh ha‸ ve venˇ hta‸ hoˆ taˍ ve yoˬ. Oˇ htaˇ, mvuhˇ naw ma lo aˬ miˍ ce la leh yawˇ hui hta‸ to‸ baˬ ve yoˬ. 10Yawˇ hui hta‸ heˍ yuˬ beˬ yuˬ ve neˇhaiˬ hta‸ htawˇ, aˬ miˍ leh ma‸ shiˉ gʼuiˬ po awˬ hkʼaw lo baˬ keu ve yoˬ. Oˇ kaˬ lo haiˬ ve to nuˇ to shaˆ leh maˇ heˆ heˆ ve tcuh kaˍ paˍ chehˇ taˍ ve yoˬ. Yawˇ hui lehˬ, co co taiˍ taiˍ tanˇ hkuinˇ tanˇ vanˇ fawˉ ve mehˍ ve hta‸ gʼa hkanˍ tuˬ yoˬ.

Hpuˉ-ehˍ ve kʼaw jaw lonˉ awˬ gʼuˇ suhˍ lo suhˉ jehˬ ve

11Oˇ ve awˬ hkʼaw‸ nawˉ, hpuˉ-ehˍ ve kʼaw jaw lonˉ hta‸ leh kʼaw jaw oˇ ve awˬ hkʼoˆ lo mui shehˍ hpaˇ hta‸ ngaˬ gʼa mawˬ ve yoˬ. Miˬguiˬ leh mvuhˇ naw ma lehˬ, yawˇ mehˆ gʼuˇ suhˍ lo hpaw-e leh, miˬguiˬ leh mvuhˇ naw ma awˬ pon chehˇ kuiˬ maˇ kʼaw‸ cawˬ. 12Suh taˍ ve chaw uiˍ chaw i hkʼa peu-eˬ kʼaw jaw oˇ ve awˬ gʼuˇ suhˍ lo huˉ chehˇ taˍ ve hta‸ ngaˬ gʼa mawˬ ve yoˬ. Oˇ htaˇ, li‸ teˇ hpaˍ hta‸ hpeu‸ taˍ ve yoˬ. Co ti‸ ha ti‸ li‸ teˇ kʼoˆ hta‸ htawˇ hpeu‸ taˍ ve yoˬ. Suh peuˬ ve chaw hui te taˍ ve kanˉ teˇ hpaˍ li‸ awˬ hkʼaw lo bvuh‸ taˍ ve hkʼe, li‸ oˇ ve teˇ hpaˍ hta‸ cuˇ leh yawˇ hui hta‸ suhˉ jehˬ ve yoˬ. 13Laˇ tsuhˇ gʼuiˬ lehˬ, yawˇ awˬ hkʼaw lo cawˬ ve suh peuˬ ve chaw teˇ hpaˍ hta‸ chiˇ a‸ piˇ ve yoˬ. Suh ve teˇ ceuˬ leh Suh mvuhˇmiˬ htawˇ, yawˇ hui awˬ hkʼaw lo cawˬ ve suh peuˬ ve chaw hui hta‸ chiˇ a‸ piˇ ve yoˬ. Chaw teˇ gʼaˇ le le, a shu yawˇ te taˍ ve hkʼe suhˉ jehˬ ve hta‸ gʼa hkanˍ ve yoˬ. 14Oˇ htaˇ, Suh ve teˇ ceuˬ leh Suh mvuhˇmiˬ hta‸ aˬ miˍ gʼuiˬ po awˬ hkʼaw lo baˬ keu ve yoˬ. Aˬ miˍ gʼuiˬ po oˇ ve lehˬ, nyiˇ pawˆ teˇ pawˆ suh ve teˇ ceuˬ hpeh‸ ve yoˬ. 15Co ti‸ ha ti‸ li‸ awˬ hkʼaw lo awˬ meh maˇ cawˬ ve chaw hkʼaˬ ve teˇ gʼaˇ hta‸ maˇ kʼoˆ, aˬ miˍ gʼuiˬ po awˬ hkʼaw lo baˬ keu ve yoˬ.

Currently Selected:

Hpeu‸maˍ ve li‸ 20: LHBE

Highlight

Copy

Compare